Itre Aqane Cainöjëne La Maca Ka Loi

HNEI Iesu Keriso hna nyipiewekëne la hnëqa i nyidrë. Hnei nyidrëti hna catre cainöjëne la maca ka loi ne la Baselaia i Akötresie, celë hi tulu ka lolo lai hnei nyidrëti hna hamëne kowe la itretre drei nyidrë. Hnei nyidrëti hna tro kowe la itre atr me ithanata me ini angatr ngöne la itre hnalapa i angatr, me ngöne la itre götrane gaa tru atr. (Mat. 9:35; 13:36; Luka 8:1) Hnei nyidrëti hna ithanata memine la itre xa atr, angatr isa ala cas. Hnei nyidrëti fe hna inine la itretre drei nyidrë ngöne la gaa co. Nge, hnei nyidrëti hna ithanata kowe la itre atr ka alanyimu catr. (Mar. 4:10-13; 6:35-44; Ioane 3:2-21) Tha hnei nyidrëti kö hna cile hnö troa akeukawane la itre ka drei nyidrë, me hamë mejiune koi angatr. (Luka 4:16-19) Hnei nyidrëti palahi hna thele troa cainöj, ngacama nyidrëti a ajan troa pane mano. (Mar. 6:30-34; Ioane 4:4-34) Ame ngöne la easa e hnine la Tusi Hmitrötr la itre aqane cainöje i nyidrë, eje hi laka, hetre aja së troa nyitipu nyidrë, tune lo ange aposetolo.—Mat. 4:19, 20; Luka 5:27, 28; Ioane 1:43-45.

² Tro sa ce wange la itre aqane tro la itre keresiano enehila a xome la huliwa hnei Iesu Keriso hna nyiqaane hë ekö, traqa koi 2 000 hë lao macatre enehila.

CAINÖJ NGÖNE ITRE HNALAPA TROOTRO

³ Kola öhne hnene la Itretre Anyipici Iehova la enyipiewekëne la troa cainöjëne la maca ka loi ngöne la itre hnalapa trootro. Hnene laka, hne së hna catre tro fë tune lai la maca ka loi, haawe, kola atre së hnyawa hnene la huliwa cili. Kola mama hnene la itre thangane lai laka, lolo catre la aqane cainöje celë ke, kola ketr la itre atr, itre milio la etrun ngöne la hnepe ijine ka xoxopatre hi. (Mat. 11:19; 24:14) Haawe, ame la huliwa ne cainöj ngöne itre hnalapa trootro, tre, celë hi aqane tro sa amamane la ihnimi së koi Iehova me kowe la nöjei atr.—Mat. 22:34-40.

⁴ Tha Itretre Anyipici Iehova kö la ka nyiqaane la huliwa ne cainöj ngöne la itre hnalapa trootro. Öni Paulo, hnei nyidrë hna inine la itre atr ngöne la itre hnalapa i angatr. Öni nyidrë kowe la itre qatre thup ne la ekalesia ne Efeso, ka hape: “Qane ngöne la drai hnapane lo traqa ni e Asia, . . . tha hnenge hna juetëne la kete ewekë ka nyipi, ngo hna amamane koi nyipunie me ini nyipunie qëmeke ne la nöj, me ngöne la kete uma me kete uma.” Matre jëne la aqane cainöje celë, me itre xa aqane ju kö, hnei nyidrëti “hna anyipicine koi angete Iuda, me angete Heleni fe, ka hape, troa ietra koi Akötesie, me lapaune koi Joxu shë Iesu Keriso.” (Ite hu. 20:18, 20, 21) Ame ngöne la ijine cili, hnene la itre joxu ne Roma hna ukune la itre atr troa thili koi idrola. Ketre, atraqatre la “qou [ne la itre atr ka alanyim] kowe la ite haze ngöne la nöjei ewekë asë.” Matre, nyipiewekë catr tro la itre atr a thele “la Akötesie Ate xupe la fene hnengödrai memine la nöjei ewekë asë ngön,” lo Atre “upe enehila la nöjei ate asë e cailo troa ietra.”—Ite hu. 17:22-31.

⁵ Ka nyipiewekë catre enehila troa canga cainöjëne la maca ka loi, pine laka, easenyi catre hë la pune la fene ka ngazo. Celë hi matre, loi e tro sa nue la trengecatre së enehila thatraqane la huliwa cili. Easa isine troa cainöj ngöne itre hnalapa trootro, nge pëkö ketre huliwa ka tun hna acil göi troa thele la itre atr ka ajane la nyipici. Ceitune hi la thangane la aqane cainöje cili, enehila memine lo hneijine i Iesu ekö me ange aposetolo.—Mar. 13:10.

⁶ Hapeu, nyipunieti kö a hane catre cainöje ngöne itre hnalapa trootro? Maine eje hi, epuni hi lai a amadrinë Iehova. (Ezek. 9:11; Ite hu. 20:35) Eje hi laka, tha ewekë ka hmaloi kö koi epuni la troa cainöj ngöne itre hnalapa trootro. Maine jë, hetre sine meci epun, maine pena tha drei epuni kö hnene la itre atr ne la teritoare i epun. Maine pena, hna wathebone la huliwa së hnei mus. Maine jë, nango jole koi epuni troa hane ithanata memine la itre atr hnei epuni hna thatre. Matre, e nöjei ijin epuni a tro troa cainöj ngöne la itre hnalapa trootro, kösë ketre hace ka tru koi epuni lai. Ngo the cile pi kö. (Eso. 4:10-12) Ame asë hi la itre trejin, trahmanyi me föe e cailo fen, angatr asë fe a hane cile kowe la itre jole cili.

