Troa Amë Hnyawa

Aqane Troa Eatrongëne La Itre Etid Ka Kökötr

Kola ce xeen hnine la sinecetrone celë la itre mekune kii hna xome qa hnine lo itre hna cinyihane göne la aqane troa eatrongëne la itre etid ka kökötr, hnine lo itre Huliwa Ne Baselaia. Loi e tro asë hi së a thupën la sinecetrone celë me wang ej ngöne la kola xomiujine la itre etid. Ketre, troa hane xome fe la itre mekune cili ngöne la ijine kola icasikeu göi cainöje trootro, nge troa nyitrepene hnene itre ej lo itre cainöj hna troa cile fë trongën hnene la qatre thup ka wange trongën la itre Ini Tus.

Paatr 1: Nemene La Aliene La Hna Hape Etid Ne La Tusi Hmitrötr?

Maine epuni a traqa lapaa kowe la ketre atr me ithanatane pala hi la Tusi Hmitrötr me angeic, jëne la ketre itus, ngacama xoxopatre hi, ngo epuni hi lai a etid me angeic. Loi e troa e la ketre etid ngöne la rapor e maine hna alua kuca ha la etid thupene la hna xötrei amamane la aqane kuca kowe lai atr, nge ketre kola mama koi së laka thaa tro kö a hmaca e cili la etid.​—km 7/04 g. 1.

Itre Itus Hna Amekötin Troa Xom

◼ Nemene La Hnei Akötresieti Hna Thele The Së?

◼ Atrehmekune Ka Eatrongë Nyipunie Kowe La Mele Ka Pë Pun

◼ Thili Jë Kowe La Akötresie Ka Caas

◼ Maine jë troa hane xome la boroshür Ijije Fe Tro Nyipunie A Ce Sinee Me Akötresie! matre troa etid memine la itre atr ka thaa qa kö hna hane ini maine ka thatreine e tus.

Paatr 2: Troa Hnëkën Troa Xomiujin La Etid

Nyipi ewekë catr tro sa thele troa eë hnyawa la ithuemacany matre troa ketr la hni ne la hnainin. Celë hi matre loi e tro sa mekune la hnainin ngöne la easë a hnëkë hnyawa qëmekene troa etid.​—km 8/04 g. 1.

Aqane Troa Hnëkë:

◼ Pane acaa goeëne jë la taan, me taan ka co, me itre nyine ixatua ka mama ne la meken maine ini.

◼ Atrehmekune jë la itre mekune ka sa la itre hnying hna fejan, me makën hmekuje la itre hnëewekë me xötrehnëewekë ka tru.

◼ Axeciëne jë la itre xötr ne la Tusi Hmitrötr nyine troa e ngöne la ijine etid. Cinyihane ju la itre xaa hnepe mekun ezine la itre xötr hnine la itus hna ini ngön.

◼ Hnëkëne jë me ce wange hmaca la itre mekune ka tru.

Loi e Troa Hamëne La Ini Hmekune La Itre Nyine Troa Kuca Hnene La Hnainin

◼ Thithi fë jë la hnainin memine la itre aja i angeic.

◼ Canga mekune jë la itre mekun hna thatreine hnene la hnainin troa trotrohnin maine kapa pena.

◼ Drei la ketre mekun: Nemene la nyine tro angeic a trotrohnin maine nyine troa saze matre troa kökötr ngöne la ua? Tro ni a ketr tune kaa la hni angeic?

◼ Thenge la hna ajan, hnëkëne jë la ketre ceitun, maine qejepengöne la ketre mekun, maine troa xome la itre hnying matre troa xatuan la hnainin troa trotrohnine hnyawa la aliene la ketre mekun maine ketre xötr.

Paatr 3: Aqane Troa Xome Hnyawa La Itre Xötr Ne La Tusi Hmitrötr

Ame la kepin matre easë a etid memine la itre atr, tre matre troa “ini” angatr, me xatua angatr troa trotrohnin me kapa la itre ini ne la Wesi Ula i Akötresie me trongëne itre ej ngöne la mele i angatr. (Mat. 28⁠:​19, 20; 1 Thes. 2⁠:13) Qa ngöne lai, loi e troa eköthe la etid hune la itre xötr ne la Tusi Hmitrötr.​—km 11/04 g. 4.

Hamë Ini Jë Jëne La Wesi Ula i Akötresie

◼ Amamane jë kowe la hnainin la aqane tro angeic a ketre xom la itre xötr hnine la Tusi Hmitrötre i angeic.

◼ Wange ju me ithanatan la itre xötr ne la Tusi Hmitrötr ka nyitrepene la itre ini së.

◼ Xome jë la itre hnying. The qeje pengöne kö la itre xötr, ngo nue angeice pi troa qaja la alien.

