Nemene La “Nyine Amadin[ë]” Epun?
1. Nemene la nyine madrine i epun ngöne la nöjei pune treu?
1 Nemene la “nyine amadin[ë] epun” la kola upi epun ngöne la nöjei pune treu troa hamëne la rapor ne hna cainöj? (Gal. 6:4) Itre pionie huti ju hë së ka eatrëne la 130 lao hawa ngöne la huliwa ne cainöj maine itretre cainöje së ka kuca hi la 15 menetr, loi e tro asë hi së a madrine ngöne la huliwa i Iehova hna kuca cememine la hni ka pexej.—Sal. 100:2.
2. Pine nemene matre loi e tro sa nu asë la mele së ngöne la huliwa i Iehova?
2 Ka meköt e tro sa nu asë la trenge catre së koi Iehova, lo Atre Musi e hnegödrai me fene hnengödrai. (Mal. 1:6) Hnene la ihnimi së koi Nyidrë, hne së hna nue la mele së matre troa kuca la aja i Nyidrë. Haawe, maine xecie koi së laka hne së hna hamën la “pane wene” ne la traeme së, me itre hne së hna atrein, me trenge catre së ngöne la huliwa i Iehova, ejehi laka itre ewekë lai ka troa thue madrinë së ngöne la kola nyipun la drai maine pune treu. (Ite edomë 3:9) Ngo, maine kola upi së hnene la mekuthetheu së laka ijiji së troa akökötren la huliwa së koi Iehova haawe, loi e tro sa wange la nyine tro sa kuca thatraqane lai.—Rom. 2:15.
3. Pine nemene matre tha loi kö tro sa aceitunëne la huliwa së memine la hna kuca hnei itre xan?
3 “Troa Isa Tupa Huliwan . . . [Qa The Së] Kö, Ngo Tha Qa Thei Kete Kö”: Tha loi kö tro sa aceitunëne la huliwa së memine la hna kuca hnei itre xan, maine aceitunëne pena memine lo hne së hna kuca ngöne lo ijine easa egöcatr. Hetrenyi la itre ewekë ka traqa me saze la aqane mele së, nge kolo fe ha saze la itre hne së hna atreine kuca. Haawe, maine tro sa aceitunë së me itre xan, tro hë lai a aciane the së la iwajahuje maine pena la mekune ka hape tha ijiji së kö. (Gal. 5:26; 6:4) Tha hnei Iesu kö hna goeëne la huliwa hna kuca hnei ketre qa ngöne la hna kuca hnei ketre, ngo hnei nyidrëti pe hna qaja aloine hnene la hna atreine kuca hnene la atr.—Mar. 14:6-9.
4. Nemene la itre ini hne së hna kapa qa ngöne la ceitune hna hamëne hnei Iesu göne la itre talan?
4 Ame la ceitune hna qaja hnei Iesu göne la itre talan, tre kola kapa hnene la itre ka huliwa, angatr isa ala cas, la itre talane thenge “la hnei angate hna isa atein.” (Mat. 25:15) Ame la kola bëeke hnene la maseta, me hnyingëne la pengöne la huliwa i angatr, ame lo itre ka catre huliwa thenge la hnei angatre hna atrein, me thenge la aqane mele i angatr, tre hnei nyidrëti hna qaja aloinyi angatr. Haawe, nyidrëti a hane alö angatre jë fe ngöne la madrine i nyidrë. (Mat. 25:21, 23) Ketre tune mina fe, ame la easa catre cainöjëne la Baselaia, xecie hnyawa koi së laka tro Iehova a kepe së, nge celë hi lai ka troa hamë madrine koi së!