Icasikeu Ka Hetre Enyipiewekën
1. Nemene la enyipiewekëne la icasikeu qëmekene troa cainöj?
1 Hnei Iesu ekö memine la ala 70 hna pane icasikeu qëmekene troa cainöje trootro. (Luka 10:1-11) Hnei nyidrëti hna thuecatrei angatr me amekunë angatr ka hape, tha angatre kö a huliwa cas, ke ce angatre me Iehova, “Joxu ne la meledrai.” Nyidrëti pë hë a hnëkë angatre jë fe, me upi angatr troa isa tro “ala lue.” Ame enehila, kolo mina fe a hamë ithuecatr koi së, me hnëkë së, me thewe qa së, la easa icasikeu qëmekene troa cainöj.
2. Ije menetr ne tro sa icasikeu qëmekene troa cainöje trootro?
2 Ame enehila, traqa koi 10 maine 15 lae menetr ne easa icasikeu, ke easa pane treqene la kola thewe qa së me thue sinatronge së, me thith. Ngo ame hë e Eiperem, tro ha saze: tro pe hi a faif maine seven lae menetr ne icasikeu. Ngo maine kola icasikeu hnene la itre gurup ne cainöj thupene la hna icasikeu hnene la ekalesia asë, ke loi e troa ahopatrën catrën, ke easë mina hi lai a ase ini Tusi Hmitrötr. Kola ahopatrëne matre qea la ijine tro sa cainöj. Ke maine ase hë la itre pionie me itre xa trejine nyiqaane cainöj, haawe loi e tro hi a ahopatren, matre tha tro kö a qea la hna thupa la cainöje i angatr.
3. Troa eköthe tune kaa la icasikeu matre hmaloi kowe la itre trejine troa canga huliwa?
3 Ame la aqane troa eköthe la itre icasikeu ne cainöje trootro, tre troa ahmaloeën. Kola hape, troa isa icasikeu hnene la isa gurup, matre easenyi koi së la hnë tro sa icasikeu, memine la götrane hnë tro sa cainöje ngön. Ketre, matre hmaloi kowe la ka cilë mekene la gurup troa thewe huliwa me wang la ka nyipi ewekë kowe la itre atrene la gurup i angeic. Qa ne la lapa ne la itre qatre thup troa wang la ka loi kowe la ekalesia. Nge ame la kola troa nyipun, tre loi e tro pë hë a thithi nge isa atre hë së la hnë cainöj së me sinatronge së.
4. Hnauëne laka tha tro kö sa wang acone la icasikeu ne cainöje trootro?
4 Ka Sisitria La Icasikeu Cili: Icasikeu lai hna kuca thatraqane la itre ka cainöj; celë hi kepine matre, ala xalaithe hi la iatren. Ngo tha tro kö sa wang acone la icasikeu cili, me mekune ka hape, ketre neköi icasikeu ka co hi. Ame asë hi la itre icasikeu ne la ekalesia me icasikeu koi cainöje trootro, tre itre hna amekötine asë hi lai hnei Iehova nyine aijijë së troa ithuecatrekeu göne la itre huliwa ka loi. (Heb. 10:24, 25) Qa ngöne lai, loi e tro la ka cilë mekene la icasikeu a hnëkë hnyawa, matre atrunyi Iehova hnene la aqane tro fë angeice la hnëqa, nge atreine fe troa xatuane la itre trejin. Celë hi matre nyipi ewekë tro la itre ka cainöj a traqa troa sine la icasikeu cili.
Tha tro kö sa wang acone la icasikeu cili, me mekune ka hape, ketre neköi icasikeu ka co hi
5. (a) Tro la atre thupëne la huliwa ne cainöj a eköthe tune kaa la porogaram ne icasikeu? (b) Itre ijine ka ue la Keresiano föe a kuca la icasikeu ne cainöj?
5 Hnëqa Ne La Ka Cilë Meken: Troa canga thuemacane la trejin ka troa cilë hnëqa ngöne la ekalesia, matre hetre ijine i angeic troa hnëkë hnyawa. Tro fe a kuca tune lai kowe la ka troa cilë mekene la icasikeu ne cainöje trootro. Maine kola isa icasikeu hnene la itre gurup ne cainöj, troa cilë mekene hnene lai trejin atrekë gurupen, maine trejin ka ixatua. Ngo e ce traqa itronyi hë la itre gurup hnine la uma ne Baselaia, qane la atre thupëne la huliwa ne cainöje troa iëne la ka cilëne la icasikeu. Ma loi e troa isa hamë porogaramen la itre ka cilë mekene la itre gurup, me afedren la porogaram ngöne lo tabolo ne ithuemacany. Troa iëne hnene la atre thupëne la huliwa ne cainöj la trejine ka atreine cilëne la icasikeu, me ka atreine troa hamë ini me thewe huliwa kowe la itre trejin. Maine troa pë qatre thup maine drikona, maine ketre trejin trahmanyi göi troa cilëne la icasikeu, tro la atre thupëne la huliwa ne cainöj a iëne la ca Keresiano föe ka ijij troa kuca la icasikeu.—Wange ju lai mekune hna hape, “Maine Troa Kuca Hnene La Keresiano Föe.”
