Loi e Tro Sa Mele Me Mekune Pala Hi La Drai Iehova
1 “Eashenyi hë la drai ka tru i Iehova, eashenyi hë, nge saqe cate hë.” (Zef. 1:14) Hnei Zefania memine lo ala 11, ene lo itre hna hëne ka hape, itre Perofeta Ka Co, hna mekune pala hi la drai Iehova. Maine easa wange hnyawa la itre hnei angatre hna cinyihane ngöne la Ini Tusi ne la Ekalesia së, jëne la itus Vivez en gardant à l’esprit le jour de Jéhovah, haawe, tro hë lai a xatua së troa hane hnëkë kowe la drai cili hna xouen.—Zef. 2:2, 3.
2 Itre Aliene Ka Tru: Ame la itus Le jour de Jéhovah, tre, thaa eje kö a hamëne la itre mekun hna nyihatren, maine qeje pengöne pena la itre xötr ne la itre tusi ne la 12 lao perofeta, ketre xötr matre ketre xötr, ngo eje pe a qaja la aqane tro sa trongëne la itre hna cinyihane cili ngöne la itre ejolene la mel hne së hna qëmeke kow ngöne la nöjei drai. Eje a amamane hnyawa laka, loi e tro pala hi sa mekune ka hape, easenyi catre hë la drai Iehova nge ketre, loi e tro sa wanga atrune lai ngöne la aqane tro sa axecië mekune memine fe la aqane tro sa ujë. Ame la itre jol ka ketr la mele ne la hnepe lapa, memine la itre aqane imelekeu së memine la itre trejin, me itre hne së hna iëne göne la itre nyine iamadrinë, me huliwa ne cainöje së, memine la itre mekune hne së hna axeciëne göne la huliwa i maseta, tre, itre jole lai hna ithanatane ngöne la itus matre troa amamane la hnene la itre perofeta hna cinyihane göne la hneijine i angatr, nge nyine amamane mina fe la aqane eatre lai ngöne la hneijine së.
3 Ame la götrane 1 ne la itus, tre, eje a hamëne koi së la itre ithuemacanyi göne lo 12 lao perofeta memine la itre hnei angatre hna cinyihan. Nemene la pengö i angatr? Nemene la itre aqane mele hne së hna melëne enehila, laka ka ceitu memine la hnei angatre hna melëne ekö? Ame la götrane 2, tre, eje a amamane hnyawa la pengö i Iehova memine la itre thiina i Nyidrë. Nemene la itre ithuemacany hna hamëne hnene la itre perofeta göne la pengö i Iehova me göne la itre thiina i Nyidrë? Ame la götrane 3, tre, eje a troa ithanatane hnyawa la sipu aqane ujë së memine la itre hne së hna mele memin. Tune kaa la aqane tro sa amadrinë Akötresie o drai ngöne la nöjei götrane ne la mele së? Nge ame la götrane 4, tre, eje a qeje pengöne la aqane tro sa mele madrine ngöne la easa lapa mekune pala hi la drai Iehova.
4 Canga Hnëkë Jë Së Enehila Matre Troa Hane Kepe Thangan: Loi e tro sa catre troa kuca enehila la ka ijij matre troa hane kepe thangane elanyi la kola troa inine la itus Le jour de Jéhovah, ka troa nyiqaane e 4 Ogas 2008 me wiike cili! Loi e tro sa canga hnëkë matre tro sa hane sine pala hi la Ini Tusi ne la Ekalesia ngöne la nöjei wiik. Ketre, loi e tro sa hnëkëne hnyawa la itre ini, me thele la itre xötr matre troa goeëne la aqane qeje pengöne itre ej la itre mekune hna hamën. Loi e tro mina fe sa lapa mekune la itre ithuemacany me isa hnying, ka hape, ‘Tune kaa la aqane tro ni a trongëne la ithuemacany celë ngöne la hnalapa, me ngöne la hna ini, me ngöne la hna huliwa, me ngöne la hna cainöj, me ngöne mina fe la itre aqane ce mele ni memine la itre trejine Keresiano?’ Loi e tro sa traqa ngöne la hna ini tus nge ase hë së isa hnëkë, matre tro sa iakeukawanyikeu me ithuecatrekeu.—Rom. 1:12.
5 Qa ngöne lai, epi tro la aqane wanga atrune së la itus Le jour de Jéhovah a hnëkë së enehila, matre ijije tro sa “acate i hni ngöne” la drai Iehova ka “atraqat [ . . . ] me nyine qouene atraqat.” Eje hi laka ame la drai cili, tre, easenyi catre hë!—Ioela 2:11.