◼ Loi e troa hmaloi la aqane hamë ini. The thele kö troa qeje pengöne la nöjei götrane ne la xötr. Xome ju hi la ka ijij matre troa ce ithanatane lai mekun.

◼ Thele ini jë qa ngön. Xatuane jë la hnainin troa goeën la aqane troa ketre sipu trongëne hnei angeic la itre xötr.

Paatr 4: Troa Inin La Itre Hnainin Troa Hnëkë

Tro ha canga kökötr ngöne la götrane la ua la hnainin ka pane e la ini hna troa ce ithanatan, me sija la itre mekun ka sa la itre hnying, me mekune la aqane troa ketre qaja itre ej. Qa ngöne lai, e mama ha ka hape, kola ajan troa sisedrën la etid hnene la atr, ce hnëkëne ju me angeic la ini matre troa amamane la aqane troa hnëkë. Ka lolo catr e troa ce hnëkëne la ketre mekene itus maine ketre ini pena memine la itre atr hne së hna etidi kow.​—km 12/04 g. 1.

Troa Sija Me Amë La Itre Mekun Ezin

◼ Qaja jë la aqane troa xome la itre mekun ka sa hmekune la itre hnying hna fejane hë.

◼ Amamane jë kowe la hnainin la itus hnei epuni hna sija hmekuje hi e hnin, la itre hnëewekë maine itre xötrehnëewekë.

◼ Xatua angeice jë troa atrehmekune laka, ame asë hi la itre xötr hna hamën hnine la itus, tre itre eje a isa sajuën la ketre mekun hnine la paragaraf, nge amamai angeice jë la aqane troa cinyihan ezin la itre hnepe mekun hnine la itusi hna etidi ngön.

Goeëne Ju Me Wange Hmaca

◼ Amamane jë kowe lai hnainin la aqane troa wange la taan ka tru, me itre taan ka co, me itre ceitun qëmekene troa hnëkëne la etid.

◼ Xatuane jë la hnainin troa wange hmaca la itre mekune ka tru e fenesi hë hnëkë.

Paatr 5: Troa Atrehmekun La Etrun La Itre Mekun Nyine Troa Ce Wang

Ame la etrune la itre mekun hna troa ce wang, tre troa xome itre ej thenge la hna atrein memine la aqane mele ne la ka hamë ini memine la hnainin.​—km 1/05 g. 1.

Troa Acatren La Lapaun

◼ Thaa tro kö a kuca nyimenyimën la itus matre ase pi, loi pe troa trotrohnine hnyawa hnene la hnainin.

◼ Xome jë la traeme ka ijij matre troa xatuan la hnainin troa trotrohnin me kapa la hnei angeic hna inin.

◼ Xome jë fe la traeme ka ijij matre troa ce wang la itre xötr kii ka nyitrepene la itre ini.

Loi e Thaa Tro Kö a Ananyin La Topik Hna Ithanatan

◼ Maine kola ajan hnene la ketre hnainin troa ithanatan la ketre mekune e tröne la topik hna ce wang, maine jë tro së a ce ithanatane ej thupene la hna etid.

◼ The tru menu kö la hna ithanata ngöne la ijine etid.

Eje hi lai laka ame ngöne la itre xaa ijin, ijije hi tro sa qaja la ketre mekun maine ketre ewekë pena hna melën hnene la itre xaa atr, ngo thaa tro pi kö a nyimutre maine qea menu, wanga tro pena a thunge la hnainin troa kapa la atrehmekune ne la itre ini qa hnine la Tusi Hmitrötr.

Paatr 6: Ngöne La Kola Amejën La Ketre Hnying Hnene La Hnainin

E cile huti hë la etid ne la ketre atr, ka lolo kö e troa wangatrune trongëne la itre ini qa hnine la Tusi Hmitrötr, hune la troa sesë nyimenyim qa ngöne la ketre topik koi ketre. Kolo lai a xatuan la hnainin troa nyitrepene hnyawa la nyipi atrehmekun, nge troa kökötr ngöne la götrane la ua.​—km 2/05 g. 6.

Loi e Troa Atreine Waiewekë

◼ Ijije troa canga sa la itre hnying ka itretrengekeu memine la etid.

◼ Ame koi itre xaa hnying e tröne la etid maine nyine troa pane thele mekune ngön, tre, tro pë hë a ce wange ngöne la ketre ijin. Ma ka loi e troa cinyihane la itre hnyinge cili.

◼ Maine nango jole kowe la hnainin troa kapa la ketre ini, wange ju la itre xaa itus ka ithanatane hnyawa lai topike cili.