6. Pine nemene matre loi e tro la ka cilë mekene la icasikeu ne cainöj a hnëkë hnyawa?
6 Maine hna thue qa së ngöne la Ini Ne Cainöj Qaathei Akötresie maine Icasikeu Ne La Huliwa, tre tha tro kö sa wang ahmalohmaloeën, ngo tro pe a hnëkëne hnyawa. Tha tro kö së a treqene la easë ngöne la gojenyi ne tro kowe la uma ne baselaia matre nyiqaane hnëkë jë. Tro fe hi la atre cilë mekene la icasikeu ne cainöj a hmekëne lai. Nyipi ewekë tro angeic a hnëkë hnyawa, matre tro angeic a tro fë hnyawane la itre mekun, me afenesin la icasikeu ngöne la hawa hna sa, tune la aqane troa ahopatrën e Eiperem. Ketre, loi e tro angeic a canga sipo teritoar.
7. Nemene la nyine troa ithanatane hnene la ka cilë mekene la icasikeu memine la itre trejin?
7 Nyine Troa Ce Ithanatan: Hnene laka tha ceitu kö la itre teritoare së, matre tha ka pexeje kö la itre ithuemacany hna hamëne koi së hnene la hlue ka nyipici. Ngo hane pe lai itre xa ixatua ka mama ngöne la götrane hna ati ëjen ka hape, “Ame hë la kola icasikeu ne cainöj, ce ithanatane ju la.” Ame la kola icasikeu, tre troa kuca tune lo easa ithawakeune la itre mekun. Ijije fe troa kuci iamacany maine amamane pena la ketre video qa ngöne jw.org, nyine amamai së la aqane troa cainöj. Tro la ka cilë meken a mekune ngöne la angeic a hnëkë, la ithuecatr nyine tro angeic a hamën kowe la itre trejin, me hnëkë angatr troa cainöj.
Tro la ka cilë meken a mekune ngöne la angeic a hnëkë, la ithuecatr nyine tro angeic a hamën kowe la itre trejin, me hnëkë angatr troa cainöj.
8. Nemene la nyine troa ce wang ngöne la itre icasikeu ne cainöj e Mecixen me Sabath?
8 Ame e Mecixen, tre easa tro fë Ita Ne Thup me Réveillez-vous! Ngo hetre itre xan e easë ka cainöj e Mecixen, ngo tha ka hane kö cainöje ngöne la wiik, matre ma thëthëhmine hë angatr lo itre aqane cainöj hnei angatr hna inine ngöne la heji ne Hmi Ne La Hnepe Lapa. Hane hi lai kepine matre loi e tro la ka cilë mekene la icasikeu a ithanatane hmaca lo tulu ka mama ngöne la icetröne la Huliwa Ne Baselaia. Maine pena, troa wang la aqane troa amexeje la ketre nuvel, maine ketre feet, maine ketre ewekë pena ka traqa, matre thue aja kowe lai atr troa kapa la zonal, ke ihmeku memine lai mekun hna ithanatan. Nge tha tro kö a thëthëhmine troa nyipune hnene la hnying, matre hetre nyine ithanatan ngöne la kola troa iwai hmaca. Maine hetre itre trejine hë ka hamëne la zonale nyine troa tro fë ngöne la treu cili, tro la ka cilë mekene la icasikeu a sipo angeic troa qeje pengöne la hnei angeice hna kuca, matre nyine ithuecatre koi itre xan. Ame e Sabath, tre ma tro la ka cilë mekene la icasikeu a ithanatane la aqane troa kuca tune lai memine la ketre itus nyine troa tro fë ngöne la treu. Maine pena, ijije fe troa wange la aqane troa tro fë lo sine itus Maca Ka Lolo me Drei Akötresie Jë, me Ini Tusi Hmitrötr, ke ijije hi troa tro fë la itre sine itus celë ngöne la nöjei drai.
