Xatuane Jë La Itre Hnainin Troa Nyiqaane Me Xomiujine La Ini Tus
1 Ame la kola nyiqaane cainöje trootro hnene la itre hnainin, maine jë tro angatr a nango xou troa hane nyiqaane me xomiujin la ini tus. Tro sa xatua angatre tune kaa troa hetre hni ne ajan kowe la cainöje celë ka sisitria?—Mat. 24:14; 28:19, 20.
2 Nyiqaane cainöje pë hë la hnainin hna thaa bapataisone petre kö, nge nyimu hane hë angeic xomi ini qa ngöne la Ini Ne Cainöj Qaathei Akötresie. Ame la ini hnei angeic hna kapa matre troa hnëkën me cile fë la itre xötreqa, tre troa ixatua troa akökötren thei angeic la atrein ini; celë hi ka nyipi ewekë lai kowe la “ate kuci huliwa ka pë nyine ahmahman, kola thawa hnyawa la wesi ula ka nyipici.”—2 Tim. 2:15.
3 Inine Jë Jëne La Tulu: Hmaloi la aqane inine Iesu la itretre drei nyidrë; hna jëne la ini ka hmaloi me tulu ka lolo. Öni nyidrë: “Tro ha cei tune la nöjei ate ka inamacane memine la ate ini angat.” (Luka 6:40) Nyipi ewekë fe tro epuni a xome la tulu i Iesu ngöne la epuni a cainöj. Maine troa öhnyi epuni hnene la hnainin e amamai tulu troa cainöj, tro hë angeic a trotrohnine laka troa hetre ini tus e hna catre iwai hmaca.
4 Qaja jë kowe la hnainin ka hape, ame la kola nyiqaane ini tus memine la ketre atr, tre thaa nyipi ewekë kö troa qaja atrune pala ha la aqane troa ini tus. Maine tro ju hi a amamane la aqane kuca ngöne la caas maine lue paragaraf qa hnine la itus. Troa xome la itre mekun nyine ixatua ngöne la götrane 3 ne la Huliwa Ne Baselaia celë.
5 Maine ijij, hëne jë la hnainin troa ce tro me epun maine ketre trejine pena ka maca troa ini tus memine la itre xan. Maine jë tro angeic a hane hamë mekun ngöne la ketre paragaraf maine ketre xötre pena. Haawe, tro hë la hnainin a goeën me inine la aqane troa xomiujine hnyawa la ini tus. (Ite edomë 27:17; 2 Tim. 2:2) Qaja aloinyi angeice jë, me ithanatan la aqane tro angeic a kökötre ngöne la götrane cili.
6 Maine tro sa inine la itre ka xötrei cainöj troa itretre inin la Wesi Ula i Akötresie, tro hë angatr a atrein kuca la “huliwa ka loi,” ene la troa nyiqaan me isa xomiujin la ini tus. (2 Tim. 3:17) Drei la madrine ka tru e tro sa ce huliwa me angatr, troa catre hnim me könën la itre atr ka hape: “Ame la ate ajan, xome gufane jë la timi ka mel”!—Hna ama. 22:17.