⁷ Hnei Iesu hna sisinyi kowe la itretre drei nyidrëti ka hape: “Hana wang ini a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:20) Hnene la aqane sisinyi Iesu hna hamë trengecatre së matre troa eatrëne la huliwa së, ene la troa inine la itre atr. Loi e tro sa mekune tui Paulo, öni nyidrë: “Ateine ni troa kuca la nöjei ewekë asëjëihë hnei nyidëti ate aegöcatenyi ni.” (Filipi 4:13) Thele jë troa sine la itre hna hnëkëne hnene la ekalesia e nöjei wiik, göi troa cainöj ngöne itre hnalapa trootro. Tro epuni lai a hane hetre ixatua, me ithuecatr, e hna ce cainöj memine la itre xa trejin. Thithi jë matre troa hetrenyi la lapaune göi troa cile kowe la itre jol hnei epuni hna troa qëmeke kow, nge catre pi troa cainöjëne la maca ka loi.— 1 Ioane 5:14.

⁸ Ame ngöne la epuni a cainöjëne la maca ka loi kowe la itre atr, ijine hi lai koi epuni troa qaja la pengöne la mejiune i epun. (1 Pet. 3:15) Tro hë epuni a öhne trongëne la eisapengönene la itre atr ka mejiune kowe la Baselaia memine la itre ka tha mejiune kö. (Is. 65:13, 14) Tro fe epuni a madrine troa atre laka ‘ka hudrume la lai i nyipunie,’ tune lo hna ahnithe hnei Iesu. Ketre, tro fe hë nyipunie a madrine troa xatuane la itre atr troa atre Iehova, nge tro hë angatr a atre la nyipici ka troa tro xomi angatr kowe la mele ka epine palua.—Mat. 5:16; Ioane 17:3; 1 Tim. 4:16.

⁹ Hetrenyi la itre hna hnëkëne göi troa cainöj ngöne itre hnalapa trootro, e mecixen me sabath, me ngöne mina fe la wiik. Ame ngöne la itre götrane laka, jole troa öhne la itre atr ngöne la itre hnalapa i angatr ngöne la drai, hetre itre hna hnëkëne hnene la itre ekalesia göi troa cainöj e hej. Ka hmalahnine la itre atr troa kepe së e hnaipajö hej, maine e hejiheji pena, ngo nango jol e hmakany.

KOLA THELE LA ITRE KA HETRE HNI NE AJAN

¹⁰ Hnei Iesu hna upe la itretre drei nyidrë troa thele la itre ka hetre hni ne ajan. (Mat. 10:11) Ame ngöne la nyidrëti a thele la itre atr ka hetre hni ne ajan, tha hnei nyidrëti hmekuje kö hna cainöj ngöne la itre hnalapa trootro. Hnei nyidrëti hna cainöj ngöne la nöjei ijine ka ijij, itre ijine hna hnëkëne ju hë maine tha hna hnëkëne kö. (Luka 8:1; Ioane 4:7-15) Ame mina fe ange aposetolo, hnei angatr hna cainöj ngöne la itre götrane ka nyimutre.—Ite hu. 17:17; 28:16, 23, 30, 31.

¹¹ Ame la aja së fe enehila tre, ene la troa qaja la maca ka loi kowe la itre atr ka alanyimu catr. Kolo lai a hape, troa xötrethenge la aqane cainöje Iesu me itretre drei nyidrë ekö. Nge, tro fe a wangatrune la itre ewekë ka traqa ngöne la fen, memine la aqane mele ne la itre atr ngöne la teritoare së. (1 Kor. 7:31) Matre, loi e tro fe sa cainöj ngöne la gaa tru atr ne la teritoare së. (Ite hu. 20:20) Hetre thangane fe la ketre aqane cainöj ne la itre trejin, ene la troa wange la itre atr ngöne la götrane hnë huliwa i angatr. Ame ngöne la itre nöj ka nyimutre, lolo catre e troa cainöj e cahu gojeny, ngöne la itre park, hnë ami loto, maine itre xa götrane ju kö gaa hetre atr. Hnene la itre xa ekalesia hna ami laulau, maine présentoire ngöne la teritoare i angatr. Ketre, hna hnëkëne amë hnei Filial la huliwa ne cainöj ngöne la gaa tru atr thatraqane la itre traon ka tru, me sipone la ixatua ne la itre trejin ne la itre xa ekalesia. Matre, ame la itre atr ka patre ngöne la hnalapa i angatr ngöne la kola traqa hnene la itre trejin tre, kola ketri angatr ngöne la itre xa götrane hnene la maca ka loi.

¹² Ame la troa tro fë la lue zonal Ita Ne Thup me Réveillez-vous ! tre, celë hi ketre aqane cainöje ka lolo ngöne la gaa tru atr. Loi e tro sa ithanata hnyawa memine la itre atr cememine la hni ka menyik, me amexeje koi angatr la ketre jole ka eje ngöne la hneijine së, nge hna hane ithanatane hnine la zonale së. Loi e tro fe sa hamëne la itre xa itusi së. Nge thupene lai, loi e tro sa ce wang me angatr matre troa wai angatr ngöne la hnalapa i angatr. Tro epuni lai a öhne laka, ame la troa cainöje ngöne la itre gaa tru atr, celë hi ketre jëne troa akökötrene la aqane cainöje së.

