“Trohemi Së Kowe La Ene i Iehova!”

¹ Hnei Davita hna saqe troa canga drenge la aqane hë celë kola hape: “Trohemi së kowe la ene i Iehova.” (Sal. 122:1) Nge hna traqa itronyi me icasikeu hnene la itre atr ka troa nyi hluene la nyipi Akötresie ngöne la “uma” i Iehova, lo ene i Nyidrë. Celë hi hna munëti ekö hnene la loinöje memine la tingeting. Ame la “uma” i Akötresie enehila, ke, kolo itre Ekalesia ne la itre keresiano ne la fene hnengödrai asë, “ene la ikapane memine la göline la nyipici” (1 Tim. 3:15). Qangöne lai, eje la gojenyine la nöjei ewekë asë hna hnëkëne nyine iamele. Celëhi kepine matre, “tro nöjei nöj’asë a xöte kow’ej” e ajane angatre troa hane kapa epine la itre manathithi hna thingehnaean, e traqa ha la musi ne la Baselaia i Akötresie. — Is. 2:⁠2.

² Hetre 69 000 lao Ekalesia ngöne la 229 lao nöje me itre hnapetine la fen’asë. Nge ngöne la fene hnengödrai asë, ke, hna fe la itre qëhnelö ne la itre Uma ne Baselaia, nge kolo palahi a hë hnene la foa milio nge sin lao itretre catre cainöj, angatr’a hape: “Trohemi! (...) Nge ame la atre ajan, ke, xome gufane jë la timi ne iamele” (Hna Ama. 22:17). Nyimutre la angetre drenge me kapa la hna ewekë celë. Ame itre xan, ke, ase hë ketr la itre wenethëhmi angatr, ngo angatre a mekune laka tha ijiji angatre pala kö troa hane lö kowe la uma i Iehova, me ce tro memine la Ekalesia i keresiano. Eje hi laka, troa kapa la itre “aja ne la ua” e hna ujë kowe la itre hna hnëkëne ngöne la Ekalesia hmekuje hi (Mat. 5:⁠3). Ijine hnëkë la itre drai celë, pine laka easenyi catre hë la pune la musi ne la atr. Tha ijine tro kö a luelue me lapa menu, ke, ka pë thangane lai. Nyipi ewekë tro la itre atr a canga “easenyi koi Akötresie” hnene la troa easenyine la organizasio i Nyidrë. (Iako. 4:⁠8) Nemene la aqane tro së a xatua angatr?

³ Xatuane jë së la itre atr ka drei së troa tro kowe la organizasio: Nyipi ewekë tro së a xatuane la itre atr ka drei së ngöne la xötrei ithahnata, troa xei me hni kowe la organizasio. Nyipici laka, öhne hi së la itre mekene tusi ngöne Tusi Hmitrötre me atreine pena troa qeje pengöne la itre ini hna pan, ngo tha qa the së kö la ini cili. Ame asë hi la itre hne së hna atre, ke, hna hamë së hnei organizasio hna jëne lo hlue ka nyipici, atre hamëne la “xeni ngöne la nyipi ijin”. (Mat. 24:45-47) Loi e tro la itre atr ka atre la nyipici a canga trotrohnine ngöne la qaan, laka, ame la hmi ka wië, ke, tha hna hmaca kö the së, maine ngöne pena la Ekalesia së, ngo hetrenyi la itre atr hna icasikeun, qathei Akötresie, e cailo fene hnengödrai, hna xomi ujine hnei Iehova.

⁴ Eje hi laka Iehova la ka xome trongë së, ke, ase hë Nyidrëti ekö thingehnaeane laka tro nyidrë a ea trongë së me ini së (Sal. 32:8; Is. 54:13). Nge ame la ini cili, ke, hna sipu hamë së, jëne la itre itusi së. Maine hne së hna xatuane la itre atr ka drei së troa nyipi ewekëne la itre itusi cili, ene la troa trotrohnine laka hetre mele ka xulu qa ngön, ke, tha tro kö angatre a canga trije itr’ej. Celë hi matre tro palahi së a amamane ngöne la aqane trofë me huliwane la itre itusi laka, loi e troa metrötrëne itr’ej. Tro së a inine la itre ka xötrei traqa, troa hnime la organizasio me lapaune kowe la itre ewekë hna hnëkëne hnen’ej thatraqai së.

⁵ Thuemacane jë së la itre ka ajane, laka hetre icasikeu ezi angatr, nge hetre itre ini hna hamëne e cili. Qaja ju fe la göhnene la Uma ne Baselaia memine la hawa ne reinio. Qaja jë fe ka hape isa pengöne kö la itre icasikeu së, memine la itre icasikeu ne hmi lo hnei angatre hna lapa hane sine e cili lo. Nge hna fe la qëhnelö koi nöjei atr, ketre pë kö kuië mani trootro, nge tha kolo fe kö a upi së troa kuië ahnahna, ke qanyi së kö isa mekun. Hetre itre trejine hna könëne troa kuca la itre icasikeu, ngo ijije fe tro së a hane sa la itre hnying, maine cile fë la itre xaa cainöj. Nge kola kapa madrine la itre fami, itre nekönatre fe a hane ithahnata Tus. Tha ka hetrë i sutane kö la itre hlue ne hmi, maine ketre ihetre ka ketre pengön. ketre tha hna thaipine menune kö la Uma ne Baselaia, pëkö këdrel, pëkö hna sa atr, ketre pëkö iatre nyine hmi kow. Nyimutre la itre atrene la icasikeu ka lapa ngöne la itre nöje easenyine la Uma ne Baselaia.

