Catre Jë Cainöj Kowe La Itre Atr Ka Thaa Ithanatane Kö La Qene Hlapa Së
1. Nemene la hna aijijë së troa kuca ngöne la easa cainöje ngöne la itre teritoare së?
1 Hnei Iesu Keriso hna thingehnaeane, ka hape, tro ha cainöjëne la maca ka loi e cailo fen asë “nyine anyipicine kowe la nöjei nöj.” Kola atrehmekune hnene la itre ka xome la huliwa ne cainöj me inine la itre atr, laka, ka nyipi ewekë catr la itre trenge ewekë cili. (Mat. 24:14; 28:19, 20) Ame ngöne la easa catre cainöj me inine la itre atr, tre, maine jë tro sa ixelë memine la itre atr ka xulu qa ngöne la itre xaa nöj, nge ka ithanatane la ketre qene hlapa kö. Loi e tro mina fe la itre atr cili a hane drenge la maca ne la Baselaia me isigöline la nyipici, qëmekene troa traqa la drai Iehova, drai ka tru nge hna xouen. (Mal. 3:18) Tro sa catre cainöje tune kaa kowe la itre atr ka thaa ithanatane kö la sipu qene hlapa së ngöne la teritoare së?
2. Nemene la aqane tro sa nyitipu Iehova ngöne la easa ithanata memine la itre atr ka qaja la ketre qene hlapa kö?
2 Amamane Jë La Mekuna i Iehova Göne La Itre Atr Ka Ithanatane La Ketre Qene Hlapa Kö: Maine easa ajane troa amamane kowe la itre atr ne la teritoare së, laka, thaa ka iwangatrehmekunyi atr kö Iehova ngo ka ihnimi pe, tre, nyipi ewekë troa eje the së la aja atraqatr troa xatuane la itre atr cili troa hetrenyi la nyipi atrehmekun göi Iehova ene la nyipi Akötresie, ngacama isapengöne ju hë la itre isa qene hlapa së. (Sal. 83:18; Ite hu. 10:34, 35) Ngacama easa pane cainöje kowe la itre atr ka ithanatane la qene hlapa ne la ekalesia së, ngo loi e tro mina fe sa wanga atrune la itre aja ka eje thene la itre atr ka thaa ithanatane kö la qene hlapa së, me thele la itre aqane tro sa tro fë koi angatr la maca ne la Baselaia. Maine easa thëthëhmine la itre atr ka thaa ithanatane kö la qene hlapa së, haawe, easë hi lai a icilekeu memine la aja i Iehova, ene la troa anyipicin kowe la itre atr ne la nöjei nöj asë. Qa ngöne lai, tune kaa la aqane tro sa xatuane la itre atr ka thaa ithanatane kö la qene hlapa së?
3. Nemene la ketre jia ne huliwa ka lolo hna hamëne koi së, nge tro sa hnëkë tune kaa matre troa huliwane ej?
3 Huliwane Jë Lo Sine Itus Hna Hape Une bonne nouvelle pour des gens de toutes nations: Hna kuca la sine itusi cili matre tro sa huliwane ngöne la easa ixelë memine la itre atr ka ithanatane la ketre qene hlapa kö. Loi e troa eje thei epun la sine itusi cili ngöne la nöjei ijin, me imajemi hnyawa memine la aliene ej, me hane hnëkë mina fe troa huliwane ej. Ami hatrene ju la itre qene hlapa hna ithanatane ngöne la teritoare i epun. Maine hetre itusi së hna fejane ngöne la itre qene hlapa cili, ijije tro sa xome la itre xan matre troa hamëne kowe la ketre atr, thupene la hna e koi angeic la maca ka eje e hnine la sine itus.
4. Tune kaa la aqane troa huliwane la sine itus Nations ngöne la hna cainöj?
4 Ame ngöne la hna cainöj maine epuni a ixelë memine la ketre atr ka ithanatane la ketre qene hlapa kö, nge thatre kö epun la qene hlapa hnei angeic hna ithanatan, haawe, amamane jë koi angeice la icetröne la sine itus. Xome jë la map ne la fene hnengödrai ngöne la icetrön, nge sipu köja epuni jë me köjane la nöj hnei epuni hna mele ngön, nge thupene lai sipo angeice jë troa amamane la nöje i angeic me qaja la qene hlapa hnei angeic hna ithanatan. Maine atre hë epuni la qene hlapa i angeic, goeëne jë la aliene la sine itus, me xome jë la götrane ka ihmeku memine la qene hlapa i angeic; nge thupene lai, amamai angeice jë la xötre hnëewekë hna cinyihane atrun e caha hun, nge upi angeice jë troa e la maca. Thupene la hnei angeice hna e, hamëne jë la ketre tarake ngöne la qene hlapa i angeic maine pena amamane jë la xötre hnëewekë hna nyi hane ka amamane la aja i epun troa bëeke hmaca memine la ketre itus hna fejan ngöne la qene hlapa i angeic. Thupene lai, amamane jë la hnaewekë hna sija atrun hna hape “ëjeng” nge qaja hnyawa jë la ëje i epun. Amamane jë la hnaewekë hna hape, “ëje i epun” nge treqene hnyawa ju la hna troa sa hnene la atrene la hnalapa. Loi e troa ce wang matre troa canga bëeke hmaca troa iwai.
