Kola Sa La Itre Hnyinge i Nyipunie

◼ Nemen la itre ithuemacany hna troa hamën ngöne la itre icasikeu göi cainöj trootro?

Ame la alien la icasikeu göi cainöj trootro, tre, ej a xatua së troa wangatrun la huliwa celë—ene la huliwa ne cainöj. Ngo, loi e tro la atre xomiujin lai icasikeu a hnëkë hnyawa, nge troa hamën la itre trenge ithanata nyine ithuecatr, ka ihmeku memin la huliwa, nge ka hetre thangan ka loi koi së. Maine ka ihmeku la topik ne la drai memin la huliwa ne cainöj, tre, loi e troa e ej, me ce ithanatan, thaa tro pe a aqean. Ngo, loi e troa mama hnyawa ngöne la icasikeu cili la enyipi ewekën la huliwa ne cainöj, memine la ixatua thatraqan asë la itre trejin ka troa cainöj matre atrein tro angatr a eatrën la huliwa ne cainöj la drai cili.—2 Tim. 4:5.

Ijij tro fe a ithanatan la itre mekun ka ixatua ngöne la Huliwa Ne Baselaia, matre troa atrehmekun la itus nyine tro fë, me aqan troa tro fë ej. Ngöne la drai ne tro fë zonal, tre, troa amacan la aqan troa tro fë zonal, hna xom la itre mekun qa ngön la hna cinyihan hna hape, “Tro Qeje Nemen Göi Itre Zonal.” Ame koi itre xaa nyine tro fë, tre, ijij troa xom la caas maine lue aqane nyiqaan ithanata ngön la itus Comment raisonner ka ihmeku memin la hna hnehengazon hnene la itre atren la teritoare së. Loi e tro fe a ithanatan la ketre götran la huliwa ne cainöje së, maine amacan pena, tune la aqan troa huliwan la Tusi Hmitrötr ngöne la itre hnalapa trootro, maine aqan troa nyiqaan ini Tusi Hmitrötr me ketre atr, maine pena la aqan troa xupexatuan la aja thene la ketre atr.

Thaa tro kö a sasaith la 10 maine 15 lao menetr la eqean la icasikeu göi cainöj trootro, nge ngöne la itre menetr cili, tre kolo fe lai a isa thewe sine cetron, me isa hamë teritoar, me ce thith. Ngöne la kola isa tro, tre, loi e tro la nöjei trejin asë a isa atre la sine cetro i angeic, me götran hna troa cainöj ngön, nge loi e tro angatr a isa canga tro ngöne la isa teritoare i angatr. Pine laka thaa qea kö la icasikeu, haawe, nyipi ewekë tro la nöjei trejin a canga traqa ngön la traem hna sa. Maine hetre icasikeu ne la ekalesia thupen la icasikeu göi cainöj trootro, tune la Etid ne La Tour de Garde, tre, loi e troa ahopatren ej. Thaa nyipi ewekë kö troa ce ithanatan la topik ne la drai, pine laka ase hë ce wang la ketre mekene tus.

Loi e troa canga ahnith kowe la itre trejin trahmany ka maca matre troa xomiujin la nöjei icasikeu göi cainöj trootro. Maine pëkö trejin ka ijij troa elemeken la ketre drai ne icasikeu, tre, loi e tro la itre qatre thup a up la itre sör hna bapataison troa kuca, e maine pë pala ha trejin trahmany. Tro la sör a lapa, nge nyiqaan ce ithanatan memine la itre trejin la topik ne la drai maine itre mekun ka ihmeku memin la huliwa ne cainöj, nge thaa tro kö a aqean la itre mekun. Tro eahlo a petr.

Itre ijin ka lolo catr koi së la itre icasikeu göi cainöj trootro, ke, itre ej a ithuecatr koi së matre atreine së troa eatrën hnyawa la huliwa ne cainöje së. Maine tro la ka xomiujin la icasikeu cili a ketre hnëkë hnyawa, haawe, tro fe hë la nöjei ka sin a kepe thangan ka loi.