⁶ Loi e tro së a xome xatuane trongëne la ajane la itre atr ka ini Tusi Hmitrötr: Ame la sipu kepine la ini Tusi Hmitrötr, ke, matre troa atre la nyipici hna xome qa hnine la Wesi ula i Akötresie. Nge tro la ini cili a upe la atr troa ajane la organizasio i Iehova, nge tro angeice fe a trotrohnine laka, nyipi ewekë troa cememin’ej. Ngöne la waane hadredre ne macatre, ke hnene la huliwa i Iesu ekö me itretre drei Nyidrë, hna upe la itre trene nyipi mekune troa cetro me cehuliwa, thenge la aqane amamai gojenyi angatre hnei kolezi sataral. Hna wangatrehmekune ngöne la itre xaa nöje laka alanyimu catre la itre atr ka xöleuthe la nyipici, celë hi matre hna acile hmaca la itre xaa ekalesia nyine xatua angatre me ini angatre palahi. Nge eje hi laka ame la itre atr ka lö kowe la itre ekalesia cili, ke, hetre trenge catre i angatre ngöne la götrane ne la ua, matre atreine angatre troa xomihnine la itre drai ne akötr. (Heb. 10:​24, 25; 1 Pet. 5:​8-10) Ngöne la hne ijine së enehila, ke, Iehova a ajane troa “casiju hi la nöjei ewekë asë koi Keriso.” (Efe. 1:​9, 10) Celë hi matre easë hë a casi ngöne la fami itre trejine e cailo fene hnengödrai. — 1 Pet. 2:⁠17.

⁷ Ame la kepine la ini Tusi Hmitrötr, ke, troa thepe manathithi göne la mele epine palua. Loi e tro palahi së a xome la itre xaa hnepe menetre ngöne la wiike matre troa qeje pengöne la organizasio me aqane huliwan’ej. Tro së a öhne la itre mekune cili hnine la La Tour de Garde ne waane macci 1985. Hna qeje pengöne mina la organizasio me itre manathithi hne së hna troa kapa ngöne la itre boroshür: Les Témoins de Jéhovah du XX^e siècle me Les Témoins de Jéhovah — Unis pour faire la volonté de Dieu sur toute la terre. Wange ju la anier lo itre hna huliwa me itre nuveel kola amamane la ekökötrene la Maca ka Loi thene la itre nöje trehnyiwa, me ekuhu hnine la itre xaa pengöne aqane mel. Hetre ithuemacanyi fe ngöne la itre xaa itus. Nge e qea ha la hna ini, ke, tro së a qaja la kepine matre easë a trongë hnalapa trootro, me aqane ixatua së göi mani, me kepine la itre reinio, memine fe la thangane la huliwa së ngöne la fene hnengödrai.

⁸ Eje hi laka ketre ixatua ka tru koi itre ka xötrei ini Tusi Hmitrötre la angatr’a iöhnyi memine la itre xaa temoë, pine laka kola fe atrune la lue meke i angatre ngöne la Ekalesia. Celë hi matre loi e tro palahi së a hëne la itretre cainöje ka isa pengöne troa hane sine la ini Tusi Hmitrötr. Nge tro mina fe la hna inine a madrine troa iöhnyi memine la ketre atrene la Ekalesia ka ce nöje me angeic, maine ka casi pena la hnë aja me angeic. Thupene lai, tro angeic’a öhne la itre xaa pengöne la nyipici. Ketre, nyipi ewekë fe troa ce tro memine la ketre atre thup, matre tro angeic’a hane imajemikeu memine la hna inin. Nge maine tro la atre thupëne la Sirkoskripsio me föi nyidrë a hane sine la etid, ke, nyipici laka hetre ixatua ka tru fe qa lai. Loi e tro fe së a amamane la hna inine kowe la itre temoë ka lapa ezi angeic: celë hi itre xaa ixatua ka ijije matre tro angeic’a hetre aja troa sine la itre reinio ne la Ekalesia.

⁹ Xatuane jë së la itre atr ka hmala la hni troa hane sine la itre icasikeu: Loi e tro la itre atr ka hmala la hni a canga trotrohnine la enyipiewekëne la itre reinio, nge catre jë së troa hamë ixatua. Amamane jë la itre hna troa ce ithahnatane ngöne la icasikeu ne la La Tour de Garde. Qaja ju fe la topikene la itre cainöje hna troa kuca. Ce wange jë fe la itre xaa mekune hna troa ithahnatane ngöne la reinio ne ini cainöj, maine ngöne ini tusi pena. Qaja jë fe la etrune la madrine së troa kapa la itre ini hna hamë së hnine la itre icasikeu cili, memine la kepine matre easë a mekune laka nyipi ewekë troa sine palahi. Nge maine ijij, ke, hape jë qanyi së kö itrothei. Ketre, maine ijije troa hë angeic ngöne telefon, qëmekene la reinio, ke, ejehi laka ketre hnepe ixatua lai koi angeic troa hane traqa.