5. Nemene la nyine tro sa kuca matre troa wanga atrune la aja ka eje thene la itre atr ka ithanatane la ketre qene hlapa kö?
5 Itre Hna Hnëkëne Amë Thatraqane La Itre Nyine Troa Wange Hmaca: Nyipi ewekë tro sa catr troa wange hmaca la itre atr ka hetre hni ka ajan kowe la maca ne la Baselaia, ngacama ithanatane ju hë angatr la ketre qene hlapa kö. Maine easa öhne laka eje thene la ketre atr, la ajane troa atre Akötresie memine la Wesi Ula i Nyidrë, ene la Tusi Hmitrötr, loi e tro sa canga nyialiene la sine pepa hna hape, Veuillez suivre l’interêt (S-43) me hamëne kowe la seketere ne la ekalesia; tro pë hë nyidrëti a iupi fë lai kowe la filial, matre troa aijijëne la atr cili ka hetre hni ka ajan troa sisedrëne la porotrik memine la ketre trejin ka ithanatane la qene hlapa i angeic. Thupene lai, tro la filial a hamëne la sine pepa cili kowe la gurup ka ithanatane la qene hlapa cili. Ame la kola ase kapa la sine pepa cili, kolo fe ha canga wange lai atr. Ijije tro la seketere a hamëne la ketre sine pepa kowe la atre thupëne la huliwa ne cainöj, matre tro nyidrëti a öhne la aja ka eje thene la itre atr ka qaja lai qene hlapa. Loi e tro hmekuje hi a xome la sine pepa cili, e ka nyipici la aja thene la ketre atr.
6. Nemene la hnëqa së, maine easa ixelë memine la ketre atr ka hetre hni ka ajan nge ka ithanatane la ketre qene hlapa kö?
6 Ijije troa tro la itre drai qaane la ijine kola hamëne la sine pepa S-43, uti hë la kola tro troa wange la atr ka hetre hni ka ajan hnene la ketre trejine ka ithanatane la qene hlapa i angeic. Qa ngöne lai, loi e tro pala hi la atre cainöj ka nyialiene la sine pepa S-43, a catre troa akökötrene la aja ka eje thene lai atr, uti hë la kolo ha wai angeic hnene la ketre trejin ka ithanatane la qene hlapa i angeic. Ame ngöne la itre xaa ijin, maine jë troa inine la Tusi Hmitrötr memine la atr ka hetre hni ka ajan. Ngo qaane la ijine cili uti hë la kola iwai hnene la ketre trejin ka ithanatane la qene hlapa i angeic, tro la ketre atr ka cainöj a hetrenyi tune kaa la itre itus hna fejan ngöne la qene hlapa ne lai atr ka hetre hni ka ajan?
7. Nemene la hna hnëkën göne la troa kapa la itre itus hna ujëne ngöne la qene hlapa ne la itre atr hne së hna ixelë memin?
7 Itre Itus Hna Kuca Kowe La Itre Atr Ka Ithanatane La Itre Xaa Qene Hlapa Kö: Thaa tro pi kö la itre ekalesia a xome atrune la itre itus hna ujëne ngöne la itre xaa qene hlapa kö. Ngo maine kola öhne hnene la atre thupëne la huliwa ne cainöj, laka, kola kökötre la aja thene la itre atr ka qaja la ketre qene hlapa, haawe, ijije tro nyidrëti a xeen amë la itre itus ka ala xalaithe hi nge hna ujëne ngöne la qene hlapa i angatr matre troa huliwan hnene la itretre cainöj. Maine pë hë itusi cili hnine la ekalesia, ijije hmaca troa komadëne itre ej. Maine jë troa hmitre traqa la itre itus ngöne la ketre qene hlapa. Qa ngöne lai, ijije troa fejane la itre itus qa ngöne Ëternet, ngöne www.watchtower.org. Nyimutre la itre itus hna amamane ngöne nyimu qene hlapa; thaa ka jole kö e troa canga xome hnene la atre cainöj maine ketre atr pena ka hetre hni ne ajan. Eje hi lai laka, tro ha hetre thangane la hna hnëkëne cili, ngöne la kola akökötrene la aja ka eje thene la itre atr ka ithanatane la ketre qene hlapa.
8. Nemene la hnëqa hna xom hnene la ekalesia ngöne la troa akökötrene la aja ka eje thene la itre atr ka ithanatane la ketre qene hlapa?
