Nyipici Göne La Itre Drai Elany
Hnei epuni fe hna hane hnyinge ka hape, ‘Nemene la ewekë ka troa traqa elany?’ Tusi Hmitrötr a qaja koi së la itre ewekë ka troa traqa, nge ka troa ketr la nöjei pengöne atr.
Hnei Iesu hna qaja la aqane tro sa lapa atre ka hape “easenyi hë la Baselaia i Akötresie.” (Luka 21:31) Hnei nyidrëti hna perofetane ka hape, troa hetre isi ka tru, me itre sa ka tru, me itre jiin, me itre mec ka ixötrekeu, kolo itre ewekë hne së hna melën e nöjei drai.—Luka 21:10-17.
Tusi Hmitrötr a amamane ka hape, ame ngöne la “itre drai ne la pun,” troa ngazo catr la thiina ne la itre atr. Hna qejepengöne lai ngöne la tusi 2 Timoteo 3:1-5. Ame la epuni a öhne la itre aqane ujë me itre thiina cili enehila, epuni hi lai a jelenyipicine laka, kola eatr la itre hna perofetan hnene la Tusi Hmitrötr.
Nemene la aliene lai? Easenyi hë la ijine tro la Baselaia i Akötresie a saze la aqane mele ne la itre atr, matre troa tro loi. (Luka 21:36) Ame ngöne la Tusi Hmitrötr, Akötresie a thingehnaeane la itre ewekë ka loi thatraqane la fen, memine la itre atr ka troa lapane ej. Hanawang la itre xaa ceitun.
ATRE MUS KA LOLO
“Nge hna hamë anganyidë la mus, me lolo, me baselaia, mate tro nöjei ate, me ite nöj, me isa qene hlapa asë a nyi hlue i anganyidë ; musi ka cile huti la musi anganyidë, nge tha tro kö a pate ; nge tha tro kö a ase la baselaia i anganyidë.”—DANIELA 7:14.
Alien: Tro epuni a mele madrin fene la baselaia hna acil hnei Akötresie, nge Iesu la Joxu.
MELE KA LOI
“Tha tro kö a qaja hnene la ate lapan’ eje, ka hape, Ini a mec.”—ISAIA 33:24.
Alien: Tha tro hmaca kö a tithi epuni hnei mec, maine kucakuca; tro epuni a mele palua.
TINGETING
“Kola nyi pune la ite ishi uti hë la cane la fene hnengödrai.”—SALAMO 46:9.
Alien: Pë hmaca kö isi, me itre akötr ka ce tro memin.
TROA LAPANE LA FEN HNENE LA ITRE ATR KA LOI
“Ame hna patepi la ate ka ngazo. . . Tro la ange ka menyike a hetenyi la nöj.”—SALAMO 37:10, 11.
Alien: Pë hmaca kö atr ka ngazo, troa lapa pe la itre atr ka ajan troa drengethenge Akötresie.
TROA APARADRAISONE LA IHNADRO
“Tro angat’ a xupi ite uma me lapan’ it’ ej, nge tro angat’ a eënyi vine me iji wen’ it’ ej.”—ISAIA 65:21, 22.
Alien: Troa mingöminge la ihnadro. Tro Akötresie a eatrën la itre thithi së laka, troa aejëne la aja i Nyidrë “e celë fen.”—Mataio 6:10.