¹³ Ngo ame la huliwa ne la itre keresiano enehila, tre, tha ene hmekuje kö la troa cainöjëne la maca ka loi. Maine epuni a ajan troa xatuane la itre atr, matre tro angatr a hane kapa la nyipici ka troa eatrongë së kowe la mel, loi e tro epuni a anyimua bëeke hmaca troa wange la itre ka hetre hni ne ajan, matre tro angatr a kökötr me macaj ngöne la nyipici.

ITRE IWAIHMACA

¹⁴ Hnei Iesu hna qaja kowe la itretre drei nyidrë, ka hape: “Tro nyipunie a anyipici ni . . . uti hë la cane la fene hnengödrai.” (Ite hu. 1:8) Ngo hna qaja fe koi angatr, ka hape: “Qa ngöne lai, tro jë nyipunie a inine la itre atr asë ne la nöjei nöj’ asëjëihë, . . . ini angatre jë troa trongëne la nöjei ewekë asëjëihë lo hnenge hna ahnithe koi nyipunie.” (Mat. 28:19, 20, MN) Hetre madrine fe hna kapa ngöne la huliwa i Iehova la kola kuca la itre iwaihmaca. Ame lo itre atr ka hetre hni ne ajan ngöne la kola xötrei iöhny, tro angatre lai a madrine troa kepe nyipunieti hmaca. Maine tro epuni a hamëne la itre xa ithuemacanyi qa hnine la Tusi Hmitrötr, tro epuni lai a acatrene la lapaune i angatr koi Akötresie. Ketre, tro epuni lai a xatua angatr troa trotrohnine la enyipiewekëne koi angatr troa atre Iehova. (Mat. 5:3) Maine hnei epuni hna hnëkë hnyawa me isa pui kowe la ketre ijine ka ijij, maine jë tro epuni a nyiqaane inine me angeic la Tusi Hmitrötr. Eje hi laka, ame la kola iwai hmaca, tre, göi troa nyiqaane ini Tus memine lai atr. Tha easë hmekuje kö a ‘traan’ la itre itine feja, ene la nyipici, ngo loi e tro fe sa ‘fie.’—1 Kor. 3:6.

¹⁵ Ame kowe la itre xan, ketre jole ka tru la troa iwai hmaca. Maine jë majemi hë epuni enehila troa tro fë la maca ka loi ngöne itre hnalapa trootro, nge hetre madrine i epun ngöne la aqane cainöje cili. Ngo ma nango jole pala kö koi epuni troa bëeke troa iwai hmaca me ce ithanatane la Tusi Hmitrötr. Ngo, tha tro pi kö epuni a xou. Ame ngöne lo xötrei, maine jë hnei epuni hna amë pe la ketre itusi kowe lai atr ka kepe epun. Haawe, tune kaa matre ce ithanatane me angeic la ketre mekun e hnine lai itus? Loi e tro epuni a hnëkë kowe lai. Maine epuni a öhne laka nango jole koi epun, sipone jë kowe la ketre trejine ka maca hnyawa troa ce tro me epun.

INI TUS

¹⁶ Hnei Filipo, ketre atre tro fë la maca ka loi hna hnyinge ngöne la ketre ijin, kowe la ketre atr ka e la Wesi Ula i Akötresie; öni angeic: “Trotrohnine hë nyipëti la hnei nyipëti hna e?” Nge önine la trahmanyi e sa ka hape: “Tro ni a ate tune ka e pëkö ate troa amekötine koi ni?” Kola qaja hnene la Ite Huliwa mekene 8, ka hape, hnei Filipo hna “amamane koi angeice la maca ka loi Iesu,” nge hna nyiqaane lai ngöne la xötre ne la Tusi Hmitrötr hnei angeic hna e. (Ite hu. 8:26-36) Thatre kö së la etrune la traeme hnei Filipo hna xome matre troa ithanata memine lai atr. Ngo eje hi lai laka, pexej la aqane qeje pengöne angeic la maca ka loi, matre tha jole ju kö kowe lai atr troa hane lapaun me sipone troa xome la bapataiso. Matre ketre atre drei Iesu Keriso fe hë angeic.

¹⁷ Ame enehila, hetrenyi la itre atr ka thatre la Tusi Hmitrötr. Matre loi e troa anyimua wai angatr me ini Tus me angatr koi itre wiik, me itre treu, maine ca macatre nge hetre munën, qëmekene tro angatr a hane lapaun me melën la itre hna amekötin matre ijiji angatre jë troa xome la bapataiso. Ngo tro lai a amanathithin la xomihni ahoeany memine la ihnimi ka ej thei epun, ngöne la epuni a xatuane la itre atr ka hni ka menyik troa hane nyihlue i Iehova, ke öni Iesu ka hape: “Sisitia la manathithi e troa hame hune la troa kapa.”—Ite hu. 20:35.

¹⁸ Troa hmaloi e troa ini Tus memine la itre atr, e hnei epuni hna xome la ketre itusi ne la Itretre Anyipici Iehova hna hnëkëne thatraqane lai. Maine tro epuni a xötrethenge la aqane ini Tusi koi epuni ekö, tro hë epuni a maca ngöne la aqane troa ini Tus me itre atr, me xatua angatr nyihlue i Iehova.