¹⁰ Nyipi ewekë fe tro së a kuca matre tha tro kö a xoue la hna inine ngöne la angeic’a xötrei sine la ketre reinio. Trosai angeice jë kowe la itre xaa atre cainöj; nge eje mina, fe koi itretre thup. Maine angeic’a hane sine lai cainöje ka tru, ke trosai angeice jë kowe la atre cilefë. Tro fe së a hane ihamë sai angeice la Uma ne Baselaia. Qeje pengöne ju la hnaa hamë zonale me itus, itre trengene ahnahna, me hnaa xeene la itre itusi me topike ne la macatre. Qaja ju ka hape, ame la Uma, ke, tha hnë hmi casi kö, ngo hna traqa itronyi fe troa hnëkë troa cainöje trootro.

¹¹ Qeje pengöne jë kowe la hna inine la aqane kuca la itre icasikeu. Amamane jë koi angeice la itre itusi hna inin, ngo amekunë angeice ju fe laka Tusi Hmitrötre kö la pane tulu koi së. Hna nue asë hi la nöjei atr troa ithahnata, ketre tune fe la itre nekönatr. Qaja jë koi angeice ka hape, ame la nyima me itre trenge ewekën, ke, hna sile kö hnene la itre temoë thatraqane la hmi, nge, nöjei pengön’atr a traqa troa hane sine la itre icasikeu. Nge tro palahi së a ithahnatane me angeice lai ihnimi me aqane kapa madrine hne së la itre ka traqa, nge eje hi laka tro la aqane ujë cili a xatuane la hna inine troa hane sine hmaca la itre reinio.

¹² Pine ue laka itre xan’a luelu: Ame itre xaa ijin, ngacama catre së ixatua, ke, itre xaa atr a amamane laka xele kö angatre ma hane easenyine la Organizasio. The canga kucakuca kö së; tupathe ju troa trotrohni angatr, ke, tha majemi kö angatre troa sine la itre reinio ne hmi, ngo kolo hi lo itre xaa icasikeu ka tru. Nge hna ajolë angatre pena hnene la fami, maine hnei itre sine i angatr, maine angatre pena xouene troa hnyimasai angatr. Ngo eje mina fe laka, ma hna xome la traeme i angatre hnene la itre xaa huliwa, maine hnene la hna ce elo, maine hnene pena la itre xaa madrin. Eje hi laka tha hmaloi kö troa cile kowe la itre ewekë cili. Celë hi matre loi e tro së a xatua angatre troa “wangatrehmekune matre troa iëne la nyipi ewekë, hnine la itre ewekë asë ka isa pengön.” — Fil. 1:​10.

¹³ Amamane jë ngöne la Tusi Hmitrötre la aliene la kola iupi troa catr. Ketre aja së asë hi troa hetre ka haji së me xatua së ngöne la ua, celëhi matre nyipi ewekë troa cetro me cemele memine la itre trejine keresiano (Rom. 1:11, 12). Hnei Iesu hna amamane hnyawa laka, tha tro kö lai icilekeu ne la fami a acilë së troa kapa la nyipici (Mat. 10:​34-39). Nge Paulo fe a xatua së troa anyipicine laka easë a xötrethenge Iesu, nge tha tro kö së a hmahmane lai (2 Tim. 1:​8, 12-14). Tro fe së a thupëne la aqane tro së a madrin, memine fe lo itre aja së, loi e tro palahi së a xomehnöthe itr’ej, wanga tro së a jötre qa ngön (Luka 21:​34-36). Loi e tro së a nyi hlue i Iehova hnene la u së ka pexej, matre kapa la manathithi qa thei Nyidrë; tha tro kö a nyimu mekun (Kol. 3:​23, 24). Eje hi laka, maine hne së hna xatuane la itre atr troa trotrohnine me xötrethenge la itre mekene tus, ke tro hë angatr’a kökötre ngöne la götrane ne la ua.

¹⁴ Hna fe la itre qëhnelö: Atraqatre nge draië la ene i Iehova hune la itre xan. Ngöne la 229 lao nöje me hnapet, ke kola hë ka hape: “Trohemi, matre elëjë së kowe la wetre i Iehova, (...) nge tro Nyidrëti a ini së la itre jë i Nyidë, nge tro së a trongëne la itre gojenyi qa thei Nyidë.” (Is. 2:⁠3). Ame la itre atr ka kapa lai, ke tro hë angatr’a mel. Nge ame fe la ketre aqane ka sisitria troa xatua angatr, ke, ene la troa troxomi angatre kowe la Organizasio i Iehova.