Ka Hnëkë Kö Epun, e Traqa Ju Elanyi La Ketre Meci Ka Tru?
Ame së itre atr, tre, ngacama ka egöcatre hi së ngo maine jë troa canga hane tithi së fe hnene la ketre meci ka tru. (Iako. 4:14) Qa ngöne lai, ame la atr ka maca mek, tre, angeice a canga hnëkë. (Ite edomë 22:3) Hapeu, hnei epuni hë hna axeciëne me cinyihane ngöne ipepa la itre drösinöe hnei epuni hna mekune troa xom, me ië aqane troa inyië epun, e traqa ju koi epuni la ketre meci ka tru? Kola troa xatua epuni hnene la video celë, Soigner sans transfuser— Besoins et droits du patient, ngöne la hnaluene götrane hna hape, Des alternatives à la transfusion— Documentaires. Ame la epuni a goeëne lai video, thele jë troa sa cahu itre hnying. Pine laka troa mama hnine la video la itre xa aqane xöje la itre atr, hawe, loi e tro la itre keme me thine a ce goeëne lai memine la nekö i angatr ka co.
(1) Pine nemene matre kolo hmaca ha wange hnene la itre xa droketre la aqane waiewekë i angatre göi xomi madra? (2) Hamëne jë la köni ceitun ngöne la itre aqane ixöj ka jole catr, hna kuca nge pëkö madra hna hamën. (3) Pine nemene matre ala nyimu la itre droketre ka ixöj e cailo fen, ka amamane la aja i angatre troa xöje la itre ka wezipo ngo tha tro kö a hamë madra? (4) Nemene la ka mama ngöne la itre pital göne la aqane huliwane la madra? (5) Nemene la itre ethane la xomi madra ngöne la kola inyiëne la ka wezipo? (6) Nemene la hna qaja hnene la itre droketre ka nyimutre, ngöne la itre thangane ka loi hna kapa qa ngöne la troa isa iëne la itre xa aqane troa nyinyine la meci së hune la troa xomi madra? (7) Nemene la qane la meci hna hape, anémie, nge nemene la nyine troa kuca matre tha tro kö a sasaithi tulu? (8) Nemene la aqane troa kuca matre troa akökötrene la etrune la itre globules rouges ngöne la itre ngönetrei ne la ketre atr ka wezipo? (9) Nemene la itre hna kuca ngöne la kola xöje la ketre atr, matre tha tro kö a tru la madra ka neni menu? (10) Hapeue la kola nyinyine la meci ne la itre nekönatr maine itre atr pena hna nyinyape fë a tro pital, ka loi fe kö koi angatre lo lai mekun, ene laka troa isa ië ajan? (11) Nemene la ketre trepene meköti ka tru ka ketr la mele ne la atr, nge aqane inyië ka loi?
Pine laka isa qanyi së kö iëne thenge la mekuthethewe së, la itre xa aqane inyië hna amamane ngöne la video celë, ngo tha tro pi kö sa treqene troa cile kowe la ketre jole ka tru, matre troa wange la hne së hna troa iën, maine tha iëne pena. Hetrenyi la itre xa ithuemacanyi ka troa xatua së troa axeciëne hnyawa la itre mekun, ngöne la Mekene 7 ne la itus “Ihnimi Akötresie” me ngöne la sinetrongene la Huliwa Ne Baselaia ne Nofeba 2006. Thupene lai, maine ka bapataiso hë nyipunie, cinyanyine jë la itre aja i epuni ngöne la pepa DPA, nge loi e troa ce xome pala hi me epuni ngöne la nöjei drai.
[Iatr ne la götran 3]
Hapeu, hnei epuni hë hna axeciëne me cinyihane la itre drösinöe nyine troa xom, me aqane inyië epun, e traqa ju koi epuni la ketre meci ka tru?