Enyipicine Laka Ka Catrecatre La Lapaun!
1. Nemene la itre ewekë ka iaxouenyi hna perofetane hë hnei Iesu?
1 Hnene la itre aposetolo hna drenge hnyawa la Iesu a qeje pengöne la hlepëti nyidrë, memine la pune la fene celë. Troa traqa la itre ewekë ka iaxouenyi kowe la fen—itre isi, jiinë xen, me itre sa, me itre mec. Thupene lai, hnei Iesu hna qaja ka hape, troa methinëne la itre ka xötrethenge nyidrë, me akötrë angatr, me humuthi angatr. Troa mejë la itre perofeta thoi, me amenune la ka ala nyim. Troa nanazije la ihnim ne la ka ala nyim.
2. Pine nemene matre nyine haine la hna cainöjëne la maca ka loi e cailo fen?
2 Ame ngöne la fene ka tune lai, maine jë kola sesekötre hnene la itre aposetolo la Iesu a sisedrëne ka hape, troa cainöjëne la maca ka loi ne la Baselaia i Akötresie e cailo fen. (Mat. 24:3-14) Ame enehila, easa haine la aqane eatre lo lai hna perofetane ka lolo. Ngacama easa melëne la itre hneijine ka ngazo, ngo kola catre cainöjëne la maca ka loi hnene la Itretre Anyipici Iehova. Kola nanazije la ihnimi ne la fen, nge kolo pe a mama cile la ihnimi së. Ngacama kola xele ma wai së hnene la “nöjei nöj’ asë,” ngo easa thele troa cainöje ngöne la ketre nöj me ketre nöj.
3. Nemene la itre etrune la ixatua hnei epuni hna öhne ngöne la Rapore e Cailo Fen?
3 Drei la ithuecatre koi së troa goeëne la hna huliwa hnene la Itretre Anyipici Iehova ngöne lo macatre ne huliwa ka ase hë, tune la hna amamane ngöne la tablo, götrane 3 koi 6! Sikisitre hë lao macatre enehila laka, hna xome la caa miliare nge hetre munëne lao hawa troa eatrëne la huliwa ne cainöj, me inine la itre atr. Drei lai ewekë nyine anyipicine laka, ka catrecatre la lapaune ne la Itretre Anyipici Iehova! Kola elë la etrune la itre pionie, kösë 5.8 koi 100 la etrun, memine la etrune la itretre cainöj, kösë 3.1 koi 100 la etrun, me itre hnainine fe, kola e la 4.4 koi 100 la etrune la ka elë. Kola elë la itre hna bapataison, kösë 20.1 koi 100 la etrun lo macatre ne huliwa ka ase hë. Drei lai ewekë nyine haine laka, easenyi hë matre traqa pi hë kowe la sevene lao milio lao atr ka nyihlue i Iehova—tru catre kö hune lo itre xaa hneijine mele ne la atr! Ame la epuni a goeëne la tablo, wange ju fe la ka troa xatua epuni e cili?
4. Nemene la itre jole hna elë hun hnene la ketre trahmanyi matre troa kökötre kowe la bapataiso?
4 Ngacama atraqatre catre la etrune la itre hne së hna e, ngo loi e thaa tro pi kö sa thëthëhmine laka, kola amamane la itre ka anyipicine la lapaune i angatr. Hanawange la ketre ceitun. Hna tru hnei Guillermo e Bolivie. Hna hnaho nyidrë lo macatre 1935, hnei nyidrëti hna nyiqaane huliwa ngöne la itre hnë traa koka, ketre isinöe. Qaane la nyidrëti a co, nyidrëti a hucëne la itre dröne koka matre troa ahmaloeë nyidrë ngöne la aqane mele hleuhleu i nyidrë hnene la huliwa ka catrehnin me ka iakötrë. Ame hë thupene lai, nyidrëti a iji menu la ka haitr, me ufi sixa. Ame la nyidrëti a nyiqaane atrehmekune la hnei Iehova hna thele thei nyidrë, tre, nue pi hi Guillermo la sixa, nge thaa iji menu hë la ka haitr. Ame la jole ka tru koi nyidrë, tre, ene la troa nuetrije la hnei nyidrëti hna majemine qaane hë ekö, ene la troa hucë dröne koka. Thaa mano kö nyidrëti hna thith, ene pe hnei nyidrëti hna elë hune la hna majemine cili. Hnei nyidrëti hna hutrö kowe la itre hna majemine ka ngazo cili, matre ame enehila ase fe hë bapataiso nyidrë. Öni nyidrëti ka hape, ame “enehila eni a drenge laka, meköti hë la meleng, atraqatre la madrineng.”
5. Nemene la aja i epun?
5 Tru la hnei Iehova hna hnehengazone la itre atr. Aja i Nyidrëti tro la nöjei atr a ietra. (2 Pet. 3:9) Ketre aja së mina fe lai. Epi tro la hni së a upi së troa kuca asë la hne së hna atreine matre tro sa catre xatuane la itre ka hni ka meköti troa atre Iehova me hnimi Nyidrë tune la hne së hna kuca.