¹⁹ Maine epuni a aja ixatua matre troa nyiqaane maine xomiujine la ketre ini Tusi Hmitrötr, the cile kö troa ce ithanatane memine la ketre qatre thup maine ketre trejin ka maca ngöne la huliwa cili. Tro fe a xatua epun hnene la itre mekun hna hamën hnine la Pepa Nyine Huliwan, itre mekune lai hna iamacanyin ngöne lo ijine icasikeu. Mejiune ju koi Iehova, nge thithi fë jë koi Nyidrëti la aja i epun troa inine la Tusi Hmitrötr koi ketre atr. (1 Ioane 3:22) Thele jë troa ini Tus me ketre atr, e tröne lo itre ini Tus hnei epuni hna kuca hnine la hnepe lapa. E tro epuni a ini Tus koi itre atr, tro ha kökötre la madrine i epuni ngöne la huliwa ne cainöj.

EATRONGËNE JË LA ITRE ATR KA AJAN KOWE LA ORGANIZASIO I IEHOVA

²⁰ Ame la itre atr hne së hna ini Tusi memin, nge hne së hna xatuane troa nyihlue i Iehova, angatre hë a hane nyi atrene la ekalesia. E tro la itre hnainin a atrehmekune me ce huliwa memine la organizasio, tro ha kökötre la lapaune i angatr, me macaj. Haawe, nyipiewekë tro sa ini angatr la aqane troa traqa kowe lai. Hetre itre video, memine la boroshür Itre Drei La Ka Kuca La Aja i Iehova Enehila? hna hnëkëne thatraqane lai. Troa xatua epuni hnene la itre xa ithuemacanyi hna hamëne ngöne la mekene 4 ne la itusi celë.

²¹ Ame ngöne la kola nyiqaane ithanatane la Tusi Hmitrötr memine la ketre atr ka ajan, loi e tro angeic a pane trotrohnine laka, hetre organizasio hnei Iehova hna xome enehila matre troa eatrëne la huliwa ne cainöj e cailo fen. Amamane hnyawa jë la enyipiewekëne la itre itusi së ka qejepengöne la Tusi Hmitrötr. Qaja jë fe la itre hna kuca matre hetrenyi jë itre ej, memine la aqane tro fë itre ej e cailo fen asë hnene la itre hlue i Iehova. Könëne jë la atr ka ini Tusi me epuni troa hane sine la itre icasikeu ngöne la itre Uma ne Baselaia. Qejepengöne jë la aqane trongëne la itre icasikeu, nge tro sai angeice jë kowe la itre trejin e cili. Loi e tro fe epuni a tro sai angeic kowe la itre xa trejin ngöne la itre ijine asabele. Ame ngöne la itre ijine cili, loi e tro la ka xötrei traqa a ketre sipu öhne la aqane ihnimi ne la itre hlue i Iehova, hatrene ka mama ne la itre nyipi keresiano. (Ioane 13:35) E tro palahi angeic a wangatrune la organizasio i Iehova, tro angeice mina fe a easenyi catre koi Iehova.

AQANE TROA HULIWAN LA ITRE ITUSI SË

²² Ame la itre pane keresiano, angatre hi lo itretre catre cainöjëne la Wesi Ula i Akötresie. Hnei angatr hna fejane la Itre Hna Cinyihan matre thatraqai angatr isa ala cas, nge göi troa inine itre ej hnine la itre ekalesia i angatr. Ketre, angatr a upe la itre atr matre tro angatr a hetreny. Tha tru menu kö la itre itusi hna fejan, celë hi matre angatr a nyipiewekëne catrëne itre ej. (Kol. 4:16; 2 Tim. 2:15; 3:14-17; 4:13; 1 Pet. 1:1) Jëne la itre masine nyine feja itus enehila, kola fejane hnene la Itretre Anyipici Iehova la itre Tusi Hmitrötr, itre milio la etrun, me itre itus ka qejepengöne la Tusi Hmitrötr, itre hadredre lao milio la etrun. Kolo fe a qaja la itre tarak, itre boroshür, me itre itus, me itre zonal, ngöne la itre qene hlapa ka nyimutre, traqa koi itre hadredr.

²³ Ame ngöne la epuni a tro fë la maca ka loi kowe la itre atr, thele jë troa huliwane hnyawane la itre itusi ka qejepengöne la Tusi Hmitrötr hna kuca hnene la organizasio i Iehova. Nyimu pengöne itus hna troa tro fë e nöjei treu ngöne la hna cainöje trootro. Ketre, loi e tro epuni a tro fë la itre zonal ngöne la nöjei ijin ne la treu, memine fe lo itre drai thatraqane lai. Pine laka hetre thangane koi epuni la hna e me inine la itre itusi ne la Itretre Anyipici Iehova, haawe, hetre aja i epun troa hane ce thawa memine la itre atr la itre hnei epuni hna inin.—Heb. 13:15, 16.

²⁴ Kolo palahi a elë la etrune la itre atr ka huliwane la Ëternet göi troa kapa la itre ithuemacany. Matre, ketre jia ne huliwa ka lolo catr la site së, jw.org, matre troa haöthe la fen hnene la maca ka loi. Itre atr e cailo fen a e me dreng la Tusi Hmitrötr me itre itusi së ngöne la itre hadredr lao qene hlapa jëne la ordinatöre i angatr. Ame lo itre atr ka xou troa ithanata me easë, maine ka mele pena ngöne la itre götrane tha hna ketre kö hnene la maca ka loi tre, ijiji angatre hi troa thele la pengöne la hmi së ngöne la hnalapa i angatr jëne jw.org.

