Aqane Tro La Itretre Thupën La Ini Tus Ne La Ekalesia a Amamane La Ihnimi Angatr
1 Hna eköth la itre Ini Tus Ne La Ekalesia matre “ijij troa trotrohnine hnyawa me xatua angatr isa ala caas, itre atren la Ini Tus troa kökötr ngöne la götrane la ua. . . . Celë hi hatren la ihnimi Iehova, memine la aja ka eje thei Nyidrë troa thupëne hnyawa la nöje i Nyidrë.” (om g. 75; Is. 40:11) Nyipiewekë la hnëqa ne la atre thupëne la Ini Tus, ene la troa hamën la nyipi ixatua koi angatr isa ala caas itre atren la Ini Tus.
2 Ngöne La Ijine Ini Tus: Pine laka hna thawa acon la itre gurup ngöne la itre Ini Tus, haawe, thaa jole kö kowe la atre thupëne la ini tus, troa atre hnyawa la itre atren asë la gurup. (Ite edomë 27:23) Nyimu ijin mina fe troa ce me itre trejin, e qëmeken maine thupen la icasikeu ngöne la nöjei wiik. Ame ngöne la treu, atreine hi tro nyidrë a ithanata memine la nöjei atren lai gurup. Jën lai Ini Tus, troa thaa jol kowe la itre atren la ini tus, troa easenyi nyidrë ngöne la angatr a cile kowe la itre itupath, maine ngöne pena la angatr a aja ixatua.—Is. 32:2.
3 Kola tupath hnene la atre thupëne la ini tus troa xatuan asë la itre atren la gurup, troa hamë mekun ngöne la ijine etid. Ame la ketre aqane tro nyidrë a kuca, tre, ene la troa kuca la etid, cememin la hni ka loi, me ithanata amenyikeny. (1 Thes. 2:7, 8) Nyidrëti a thel la itre aqane troa kuca, matre troa hamë mekun hnene asë hi la itre atren la icasikeu, a tune mina fe la itre thöth. Maine ka lapa thaup la itre xan troa sa, maine jë tro nyidrëti a canga wai angatr me hamën la itre xaa hnepe ixatua koi angatr, ene la troa ce wang me angatr matre troa e la ketre xötr, maine troa qeje mekun pena ngöne la ketre paragaraf. Tro fe nyidrëti a amaman koi angatr, la aqane troa hamë mekun thenge la hnei angatr hna atrein.
4 Maine drikona la ka xatuan la atre thupëne la ini tus, tro la atre thup a nue angeic troa hane xomiujin la ini thupene la lue treu. Kola aijijën la atre thup troa pane goeën la drikona, me thele troa hane hamën koi angeic la itre mekun nyine ixatua. Drei la ketre mekun ka lolo, göi troa xatuan la itre trejin matre troa kökötr lolo la aqane tro angatr a hamën la ini!—Tito 1:9.
5 Ngöne La Hna Cainöje Trootro: Ame la ketre hnëqa ka tru ne la atre thupëne la Ini Tus, tre, ene la troa elemeken la huliwa ne cainöje trootro. (Num. 27:16, 17) Nyidrë a kuca matre troa ce cainöj memine la itre atren la gurup, me catre troa xatua angatr asë, matre troa hetre madrine i angatr ngöne la huliwa ne cainöje trootro. (Efe. 4:11, 12) Maine nyidrëti a ajan troa eatrëne lai, loi e tro nyidrë a thele troa ce huliwa memine la itre atren la Ini Tus, ketre me ketre. Nyidrëti fe a ce huliwa memine la atre thupën la huliwa ne cainöj, matre troa wang la itre ka ajan troa kökötr ngöne la itre xaa hnepe götran ne la cainöj, ene pe tro angatr a hane kapa la ketre ixatua qaathen la ketre atre cainöj, ka maca troa tro fë la maca ka loi.
6 Ceitun Me Ketre Atre Thupë Mamoe Ka Ihnim: Kola hane wangatrune mina fe hnene la atre thupëne la ini tus, la itre ka thatrein troa akökötren la aqane cainöje i angatr, qa ngöne la itre jole ka eje ngöne la mele i angatr. Loi e troa xecie hnyawa koi nyidrë ka hape, atre hnyawa hi la itre trejine cili lo hna amekötin, ene laka, kola nue angatr troa hane hamë rapor, ngacama 15 mn la hna kuca ngöne la treu; hna hnëkëne lai, thatraqan la itre ka ngazo mecin, maine ka eatr angazony, matre kösë kolo hi a kuca la hna atrein. (Troa amekötin hnene la Kometr Ne La Huliwa Ne Cainöj Ne La Ekalesia, la itre trejin hna ahnithe kow lai mekune cili.) Nyidrëti fe a hane wangatrun la itre atren la gurup ka nanazij matre thaa cainöje hë, me thele troa xatua angatr troa ce cainöje hmaca memine la ekalesia.—Luka 15:4-7.
7 Drei la ole së kowe la aqane wangatrunyi së me hnimi së hnene la itretre thupëne la itre ini tus! Hetre eloin la angatr a isa nyipi ewekë së isa ala caas, ngöne laka, kola xatua së matre tro sa “traqa kowe la ce hni ngöne la lapaun . . . , me kowe la tulu ne la etrune la tiqa i Keriso.”—Efe. 4:13.