Xatuane Jë La Itre Xan Troa Hane Kepe Thangan La Thupene Mel
Troa Atrun La Drai Ne Amekunën La Meci Keriso e 12 Eiperem
1. Nemene la ketre aqane amamane hnene la nöje i Akötresie la hni ne ole i angatr kowe la thupene mel?
1 “Ole koi Akötesieti la ahnahna i anganyidë hna tha ‘teine qaja asë.” (2 Kor. 9:15) Itre trenge ewekë la ka amamane hnyawa la aqane hnime Akötresie la nöje i Nyidrë, laka kola mama jëne la mele hna huujën hnene la Hupuna i Nyidrë, Iesu Keriso. Troa mama hnyawa la hni ne ole së koi Akötresie, ngöne la easë a ce icasikeu e 12 Eiperem matre troa atrune la Drai Ne Amekunën la meci Keriso.
2. Drei la itre ka ce hane sin memine la itre hlue i Iehova lo Drai Ne Amekunën, nge nemene la nyine tro angatr a kuca matre troa hane kepe thangane la thupene mel?
2 Ame ngöne la nöjei macatre, tre, kösë treen milio pala hi la etrune la itre ka ce sin memine la itre hlue i Iehova la Drai Ne Amekunën. Kolo hi lai a hane amamane mina fe hnene la itre ka thaa nyi hlue i Iehova petre kö, la hni ne ole i angatr kowe la mele hna huujën hnei Keriso. Ngo maine angatr a hane ajan troa kepe thangane la thupene mel, nyipi ewekë tro angatr a lapaune kow. (Ioane 3:16, 36) Tro sa xatua nyudreni tune kaa troa hane akökötrene la lapaune cili? Ame ngöne la ijine atrune la Drai Ne Amekunën, tro sa xatua nyudren troa hane etid me hane sin la itre icasikeu ne la ekalesia ngöne la nöjei wiik. Tro sa ce wange cahu itre mekune nyine ixatua.
3. Tro sa nyiqaane tune kaa la ketre etid memine la itre atr hne së hna könën troa hane sin la Drai Ne Amekunën?
3 Itre Etid: Ame ngöne la epuni a könëne la itre atr ka hetre hni ne ajan kowe la Drai Ne Amekunën, tune kaa matre nyiqaane etid me angatr ngöne la itus Ini Tusi Hmitrötr? Tupathe jë troa qejepengöne la Drai Ne Amekunën kowe lai atr jëne la itre götrane 206-8 nge ce wange jë la topik, “Jidri Ne Pui Ne Xeni Ne La Joxu—Ketre Nyine Amekunën Ka Atrunyi Akötresie.” Ijije hi troa ce wange lai ithuemacanyi cili ngöne la caas maine lue vizit; maine jë ngöne la kola etid ngöne la qene qëhnelö. E asë hë epuni ce ithanatane uti hë ngöne la pune lai topik, maine jë tro lai atr a pi hane ithanatane la mekene 5, “Thupene Mel—Ahnahna i Akötresieti Ka Sisitria.” E kolo ha kuca lapaan la etid, haawe, bëeke hmaca jë troa ce wange lo foa lao pane mekene la itus.
4. Drei la itre hne së hna troa nyiqaane etid memin ngöne la hneijine ne Drai Ne Amekunën?
4 Tro sa xome thatraqai drei caha aqane nyiqaane la ketre etid? Maine jë troa pi ce ithanatane me nyipunieti lai hnene la itre sine huliwa i epun, me itre sine ce ini me epun, maine itre atr ka lapa ezi epuni pena. Ijije hi troa thele hnene la itre trejine trahmanyi troa hane easenyine la itre trahmanyi ne la itre trejine föe. Nge thaa tro pi kö sa thëthëhmine la itre sinee së ka thaa hane kö ce hmi me easë. Ketre, tro fe sa pane catre thele troa hane hëne mina fe troa sin la Drai Ne Amekunën, lo itre ka sine ekö la itre huliwa ne la ekalesia. (Luka 15:3-7) Epi tro pala hi sa thele troa xatuane la itre atr cili, matre tro angatr a hane kepe thangane la thupene mel.
5. Tro sa xatuane tune kaa la itre hnainin memine la itre xaa ka hni ka ajane troa hane sin la itre icasikeu ne la ekalesia hna kuca ngöne la nöjei wiik?
5 Itre Icasikeu Ne La Ekalesia: Ame la Drai Ne Amekunën, tre, celë hi pane icasikeu lai hna pane hane sin hnene la itre hnainin ka nyimutre, me itre xaa ka hni ka ajan. Tro sa xatua angatre tune kaa matre tro angatr a hane kepe thangane la itre xaa icasikeu ne la ekalesia? Hna hamën hnene la Huliwa Ne Baselaia ne Eiperem 2005 götrane 8, la itre mekune nyine ixatua, kola hape: “Qaja jë la taan la cainöj ka troa xulu hna troa kuca kowe la ka ala nyim. Amamane jë koi angatr la itre mekune nyine troa wanga atrun hnine la Ini ne la zonal La Tour de Garde me ngöne la Ini Tusi ne la Ekalesia. Qejepengöne jë la Ini Ne Cainöj Qaathei Akötresie memine la Icasikeu Ne La Huliwa. Maine hetre hnëqa i epuni ngöne la ini, maine jë tro epuni a pane ce amacane me angatr. Ce thawa jë la itre mekune hna amamane ngöne la itre ijine icasikeu. Xome jë la itre iatr hnine la itre itusi së, matre troa xatua angatr troa trotrohnine la itre aqane trongene itre ej. Ame la kola nyiqaane etid me angatr, kolo fe hi a hane hë angatr troa hane sine la itre icasikeu.”
6. Nemene la lue aqane tro sa xatuane la itre atr ka hetre hni ne ajan, troa hane kepe thangane la thupene mel?
6 Ame ngöne la kola inine pala hi la Tusi Hmitrötr hnene la itre atr ka hetre hni ne ajan, me sine lapaan la itre icasikeu ne la ekalesia, ene pe angatr a kökötre nyimenyim ngöne la nyipici. Haawe, loi e tro sa catre xatuane la itre xane troa hane kepe thangane lai itre hna hnëkëne ngöne la götrane la ua, memine la ahnahna ka sisitria hna hamën hnei Akötresie, ene la thupene mel.