Paatr 8: Aqane Troa Eatrongëne La Itre Etid Ka Kökötr
Troa Eatrongën La Itre Hnainin Kowe La Organizasio
1. Pine nemen matre hetre thangane ka loi e troa ce thawa ngöne la nöjei wiik memine la hnainin la ketre mekune göne la organizasio i Iehova?
1 Ame la hne së hna ajan troa traqa kow ngöne la kola kuca la itre etid, tre, ene la troa xatuan la itre hnainin troa hane itre atrene la ekalesia i Keresiano, ngo thaa tro hmekuje kö a kapa la itre ini. (Zaka. 8:23) Kola xatua së hnene la itre boroshür, Les Témoins de Jéhovah : Qui sont-ils ? Quelles sont leurs croyances ? Hamëne jë la boroshür kowe la itre ka xötrei etid me ithuecatre koi angatr troa hane e. Ketre, xome jë la itre hnepe menetr ngöne la nöjei wiik matre troa amexeje la ketre mekune ngöne la pengöne la organizasio i Iehova.
2. Tune kaa la aqane tro nyipunie a xatuan la itre hnainin troa sin la itre icasikeu ne la ekalesia?
2 Itre Icasikeu Ne La Ekalesia: Ame la sipu aqane troa kuca matre tro la itre hnainin a hane wangatrune la organizasio i Akötresie, tre, ene la troa ce me easë hnine la itre icasikeu ne la ekalesia. (1 Kor. 14:24, 25) Qa ngöne lai, loi e troa nyiqaane amexeje koi angatr la itre icasikeu, troa isa qeje pengön la faifi lao icasikeu ngöne la wiik. Qaja jë la taan la cainöj ka troa xulu hna troa kuca kowe la ka ala nyim. Amamane jë koi angatr la itre hna troa ithanatan ngöne la Ini Ne la zonal La Tour de Garde memine la Ini Tus ne la Ekalesia. Qeje pengöne jë la Ini Ne Cainöj Qaathei Akötresie memine la Icasikeu Ne La Huliwa. Ame ngöne la kola hamë xötreqa i epuni thatraqane la ini, maine jë ijije hi tro epuni a ce anyimua amacane ej me angatr. Ce thawa jë me angatr la itre mekune hna hamën ngöne la itre hna icasikeu. Xome jë la itre iatr hnine la itre itusi së matre troa xatua angatr troa trotrohnin la hna nyi hatren hnene itre ej. Ame ngöne la angatr a xötrei etid, hane jë nyiqaane könë angatre troa hane sin la icasikeu.
3. Nemene la itre götrane ne la organizasio nyine troa ithanatan?
3 Ame ngöne la kola easenyi la Drai Ne Amekunën, me itre asabele me itre kovasio, memine lo ijine traqa lo qatre thup ka iwai trootro, pane xome jë la itre xaa hnepe menetr matre troa qeje pengön me akökötren la madrine i angatr kowe la itre hna hnëkëne cili. Loi e troa sa trongëne la itre hnyinge celë, hna hape: Pine nemen matre hna hë së ka hape Itretre Anyipci Iehova? Pine nemen matre easë a qaja la itre hnë icasikeu së ka hape Uma Ne Baselaia? Nemene la itre hnëqa ne la itre qatre thup memine la itre drikona? Tune kaa la aqane eköthe la huliwa ne cainöje memine la itre teritoar? Tune kaa la aqane kuca la itre itusi së? Tune kaa la aqane sajuëne la organizasio hnei mani? Nemene la itre hnëqa ne la filial memine la Collège central ngöne la troa elemekene la huliwa?
4, 5. Tune kaa la aqane tro la itre video së a akökötren la trotrohnine së memine la ole së kowe la organizasio?
4 Itre Video Nyine Ini Së: Ame la ketre aqane troa atre la organizasio i Iehova hnene la itre hnainin, tre, jëne la itre video së. Kola amamane hnene la video, Jusqu’aux extrémités de la terre la huliwa ne cainöj e cailo fen; ame la video, Toute la communauté de nos frères, eje a amamane la ihnimi ne la itre trejine e cailo fen; nge kola amamane hnene la video Unis grâce à l’ enseignement divin la caasi ka eje thei angatr. Faifi hë lao macatre ne kapa hnene la ketre föe la itre zonale së memine la itre itus, ngo eahlo a treij ngöne la eahlo a goeëne la video, Les Témoins de Jéhovah : un nom, une organisation. Hnei eahlo hna akökötren la mejiune i eahlo kowe la Itre Temoë ka wai eahlo, ngo ame hë thupene la hna goeën lai video, eahlo fe hë a mekune laka, loi e tro fe a mejiune kowe la organizasio. Ene pe hna nyiqaane etid me eahlo, nge ame lai wiike thupen, hnei eahlo hna sin la itre icasikeu hnine la Uma Ne Baselaia.
5 Maine tro sa xome la hnepe menetr ka xalaithe hi ngöne la nöjei wiik memine la itre atr hne së hna etidi kow, me xome fe la itre jiane huliwa hna hamëne koi së, atreine hi tro sa eatrongëne hnyawa la itre hnainin kowe la organizasio ka caas hnei Iehova hna sajuën enehila.