Loi e Tro Asë Hi Së a ‘Kapa La Wesi Ula Cememine La Hni Ka Ajan’!
1 Nyimutre catre la itre atr ka inine la Tusi Hmitrötre memine la itretre anyipici Iehova, hetre itre milio la etrun. Nyipi ewekë troa mele thenge la itre hna amekötin, me ‘kapa la wesi ula cememine la hni ka ajan,’ matre troa hane hetrenyi fe la mele ka thaa ase palua kö; ewekë lai hna kuca hnene la 3 000 lao atr ka ietra me xome la bapataiso, ngöne lo drai Penetekos macatre 33 M.K. (Ite Huliwa 2:41) Nemene la enyipiewekëne la hnëqa cili koi së enehila?
2 Nyipi ewekë tro së a xatuane la itre hnainine troa catre hmi koi Iehova. (1 Tim. 4:7-10) Celë hi matre kola qaja ngöne la sinecetrone la Huliwa ne Baselaia ne juun 1996, paragarafe 20, ka hape: “Ngöne la kola etid, wange ju la itre hnepe götrane ka ijije troa acatrene la madrine ne la hnainine kowe la itre thiina i Iehova. Ketre, loi e tro fe epuni a hane fe amamane la ejuine la ihnimi epuni koi Akötresie. Xatuane jë fe la hnainin, matre atreine troa keukawahnine la aqane ithahnata i angeice nge atreine angeice mele nyipici koi Iehova.”
3 Ketre Jole Hne Së Hna Cile Kow: Nyimutre la itre atr hna ajojezine hnene la hmi ka thoi, angatre a xome hi la itre hnepe hawa, me hnöthe la aqane kuca angatre la itre huliwa ne la hmi; ngo pë pi kö caa ajane e kuhu hni, troa saze la thiina. (2 Tim. 3:5) Ame la jole hne së hna qëmeke kow, ke, ene la troa xatuane la itre hnainine troa trotrohnine ka hape, ame la nyipi hmi, thaa ene hmekuje kö la troa drenge la wesi ula i Akötresie, ngo hetre ewekë kö ka sisistria nyine troa kuca. Nyipi ewekë tro angatre a trongëne ngöne la mele i angatre la itre hnei angatre hna inin. (Iako. 1:22-25) Maine hetrenyi ngöne la thiina i angatre la ketre ewekë ka thaa meköti kö xajawai Akötresie, haawe, nyipi ewekë tro angatre a pane ipië me thele troa “ietra” me kuca la meköti matre kepe angatre hnei Nyidrë. (Ite Huliwa 3:19) Maine angatre a ajane troa hetrenyi la mele ka thaa ase palua kö, loi e tro angatre a ‘isa catre’ me cile huti ngöne la nyipici.—Luka 13:24, 25.
4 Ame ngöne la easë a ce ithahnatane memine la hnainine la itre pengöne aqane kuci ngazo enehila, easë a hnyingëne ju fe koi angeice la mekune i angeic, memine la hna troa kuca hnei angeic, e hetrenyi thei angeice la ketre ewekë nyine troa saze ngöne la aqane mele i angeic. Amamane jë koi angeice la enyipiewekëne la organizasio ka inine la nyipici, nge xatua angeice jë troa sine pala hi la itre icasikeu ne la ekalesia.—Heb. 10:25.
5 Loi e tro së a thele troa amë e kuhu hni ne la hnainin, la ini hne së hna hamën. Tro ha hetrenyi the së la madrin, pine laka, easë a xatuane la itre xaa atr troa kapa cememine la hni ka ajan, la wesi ula i Akötresie, me xome la bapataiso!—1 Thes. 2:13.