Atreine Hi Tro Angatre a Öhne Ka Hape, Ketre Pengö Së Kö
1 Ame ngöne lo macatre hnapan, hna e la 300 000 lao atr ka xötrei hane xome la bapataiso, me hane ce me së troa nyihluei Iehova. Nemene la ewekë hna öhne hnene la itre atr cili thene la Itretre Anyipici Iehova, matre hane jë fe angatre ajane troa itre atrene la organizasio i Akötresie? Pine nemene matre, isapengöne pe kö së hune la itre hmi asë? Hanawange la itre xaa mekune ka sa hnyawa la itre hnyinge celë:
—Easë a mejiune kowe la Tusi Hmitrötr ngo thaa kowe kö la itre mekune i atr: Easë a hmi koi Iehova “ngöne la [ua NW] memine la nyipici,” tune la hna upi së troa kuca hnei Iesu Keriso. Kolo lai a hape, troa nue trije la itre hmi ka thoi me trongëne la Wesi Ula i Akötresie hna cinyihane hnine la Tusi Hmitrötr.—Ioane 4:23, 24; 2 Tim. 3:15-17.
—Thaa easë kö a treqene la itre atr ngo easë a tro koi angatr: Hne së hna kapa la hna amekötine hnei Keriso, ene la troa cainöje me troa inine la itre atr, me xötrethenge la tulu i nyidrë troa thele la itre atr ka hni ka menyik. Easë a thele troa ithahnata me angatre ngöne la itre hnalapa i angatr, me ngöne la itre gojeny, maine ngöne la itre götrane hna troa öhnyi angatre ngön.—Mat. 9:35; 10:11; 28:19, 20; Ite Huliwa 10:42.
—Easë a hamëne gufane la ini qa hnine la Tusi Hmitrötr kowe la nöjei atr asë: Easë a hamëne la itre mo së me nue la trenge catre së troa kuca la itre milio lao hawa thatraqane la huliwa i Akötresie ngöne la nöjei macatre. Thaa ka iwangatrehmekunyi atr kö së; easë a hamëne kowe la nöjei pengöne atr asë la ini qa hnine la Tusi Hmitrötr.—Mat. 10:8; Ite huliwa 10:34, 35; Hna ama. 22:17.
—Hna hnëkë së hnyawa troa xatuane la itre atr ngöne la götrane la ua: Qa ngöne la hne së hna isa inine la Tusi Hmitrötr, me kapa la ini jëne la itre icasikeu ne la ekalesia me itre asabele, me itre kovasio, haawe, easë a kapa la ketre ini qa thei Akötresie, ka tru alamekene catr, nge ka pëkö thupen, kola aijijë së troa thinane la itre xane ngöne la götrane la ua.—Isa. 54:13; 2 Tim. 2:15; 1 Pet. 3:15.
—Easë a wangatrune hnyawa la nyipici, me trongëne eje ngöne la nöjei drai ne mele së: Pine laka, atraqatre la inhimi së koi Akötresie, easë a saze la itre aqane mele së matre troa ihmeku memine la aja i nyidrë. Kola pi ajane la itre atr troa atre la nyipici, qa ngöne laka, angatre a öhne the së la thiina ka hnyipixe ka eje thene la itre nyipi Keresiano.—Kol. 3:9, 10; Ia. 1:22, 25; 1 Ioane 5:3.
—Easë a thele troa ce mele me ce huliwa tingetinge memine la itre xaa atr: Maine tro pala hi së a eëne ngöne la mele së la itre thiina i Akötresie, haawe, tro ha itre eje a xatua së troa thupëne la itre huliwa së me aqane ithahnata së. Easë a “thele la tingeting, me xöte thenge ej” ngöne la aqane ce mele së memine la nöjei atr asë.—1 Pet. 3:10, 11; Efe. 4:1-3.
2 Nyimutre la itre atr ka ajane troa kapa la nyipici, qa ngöne laka, angatre a öhne la itre tulu ka lolo hna hamëne hnene la itre Keresiano hnine la organizasio i Iehova. Epi tro fe la tulu hne së isa ala caasi hna hamën, a hetre thangane ka loi fe, thene la itre atr ka atre së me goeë së.