Kola Nyiqane e 17 Maac La Huliwa Ne Ihë Göi Drai Ne Amekunën
1. Nemene la huliwa ka ketrepengön hna nyiqane e 17 Maac?
1 Kola atrune la Drai Ne Amekunën ngöne la nöjei macatre, matre troa cainöjëne la meci Iesu. (1 Kor. 11:26) Hawe, aja së tro fe la itre xan a ce atrune me easë la drai cili, me hane drenge la kola qeje pengöne la ahnahna ka lolo qathei Iehova, ene la thupene mel. (Ioane 3:16) Ame ngöne la macatre celë, easa nyiqane la huliwa së ne ihë göi Drai Ne Amekunën, qane e Mecixeni 17 Maac. Hapeu, epuni kö a treqene hnyawa la ijine cili, matre troa akökötrene la huliwa ne cainöje i epun?
2. Tro sa tro fë tune ka la pepa ne ihë?
2 Nyine Tro Sa Qaja: Tha tro kö sa aqeane la aqane nyiqane ithanata së. Maine jë tro hi sa qaja ka hape: “Bozu së. Eahuni a könëne la hnepe lapa i nyipunie, matre troa hane sine la ketre ijine ka sisitria ngöne la macatre hna troa kuca e cailo fen, e 5 Eiperem. Hetrenyi la ketre cainöje hna nyitrepene hnei Tusi Hmitrötr hna troa cile fë koi së, nge eje a troa amamane la hna eatrëne hnene la meci Iesu, memine la itre ewekë hnei nyidrëti hna kuca enehila. Kola mama ngöne la pepa ne ihë celë la hawa memine la götrane hnë troa eköthe la icasikeu cili.”
3. Tro sa hëne tune ka la itre atr ka ala nyim?
3 Hëne Jë La Ka Ala Nyim: Ame la aja së, tre ene la troa hëne la itre atr ka ala nyim. Qa ngöne lai, loi e troa xecie koi epuni laka, hnei epuni hna könën la itre hnainin me itre atr hnei epuni hna wange lapan, me itre sine huliwa, me itre sine ce ini, me itre atr ka lapa ezi epun, me itre xa atr kö. Tro la itre qatre thupe ne la ekalesia i epun a amamane la aqane troa haöthe asë la teritoar. Ka hetre thangane catre la huliwa hne së hna kuca ngöne la nöjei macatre, ene la troa hëne la itre atr thatraqane la Drai Ne Amekunën. Ame ngöne lo macatre hnapan, hnene la ketre föe hna traqa ngöne la hna icasikeu, nge hna sipo eahlo hnene la ketre trejine troa xatua eahlo troa thele la atr ka könë eahlo. Ngo öni eahlo jë hi koi angeic, ka hape, pëkö atr hnei eahlo hna atre ngöne la hna icasikeu, ke, hna hamëne koi eahlo la pepa ne ihë hnene la ketre trejine ka cainöje ngöne itre hnalapa trotro.
4. Nemene la itre kepine ka upi së troa catre xome la huliwa cili ne ihë trotro?
4 Maine jë troa sine la Drai Ne Amekunën hnene la ketre atr hne së hna hamëne kow la pepa ne ihë. Maine tro la ketre atr a kapa maine tha kapa pena la pepa ne ihë, ngo tha tro jë kö a gufa la itre trengecatre së. Ame la itre pepa ne ihë hne së hna tro fë trotro, tre, itre eje a cainöjëne ka hape, Iesu enehila la ketre joxu ka trene men. Jëne la aqane catre i epuni troa sine la huliwa cili, epuni hi lai a amamane kowe la itre atr ka goeë epun, tune la itre atrene la teritoar, me itretre cainöj, memine la Atre ka sisitria ene Iehova, laka, atraqatre la hni ne ole i epun kowe la thupene mel.—Kol. 3:15.