Itre Eloine La Gurupe Ne Cainöje Trootro
1. Nemene la itre eloine la easë enehila ngöne la isa gurupe ne cainöje trootro, nge ka mama ekö ngöne la easa sine la Ini Tusi Ne La Ekalesia së?
1 Hapeu, mekune pala hi nyipunieti lo itre eloin, lo easë ekö a sine lo Ini Tusi Ne La Ekalesia? Tha ala nyimu catre kö së ngöne lo isa gurup së, nge ketre, lolo hi ke tha tune kö lo easa icasikeu ngöne la uma ne baselaia së. Celë hi ka aijijë së ekö troa atrepengöne hnyawa la itre trejine ne la gurupe së, me itö ithuecatrekeu ngöne la götrane la ua. (Ite edomë 18:24) Nge ketre, pine laka, atrepengö së hnyawa ha hnene lo atre xomiujine la Ini Tusi ne la gurupe së, haawe atreine nyidrë troa isa hamëne koi së la itre ixatua ka ijij. (Ite edomë 27:23; 1 Pet. 5:2, 3) Casi fe hi la itre eloine lo Ini Tusi Ne La Ekalesia së ekö, memine la itre eloine la itre gurupe ne cainöje trootro enehila.
2. Nemene la nyine tro sa mekune troa kuca matre tro sa imajemikeu hnyawa memine la itre atrene la isa gurupe së ne cainöje trootro, nge matre tro sa itö ithuecatrekeu ngöne la götrane ua?
2 Xomi Mekune Jë: Kola nango ceitu la etrune la itre atrene la itre gurupe ne cainöj trootro enehila, memine la etrune lo itre atrene lo itre gurup ne Ini Tusi ekö. Ame la easa “ce cate” ngöne la huliwa ne cainöj, tre kolo fe a acatrene la cas i së. (Fil. 1:27) Ala ije hë la itre hnei nyipunieti hna cainöje memin ngöne la gurupe i nyipunie? Tro fe kö nyipunieti a ‘atrune’ la itre xan e kuhu itre hni nyipunie, ngöne la huliwa cili? (2 Kor. 6:13) Ka loi fe la troa hane hëne la ketre trejine ka sine la gurupe së, göi troa ce sine la Hmi Ne La Hnepe Lapa së, maine göi troa ce xeni pena. Ame ngöne la itre xa ekalesia, hnene la itre gurupe ne cainöje trootro hna mekune la qatre thup ka traqa troa iwai, me hë nyidrë troa hane ce xeni me angatr ngöne la ijine hna isa sa hnene la itre gurupe koi nyidrë. Maine patre pi hë nyidrë, ngo ame pe, tro kö angatr a traqa itronyi ngöne lai drai hna sa, göi troa ce xeni me ithuecatrekeu.
3. Nemene la itre ewekë hna kuca hnene la itre qatre thup, göi troa wange la itre gurupe ne cainöje trootro?
3 Maine nyipici laka, a lu a itronyi pe hi së ngöne la wiik göi troa icasikeu, ngo ame pe, qa ne pala hi la itre qatre thup troa wange la itre ka cainöj. Qa ne la itretre thupëne la itre gurup troa hamë ithuecatre me inine la itre atrene la isa gurupe i angatr. Maine tha ase petre kö lo atre thupëne la gurupe i nyipunieti ithanata me nyipunie göi troa ce cainöje me nyipunie, sipo nyidrëti jë troa ce huliwa me nyipunie. Ketre ame la atre thupëne la huliwa ne cainöj, tre qa i nyidrëti troa hane sine la icasikeu ne la huliwa ne cainöje ne la itre gurup; e ca treu, ca gurup. Ame ngöne la itre ekalesia ka co, pine laka tha tru kö la itre gurupe ne cainöje trootro, tre ma loi e troa a lu a wange itre eje ngöne la macatre. Maine ijiji nyipunie, epi troa kuca matre tro fe nyipunieti a hane sine la huliwa ne cainöje ngöne la ijine nyidrëti a traqa troa wange la gurupe i nyipunie.
