Atre Kö Epuni La Itre Nyine Iën e Thaa Epuni Kö a Xomi Madra?

Kola elë e cailo fen la etrun la itre pital ka ixöj ngo thaa ka hamë madra kö. Hapeu, ase kö epuni kapa asë la itre ithuemacanyi göne la itre nyine iën, e thaa epuni kö a xomi madra? Nyipi ewekë tro epuni a atre hnyawa la itre ewekë cili, matre ijije troa axecië mekun ngöne la götrane la inyië me ixöj. Goeëne jë la video, Pas de sang : la médecine relève le défi. Thupene lai, thithi jë fë la itre mekun hnei epuni hna axeciën, thenge la hnei epuni hna atre jëne la itre hnyinge celë.—Ithuemacany: Pine laka kola amamane hnene la video la itre xaa aqane xöj la itre atr, haawe, qanyi itre keme me thine kö axeciëne maine thaa tro pë hë la itre nekönatr a hane goeëne la itre götrane cili.

(1) Nemene la sipu kepin matre kola thipetrij hnene la Itretre Anyipicine i Iehova troa xom me hamë madra? (2) Ame göi inyië thei droketre, nemene la aja ka eje the së, Itretre Anyipicine i Iehova? (3) Nemene la ewekë ka meköti ka eje thene la itre ka wezipo? (4) Pine nemen matre mekune ka loi nge hni ka inamacan la troa thipetrij la xome me hamë madra? (5) Maine tru la madra ka neni, nemene la lue nyine troa canga kuca hnene la itre droketre? (6) Nemene la foa lao aqane troa inyië e tröne la xomi madra? (7) Tune kaa la aqane tro la itre droketre a (a) kuca matre troa co la madra ka neni, (b) xeene la itre globules rouges, (c) kuca matre aelëne la madra nge (d) nyihnane hmaca la madra ka neni? (8) Qeje pengöne jë la aqane inyië hna hape (a) hémodilution me (b) madra hna thiane qa ngöne la ketre eatr. (9) Nemene la nyine tro sa atre hnyawa ngöne la itre xaa jëne troa neëne la xomi madra? (10) Hapeu, ijije kö troa xöj la ketre atr nge thaa tro kö a hamë madra koi angeic, ngacama tru me jol la hna xöji angeic? (11) Nemene la ewekë ka ixatua hna kuca hnene la itre droketre?

Tune la hna amamane göi troa kapa la itre xaa drösinöe, hna hape isa qanyi së kö troa axeciëne hnyawa la mekun thenge la mekuthethewe së hna inin hnei Tusi Hmitrötr. Hane kö epuni axecië mekun göne la itre aqane inyië e tröne la xomi madra, koi epuni me haa nekö i epun, me hane nyi aliene mina fe la pepa DPA? Maine epuni a aja itre xaa ithuemacanyi ngöne la itre mekune celë, wange ju la “Questions des lecteurs” ne 15 Juun 2004, me 15 Okotropa 2000, ngöne la zonal La Tour de Garde. Ketre xome jë la itre pepa ne huliwa hnine la sinetrongene la Huliwa Ne Baselaia ne Nofeba 2006, hna hape “Tro Sa Goeëne Tune Kaa La Itre Mutine La Madra Memine La Itre Hna Amekötine Hnei Pital Göi Sipu Madra Së?,” matre troa sipu axecië mekun. Thupene lai, loi e troa xecie koi epun, laka, hnei epuni hë hna cinyanyine la itre aja i epun ngöne la pepa DPA. Loi e troa thuemacane la itre droketre me itre ka inyië, me itre atrene la fami epun ka thaa Nyihlue i Iehova kö, la itre hnei epuni hna axeciën.