Drei La Eloine e Hna Troa Sine Pala Hi La Itre Icasikeu!
1 Nyimutre catre la itre macatre ne wathebone ngöne la itre götrane ahië ne Erop ahië, tro la itre trejine me easë a hane kuca la itre icasikeu koi nöjei atr. Drei kö la madrine i angatr, ngöne la kola nue angatre troa hane icasikeu!
2 Hnene la ketre qatre thup, atre thupëne la sirkoskripsio hna iwai ngöne la ketre ekalesia ne la itre nöje cili, matre hnei nyidrëti hna cinyihane ka hape: “Ngöne la jidri ne drai menu, eni ju petre hi a troa nyiqaane la wiike ne iwai kowe la ekalesia, ene pe ngazo ju hi la nyine akeukawane la uma. Ame e tröne la uma, atraqatre catre pi hë la hnötr matre kola catre la tim kösë wene galaas, nge kola traqa koi 5° C la elepanyine e hnine la uma. Kola hetrëne hnene la itre trejine la itre ikotre ne hnötr, me atu nyinawa, me liine la itre iga, me petrë ibone, me hna buutr. Jole koi angatre troa xome la itre xötre hnine la Tusi Hmitrötr, pine laka, thatreine kö troa fe la itre götrane la tus. Eni a cile thaa enije ngöne la ita ne cainöj memine la hnaheetreng, nge eni a troa meci hnei hnötr, nge ame la eni a ithahnata, ceitune me hajingene eë lo so a lö pi qa ngöne la qeng. Ngo eni a hai laka, pë pi kö hnepe trenge ewekë ne nyiulil hnenge hna drenge thene la itre trejin. Angatre asë hi a qaja ka hape, atraqatre la madrine nge sheminge lolo e troa sine la icasikeu!” Paatre kö thene la itre trejine la mekune kowe la itre trejine cili, troa triane la icasikeu!
3 Hapeu, Eje Fe Kö The Së La Mekune Cili? Madrine kö së laka, kola nue së troa hane sine la itre icasikeu ngöne la nöjei wiik? Maine thaa wangatrune pena ha së itre ej, ngacama ijije catre tro së a hane sine itre ej? Eje hi laka, ma thaa ewekë ka hmaloi kö la troa sine pala hi la itre icasikeu, maine jë troa traqa koi së ngöne la itre xaa ijin, la itre nyipi kepine matre thaa ijiji së pë hë troa hane sine la itre icasikeu. Ngo thaa tro pi kö së a thëthëhmine laka, nyimutre the së la itre trejine ka nyipi ewekëne la itre icasikeu, me sine pala hi itre ej, ngacama qatre catre hë angatr, maine hna tithe pena hnene la ketre meci ka tru, maine sine wezipo pena, maine kola huliwane la huliwa ka catr, me itre xaa hnëqa ju kö ka tru. Drei la itre tulu ka loi, nyine tro së a xötrethenge!—Wange ju la Luka 2:37.
4 Loi e tro pala hi së a majemine troa catre fë la nyipi hmi, hnene la troa sine la nöjei icasikeu asë ne la ekalesia i Keresiano, a qa ju hi ngöne la icasikeu ne la hnepe gurupe ngöne la Ini Tus, uti hë ngöne la itre Kovasio ka tru. Pine nemene matre, nyipi ewekë catre tro së a sine la itre icasikeu cili? Pine laka, hna amekötine lai koi së hnei Akötresie, ene la tro së a ce icasikeu. Ngo hetrenyi pala kö la itre xaa kepine ka sisitria. Nyipi ewekë catre koi së asë la itre manathithi hne së hna kapa jëne la ini qa thei Akötresie, memine la ixatua ne la uati hmitrötre i Nyidrë hna hamëne koi së ngöne la itre ijine icasikeu. (Mat. 18:20) Easë a ithuecatrekeu ngöne la easë a porotrike memine la itre atr ka ce thawa me easë la lapaune ka sisitria.—Heb. 10:24, 25.
5 Ame ngöne lo ijine kola ketre pengöne me lolo hnei Iesu, hna qaja hnei Peteru ka hape, “Joxu, jiniati nyishëti e jotëtia munëti e celë.” (Luka 9:33) Loi e hna tune fe la aqane wange së la nöjei icasikeu i Keresiano asë. Ketre, drei kö la elolone troa sine pala hi la itre icasikeu!