²⁵ Haawe, loi e tro sa qaja amamane la site së jw.org ngöne la nöjei ijine ka ijij. Maine hetre atr ka hnyingë pengöne la hmi së, loi e tro sa canga amamane koi angeic la itre mekun ka sa la hnyinge i angeic jëne mobilis maine ordinatör. Maine hetre atr hne së hna iöhnyi memin, nge ka qaja la ketre qene hlapa, memine fe la qene hum, loi e tro sa amamai angeic la site së matre troa öhne la Tusi Hmitrötr, me itre itusi së ngöne la qene hlapa i angeic. Alanyimu la itretre cainöj ka nyiqaane ini Tusi memine la ketre atr ke, hna amamane la ketre video ngöne la site së.

CAINÖJ NGÖNE LA NÖJEI IJINE KA IJIJ

²⁶ Hnei Iesu hna qaja kowe la itre ka wangatrune la itre trengewekë i nyidrë, ka hape: “Nyipunieti la lai ne la fene hnengödrai. . . . Tune ju nyipunie ahudumenejë la lai nyipunie qëmeke ne la nöjei at, mate goeëne hnei angate la huliwa ka loi nyipunie; ame hna atrune la Tetetro i nyipunie e koho hnengödrai.” (Mat. 5:14-16) Hnene la itretre dreng hna nyitipu Iesu, matre kola mama thei angatr la itre thiina i Akötresie. Öni Iesu lo göi nyidrë: “Ini la lai ne la fene hnengödrai.” Hnei Iesu hna ahudrumene la “lai ne la mel” matre kepe thangane hnene la nöjei ka troa drei nyidrë, celë hi aqane amamane nyidrë la tulu kowe la itre keresiano.—Ioane 8:12.

²⁷ Paulo aposetolo mina fe la ketre tulu ka loi koi së. (1 Kor. 4:16; 11:1) Ame ngöne lo nyidrëti e Athena, hnei nyidrëti hna cainöj o drai ngöne la hna maketr kowe la itre atr hnei nyidrëti hna öhne e cili. (Ite hu. 17:17) Hna xötrethenge hnene la itre keresiano ne Filipi la tulu i nyidrë, matre öni nyidrë koi angatr ka hape, angatr a “hudume . . . tune la ite lai ne la fen,” e nyipine la “xöte ka qaliqali me ka ena.” (Fil. 2:15) Ame enehila, loi e tro sa thel matre troa hudrume la nyipici jëne la itre trengewekë së me itre huliwa së, ngöne la nöjei ijine easa qaja la maca ka loi. Eje hi laka, tro la aqane huliwa nyipici së me thiina ka meköti së a amamane kowe la itre atr ka hape, isapengö së kö memine la itre atr ne la fen. Nge, maine easa qaja la maca ka loi kowe la itre atr, tro hë angatr a trotrohnine la kepine matre isapengö së kö memine la itre xa atr.

²⁸ Nyimutre la Itretre Anyipici Iehova ka qaja la maca ka loi kowe la itre sine huliwa i angatr maine itre sine ini angatr, maine kowe la itre ka ti kar me angatr, maine pena kowe la itre atr hna iöhnyi memin e cahu hna tro. Ame itre xa ijin, loi e tro sa thel la itre ijine ka ijije matre troa ithanata kowe la itre ka ce ti he, maine ti avio me easë. Loi e tro sa isa hmekëne la itre ijine ka ijij matre troa nyijëne la ketre porotrike menu matre tro pena ha qaja la maca ka loi. Loi e tro palahi sa isa hnëkë hnyawa matre tha jole kö koi së troa cainöje kowe la itre atr ngöne la nöjei ijine ka ijij.

²⁹ E tro sa cainöjëne la maca ka loi kowe la itre atr ngöne la nöjei ijin, easë hi lai a atrune la Atre Xupi së memine la ëje i Nyidrë. Matre, e tro sa lapa mekune lai, tro palahi lai a hetre aja së troa cainöjëne la maca ka loi ngöne la nöjei ijin. Ketre, jëne tro fe së lai a xatuane la itre atr ka hni ka menyik troa hane atre Iehova, nge matre tro angatr a hane nyihlue i Nyidrë. Nge ketre, tro fe angatr a hetrenyi la mejiun, ene la mele ka tha ase palua kö hna troa kapa elanyi qa ngöne la hna lapaune koi Iesu Keriso. Ka tru koi Iehova la itre trengecatre hna kuca thatraqane lai, nge Nyidrëti a xome ceitune lai memine la kola huliwa i Nyidrë.—Heb. 12:28; Hna ama. 7:9, 10.

ITRE TERITOAR

³⁰ Ame la aja i Iehova, tre, troa cainöjëne la maca ne Baselaia e cailo fen, ngöne la itre traon uti fe hë la itre tribu. Celë hi matre, kola athip hnene la Filial ne la nöj kowe la itre ekalesia, me kowe mina fe la itre trejine ka mele ngöne la itre götrane ga nany, la isa teritoare i angatr. (1 Kor. 14:40) Ka ihmeku la aqane huliwa celë memine la itre hna amekötine hnei Akötresieti ekö ngöne lo hneijine i Iesu. (2 Kor. 10:13; Gal. 2:9) Pine laka kola kökötre nyimenyime la huliwa ne la Baselaia ngöne la itre drai tixenuë celë, haawe, nyipiewekë catre troa hnëkëne hnyawa la aqane troa thawa la itre teritoar, matre troa huliwan hnyawane itre ej hnene la ekalesia.

