Ini Tus Ne La Ekalesia—Pine Nemene Matre Ka Nyipi Ewekë Eje Koi Së
1. Nemene ekö la qaane la Ini Tus Ne La Ekalesia?
1 Ame lo macatre 1895, hna hëne ekö la Itre Temoë i Iehova ka hape, Itretre Inine La Tusi Hmitrötr, nge ame itre gurupe ne ini, tre hna hëne itre eje ka hape Itre Gurupe ne kaqa ne lai göi troa ini Tusi Hmitrötr. Nge hna nyitrepene la itre ini cili hune la itre Volim hna hape “ Cercle de l’aurore ” (gurupe ne kaqa ne lai). Thupene lai, hna hëne la itre icasikeu cili ka hape, Itre gurupe ne itretre Berea göi troa inine la Tusi Hmitrötr. (Ite hu. 17:11) Hna hnen la itre icasikeu cili ngöne la itre hnalapa ngöne la ketre hej ka ijije kowe la itre atrene la gurup, nge hna tuluthe hi la etrun. Itre icasikeu lai, laka kolo pë hë a hëne enehila la itre icasikeu cili ka hape Ini Tus Ne La Ekalesia.
2. Nemene la nyine tro sa kuca matre tro sa hane “ce iakeukawany” ngöne la ijine ini tus?
2 Ithuecatr Me Ixatua: Pine laka xalaithe hi la itre atrene la gurup ne ini tus, haawe, nyimutre la itre ijine ka ijije kowe la itre atrene troa hane qaja amamane la lapaune i angatr. Ame la thangane lai, tre, “troa ce akeukawanyi [së] . . . , hnene la ce lapaune shë.”—Rom. 1:12.
3, 4. Tune kaa la aqane troa xatua së hnene la hna amekötin, ene la ini tus, troa kuca la huliwa ne cainöje së?
3 Maine tro sa goeëne hnyawa la aqane hamë ini hnene la atre thupëne la ini, tre, tro lai a xatua së troa ‘thawa hnyawa la wesi ula ka nyipici.’ (2 Tim. 2:15) Loi e troa goeëne hnyawa me inine la aqane qaja atrune nyidrë, la itre xötre ne la Tusi Hmitrötr ka nyitrepene la itre mekune hna hamën. Maine ijije kowe la itus hna ce wang, loi e tro nyidrë a amamane hnyawa la itre mekune ka tru jëne la revizio nyine nyipun, nge tro hi a xome la Tusi Hmitrötr. Tro la tulu ka lolo hnei nyidrë hna hamën, a xatua së troa kökötre ngöne la aqane tro sa hamë ini ngöne la huliwa ne cainöj.—1 Kor. 11:1.
4 Thaa tro hmekuje kö la atre thupëne la ini a xomiujine la ini tus e nöjei wiik, tro fe nyidrëti a elemekene la huliwa ne cainöj. Loi e tro nyidrëti a ce huliwa memine la atre thupëne la huliwa ne cainöj, me hnëkëne la itre nyine kuca thatraqane la huliwa ne cainöj. Tro nyidrë a xatuane la nöjei atren la gurup matre troa eatrën la hnëqa së asë, ene la troa cainöjëne la maca ka loi me troa inine la itre atr.—Mat. 28:19, 20; 1 Kor. 9:16.
5. Nemene la ixatua hne së hna troa isa kapa jëne la ini tus?
5 Loi e troa eje thene la atre thupën la ini tus la ajane troa xatua angatr isa alacaas itre atren la gurup, ngöne la götrane la ua. Tro nyidrëti a amamane la aja cili ngöne la itre icasikeu ne la ekalesia, me ngöne la nyidrëti a ce cainöj memine la itre xaa trejin ngöne la itre hnalapa trootro. Loi e tro fe nyidrë a xome la itre ijine troa hamë ithuecatr ngöne la götrane la ua, kowe la itre trejine ngöne la itre hnalapa i angatr. Loi e tro asë hi së a easenyine la atre thupëne la ini tus, ngöne la easë a aja ixatua, matre tro nyidrëti a hamëne koi së la itre eamo ngöne la götrane la ua.—Is. 32:1, 2.
6. (a) Qa ngöne laka ala xalaithe hi la itre atren la itre gurup ngöne la kola icasikeu, haawe, tune kaa la aqane acatrene la lapaune ne la itre trejine ngöne la itre xaa nöje ka tru? (b) Nemene thangane hnei epun isalacaas hna kapa qa ngöne la ini tus?
6 Loi e Tro Sa Ithuecatrekeu: Ame ngöne la itre nöje ka wathebone la nöje i Akötresie troa hmi, ke isa ala xalaithe la itre atren la itre gurup ngöne la angatr a icasikeu. Hna qaja hnene la ketre trejin ka hape: “Ngacama hna wathebone la itre huliwa ne la itre Keresiano, ngo ame pe tre atreine pala hi huni troa kuca la itre icasikeu huni ngöne la wiik, isa ala 10 me 15 la itre atren la itre gurup. Hne huni hna kapa jëne la itre icasikeu la trengecatr ngöne la götrane la ua, qa ngöne laka easë a ce inine la Tusi Hmitrötr me porotrik memine la itre trejin. Easë a hane isa porotrikën la isa aqane cile huti së ngöne la nyipici, ene pe kola xatua së troa atrehmekune laka caasi hi la hne së hna isi kow.” (1 Pet. 5:9) Epi tro së a ithuecatrekeu hnene la hna catre sajuëne la hna hnëkëne thatraqa së, ene la Ini Tus Ne La Ekalesia.—Efe. 4:16.