Loi e Caasi Së Me Madrin Ceme Iehova Memin La Hupuna i Nyidrë
Loi e Troa Wangatrun e 28 Maac La Drai Ka Sisitria Catr
1 Easë a amaman ka hape, ka madrin me caasi së me Iehova Akötresie me Iesu Keriso, e hne së hna hane wangatrun la Pui Ne Xeni Ne La Joxu, e 28 Maac 2002 thupen la hna lö la jö. Ngöne la ijin ka ketre pengön cili, kola troa madrin hnene la thelen ne la itre Keresiano hna iën, troa “ce” memin la itre xaa matran la Baselaia, me Tretretro memine la Hupuna i Nyidrë. (1 Ioane 1:3; Efe. 1:11, 12) Tro fe la itre “xaa mamoe,” itre milio la etrun, a hane mekune hnyawa la manathith ka eje thei angatr, ene la troa caas me Iehova me Hupuna i Nyidrë, nge kola ce huliwa i Akötresie cememin la hni me mekun ka caas!—Ioane 10:16.
2 Catre Pi Së Troa Ce Huliwa Me Caas Memine La Itre Trejin: Hna madrin pala hi me caasi hnei Iehova me Iesu. Ka cile huti la aqane ce huliwa nyidro, a qaane hë ekö qëmeken la kola xup la atr. (Mika 5:2) Haawe, sisitria la itre otren ne ihnim ka iothekeu nyidro. Hna aceitunën la Nekön haetra celë ngöne lo qëmeken troa xup la atr, me ketre inamacan, ene pe kola atrein troa qaja hnei angeic ka hape: “Ce ini hi me anganyidrë nge atre xup, nge hanyi anganyidrëti ni o drai, kola madri xajawa i anganyidrë o ijin’ asë.” (Ite edomë 8:30) Qa ngöne laka, hnei Iesu hna ce mel hnyawa memin la qeqen la ihnim, ene pe hetre thangane catr lai kowe la Hupuna i Akötresie!—1 Ioane 4:8.
3 Pine laka kola ajan hnene la itre atr la mel, haawe, hnei Iehova hna iën la Hupuna i Nyidrë ka caas, ka hnim la itre atr, matre troa hujën la mele i angeic, ene pe hetrenyi hë së la mejiun ka sisitria. (Ite edomë 8:31) Tun la caasi Iehova memin la Hupuna i Nyidrë ngöne laka caasi hi la aja i nyidro, haawe, easë mina fe a hane caas me nyidro memin la itre xan jën la itre otren ka catr ne la ihnim, me catre kuca fe la aja i Akötresie.
4 Loi e Tro Së a Hetre Hni Ne Ole: Maine tro së a sin la Drai Ne Amekunën me drenge hnyawa me metrötr, haawe, easë hi lai a amaman la hni ne ole së kowe la ihnimi Iehova memin la mel hna hujën thatraqai së hnene la Hupuna i Nyidrë. Kola troa amaman hnyawa la tulu ne ihnim hna amë pe hnei Iesu, memin la aqane mele nyipici nyidrë ngöne la kola hujën la mele i nyidrë, memin la musi nyidrë, ene la Joxu ne la Baselaia hna acil hnei Akötresie, ketre tune mina fe la itre manathith hna troa kapa hnene la itre atr jën la Baselaia. Kolo mina fe a troa amekunë së la enyipiewekën la troa catre lapaun, me catr huliwa thenge la aja i Iehova, tune la itre ka “ce huliwane la nyipici.”—3 Ioane 8; Iako. 2:17.
5 Xatuane Jë La Itre Xan Matre Troa Ce Me Easë: Loi e tro la itre qatre thup a pane thel troa xatuan ngöne la teritoar la itre trejine asë ka thaa cainöje hmaca kö, matre tro angatr a hane sin la Drai Ne Amekunën la meci Keriso. (Mat. 18:12, 13) Fejane jë la ëje ne la itre trejin cili, matre troa hane wai angatr asë, me sipu tro troa hë angatr.
6 Atre hi epun la itre xaa atr ka ijij troa hane sin la Drai Ne Amekunën? Tro jë troa xatua angatr, matre troa hetre hni ne ajane i angatr troa hane atrun la ijine cili. Loi e troa hë angatre fe cememin la hni ka menyik, me hane eköth thei angatr la ajan. Loi e tro mina fe së a kuca la hne së hna atrein, matre troa hën kowe la drai ka sisitria cili, lo itre hnainin asë, me itre xaa atr ka drei së, tune mina fe la itre atren la hnepe lapa së, me itre atr hne së hna atre. Ame la itre eloin la thupene mele i Iesu, tre, thatraqan la itre atr asë ka inin “la esisitria ne la wangate hmekunyi Keriso Iesu.” (Fil. 3:8) Atreine hi troa hetrenyi hnene la itre atr la mejiun ka catr ne la mele ka thaa ase palua kö, e hnei angatr hna lapaun kowe la mel hna hujën hnei Keriso.—Ioane 3:16.
7 Thaa tro pi kö së a wangahmalohmaloeën la thangan hna troa kapa hnene la itre atr ka hni ka menyik ngöne la Drai Ne Amekunën. Ame ngöne lo lue macatre ka asë hë ngöne la ketre hnapeti ne Papouasie-Nouvelle-Guinée, 17 lao hawa ne tith la ketre bootr ka co hnene la 11 lao atr ka ajan troa hane sin la Drai Ne Amekunën. Pine nemen? Hnei angatr hna qaja ka hape: “Hne huni hna ajan troa hane atrun la Drai Ne Amekunën la meci Keriso, memine la itre ka hmi koi Iehova; celë hi matre tru ju hë la itre ejolen la gojeny, ngo sisitria kö koi hun la drai cili.” Mekune hnyawa kö së la aqane catr ne la itre atr ka hni ka menyik, memin la aja ke ej e kuhu hni angatr, troa hane madrin me caas me Iehova, me Hupuna i Nyidrë, memine la itre trejin Keresiano!
8 Loi e troa hane inin la Tusi Hmitrötr la itre atr asë cili. Xatua angatre jë troa hane sin pala hi la itre icasikeu ne la ekalesia, me hane ce thawa me angatr la nyipici. Xatua angatre jë fe troa ‘tro ngöne la lai’ me troa ‘kuca la nyipici,’ ene la troa trongën la itre trepene meköti ne la Tusi Hmitrötr ngöne la mele i angatr. (1 Ioane 1:6, 7) Xatua angatre jë troa acatren la aqane imelekeu i angatr me Iehova me kökötre pala hi ngöne la aqane troa melën la manathith ka sisitria, ene la troa caas troa kuca la aja i Nyidrë.
9 Drei la eloin e troa madrin me caas “ngöne la mekune ka cas, me ce catre kowe la lapaune ene la maca la loi!” (Fil. 1:27, 28) Epi tro së a treqen hnyawa la itre ka troa ce sin me easë la Drai Ne Amekunën ngöne la 28 Maac, nge easë a olen hnyawa koi Iehova memine la Hupuna i Nyidrë la hna aijijë së troa atrun la drai cili!—Luka 22:19.