Aqane Xatua Së Hnene La Ini Tusi Ne La Ekalesia
1. Tune kaa la aqane xatua së hnene la faifi lao icasikeu ne la wiik?
1 Faifi lao icasikeu së ngöne la wiik, nge isapengöne catre itre ej isa ala caas ngöne la aqane isa xomi iujine itre ej, memine la isa aliene itre ej. Ngo, ka nyipi ewekë asë itre eje göi troa xatua së “tro sha imekunekeune mate troa aciane la ihnimi me ite huliwa ka loi” the së. (Heb. 10:24, 25) Nemene la itre xaa ixatua hne së hna kapa qa ngöne la Ini Tusi Ne La Ekalesia?
2. Nemene la itre thangane ka loi hna kapa qa ngöne la hna icasikeu hnene la ka ala xalaithe hi ngöne la ini tus?
2 Ixatua Troa Kökötre Ngöne La Ua: Xalaithe hi la itre atr ka sine la ketre ini tus, hune la etrune la itre atr ka sine lo itre xaa icasikeu ne la ekalesia. Ene pe thaa jole kö troa akökötrene la aqane imelekeu së memine la itre trejine ne lai ini tus, nge ketre qeqene ixatua lai ngöne la ua. (Ite edomë 18:24) Hane kö epuni thele troa atre la itre atrene asë la ini tusi epun, maine jë troa sipo angatre troa ce cainöje me epun? Ketre, kola aijijëne la atre thupëne la ini tus jëne la icasikeu cili, troa atrepengöne la aqane mele ne la itre trejine isa ala caas ngöne lai gurup, me hamëne la ixatua ka ijije koi isa ala caas.—Ite edomë 27:23.
3. Tune kaa la aqane xatuane hnene la ini tus, la itre hnainin matre tro angatr a hmalahnine troa sine ej, me hane qeje mekune e cili?
3 Hane kö epuni könëne la itre hnei epuni hna etid memin troa hane sine lai ini tus? Hapeue lo itre atr ka hetre hni ne aja, nge ka nango cile hnö pe troa sine la itre icasikeu ka tru, maine jë tro pena angatr a hmalahnine troa sine la ketre icasikeu ka ala xalaithe hi la itre atren, nge hna hnen ngöne la ketre hnalapa ne la ketre trejin. Hnene laka keukawahnin la ijine cili, ene pe thaa jole kö kowe la itre thöth, me itre ka xötrei traqa troa hane qeje mekun. Nge pine laka, ala xalaithe hi la itre atrene la ini tus, nyimutre catre kö la itre ijine ka ijije koi së troa hane qeje mekun, me atrunyi Iehova.—Sal. 111:1.
4. Nemene la eloine la ini tus?
4 Hna pune hnen la itre ini tus ngöne la teritoare ne la ekalesia, matre thaa jole kowe la itre trejine troa sine itre ej. Ngacama thaa ijije kö kowe la itre trejine asë troa sine la ini tus gaa easenyine la hnalapa i angatr, ngo ame pe, e tro sa sine la ini tus hna athipe koi së, tre, thaa nanyi kö hune la troa sine la itre xaa icasikeu ne la ekalesia. Ketre, hnë ka ijije fe la hna ini tusi troa icasikeu qëmekene troa cainöje trootro.
5. Tro sa kapa tune kaa la ixatua troa cainöje qaathene la atre thupëne la ini tus?
5 Ixatua Troa Cainöje Trootro: Kola thele hnene la atre thupëne la ini tus troa xatuane la itre trejine isa ala caas, matre tro angatre a cainöje lapaa, me hetre thangane la hna cainöj, me kepe madrine qa ngön. Qa ngöne lai, angeice a catre troa ce huliwa memine la itre trejine asë ne la gurup, me hamëne la ixatua ka ijije koi isa ala caas ngöne la nöjei götrane la huliwa ne cainöj. Maine epuni a öhnyi ejolene la ketre götrane la huliwa ne cainöj, tune la troa kuci vizit, loi e troa thuemacane la atre thupëne la ini tusi epun. Maine jë tro angeice a wange la ketre atre cainöje ka maca hnine la ini tus matre troa ce huliwa me epun. Troa maca hnei epuni ngöne la epuni a inine la Tusi Hmitrötre kowe la itre atr, e hnei epuni hna wangatrune la aqane hamë ini hnene la atre thupëne la ini tus ngöne la kola xomiujine lai icasikeu cili.—1 Kor. 4:17.
6. Pine nemene matre loi e tro sa thele troa kepe thangane hnyawa la ini tus?
6 Drei la manathithi hna kapa qa ngöne la Ini Tusi Ne La Ekalesia! Kola xatua së hnene la hna hnëkëne celë matre tro sa cile catre ngöne la itre itupathe hne së hna melëne enehila.—Sal. 26:12.