Hetre Madrine Ka Tru e Troa Ce Cainöj
1 Ame ngöne la Iesu a upe lo itretre drei nyidrë ka ala 70 troa cainöj, hnei nyidrëti hna ini angatr la nyine troa qaja, me thawa luën la itre gurup, me athipe la itre götran hnë tro angatr a cainöj. Celë fe itre ewekë lai ka hamë madrine koi angatr. (Luka 10:1-17) Ketre tune mina fe enehila, kola ixatua hnene la itre gurup ka ce cainöj, matre troa nyi jiane huliwa, me hnëkën, xatuan la nöje i Akötresie troa cainöj.
2 Kola Elemeken Hnene La Itre Qatre Thup: Ketre hnëqa ka tru catr hna xom hnene la itre qatre thup, ene la troa xatuan la itre trejine asë troa catre cainöjëne pala hi la maca ka loi. Kola cilën hnene la atre thupën la huliwa ne cainöj la itre hna amekötin göi cainöj ngöne la itre drai ne la wiik. Hnëqane la atre thupën la ini tus troa isa hnëkën thatraqane la gurupe i angeic, la itre nyine troa kuca göi cainöj ngöne la mecixeni me sabath.
3 “Alolone Jë Me Amekötin”: Loi e tro la trejin hna iën troa xomiujine la icasikeu göi cainöj a nyiqaan ngöne la traem hna sa, nge troa xome la 10 maine 15 lao menetr thatraqane lai. Loi e tro angeic a thawa la itre gurup matre troa cainöj, me isa athip koi angatr la itre götran hna troa cainöje ngön (e thaa kuca kö hnene la itretre thupëne la itre ini tus, tune la hna qaja e caha hun) qëmekene tro angeic a nyipun hnene la thith. Kolo lai a neën wanga troa cacaxenyi ngöne la hnë troa cainöj, nge qaja angazone jë la huliwa së hnene la itre atr. Ka ihmeku lai memine la eamo hna hamën hnei Paulo, kola hape: “Kuca alolone jë me amekötine la nöjei ewekë asë.” (1 Kor. 14:40) Loi e tro asë hi la itre ka sin la itre icasikeu cili a kuca matre troa tro loi hnyawa itre ej, hnene la troa traqa ngöne la hawa hna sa, me ce huliwa memine la trejin ka elemeken la icasikeu, me canga tro kowe la hnë troa cainöj e ase hë thawa la itre gurup.
4 Loi e Tro Sa Caas Me Ce Huliwa: Lolo catr la troa ce cainöj la itre gurup, ke kola aijijë së troa hane atre la itre xaa atren la ekalesia. Ngacama thaa ka ngazo kö e troa canga iën la itre hne së hna troa ce cainöj memin, ngo tro mina fe a hetre thangane la itre icasikeu göi cainöje trootro koi së, e hne së hna treqen tro la trejin ka elemeken la icasikeu a ce ami së memine la itre xan. Maine jë troa ce ami së troa ce cainöj memine la ketre trejin hne së hna thatre hnyawa kö, ene pe kola aijijë së troa “atrune” la ihnimi së.—2 Kor. 6:11-13.
5 Jëne la itre gurup ne cainöj, kola ithuecatre koi së me aieasenyi së matre tro sa “ce huliwane la nyipici.” (3 Ioane 8) Catre pi së troa ce cainöj memine la itre gurup!