Itre Icasikeu Göi Cainöje Trootro
1. Pine nemen matre loi e troa eje the së la ajan troa tro loi la huliwa ne cainöje trootro?
1 Hnei Iesu hna amamai tulu ngöne la huliwa ne cainöjëne la Baselaia, me eköthe eje hnyawa. Tune mina fe enehila, laka, eje thene la itre ka elemekene la huliwa ne cainöjëne la Baselaia e cailo fen, la ajane troa tro loi fe la huliwa cili. Kola mama la aja cili jëne la itre icasikeu göi cainöje trootro hna kuca hnene la itre ekalesia e cailo fen, matre troa isa eköthe la itre gurup göi troa cainöj.—Mat. 24:45-47; 25:21; Luka 10:1-7.
2. Nemene la hna thele ngöne la itre icasikeu göi cainöje trootro?
2 Ketre Hna Amekötin Ka Lolo: Hna kuca la itre icasikeu göi cainöje trootro, matre troa hamë ithuecatr me aqane troa cainöj, me itre ixatua kowe la itre ka troa cainöj. Maine jë kola nango ithanatane la topik ne la drai, e ka ihmeku la itre mekune memine la huliwa ne cainöj. Ame itre xaa ijin, kola amexeje hmaca la itre mekune qa hnine la Huliwa Ne Baselaia, me itus Comment raisonner, maine pena qa hnine la itus École du ministère, matre troa hnëkëne la itre atr ka sine lai icasikeu cili troa cainöje la drai cili. Ijije mina fe troa kuca la ketre iamacany ka amamane la aqane troa tro fë la ketre itus. Qëmekene troa nyipune hnene la thith, loi e tro la itre atrene la icasikeu a isa atre la itre sine ce tronge i angatr memine fe la teritoare hna troa cainöje ngön. Thaa tro pi kö la itre icasikeu cili a sasaithe la 15 lao menetr; thupene lai, loi e tro la itre atr asë a tro ngöne la teritoar.
3. Drei la atrekë hnëqan troa eköthe la itre icasikeu göi cainöje trootro?
3 Hna Eköthe Tune Kaa La Itre Icasikeu Cili? Hnëqa ne la atre thupëne la huliwa ne cainöj, troa eköthe me elemekene la itre icasikeu göi cainöje trootro. Ame la itretre thupëne la itre gurup maine pena la itre drikona, tre, hnëqa i angatr troa ce tro memine la itre gurupe i angatr ngöne la nöjei mecixen me sabath. Maine jë tro la itre xaa qatre thup maine itre xaa drikona a ce cainöj me angatr ngöne la itre drai ne la wiik. Kola ce huliwa la itretre thupëne la itre gurup memine la atre thupëne la huliwa ne cainöj, matre tro pala hi a hetre teritoare ne la gurupe i angatre e nöjei mecixen me sabath. Ame ngöne la wiik, tro la atre thupëne la huliwa ne cainöj a hnëkëne matre pëkö ejolene kowe la itre ka elemekene la gurup troa cainöje trootro.
4-6. (a) Nemene la aja hna thele troa eatrëne jëne la itre icasikeu göi cainöje trootro, göne la teritoare ne la ekalesia? (b) Nemene la nyine troa wange hnyawa, matre troa mama la itre ewekë ka sisitria göne la itre icasikeu cili?
4 Ekaa Nge Eue La Troa Kuca La Itre Icasikeu Cili? Loi e troa amë la itre icasikeu cili thene la itre trejine ka lapane la teritoare matre troa huliwane hnyawa ej hnene la ekalesia. Hna kuca fe la itre Uma Ne Baselaia thatraqane la huliwa cili. Nyimutre la itre ekalesia ka kuca e nöjei Sabath la ketre icasikeu göi cainöje trootro ngöne la Uma Ne Baselaia, thupene la cainöj kowe la ka alanyim me Ini ne la zonal La Tour de Garde. Loi e troa kuca matre thaa nanyi menu kö la teritoare kowe la itre trejine troa canga traqa. Qa ngöne lai, loi e tro pala hi a thupëne matre ka hmaloi pala hi kowe la itre trejine troa icasikeu me huliwane hnyawa la teritoar.
5 Loi e troa sa la hawa ka ijij matre troa nyiqaane la itre icasikeu cili, memine la eqeane la aqane xomiujine itre ej ngöne la wiik, thenge la pengöne la teritoar. Maine jë troa xatua së hnene la itre hnying celë matre troa axeciëne la hnë memine la drai ka ijij troa kuca la itre icasikeu göi cainöje trootro.
6 Ekaa ngöne la teritoare gaa aja ixatua? Nemene la hawa ka ijij göi troa cainöje ngöne itre hnalapa trootro? Ijije kö troa kuca la ketre icasikeu e hej göi troa cainöj ngöne itre hnalapa trootro maine pena troa wange hmaca la itre atr? Loi e troa afedrene ngöne tablo la itre hna hnëkëne amë thatraqane la huliwa ne cainöj. Eje thene la itretre cainöjëne la Baselaia, la ajan troa haöthe la teritoare hna hamë angatr, matre tro fe angatr a hane qaja tui Paulo aposetolo, ka hape: “Pa hmaca kö qânge ngöne la ite nöje celë.”—Rom. 15:23.