9. Nemene la nyine troa ce ithanatan e Mecixen me Sabath lo itre ijine campagne së?
9 Maine easa tro fë pepa ne ihë maine tarak ka hnyipixe ngöne lo itre ijine campagne e Mecixen me Sabath, tro la ka cilë mekene la icasikeu a ithanatane la aqane troa ce hamëne lai pepa ne ihë maine tarak memine la lue zonal. Maine pena troa qaja la hna kuca hnene la itre xa trejin, nge ka amamane la enyipiewekëne la troa tro fë pepa ne ihë maine tarak ka hnyipixe.
10, 11. Nemene la enyipiewekëne kowe la itre ka cainöj troa canga hnëkë?
10 Hnëqa Ne La Itre Ka Cainöj: Hetre nyine tro la itre ka cainöj a kuca matre tro loi la icasikeu ne cainöj. Maine tro angatr a isa hnëkë ngöne la ijine hmi ne la hnepe lapa, tro hë angatre lai a hnëkëne la itre mekune nyine troa ce thawa memine la itre xa ka troa sine la icasikeu ne cainöj. The thëthëhmine kö canga xom la itre zonale me itre itus qëmekene troa tro kowe la hna icasikeu ne cainöj, matre tha tro kö a aluzi traem.
11 Canga traqa pi qëmekene troa nyiqaane la icasikeu ne cainöj. Ka majemine së lo canga traqa ngöne la itre drai ne icasikeu ne la ekalesia. Ngo, e tro sa traqa hmiitr e ijine icasikeu ne cainöj, tro së lai a ajolëne la trejin. Drei? Ene la ka cilë meken, ke nyidrë la ka thewe qan la iatrene la icasikeu. Maine ala xalaithe hi la ka traqa kowe la icasikeu, tro hi nyidrëti lai a hamë angatr la götrane hmekune la etru i angatr. Maine pëkö loto i itre xan nge nanyi la hna cainöj, tro nyidrëti lai a ce ami angatr me itre trene loto. Maine kola cainöj ngöne la itre götrane hna xouen, tre tro nyidrëti a ce amë la itre Keresiano föe memine la itre Keresiano trahmany. Maine ka kucakuca itre xan me trene sine mec, tro nyidrëti lai a upi nyudren kowe la itre götrane gaa thegölia, me itre hnalapa gaa pë i escaliers. Nge tro nyidrëti a ce amë la itre ka xötrei cainöj memine la itre ka majemi hë. Ngo maine tro la ketre e easë a traqa hmitr, tre easë hmaca lai a nyi huliwane lai ka cilë mekene la icasikeu. Tro hmaca nyidrëti lai a ijene lo itre hna ce amë panën, matre nyi sinetronge së, me thue huliwa së. Nyipici hetre ijine laka, hetre sipu kepin matre easë a traqa hmitr. Ngo maine ka majemine pala hi së traqa hmitr, tro sa thele ka hape, ma hne së hna nango wange sixane la icasikeu ne cainöj, maine pena qa ngöne laka, tha hne së kö hna canga hnëkë?
12. Maine easa mekune troa canga thele sinatro, nemene la nyine tro sa kuca?
12 Hnene la itre xan e easë hna thele sinatro qëmekene troa sin la icasikeu, nge itre xan a treqene troa thue sinetronge i angatr. Maine ka majemine së thele sinatro, loi e tha tro kö sa ce tro pala hi memine la ca trejin. (2 Kor. 6:11-13) Loi e tro sa hane huliwa memine lo itre ka xötrei cainöj, matre troa xatua angatr troa maca. (1 Kor. 10:24; 1 Tim. 4:13, 15) Drenge hnyawa ju la götrane hna upi së troa cainöje ngön, me itre xa hna amekötine fe. Ame hë la kola umuth la icasikeu, trongëne jë hë la itre hna amekötin, the saze teritoare hmaca kö maine sinatro pena.
13. E tro easë asë a isa kuci qan, nemene hë la thangan?
13 Ame la kola fenesi hnene lo ala 70 lao hna up hnei Iesu, angatr a bëeke ce memine la hni ka “madin.” (Luka 10:17) Nyine amamane ka hape, loi la thangane qa ngöne la hnei angatr hna icasikeu me Iesu qëmekene troa cainöj. Ceitune hi lai memine la itre icasikeu ne cainöj enehila. Maine tro easë asë a isa kuci qan, tro hë së lai a xomi trenge catr, me hnëkë, me eatrëne la hna upi së, ene la troa “anyipicine kowe la nöjei nöj.”—Mat. 24:14.