Aqane Troa Xomiujine Hnyawa La Ini Tus
1. Nemene la hnëqa ne la itre ka ini Tusi Hmitrötr kowe la itre atr?
1 Thatreine kö tro ketre a nyihlue i Iehova e tha “hna e angeice” kö hnei Nyidrë. (Ioane 6:44) Ngo ame pe, hnëqa ne la itre ka cainöj troa xatuane la itre atr troa easenyi kowe la Tretretro i angatr. (Iako. 4:8) Celë hi kepine matre loi e troa hnëkë hnyawa. Tha tro kö lai ka ini Tus a trotrohnine la maca, e tro hi sa e la paragaraf memine la hnying ne la itus.
2. Nemene la thangane la troa ini Tusi Hmitrötr hnyawa koi ketre?
2 Loi e tro sa xatuane lai ka ini Tus troa (1) trotrohnine la hnei Tusi Hmitrötr hna ini angeic, me (2) kapa la hnei Tusi Hmitrötr hna ini angeic, me (3) trongëne la hnei Tusi Hmitrötr hna ini angeic, matre hetre thangan. (Ioane 3:16; 17:3; Iako. 2:26) Tro së lai a pane ini Tusi koi itre treu, qëmekene tro angeic a eatrëne la köni ewekë celë. Ngo itre ewekë lai ka troa xatua angeic troa imelekeu hnyawa me Iehova, me nue la mele i angeic koi Nyidrë e thupen.
3. Hnauëne laka tro sa thele troa atre la mekuna ne la hne së hna ini Tusi kow?
3 Nemene La Mekuna i Angeic?: Troa mama ka hape, trotrohnine hë, nge ase hë lai ka ini Tusi kapa la hnei angeic hna inin, e hne së hna hane nue angeic troa qaja la mekuna i angeic; ngo tha tro kö sa tru hna ithanata. (Iako. 1:19) Trotrohnine kö angeic la hnei Tusi Hmitrötr hna qaja göne lai ewekë hnei epon hna ithanatan? Atreine kö angeic ketre qeje pengöne la hnei angeic hna trotrohnin? Nemene la mekuna i angeic? Ame koi angeic, tre ka loi kö la hna qaja hnei Tusi Hmitrötr? (1 Thes. 2:13) Trotrohnine kö angeic ka hape, loi e troa mama ngöne la mele i angeic laka, angeic a kapa la ini cili? (Kol. 3:10) Tro sa atre lai, e hne së hna pane thele troa atre la mekuna i angeic, nge loi e tro sa drei angeic.—Mat. 16:13-16.
4. Nemene la nyine troa kuca e tha kapa kö maine trongëne pena hnene la ka ini Tusi me easë la hnei angeic hna inin?
4 Ame itre xa ijin, tre, jole nge hmitre koi itre atr troa nuetrij la itre thiina me aqane waiewekë i angatr. (2 Kor. 10:5) Nemene la nyine troa kuca e tha kapa kö maine trongëne pena hnene la ka ini Tus la hnei angeic hna inin? Nyipi ewekë tro sa nue kowe la Wesi Ula i Akötresie me uati hmitrötr i Nyidrë troa huliwane la mekune me hni ne la ka ini Tusi me easë. (1 Kor. 3:6, 7; Heb. 4:12) The iuku kö, e jole kowe la ka ini Tusi me easë troa trotrohnine maine trongëne la ketre ini qa hnine la Tusi Hmitrötr; ngo sisedrëne jë kö la ini. Catre pi së ini Tusi Hmitrötr koi angeic; tro kö angeice lai a amekötine la itre thiina me aqane waiewekë i angeic.