7. Nemene la hnëqa ne la atre xomiujine la icasikeu göi cainöje trootro?
7 Aqane Troa Xomiujine La Itre Icasikeu Göi Cainöje Trootro: Ame la trejine hna ahnithe kow troa xomiujine la icasikeu cili, tre, angeic a amamane la metrötre i angeic kowe la hna amekötine cili qaathei Akötresie hnene la hna hnëkë hnyawa. Loi e troa nyiqaane la itre icasikeu cili ngöne la hawa hna sa me hetre ini hna xom qa ngön; ketre, thaa tro pi kö itre ej a sasaithe la 10 maine 15 lao menetr. Qëmekene la icasikeu, loi e eje thene la atre xomiujin la itre teritoare hna troa cainöje ngön hnene la gurup. Ngacama thaa nyipi ewekë kö troa treqene la itre ka traqa pë hë e thupen, ngo ixatua ka tru e troa ami maca pe ngöne la götrane hnë troa cainöj. Thupene la icasikeu, loi e tro asë hi la itre ka cainöj a canga tro ngöne la teritoar. Maine hna eköthe hnyawa la icasikeu nge nyimu ini hna kapa qa ngön, tro ha xatuane la itre trejine troa kuca hnyawa la huliwa ne cainöje i angatr ngöne la drai.—Ite edomë 11:14.
8. Tune kaa la aqane tro la itre ka sine la itre icasikeu göi cainöje trootro a ce huliwa memine la itre ka xomiujine itre ej?
8 Loi e Troa Sine La Itre Icasikeu Göi Cainöje Trootro: Nyipi ewekë catre la troa ce huliwa. (Heb. 13:17) Maine ijij, tro la atre eköthe la gurup a ce cainöje memine la ketre trejine ka aja sine ce huliwa. Loi e troa sine la itre icasikeu cili hnene la itretre cainöj ka macaj, matre troa xatuane la itre ka xötrei cainöj memine la itre trejine ka aja ixatua. Ame la itre ka kapa troa isa ami angatr me ketre, tre, nyimutre la itre ewekë ka loi hnei angatr hna troa kuca. (Ite edomë 27:17; Rom. 15:1, 2) Loi e tro asë hi së a catre troa traqa ngöne la hawa hna sa. Maine easa metrötrëne la hna amekötine hnei Akötresie me wanga atrune la itre trejine me easë, tro hë sa kuca la hne së hna atrein ngöne la götrane cili.—2 Kor. 6:3, 4; Fil. 2:4.
9. Tune kaa la aqane tro la itre pionie a sajuëne la hna amekötine cili?
9 Ixatua Hna Hamën Hnene La Itre Pionie: Nyipi ewekë catre la ixatua hna hamën hnene la itre pionie ngöne la itre icasikeu cili, ke, angatr a ithuecatre kowe la itre ka cainöj. Nyipici laka nyimutre la itre hnëqa hna xome hnene la itre pionie. Ngacama angatr a xomiujine la itre etid me wange hmaca la itre atr, ngo maine jë angatr a eatrëne o drai la itre hnëqa i angatr ngöne la fami me ngöne la hna huliwa i maseta. Qa ngöne lai, thaa hna musinëne kö la itre pionie troa sine o drai la nöjei icasikeu göi cainöje trootro hna eköthe hnene la ekalesia. Ngo ijije tro angatr a sine la itre xaa icasikeu ngöne la nöjei wiik. Ketre, kola inine la trejine hnene la itre icasikeu cili, nge kolo mina fe a xatua angatr hnene la hna melëne hnei itre pionie ngöne la hna cainöj, me aqane macaje angatr ngöne la ua. Kola hane maca la itre pionie ngöne la hna cainöj hnene la aqane catre cainöje i angatr. Ketre ewekë lai nyine ce thawa. Angatr a amamai tulu jëne la aqane catre cainöje i angatr me catre sine me qeje mekune ngöne la itre icasikeu göi cainöje trootro. Ketre, atraqatre la hni ne ole ne la itre trejin kowe la aqane catre angatr troa sine me qeje mekune ngöne la itre icasikeu cili.
10. Pine nemen matre nyipi ewekë tro la nöjei ka cainöjëne la Baselaia a catre sajuëne la hna amekötine celë hnene la hni angatr ka pexej?
10 Ceitune hi la pengö së me Iesu memine la itretre dreng, laka, atraqatre la huliwa hna kuca ngöne la hna cainöj ngöne itre hnalapa trootro. Hna eköthe la itre icasikeu cili matre troa ithuecatrekeu me amacane la itre trejine kowe la huliwa ne cainöj. Loi e tro la nöjei ka cainöjëne la maca ka loi a sajuëne la itre hna amekötine celë hnei Akötresie. (Ite hu. 5:42; 20:20) Epi tro asë hi sa catre sajuëne la itre icasikeu cili hnene la hni së ka pexej. Maine tro sa ujë tune lai, tro hë sa kapa la itre manathithi qaathei Iehova, me amadrinëne la hni Iesu lo Atre Eatrongë së, ngöne la easa catre cainöjëne la maca ka loi ne la Baselaia i Akötresie.—Mat. 25:34-40; 28:19, 20.