◼ Maine thaa xecie hnyawa kö kowe la hnainin la ini hna hamën, pane nue pi troa ithanatane lai ngöne la ketre ijin, nge sisedrëne jë la etid.

Loi e Troa Qahmihmi

◼ Maine thatre kö epuni la mekune ka sa la ketre hnying, the hamëne menune kö la ketre mekun.

◼ Inine trongëne jë la hnainin la aqane troa thele mekun.

Paatr 7: Troa Thith Ngöne La Kola Etid

Nyipi ewekë kowe la itre hnainin la manathith qaathei Iehova, maine angatr a ajan troa kökötr ngöne la götrane la ua. Qa ngöne lai, nyipi ewekë troa nyiqaan me nyipun la etid hnene la thith.​—km 3/05 g. 4.

Troa Nyiqaane Tune Kaa Hnene La Thith

◼ Ame koi itre ka hmi, loi e troa canga nyiqaane thith ngöne lo pane etid.

◼ Ame itre xan, nyipi ewekë troa atrehmekune la ijine ka ijij troa nyiqaane thith.

◼ Troa xome la Salamo 25:​4, 5 me 1 Ioane 5:​14 matre troa qeje pengöne la kepin matre kola thith.

◼ Troa xome la Ioane 15⁠:16 matre troa amamane laka, loi e troa thithi koi Iehova jëne Iesu Keriso.

Nemene La Nyine Troa Qaja Ngöne La Itre Thith

◼ Ka loi troa atrunyi Iehova lo Qaane la ini.

◼ Amamane jë laka easë a wanga atrune la hnainin.

◼ Amamane jë la hni ne ole së kowe la organizasio i Iehova.

◼ Sipo Iehova jë la troa amanathithin la trenge catr hna kuca hnene la hnainin troa trongën la itre hnei angeic hna inin.

Paatr 8: Troa Eatrongën La Itre Hnainin Kowe La Organizasio

Ame la hne së hna ajan troa traqa kow ngöne la kola kuca la itre etid, tre, ene la troa xatuan la itre hnainin troa hane itre atrene la ekalesia i Keresiano, ngo thaa tro hmekuje kö a kapa la itre ini. Xome jë la itre hnepe menetr ngöne la nöjei wiik matre troa amexeje la ketre mekune ngöne la pengöne la organizasio i Iehova.​—km 4/05 g. 8.

Itre Icasikeu Ne La Ekalesia

◼ Qeje pengöne jë la nöjei icasikeu ne la ekalesia. Qaane la kola nyiqaane etid, hë angatre jë troa hane sine itre ej.

◼ Ce thawa jë la itre mekune ka tru hna ithanatane ngöne la itre ijine icasikeu.

◼ Eköthe jë thei angatr la madrine troa sin la Drai Ne Amekunën, me itre asabele, me ijine iwai ne la qatre thup ka wange trongën la itre ekalesia.

◼ Xome jë la itre iatr hnine la itre itusi së matre troa xatua angatr troa trotrohnine la hna nyi hatren hnene itre ej.

◼ Xatua angatre jë tro e la boroshür Les Témoins de Jéhovah : Qui sont–ils ? Quelles sont leurs croyances ?

Xome Jë La Itre Video Troa Eköth La Hni Ne Ole

◼ Les Témoins de Jéhovah : un nom, une organisation

◼ Toute la communauté des frères

◼ Unis grâce à l’enseignement divin

◼ Jusqu’aux extrémités de la terre

Paatr 9: Hnëkëne Jë Së La Itre Hnainin Troa Cainöj Ngöne La Nöjei Ijin

Pine laka, kolo ha nyiqaane troa lapaun hnene la itre hnainin kowe la itre hnei angatr hna inin, ene pe kola upi angatr troa hane qaja kowe la itre xan.​—km 5/05 g. 1.

Xatua Angatre Jë Troa Anyipicin

◼ Hetrenyi kö la itre enehmu me itre atren la fami hnei angeic hna troa hane hën matre troa sine la etid?

◼ Hetrenyi kö la itre sine huliwa i angatr, me itre sine ce ini, maine itre hna atre pena, ka hane pi drenge la maca ka loi?

Ini Angatre Jë Troa Hane Thawa La Itre Ini i Angatr

◼ Ame ngöne la kola ithanatan la itre mekune hna iëne hë ngöne la ijine etid, nge hnyinge jë kowe la hnainin, ka hape, “Tune kaa la aqane tro epuni a xome la Tusi Hmitrötr matre troa qeje pengöne la nyipici celë kowe la hnepe lapa i epun?”

◼ Xatuane jë la hnainin troa trotrohnine la enyipiewekën la troa metrötr me menyik ngöne la kola qeje Akötresie memine la itre aja i Nyidrë kowe la itre xaa atr.