4. (a) Nemene la itre hna kuca göne la itre icasikeu thatraqane la huliwa ne cainöj? (b) Pine nemene matre nyipi ewekë troa wange maine ijije troa nue la hnalapa së göne la itre icasikeu ne la huliwa ne cainöj?
4 Hetre eloine la troa icasikeu ngöne la isa gurupe ne cainöje trootro e nöjei mecixeni me sabath. E nyimu hnë icasikeu hë, tre tha nanyi menu kö qa ngöne hnalapa së, nge ketre tha nanyi menu kö qa cili hnë icasikeu, kowe la itre götrane hnë tro sa cainöje ngön. Qa ngöne lai, ijije hi troa canga thewe qa ne la itre ka cainöj, matre aijijë angatre troa canga tro kowe la götrane hnë tro angatr a cainöje ngön. Nge ketre, hmaloi hi kowe la atre thupëne la gurupe troa wange hnyawane la itre atrene la gurupe i nyidrë. Ame itre xa ijin, maine jë loi e troa ce amë la lue gurup, göi troa icasikeu. Maine kola traqa itronyi la itre atrene la ekalesia asë ngöne la pane mecixeni ne la treu, maine thupene la hna inine lo La Tour de Garde pena, tre loi e troa tro kowe la isa gurupe së matre hmaloi kowe la atre thupëne la gurupe së troa canga thewe huliwa së me nyipune hnei thith.—Wange ju lo itre mekune hna eköhagen, hna hape “Ijiji Nyipunieti Kö Troa Nue La Hnalapa i Nyipunie?”
5. Maine nyipici laka, pë hë Ini Tusi Ne La Ekalesia, ngo nemene la nyine tro pala hi sa atrehmekun?
5 Maine nyipici laka pë hë Ini Tusi Ne La Ekalesia, ngo ame pe hetre hnei Iehova pala hi hna kuca göi troa xatua së troa eatrëne la aja i Nyidrë. (Heb. 13:20, 21) Pëkö hne së hna hane pë ewekë. (Sal. 23:1) Nge nyimutre la itre manathithi hne së hna kapa qa ngöne la hna sine la gurupe ne cainöje trootro. Maine tro sa hane xomi mekune ngöne la huliwa së, me “tran’ atrun,” haawe “tru fe la [hne së] hna menue.”—2 Kor. 9:6.
[Iatr ne la götran 6]
Ijiji Nyipunieti Kö Troa Nue La Hnalapa i Nyipunie?
Ame ngöne la itre xa ekalesia, tru catre la itre gurupe ne cainöj, ngo tha ijije kö la etrune la itre hnalapa hna nue göne la itre icasikeu thatraqane la huliwa ne cainöj. Celë hi kepine matre hna ce amë la itre xa gurupe ngöne la hnë ka cas. Ame la itre icasikeu thatraqane la huliwa ne cainöj, tre ketre hna amekötine lai hna xome hnene la ekalesia. Haawe, maine tro sa nue la hnalapa së thatraqane lai, tre ketre manathithi ka tru lai hne së hna kapa. Ijiji nyipunieti fe kö troa hane nue la hnalapa i nyipunie? The mekune kö laka, tha nyipi hnalapa kö la hnalapa i nyipunie. Qanyine kö la itre qatre thupe troa goeëne la götrane hnei nyipunieti hna lapa ngön me itre xa ewekë ju kö, matre axeciën thenge la itre hna amekötin, maine ijije hi maine tha ijije pena, tune lo aqane kuca i angatr ekö, göne lo Ini Tusi Ne La Ekalesia. Maine nyipunieti a hane ajane troa nue la hnalapa i nyipunie, hane ju qaja kowe la atre thupëne la gurupe ne cainöje i nyipunie.