Loi e Troa Ketr La Hni Ne La Hnainin?
1 Ajane kö epuni e tro la hnainin’a trongëne la itre hnei angeice hna atre? Loi e tro angeic’a kuca tune lai matre hetre thangane la itre hna ini. Ngo tro epuni a pane ketr la hni angeice matre hetre trenge catre i angeice ngöne la götrane cili. Ngöne la drai ne Penetekosi ekö, ngöne la macatre 33 thupei Iesu Keriso (I.K.), ke, hnene la cainöje i Peteru aposetolo hna “thine la hni” ne la ala 3 000 lao atr, itretre “kapa la trenge ewekë i angeic”, nge hna bapataiso angatre ngöne la drai cili. (Ite hul. 2:37, 41) Nemene la aqane kuca matre troa ketr la hni ne la hnainin?
2 Loi e troa hnëkë hnyawa: The thelejëne kö troa atrune la hna goeëne memine la hnainin, nge co pë hë la ijine troa ce ithahnataane hnyawan. Pane sipu hnëkëne jë kö epuni la itre mekune nyine troa amama’atrune koi angeic, nge loi e pane trotrohnine hnyawa epuni la hna qaja hnei Tusi Hmitrötr. Ketre, troa thele la mekune ne la hnainine matre troa nue la ixatua ka ijiji angeic. Maine atre hnyawa epuni la hnainin, ke, ketre ewekë ka sisitria catre matre tro epuni a hamëne la itre trenge ithahnata ka ihmeku memine la itre mekune i angeic.
3 Nyitipune jë la aqane ini Iesu: Hnei Iesu hna qaja ekö la itre ceitun, matre tha jole kö troa trotrohnin, nge matre tro la itretre drei nyidrë a dreng’atrune e kuhu hni angatre la enyipicine me aliene la itre hna qaja. (Luka 10:29-37) Eje mina fe, tro epuni a xome la itre ceitune ka tha jole kö qa ngöne la itre ewekë hne së hna melëne e nöjei drai, matre troa hamën, thenge la aqane mele ne la hnainin, celëhi ini lai ka sisitria ka ijije troa ketr la hni angeic.
4 Hnei Iesu hna amamane palahi ekö laka ame la ketre aqane ka sisitria matre troa ketr la hni ne la itre hnainin, ke, ene la troa hamëne la itre hnying. (Luka 10:36) Ngo the mekune kö ka hape, pexeje hë lai e maine ase hë angeice e hmekuje hi la tusi matre troa sa la itre hnying. Loi e troa atreine ujëne la itre hnying, matre troa eatrongë angeice kowe la mekune hna troa traqa kow, lo ka tha mama pala kö koi angeic. Tro la aqane kuca cili a xatuane la hnainine troa atreine öhne la itre mekun. Loi e troa hamëne la hnyinge ka thele la sipu mekune i angeic. Celëhi matre ijije tro epuni a wangatrehmekune la itre götrane ka jole koi angeic, ene pe atreine epuni e cili troa hamë ixatua ka ijij.
5 Maine tha tru kö la thangane la etid, ke, nyipi ewekë troa atre la kepin, kola hape troa kuca palahi la etid, nge tro fe kö a lapa traqa troa tuë angeice e ketre drai kö. Hapeu, hetre kepine kö matre angeic’a nango hunyinyi troa kuca thenge la itre hna inin? Hetre ketre ewekë kö hnei angeice hna tha trotrohnin? Nanazije kö angeice troa ujëne la itre xaa thina i angeic? Maine ‘luelue la hnainine ngöne la lue mekun’, amamai angeice jë ka hape poizine la aqane ujë cili. 1 Ite Joxu 18:21
6 Hna atre hmekune hnei Paulo aposetolo ekö laka, gojenyine mele la troa inine kowe la ketre atr la itre nyipici qa hnine la Tusi Hmitrötr, nge hnei Nyidrë hna ahnithe kowe la itre keresiano laka loi e tro angatr’a ‘hmekëne la aqane ini angatr.’ (1 Tim. 4:16) Ame la itre atr ka inine la Tusi Hmitrötre me epun, ke, nyipi ewekë tro angatr’a atre laka, tha tro kö a inine hmekuje hi la itre ewekë ka traqa ekö, ceitune me ifejicatre. Ngo loi fe tro angatr’a atrehmekunyi Iehova hnyawa me Iesu, matre troa atrune me akeukawane la ihnimi angatre me nyidro. Nge maine tro angatr’a kuca tune lai, ke, kola hape angatr’a amamane la lapaune i angatre hnei huliwa. (Iakobo 2:17, 21, 22) Nge e ketrë hë la hni ne la hnainin, ke, hetre trenge catre i angeice troa nyenyapëne la gojenyi ne atruni Iehova, nge jëne mele fe koi angeic. — Ite Edomë 2:20-22