◼ Ijije hi tro la itre hnainin a xome la boroshür Les Témoins de Jéhovah : Qui sont-ils ? Quelles sont leurs croyances ? matre troa xatuan la itre sinee me itre atrene la fami troa trotrohnine la itre trepene ini me itre huliwa qa hnine la Tusi Hmitrötr.

Paatr 10: Inine Jë La Itre Hnainin Troa Cainöje Ngöne Itre Hnalapa Trootro

E mama ha kowe la itre qatre thup laka ijije hë tro la ketre hnainin a hane cainöj, ma tro fe hë angeic a hane nyiqaane ce cainöj memine la ekalesia.​—km 6/05 g. 1.

Loi e Tro Nyidroti a Ce Hnëkë

◼ Amamane jë kowe la ka xötrei cainöje la hnë tro angeic a thele la itre aqane nyiqaane ithanata.

◼ Xatua angeice jë troa iëne la ketre aqane nyiqaane ithanata ka loi thatraqane la teritroare i epun.

◼ Xatuane angeice jë troa cainöje fë la Tusi Hmitrötr ngöne la kola cainöje trootro.

◼ Ce amacane jë me angeic. Amamane jë la aqane troa sa hnyawa la itre hnying hna majemine xom hnene la itre atr.

Troa Ce Cainöj

◼ Tro la hnainin a pane goeën la aqane tro fë epuni lo ketre aqane nyiqaane ithanata hnei epon hna ce hnëkëne hë.

◼ Wanga atrune ju la thiina me itre hna atrein hnene la hnainin. Maine jë ka loi e tro hi angeic a kuca la ketre hnepe götrane ne la aqane nyiqaane ithanata.

◼ Xatuane jë la ka xötrei cainöj troa eköthe amë la ketre porogaram matre tro angeic a catre cainöje pala hi.

Paatr 11: Xatuane Jë La Itre Hnainin Troa Iwai Hmaca

Troa hnëkë troa iwai hmaca ngöne la kola xötrei iöhny. Xatuane jë la hnainin troa wanga atrune lo itre atr hnei angeic hna ithanata memin. Ini angeice jë troa hane nue angatr troa qeje mekun, me drenge me xome la itre ewekë hna hnehengazon hnei angatr.​—km 7/05 g. 1.

Troa Hnëkë Troa Iwai Hmaca

◼ Wange hmaca ju lo itre hna ithanatan ngöne la xötrei, nge xatuane jë la hnainin troa iën la caa topik ka troa upe ahlën la aja ne la atr.

◼ Hnëkëne jë la ketre aqane tro fë ka xoxopatr, ka ihmeku memine la ketre xötr ne la Tusi Hmitrötr e hnine la paragaraf ne la ketre itus.

◼ Hnëkëne jë la ketre hnying hna troa amë pe ngöne la kola nyipune la ithanata.

Catre Pi Ixatuane La Aja

◼ Xatuane jë la hnainin troa canga wange asë hmaca lo itre atr ka drei angeic.

◼ Xatuane jë la hnainin troa wang la enyipiewekën la troa catre thel troa ketr lo itre atr ka papaatr.

◼ Amamane jë kowe la ka xötrei cainöj la aqane troa isa pui, me xatua angeic troa wanga atrune la enyipiewekën troa aejën lo hna isa pui.

Paatr 12: Xatuane Jë La Itre Hnainin Troa Nyiqaane Me Xomiujine La Itre Etid

Nyipi ewekë fe tro epuni a xome la tulu i Iesu ngöne la epuni a cainöj. Maine troa öhnyi epuni hnene la hnainin e amamai tulu troa cainöj, tro hë angeic a trotrohnine laka troa hetre etid e hna catre iwai hmaca.​—km 8/05 g. 1.

Aqane Troa Thele Troa Etid

◼ Qaja jë kowe la hnainin laka thaa nyipi ewekë kö troa qeje pengöne menune pala ha la aqane etid.

◼ Ame itre xaa ijin, ka loi hi troa amamane la aqane troa etid, hnene la hna kuca la caas maine lue paragaraf ne la itus hna ini ngön.

◼ Wange hmaca ju me amexeje hmaca la caa mekun nyine ixatua göi aqane troa nyiqaane etid.​—km 8/05 g. 8; km 1/02 g. 6.

Inine Jë La Itre Hnainin Troa Itretre Ini

◼ Xatuane jë la itre hnainin troa hane saen kowe la Ini Ne Cainöje Trootro Qaathei Akötresie.

◼ Wange ju matre tro la ka xötrei cainöj a ce tro me epun kowe la itre xaa etid, nge e cili tro angeic a hane nango hamë ini fe.