Loi e Tro Nyipunie a Xatuan La Atre Thupëne La Ini Tusi Nyipunie
1 Nyimutre la itre manathith hna kapa hne së isa ala caas, qa ngöne la itre Ini Tus Ne La Ekalesia. Hne së hna ithanatane hë ngöne lo treu hnapan, la aqane troa xome hnyawa hnene la atre thupëne la Ini Tusi Ne La Ekalesia, la hnëqa i angeic. Ngo nemen la nyine tro sa kuca matre troa xatua angeic, me hane kepe thangane lai, hne së isa ala caas me hnei itre xane fe?
2 Troa Sine Pala Hi Ngöne La Nöjei Wiik: Pine laka, xalaithe hi la itre atren la ini tus, haawe ka nyipi ewekë catr e tro sa sin la icasikeu cili. Loi e eje the së la ajan, troa sin pala hi la ini tus ngöne la nöjei wiik. Nyipi ewekë fe tro sa traqa ngöne la traem hna sa, matre thaa jol kowe la qatre thup troa nyiqaan la icasikeu, ngöne la hawa hna amekötin.—1 Kor. 14:40.
3 Itre Mekun Nyine Ithuecatr: Ame la ketre aqane troa hane ixatua, tre, ene la troa hnëkë hnyawa, me hane hamën la itre mekun nyine ithuecatr kowe la itre xan. Ka sisitria catre kö la itre mekun ka qejepengöne hi la caa ewekë, nge kolo fe lai a xatuan la itre xan troa hane qeje mekun. Thaa ka nyipi loi kö e troa thel troa qaja asë la itre mekun ne la ketre paragaraf. Maine kola ketr la itre hni së hnene la ketre mekun, loi e tro së a hane ce thawa fe la mekune së, matre itre xaa ithuecatr ka lolo ngöne la easë a ithanatan la ketre mekun.—1 Pet. 4:10.
4 Maine epuni la ka e la itre paragaraf, loi e troa wanga atrune la hnëqa cili me thel troa e hnyawa, matre troa kepe thangane ka loi hnene la itre atren la gurup. Hetre eloin me madrin hne së hna kapa qa ngöne laka, hna e hnyawa.—1 Tim. 4:13.
5 Troa Ce Cainöj Memin La Gurup: Hna hnen la itre icasikeu göi cainöje trootro ngöne la itre hnë ini tus, nge troa xatuan la atre thup ngöne la angeic a elemeken la huliwa ne cainöj, e hne së hna hane sajuën la itre hna amekötine cili. Loi e troa wanga atrun la itre hna amekötine cili, ceitun me itre ijine troa acatren la aqane imelekeu së memine la itre trejin me easë, nge troa hane ithuecatr koi angatr.
6 Itre Rapor Ne Hna Cainöj: Ame la ketre aqane troa xatuan la atre thup, tre, ene la troa canga hamën la itre rapor ne hna cainöj ngöne la pune treu. Troa hamën mekötin koi angeic, maine tro pena a kuiën e hnine la kees hna hnëkën thatraqane lai, hnine la Uma ne Baselaia. Tro la seketere a xome lai keesi cili, matre troa xawan asë la itre rapor ne hna cainöj hna hamën koi angeic, hnene la itretre thupëne la itre ini tus.
7 Tro ha madrin atraqatr la aqane ce huliwa së, memin la atre thupëne la Ini Tus Ne La Ekalesia. E hune la nöjei ewekë asë cili, loi e xecie hnyawa koi së laka, tro Iehova a ‘ce memin la aja ka eje the së.’—Fil. 4:23, MN.