³¹ Qa ne la atre thupëne la huliwa ne cainöj troa hnëkëne la huliwa cili. Ijije hi troa nue kowe la ketre drikona troa xome la hnëqa ne troa thawa la itre teritoar, me troa waipengöne palahi la itre teritoar asë, me hnëkëne hmaca itre ej. Hetrenyi la lue pengöne teritoar, ene la teritoar ne la gurup me teritoar hna hamën koi ketre. Maine ka co hi la teritoar ne la ekalesia, nyipiewekë tro la itre atrene la gurup a cainöj ngöne la itre teritoar hna hamën kowe la atre thupëne la gurup. Nge, maine ka tru la teritoar ne la ekalesia, ijije hi troa isa hetre teritoar ne la itre ka cainöj.

³² E pë ju icasikeu hna acil göi troa cainöje trootro, nge maine jole pena troa tro kowe la götran hna cainöje ngön hnene la gurup, loi e troa hetre sipu teritoare i epun matre troa hetre götrane hnë tro epuni a cainöje ngön. Hnene la itre xa trejin hna sipo teritoar ka easenyi hi qa ngöne la hnë huliwa i angatr, nge angatr a cainöj ngöne la ijine xen, maine thupene la hna huliwa. Nge itre hnepe lapa a sipo teritoar ka easenyi qa ngöne la hnalapa i angatr matre troa cainöj e hej. Matre, e hetre teritoare ne la ketre trejin, tro angeice lai a huliwane hnyawane la traeme i angeic matre troa cainöjëne la maca ka loi. Eje hi laka, loi e tro fe a huliwane la itre teritoare cili ngöne la easa cainöj memine la itre atrene la gurupe së. Haawe, maine epuni a aja teritoare thatraqai epun, qaja jë kowe la atrekë huliwane la teritoar.

³³ Loi e tro la atr thupëne la gurup ka kapa la itre teritoar a thelejëne matre troa huliwane hnyawane itre ej. Ketre, tro fe a ujë tune lai hnene la itre trejin asë ka sipo teritoar thatraqai angatre kö. Kolo lai a hape, tro sa isine troa ithanata memine la ketre atr ngöne la nöjei hnalapa. Maine jë tro sa ketr la itre xa atr jëne tusi, maine telefon, maine hna cainöj koi angatr e cahu gojeny. Loi e tro la atre thupëne la gurup, maine itre trejin pena ka trene teritoar a isine troa huliwane lai koi 4 lao treu. Nge, e ase hë, troa thuemacane la trejin atrekë hnëqane la teritoar ka hape, ase hë huliwan, matre troa waipengöne la itre teritoar asë, me hnëkëne hmaca itre ej. Ijije hi tro la atre thupëne la gurup, maine itre trejin ka trene teritoar a lapa fë la teritoare i angatr göi troa huliwane hmaca, maine pena troa nue hmaca kowe la trejin atrekë hnëqane lai.

³⁴ Maine tro la itre atren asë la ekalesia a ce huliwa, haawe, tro ha huliwane hnyawa la teritoar. Ketre, tha tro kö së a itrongë pi ngöne la ca teritoar, wanga troa wesitre koi së hnene la itre atr. Aqane tro së lai a metrötrëne la itre trejin memine la itre atr ne la teritoar.

TROA CE HULIWA MATRE CAINÖJ KOWE LA ITRE ATR NE LA ITRE QENE HLAPA ASË

³⁵ Nyipiewekë tro la itre atr asë a atre Iehova Akötresie, memine la Hupuna i Nyidrë, memine la Baselaia i Nyidrë. (Hna ama. 14:6, 7) Hetre aja së troa xatuane la itre ka qaja la ketre qene hlapa ngöne la teritoare së, matre tro fe angatr a hane qaja la ëje i Iehova ke, jëne iamele hi lai. Nge ketre, aja së fe tro angatr a hane xetrën la atre ka hnyipixe. (Rom. 10:12, 13; Kol. 3:10, 11) Nemene la itre jol hne së hna cile kow, ngöne la easa cainöjëne la maca ka loi kowe la itre atr cili? Nemene la nyine tro sa kuca matre aijijëne la ka alanyim troa drenge la maca ka loi ngöne la qene hlapa hnei angatr hna trotrohnine hnyawa?—Rom. 10:14.

³⁶ Hna isa thawa la itre teritoare ne la itre ekalesia thenge la itre qene hlapa hna ithanatan. Matre, ame la itre götrane hna lapane hnene la itre atr ka nyimu qene hlapan, itre trejin qa ngöne la isa ekalesia a cainöj ngöne la götrane ka cas. Ame e cili, loi e tro la itretre cainöj a isa thel me cainöj kowe la itre atr ne la sipu qene hlapa i angatr. Kolo lai a hape, e tro sa cainöj ngöne la itre hnalapa trootro, tro sa tro fë hmekuje hi la itre itus ngöne la qene hlapa ne la ekalesia së. Tro së a tro sasaith la itre uma hna kuca hnene la itre ekalesia ka qaja la itre xa qene hlapa. Tro fe sa trongëne lai ngöne la easa tro fë lo itre pepa ne ihë ngöne lo nöjei macatre. Ngo, ame la easa cainöj ngöne la gaa tru atr, me ngöne la nöjei ijine ka ijij, tro sa cainöj kowe la nöjei atr asë, me hamë itus ngöne la nöjei qene hlapa.

