“Ahudumenejë La Lai Nyipunie”
1. Nemene la manathithi ka tru ka eje the së?
1 Qaane e hmahmakany uti hë e jidr, tre, kolo pala hi a atrunyi Iehova Akötresie hnene la emingömingöne la lai. Ngo hetrenyi la ketre pengöne lai hnei Iesu hna ithuecatre kowe la itretre drei nyidrë troa kapa, ene la “lai ne la mel.” (Ioane 8:12) Maine nyipici laka ketre manathithi la troa kapa la lai cili ngöne la götrane la ua, ngo ketre hnëqa ka tru mina fe lai. Hnei Iesu hna amekötin, ka hape: “Ahudumenejë la lai nyipunie qëmeke ne la nöjei at,” matre troa kepe thangane hnene la itre xan. (Mat. 5:16) Pine laka ame ngöne la götrane la ua, tre, kola lapa la itre atr ngöne la jidr, haawe, nyipi ewekë catre troa hudrume la lai cili; nge celë hi la ewekë ka sisitria nyine tro sa kuca! Tui Iesu, tune kaa la aqane tro sa ahudrumene la lai së?
2. Hnei Iesu hna amamane tune kaa la enyipiewekëne la troa tro fë la lai ngöne la götrane la ua?
2 Hnene La Hna Cainöje Trootro: Hnei Iesu hna xome la traeme i nyidrë me trenge catre i nyidrë me itre mo i nyidrë, matre troa tro fë la lai, ene la nyipici kowe la itre atr ngöne la itre uma i angatr, me e cahu gojeny, me hune la itre wetr; kola qaja la nöjei götrane gaa tiqa hnei atr. Atrehmekune hnyawa hi Iesu la enyipiewekëne me itre eloine ka cile hut, e troa ce thawa me itre xan la lai ka nyipici ngöne la götrane la ua. (Ioane 12:46) Pine laka nyipi ewekë troa ketr la ka ala nyim, ene pe hnei Iesu hna hnëkëne la itretre drei nyidrë matre tro angatr a itre “lai ne la fene hnengödrai.” (Mat. 5:14) Hnei angatre hna ahudrumene la lai angatr hnene la hna kuca la loi kowe la itre atr ka lapa easenyi angatr, me tro fë la itre nyipici ngöne la götrane la ua.
3. Tro sa amamane tune kaa la hni ne ole së kowe la lai, ene la nyipici?
3 Kola wanga atrune hnyawa hnene la nöje i Akötresie la hnëqa celë, ene la troa “tro pala hi tune la ite nekö ne la lai,” me catre cainöje ngöne la itre götrane gaa tiqa hnei atr. (Efe. 5:8) Maine tro sa nango e hi la Tusi Hmitrötr maine pena la ketre itusi së ngöne la easa mano ngöne la ketre götrane gaa mama koi atr, maine jë ngöne la hna huliwa i maseta maine hna ini pena, tro lai a aijijë së troa nyiqaane troa porotrikë Tusi Hmitrötr. Celë hi la hna kuca hnene la ketre trejine jajiny, ene pe hnei angeice hna nyiqaane inine la Tusi Hmitrötr memine la ketre atr, me hamëne la 12 lao itus kowe la itre sine ce ini me angeic!
4. Pine nemene matre ame la troa ‘ahudrumene la lai së,’ tre, kolo fe lai a hape, troa xome la ketre aqane ujë ka lolo?
4 Hnene La Itre Huliwa Ka Loi: Nyipi ewekë mina fe tro sa ahudrumene la lai së hnene la aqane ujë së o drai. (Efe. 5:9) Ame ngöne la hna huliwa i maseta me hna ini, me ngöne la itre götrane gaa tiqa hnei atr, tre, loi e troa mama ngöne la aqane ujë së, laka, ketre Keresiano së, nge loi e tro lai a aijijë së troa thawa la itre nyipici qa hnine la Tusi Hmitrötr. (1 Pet. 2:12) Drei la ketre ceitun, hnene la aqane ujë ka lolo ne la ketre nekönatr ka faifi lao macatre, hna upe la atre hamë ini koi angeic troa hëne la keme me thine i angeic. Öni eahlo ka hape, “Pëkö ketre nekönatr hnenge hna atre ka tui angeic, ka wanga atrehmekune hnyawa la ewekë ka loi me ka ngazo!” Eje hi, ijije hi tro sa ea la itre atr kowe “la lai ne la mel” me atrune la Akötresi së, hnene la huliwa ne cainöje së me aqane ujë së ka lolo.