“Kucajë La Nyine Amekune Koi Ni”
Troa Atrune La Mec i Iesu e 2 Eiperem
1. Pine nemen matre ka nyipi ewekë catre la drai 2 Eiperem 2007?
1 Ame e 2 Eiperem, tre, itre milio la etrune la itre atr e cailo fen ka troa icasikeu matre troa atrune la drai ne meci Iesu. Hnei Iesu hna meci ngöne la nyidrëti a cilëgöline la musi ne la Tretretro i nyidrë e koho hnengödrai, me amamane hnyawa laka Satana lo Diabolo la ka sili trenga thoi ngöne lo angeic a qaja ka hape ame la itre atr, tre, angatr a nyihlue i Akötresie göi troa kapa pala hi la itre sipu aja i angatr. (Iobu 2:1-5) Kola amekunë së hnene la Pui Ne Xeni Ne La Joxu laka, jëne la mele ka pexej hnei nyidrëti hna huujën, ene la mele ka pë ethan, haawe, Iesu hi lai a ‘hamëne la thupene mel ne la nöjei atr ka kösau.’ (Mat. 20:28) Qa ngöne lai, hnei Iesu hna amekötine kowe la itretre drei nyidrë ka hape: “Kucajë la nyine amekune koi ni.” (Luka 22:19) Hapeue la ole së kowe la ahnahna ka sisitria cili qaathei Akötresie, eje kö a upi së troa hnëkë hnyawa matre troa hane atrune lai hatrene ihnimi cili ka sisitria catr?—Ioane 3:16.
2. Nemene la aqane tro sa hnëkëne hnyawa la itre hni së göne la Drai Ne Amekunën?
2 Hnëkëne Jë La Hni Nyipunie: Maine tro sa wanga atrune lo itre drai tixenuë i Iesu e celë fen, ijije hi tro sa hnëkëne la itre hni së kowe la Drai Ne Amekunëne cili. (Ezera 7:10) Ame la ka troa xatua së kowe lai, tre, ene la troa e lo porogaram ne e Tusi Hmitrötr ka eje hnine la topik ne la drai hna hape Examinons les Écritures chaque jour — 2007 me ngöne la idrai ene lo Calendrier 2007. Ka ihmeku hnyawa la porogaram ne e tusi cili memine la itre drai ka itretrengekeu memine la ijine meci Iesu thenge la idrai hne së hna xome enehila. Ame la itre drai me itre ijin hna qaja hnei Tusi Hmitrötr, tre, hna eköthe itre ej hune la idrai i angetre Iudra, laka ame la caa drai, tre kola nyiqaane ngöne la kola lö la jö uti hë elanyi la ketre lö la jö. Celë hi ketre aqane tro lai a e la itre drai, nge kola troa mama ngöne la kola troa xome la porogaram ne e Tusi Hmitrötr göi Drai Ne Amekunën. Maine tro sa wange hmaca la porogarame cili me sine thel jëne la thith la ejuine la ihnimi Iehova, haawe, tro ha xatua së troa kepe thangane hnyawa la Drai Ne Amekunën la mec i Iesu.
3. Tune kaa la aqane tro sa xatuane la itre ka hetre hni ne ajan nge ka nanazij, matre tro angatr a hane kepe thangane ka loi qa ngöne la Drai Ne Amekunën?
3 Könëne Jë La Itre Xan Troa Hane Sin: Hna ithuemacanyi hnene la sine cetrone la Huliwa Ne Baselaia ne Febuare, la ketre huliwa ka ketrepengön; kola troa hëne la itre atr kowe la ijine ka sisitria cili. Hnei epuni kö hna hnëkë göi troa catre cainöje ngöne la ijine cili? Hnei epuni kö hna hane cinyihane wengëne la ëjene la itre atr hnei epuni hna atre nyine troa könën, nge hane fe hë epuni nyiqaane hë angatr? Loi e troa canga traqa ngöne la jidri ne Drai Ne Amekunën, matre troa kapa la itre hna könën tune fe la itre xan ka troa traqa. Maine jë tro nyipunieti a ce lapa me angatr, me wange ka hape hetre Tusi Hmitrötre i angatre jë fe kö me nyima. Tro sai angatre jë troa hane ibozu memine la itre xan e hnine la ekalesia. Thupene la icasikeu, loi e tro nyipunie a xomi ijine troa sa la itre hnyinge i angatr. Könë angatre jë troa hane sine la ketre cainöj kowe la ka ala nyim ka ketrepengön, hna troa cile fë e 15 Eiperem. Tro la itre qatre thup a wange hnyawa matre troa xecie koi angatr ka hape, ame lo itre ka sin la ekalesia ngo ka nango nanazij ngöne la götrane la ua, tre, hna hane könë angatre hë kowe la Drai Ne Amekunën me kowe la cainöj kowe la ka ala nyim ka ketrepengöne kö.
4. Tune kaa la aqane tro sa xatuane la itre atr ka catre kökötre ngöne la götrane la ua thupene la hna atrune la Drai Ne Amekunën?
4 Xatuane Jë La Itre Ka Xötrei Atre La Nyipici Memine La Itre Ka Nanazij Troa Kökötr: Tro la atre cile fë la cainöj ne Drai Ne Amekunën a amexeje la pengöne la etid, me xatuane la itre ka xötrei atre la nyipici troa catre thele troa atre Iehova. Ijije hi tro nyipunie a xome la itre mekune i nyidrë matre troa xatuane la itre hnei epuni hna hën troa atre Iehova. Maine thaa itre ka etidi kö angatr enehila, loi e troa canga wai angatre hmaca thupene la Drai Ne Amekunën me amamane la aqane trongene la etid. Maine angatre fe a ajan troa kökötr ngöne la götrane la ua, nyipi ewekë fe tro angatr a hane sin la itre icasikeu ne la ekalesia. (Heb. 10:24, 25) Troa aejëne lai, e hna ithuecatre koi angatr troa nyiqaane sine lapaane itre ej. Tro la itre qatre thup a thele matre troa hane wange la itre Keresiano ka nanazij ka sine la Drai Ne Amekunën, nge troa xatua angatre jëne la itre mekune hna cile fë ngöne lai cainöj. Kolo fe lai a xatua angatr troa xejë hmaca la huliwa ne cainöje i angatr e hnine la ekalesia.
5. Nemene la thangane ka loi hne së hna kapa qa ngöne la Drai Ne Amekunën?
5 Kola aijijë së hnene la Drai Ne Amekunën troa metrötrëne hnyawa la hnei Iehova me Iesu hna kuca thatraqa së. Hnene la hne së hna thele mekun, ene pe tro ha jui me kökötre hnyawa la ihnimi së koi nyidro nge troa hetre thangane kowe la aqane ujë së. (2 Kor. 5:14, 15; 1 Ioane 4:11) Ijine tro hi së la a nyiqaane hnëkë, easë memine la itre ka hetre hni ne ajan, matre tro sa hane sin lai drai ka nyipi ewekë catr; ketre ijine easë a troa ‘cainöjën la meci ne la Joxu.’—1 Kor. 11:26.