³⁷ Ame itre xa ijin, thatreine kö la ekalesia ka qaja la ketre qene hlapa troa huliwane lapane la teritoare i angatr ke, nanyi palaha. Matre angatr a nue kowe la itre ekalesia e cili troa kuca asë la itre hnalapa. Loi e tro la itretre cainöj a isine troa tro fë la maca ne Baselaia kowe la itre atr ka qaja la ketre qene hlapa kö. E hetre atr ka ajan, loi e troa nue kowe la ekalesia ka icasikeu ngöne la qene hlapa i angeic troa wai angeic matre troa akökötrene la aja i angeic. Tro lai a ketr la itretre thupëne la huliwa ne cainöj ngöne la itre ekalesia. Matre, nyipiewekë tro angatr a ce huliwa matre troa tro loi la aqane huliwane la itre teritoar. Tro lai a aijijëne la nöjei atr troa dreng la maca ka loi, nge tha tro kö a isazikeu la aqane ce huliwane la teritoar wanga wesitre jë la itre atr e cili.—Ite edomë 15:22.

³⁸ Tune kaa e öhne jë së la ketre atr ka qaja la ketre qene hlapa kö? Tha tro kö sa mekune ka hape, tro pë hë la itretre cainöj ka qaja la qene hlapa i angeic a wai angeic. Loi e tro sa amamane la boroshür Une bonne nouvelle pour des gens de toutes nations, matre troa thel la qene hlapa i angeic, me cainöj koi angeic jëne lai. Hnene la itre xa trejin hna inine la itre aqane nyiqaane ithanata ngöne la ketre qene hlapa hna ithanatane ngöne la itre teritoar hnei angatr hna kuca lapan. Loi e tro sa amamane kowe la atr la nyine troa kuca matre tro angeic a e maine télécharger pena la itre itus ngöne la qene hlapa i angeic qa ngöne la site së, jw.org. Maine pena, tro sa tro fë koi angeic la itre itus ngöne la qene hlapa i angeic.

³⁹ Maine hetre aja thene la ketre atr, loi e tro sa thele la ketre trejin ka maca, nge ka ithanatane la qene hlapa i angeic. Ketre, loi e tro fe sa qaja koi angeic la hnen ne la hna icasikeu ngöne la qene hlapa i angeic. Maine angeic a ajane troa wai angeic hnene la ketre atr ka qaja la qene hlapa i angeic, loi e tro sa amamane koi angeic la aqane troa hamëne la aderesi angeic ngöne jw.org. Tro pë hë Filial a thel la ketre trejin e cili, maine ketre gurup, maine ketre ekalesia pena matre troa xatua angeic.

⁴⁰ Maine pë palaha trejin ka ithanatane la qene hlapa i angeic ka traqa koi angeic, tro palahi sa wai angeic. Ame itre xa ijin, tro la Filial a thuemacane la itre qatre thup ka hape, pëkö trejin hna öhne ka ithanatane la qene hlapa ne lai atr. Ame e cili, loi e tro sa isine troa wange palahi lai atr, me akökötrene la aja i angeic. E ijij, tro sa ini Tusi Hmitrötr me angeic, maine jë, jëne la ketre itus ngöne la qene hlapa i angeic. Maine tro sa xome la itre iatr me upi angeic troa e la itre xötr ka mama, tro hë angeice lai trotrohnine hnyawa la itre ini ka tru ne la Tusi Hmitrötr. Loi e tro la ketre atrene la hnepe lapa i angeic ka atre hnyawa la qene hlapa i angeic, memine la qene hlapa së fe, a ujëne koi angeic.

⁴¹ Maine easa ajane troa ea la atr ka ajan kowe la organizasio i Iehova, loi e tro sa könë angeic kowe la itre icasikeu së, ngacama tha tro kö angeice lai a trotrohnine asë la icasikeu. E kolo mina ha e la itre xötr, loi e tro sa xatua angeic troa thel itre ej hnine la sipu Tusi Hmitrötre i angeic, e hetrenyi ngöne la qene hlapa i angeic. E tro angeic a sine la itre icasikeu cememine la itre trejin, tro lai a acatrene la lapaune i angeic, nge tro angeice lai a kökötr ngöne la nyipici.

⁴² Maine nyimutre pi hë la itre atr ka qaja la ketre qene hlapa ngöne la teritoar ne la ekalesia, loi e tro la lapa ne la itre qatre thup a sipo Filial matre troa hetre pré-groupe e hnine la ekalesia. Ame la pré-groupe kola qaja la itretre cainöj ka ala xalaithe hi, nge ka cainöj ngöne la ketre qene hlapa kö. Nge pëkö qatre thup me drikona ka maca göi troa xomiujine la icasikeu e nöjei wiik ngöne la qene hlapa cili. Ame itre xa ijin, tro la itre qatre thup a wang maine troa kuca la icasikeu tune la Cainöj Koi Nöjei Atr, maine Ini Ne La Ita Ne Thup ngöne la qene hlapa cili. Maine pena, tro angatr a thele jëne matre tro la pré-groupe a dreng maine goeëne la icasikeu hna kuca hnene la ekalesia ngöne la qene hlapa cili.