8 Hnëqa Ne La Ekalesia: Ame itre xaa götran, ngacama kola elë la etrune la itre atr ka ithanatane la ketre qene hlapa, ngo pëkö ekalesia e xötreith ka xomiujine la itre icasikeu ngöne la qene hlapa cili. Qa ngöne lai, loi e troa könëne la itre atr ka hetre hni ne ajan nge ka ithanatane la ketre qene hlapa, troa hane ce sine me epuni la itre icasikeu. Maine jë tro la ekeukawane la aqane ikep memine la aqane wanga atrunyi angatr hnene la itre trejin, a ithuecatre koi angatr troa catre sine pala hi la itre icasikeu. Nyipici laka ame ngöne la qaan, maine jë troa hetre ifego, ene la qene hlapa, me aqane mele i angatr; ngo ame hnine la lapa ne la Itretre Anyipicine i Iehova e cailo fen, tre, pëkö ifego ne la ihnimi ne la itre nyipi Keresiano. (Zef. 3:9; Ioane 13:35) Hapeu, hmaloi hi koi epun troa ithanatane la ketre qene hlapa? Maine ka hmaloi hi nge hetre aja i epun troa wange hmaca la itre atr ka ithanatane la qene hlapa cili, haawe, canga thuemacane ju la seketere ne la ekalesia i epun, matre tro nyidrëti a qaja kowe la filial. Tro hë lai a ketre ixatua kowe la filial ngöne la kola troa thele la ketre atre cainöj troa iwai hmaca.
9. Eue la ijine kola acile la ketre ini qene hlapa thatraqane la itretre cainöj, nge tune kaa la aqane thuemacane lai?
9 Aqane Troa Inine La Ketre Qene Hlapa: Maine epuni a ajane troa xatuane la itre ka ithanatane la ketre qene hlapa, haawe, thuecatre jë koi angatr troa nyiqaane sine la icasikeu ne la ketre ekalesia ka ithanatane la sipu qene hlapa i angatr,e ijiji angatre hi. Ngo maine thaa ijiji angatre kö, maine jë tro la itre xaa ka cainöj a iëne troa inine la ketre qene hlapa, matre troa xatuane hnyawa la itre atr ka hetre hni ne ajan. Maine pëkö ekalesia ka easeny nge ala nyimu pi hë la itre atr ka xulu qa ngöne la itre xaa nöj maine ka isa hane ne ngönetrei pena, haawe, hnëqa ne la filial troa wang, ka hape, maine ijije kö troa acile la ketre gurupe ne qene hlapa. E ijije hi, loi e tro la filial a qaja kowe la itre ekalesia ka easeny troa kuca la ketre ithuemacany, göne la ketre gurupe ne qene hlapa. Loi e tro la itre ka sipone troa inine la qene hlapa cili a mekune troa tro kowe la gurup maine pena la ekalesia hna acil thatraqane lai, matre troa huliwane la teritoare ne la qene hlapa cili.
10. Eue la ijine kola eköthe la ketre gurup ne qene hlapa, nge kola axeciëne tune kaa laka, ketre gurupe hë?
10 Aqane Troa Eköthe La Ketre Gurup: Ijije hi troa eköthe la ketre gurup ka qaja la ketre qene hlapa, e eatre asë la foa lao hna amekötin celë ka sisitria. (1) Ala nyimu la itre atr ka hetre hni ne ajan nge ka ithanatane la qene hlapa cili. (2) Hetrenyi pala hi la itretre cainöj ka ala xalaithe hi, nge ka trotrohnine hnyawa la qene hlapa maine pena ka inine troa ithanatane ej. (3) Loi e hetre qatre thup ka maca maine ketre drikona pena troa elemekene la gurup me xomiujine la caa icasikeu ngöne la wiik ngöne la qene hlapa cili. (4) Loi e hetrenyi la ketre lapa ne la itre qatre thup ka ajane troa xatuane la gurup. Maine hna eatrëne asë la itre hna amekötine cili, tro hë la lapa ne la itre qatre thup a cinyany kowe la filial matre troa qeje pengöne la gurup cili, me sipone troa kapa, ka hape, ketre ekalesia hë lai ka sajuëne la ketre gurup ne qene hlapa. (Wange ju la itus Organisés, g. 106-107.) Ame la qatre thup maine drikona ka elemekene la gurup, tre, troa hëne, ka hape, “atre thupëne la gurup” maine “drikona ne la gurup” ame la hnëqa i nyidro, tre, ene la troa thupëne hnyawa la gurup.
11. Pine nemene matre ketre manathithi ka tru la troa huliwane la itre teritoare së ka qaja la ketre qene hlapa kö?
11 Ame la troa catre cainöj ngöne la ketre teritoare ka ithanatane la ketre qene hlapa, tre, ketre götrane lai ka sisitria ngöne la huliwa ne cainöj e cailo fen hna eköthe hnene la Tulu së, ene Iesu Keriso. Epi tro sa catre xome la huliwa cili me goeëne pala hi la aqane jumejume Iehova la nöjei ethen, me ea koi Nyidrë la itre atr hnei Nyidrëti hna hnim. (Hag. 2:7) Drei la madrine së troa ce huliwa catr ngöne la götrane cili! Epi tro Iehova a amanathithine la trenge catre hne së asë hna kuca, matre troa huliwane la itre teritoare ka qaja la itre xaa qene hlapa; nge loi e tro pala hi sa mekun, ka hape, maine nyipici laka ketre jol kowe la itre atr troa itrotrohni ngacama isa qene hlapa kö, ngo ame pe, ijije hi tro Akötresieti a xatua së matre troa hetre thangane ka loi la huliwa cili!—1 Kor. 3:6-9.