Les merveilles de la création révèlent la gloire de Dieu

Ala nyimu la itre atr ka madrine troa goeëne la itre ewekë hna xup. Ngo xalaithe hi la itre ka atre laka, itre eje a qaja amamane la itre mekune me itre aliene hni ne la Atre Xup ka Sisitria. (Rom. 1:20) Hnei Davita ekö hna atre la pengöi Iehova jëne la Wesi Ula i Nyidrë. Ngo hnei angeice fe hna “goeëne” me easenyi Nyidrë jëne la itre ewekë hna xup. (Sal. 8:3, 4) Hna kuca la video celë hna hape, Les merveilles de la création révèlent la gloire de Dieu, thatraqai së me itre nekö së me itre hnainin. Eje a troa xatua së troa wai pengöne hnyawa la itre xa ewekë hna xupe hnei Iehova, me öhne la itre thina i Nyidrë me pengöi Nyidrë, me hane easenyi Nyidrëti fe. Thupene la hna goeëne la video cili, thele jë troa sa la itre hnyinge celë.

(1) Kola akökötrene tune ka la hni ne ole së koi Iehova, hnene la etrune memine la elolone la aqane eköthe la hnengödrai memine la fene hnengödrai? (Is. 40:26) (2) Ame la easa wai pengöne hnyawa la tim, tre, nemene la hne së hna inin göne la Atre Xupe lai? (Hna ama. 14:7) (3) Kola amamane tune ka la inamacane i Iehova hnene la etrune la ihnadro, memine la aqane easenyine eje la jö? (4) Nemene la enyipiewekëne la treu? (Sal. 89:37) (5) Nemene la hnei Iehova hna kuca matre tro la itre atr a mele madrin? (6) Nemene la ADN? (Sal. 139:16) (7) Nemene la eisapengönene la itre atr memine la itre xa ewekë hnei Iehova hna xup? (Gen. 1:26) (8) Nemene la hne së hna treqene hnyawa ngöne la fene ka hnyipixe elany?

Itre Xa Mekun: (9) Ka qa ka la itre han? (10) Hna tune ka matre elë jë la tim a troa ketr la hene ne la itre isinöe? (11) Nemene la enyipiewekëne la tim e hnine la ngönetrei së? (12) Hamëne jë la itre xa ceitun ka amamane laka kola ce huliwa la itre ewekë ka mel. (13) Hnene la itre ewekë ka mel hna atre tune ka la aqane troa ce huliwa memine la itre xan? (14) Kola hapeue la “angle d’or,” nge kola mama tune ka lai ngöne la itre ewekë hna xup?

Tro Sa “Mekune” Hnyawa La Itre Ewekë Hna Xupe Hnei Iehova: Hnei Iesu hna ithuecatre koi së troa “mekune la nöjei öni ka sheshë e caha,” me “mekune la aqane cia ne la ite peledë.” (Mat. 6:26, 28) Maine tro sa ujë tune lai, tro ha kökötre la lapaune së, me acatrene la mejiune së kowe la Atre Xup, nge tro fe ha kökötre la hni ne ole së kowe la etrune la inamacane i Iehova, memine fe la men me ihnimi Nyidrë. The nue kö la itre huliwa ka gufa ne la fene celë troa ajolë së; ngo catre pi pe së troa xomi ijine troa goeëne la itre ewekë ka lolo hna xupe hnei Iehova, me sine thele la hnene itre eje hna amamane göne la Akötresi së.—Sal. 19:1.