⁴³ Hetrenyi la foa lao hna amekötine göi troa eköth la ketre gurup ka qaja la ketre qene hlapa: (1) Tru la itre atr ka ajan, nge troa elë la etrune la itre atr ka troa nyihlue i Iehova ngöne la qene hlapa cili. (2) Hetre itretre cainöj ka ala xalaith ka atre la qene hlapa cili, maine pena ka inin ej. (3) Hetre qatre thup, maine drikona ka maca ka elemeken, me xomiujine e nöjei wiik la icasikeu ngöne ma qene hlapa cili, nge (4) hetre aja ne la lapa ne la itre qatre thup troa kapa ngöne la ekalesia la gurupe cili. E hna eatrëne la itre hna amekötine celë, tro la lapa ne la itre qatre thup a cinyanyi kowe la Filial, me qaja la pengöne la gurup. Nge, tro fe angatr a sipone matre tro hë la ekalesia a thupëne lai gurup cili. Troa xome la qatre thup maine drikona ka elemeken la gurup ne la qene hlapa cili, ceitu me atre thupëne la gurup, maine atre ithupë ka inyihnai.

⁴⁴ Ame la pane igötranene la icasikeu Mel Me Huliwa Ne Cainöj Ne La Keresiano hna troa kuca e nöjei wiik hnene la gurup ne la ketre qene hlapa, tre, ene la Ini Tusi Hmitrötr Ne La Ekalesia. Hna kuca la itre icasikeu cili ngöne la ketre hnahag ka co ne la Uma ne Baselaia. Ame hë e thupen, e hetre qatre thup, maine drikona ka ithanatane la qene hlapa cili, tro hë angeic a ceamen, nge tro ha athipi qa ne la itre hnainin matre troa cile fë ngöne la hnahag ka co. Tro fe la itre qatre thup a ce axeciën matre troa hetre itre xa icasikeu, tune la Cainöj Koi Nöjei Atr memine la Ini Ne La Ita Ne Thup. Loi e tro fe a hnëkëne thatraqane la gurup la itre icasikeu göi troa cainöje trootro. Tro la itre atrene asë la gurup a ce huliwa memine la aqane ameköti ewekë ne la lapa ne la itre qatre thup ka thupëne la gurup. Tro la itre qatre thup a hamëne la itre ixatua ka ijij, me sikusikune troa hamëne la hna ajane hnene la gurup. E traqa jë la atre thupëne la sirkoskripsio, me ce huliwa memine la gurup ngöne la wiik ne iwai angeic kowe la gurup ne la ekalesia, tro angeic a hamëne kowe la filial la ketre rapor ka tha qea menu kö, nge ka qaja la aqane kökötrene la gurup, me hane amamane la itre hna ajan hnene ej. Nge ame hë e ketre ijin, tro hë eje lai a ketre ekalesia. Maine tro la itre trejin asë ka cainöj ngöne la teritoare ne la itre xa qene hlapa a trongëne la itre hna amekötin, tro lai a amadrinë Iehova.—1 Kor. 1:10; 3:5, 6

TROA CAINÖJ MEMINE LA GURUP

⁴⁵ Ame la hnëqa ne la itre keresiano asë tre, ene la troa qaja la maca ka loi kowe la itre atr. Nyimu aqane tro angatr a eatrëne lai. Ngo alanyimu the së la itre ka madrine troa ce cainöj memine la itre xan. (Luka 10:1) Celë hi matre, hnene la itre ekalesia hna hnëkëne la itre icasikeu göi cainöje trootro, e mecixeni me sabath, tune mina fe ngöne la wiik. Ame mina fe la itre drai ne mano, tre, celë fe itre ijine ka lolo catr troa ce cainöj memine la gurup, pine laka nyimutre la itre trejine ka tha huliwa. Loi e tro la atre thupëne la huliwa a ce wang memine la lapa ne la itre qatre thup matre troa hetrenyi ngöne la drai maine e hej, la itre icasikeu göi cainöj trootro ngöne la itre hawa, me ngöne la itre götrane ka ijij.

⁴⁶ Ame la troa ce cainöj memine la gurup tre, hna aijijëne la ketre trejin troa ce huliwa me troa “ce akeukawanyi.” (Rom. 1:12) Ame e cili, hetre ixatua hna kapa hnene la itre ka xötrei cainöj ke, hna ce huliwa memine la itre trejin ka maca hnyawa. Ame ngöne la itre xa teritoar, loi e troa upe la lue trejin maine troa nango alanyim troa ce cainöj wanga hetre jole jë ka traqa e cili. Maine hnei epuni hna mekune troa cainöje cas, ngo eje hi laka, hetre ithuecatre hna kapa hnene la itre atrene asë la gurup e hnei epuni hna hane sine la ijine icasikeu göi cainöj trootro. E tro sa atre ka hape, hetre itre trejin ka cainöje trootro ngöne la götrane cili, tha hnehengazo menu kö së. Tha tro kö la itre pionie me itre xane ju kö a mekun ka hape, tro angatr a sine asë la itre icasikeu göi cainöj trootro hna acil hnene la ekalesia, e hetrenyi e nöjei drai. Ngo, loi e tro angatr a hane sine la itre xan ngöne la wiik.

⁴⁷ Xötrethenge jë së la tulu hna amë pe hnei Iesu memine la itre aposetolo. Tha tro pi kö sa luelu laka, tro Iehova a amanathithine la trengecatre hne së hna kuca matre troa eatrëne hnyawa la huliwa ka sisitria, ene la troa cainöjëne la maca ka loi ne la Baselaia.—Luka 9:57-62.