Loi e Tro Sa Hnëkë Hnyawa Goï Troa Hamë Ini
1. Pine nemen matre loi e tro sa thele troa aciane la hni ne ole e kuhu hni ne la hnainin, ngöne la easa ini Tusi Hmitrötr me angeic?
1 Ame ngöne la easa xomiujine la ketre etid, nyipi ewekë tro sa hnëkë hnyawa matre troa hetre hni ne ajane la hnainin troa nyihlue i Iehova. Tro hë sa kepe thangane ka loi, e hne së hna xatuane la hnainin troa hetre hni ne ole kowe la itre ini hna kapa qa hnine la Tusi Hmitrötr. Celë hi lai ka troa uku angeic. (Deu. 6:5; Ite edomë 4:23; 1 Kor. 9:26) Tune kaa la aqane tro sa ujë tune lai?
2. Nemene la enyipiewekëne la thithi ngöne la easa hnëkëne la ini hna troa hamëne kowe la hnainin?
2 Sipo Ixatua Jë Koi Iehova Ngöne La Kola Hnëkë Troa Hamë Ini: Pine laka Iehova la ka aciane la itine nyipici e kuhu hni ne la hnainin, haawe, loi e tro sa thithi thatraqane la hnainin memine la itre aja i angeic, qëmekene troa hnëkëne la ini hna troa hamëne koi angeic. (1 Kor. 3:6; Iako. 1:5) Ketre, ijije tro la thithi cili a xatua së troa atre hnyawa la aqane tro sa atiqane la hni angeice hnene “la trotrohnine” ne la aja i Iehova.—Kol. 1:9, 10.
3. Tro sa wanga atrune tune kaa la pengöne la hnainin ngöne la easa hnëkë?
3 Wanga Atrune Jë La Pengöne La Hnainin: Atrehmekune hi Iesu laka, nyipi ewekë troa wanga atrune la pengöne la itre ka drei nyidrë, matre troa hetre thangane la ini hnei nyidrë hna troa hamën. Alua qaja Iesu la hnyinge celë: “Nemene la qânge troa kuca mate troa hetenyi ni la mele ka tha ase palua kö?” Ame ngöne la nyidrëti a sa, tre, hnei nyidrëti pala hi hna xome la ketre pengöne hna ithanata. (Luka 10:25-28; 18:18-20) Loi e tro mina fe sa wanga atrune hnyawa la pengöne la hnainin ngöne la easa hnëkë. Nemene la itre xötre hne së hna troa ce e me angeic? Nemene la etrune la itre ithuemacany hne së hna troa ce ithanatan? Ame ngöne la ini, nemene la itre mekun ka jole troa trotrohnin maine kapa pena hnene la hnainin? Maine tro sa canga mekune la itre xaa hnying ka ijij troa amejëne hnene la hnainin, haawe, tro hë sa maca hnyawa troa sa koi angeic.
4. Nemene la ka nyipi ewekë göi troa hnëkë hnyawa?
4 Wange Hmaca Jë La Itre Mekun: Ngacama hne së hë ekö hna inine la itre mekun ne la itus, ngo easë petre hi a troa inine lai memine la hnainin. Maine easa thele troa ketr la hni angeic, haawe, nyipi ewekë troa hnëkëne hnyawa la ini hne së hna troa hamën. Kolo lai a hape, troa trongëne la ithuecatre hne së hna hamëne kowe la hnainin. Loi e tro sa wange hmaca la itre mekun, ene mina fe la itre xötr, memine la pengöne la hnainin, nge maine jë ijije fe troa sija la itre mekune ka tru.—Rom. 2:21, 22.
5. Tro sa nyitipu Iehova tune kaa?
5 Iehova a wanga atrune la aqane isa kökötre ne la itre hnainin. (2 Pet. 3:9) Celë hi matre maine tro sa xomi ijine hnyawa troa hnëkëne la itre ini hna troa isa hamëne kowe la itre hnainin, haawe, easë mina fe lai a hane amamane laka, caasi hi la aja së me Iehova.