Itre Itus Ka Nyitrepene La Mel Me Huliwa Ne Cainöj Pepa Nyine Huliwan
7-13 JANUARE
ITRE TRENGAMO QA HNINE LA WESI ULA | ITE HULIWA 21-22
“Loi e Troa Kuca La Aja i Iehova”
(Ite Huliwa 21:8-12) Nge hmakanyi eëhuni a tro me traqa e Kaisara ; ame hne huni hna Iöjë kowe la uma i Fillipo ate amamane la maca ka loi, lo kete ne la ala luengemen, me lapa thei angeic. 9 Nge ame la ate cili, te, eke nekö i angeice jajiny, nge itete perofetan’ angat. 10 Nge nyimu drai hne nyipuni hna lapa e cili, ame hna traqapi qa Iuda la kete perofeta, Agabo la ëjen. 11 Nge traqa ha angeice koi hun, ame hnei angeice hna xome la otene i Paulo, me othe la lue hne me lue ca i angeice kö, me hape, Öninejë la Uati Hmitöt, Troa othe tune la hnei angete Iuda e Ierusalema la ate kë otenene la, me troa nue kowe la ite iwanakoime ne la nöjei ethen. 12 Nge dengë hë huni la tenge cili, ame hne huni me angete lapa e cili, hna shewe nyidëti, ka hape, The tro kö Ierusalema eë.
“Loi e Troa Kuca La Aja i Joxu”
15 Ame ngöne lo ijine kola traqa hnei Paulo koi Filipo, hna traqa la ketre atr hna metrötrën, Agabo la ëje i angeic. Atre asë hi la itre atr ka lapa thei Filipo laka, ketre perofeta Agabo, nge angeice hi lo ka perofetane lo ijine jiin ngöne lo kola musi hnei Kalaudio. (Ite Huliwa 11:27, 28) Maine jë, hnei angatr hna isa hnying ka hape: ‘Pine nemene matre kola traqa hnei Agabo? Nemene maca la hnei angeic hna tro fë?’ Hnei Agabo hna xome la beletre i Paulo, ketre imano hna oth ngöne gö, nge hnë ami manie fe maine itre xa ewekë ju kö. Qëmekei angatr asë, hnei Agabo hna oth la lue ca me lue ime i angeic. Thupene lai, angeic a qaja jë la maca, ketre maca ka catr. Öni angeic: “Troa othe tune la hnei angete Iuda e Ierusalema la ate kë otenene la, me troa nue kowe la ite iwanakoime ne la nöjei ethen.”—Ite Huliwa 21:11.
16 Kola acatrene hnene la hna perofetane celë laka, tro kö Paulo a tro Ierusalema eë. Ketre, tha tro kö a kepe angeice hnene la angetre Iudra, tro angatr a “nue [angeic] kowe la ite iwanakoime ne la nöjei ethen.” Hace pi hë la hni ne la itre atr ka lapa e cili, la angatr a drenge la hna perofetane celë. Öni Luka: “Dengë hë huni la tenge cili, ame hne huni me angete lapa e cili, hna shewe nyidëti, ka hape, The tro kö Ierusalema eë. Ame hnei Paulo hna sa, ka hape, Ue lae nyipunie a iteijenyi me asheshëthoune la hning ? ke ase hë ni hnëkëne tha kowe la iothi hmekuje hi ; ngo kowe fe la troa meci e Ierusalema pine la atesiwa i Joxu Iesu.”—Ite Huliwa 21:12, 13.
(Ite Huliwa 21:13) Ame hnei Paulo hna sa, ka hape, Ue lae nyipunie a iteijenyi me asheshëthoune la hning ? ke ase hë ni hnëkëne tha kowe la iothi hmekuje hi ; ngo kowe fe la troa meci e Ierusalema pine la atesiwa i Joxu Iesu.
“Loi e Troa Kuca La Aja i Joxu”
17 Hanawange la ewekë ka traqa. Hnei Luka memine la itre xa trejin hna iele Paulo troa lapa. Nge, itre xan a treij. Hna ketr la hni Paulo hnene la aqane hnimi angeic hnei angatr. Ngo hnei angeic hna qaja menyikëne ka hape, angatr a “asheshëthoune la hni [angeic],” maine “akötrëne la hni [angeic],” tune la aqane ujën hnene la itre xa Tusi Hmitrötr qene Heleni. Hnei Paulo hna catr, tune la aqane ujë i angeic kowe la itre trejin ne Turo. Ngacama kola treij, me thel troa alapa angeic, ngo tha hnei angeice pi kö hna drei angatr. Hnei angeic hna qaja la kepine matre nyipiewekë tro angeic a tro. Ka catre Paulo! Tui Iesu ekö, ka catre e kuhu hni Paulo troa tro Ierusalema eë. (He. 12:2) Tha Paulo kö a thel troa mec pine la huliwa i Akötresie. Ngo maine troa traqa, ke, ewekë lai ka sisitria koi Paulo, ene la troa mec pi Iesu Keriso.
(Ite Huliwa 21:14) Nge tha denge kö nyidë, ame hne huni hna lapa thaupu, me hape, Loi e troa kuca la aja i Joxu.
“Loi e Troa Kuca La Aja i Joxu”
18 Nemene la aqane ujë la itre trejin? Hnei angatr hna ujë cememine la metrötr. Öni Tusi Hmitrötr: “Tha denge kö nyidë, ame hne huni hna lapa thaupu, me hape, Loi e troa kuca la aja i Joxu.” (Ite Huliwa 21:14) Tha hnene kö la itre ka sewe Paulo troa tro Ierusalema hna catre fë mekun. Hnei angatre pe hna drei angeic, me kapa la aja i Iehova, ngacama tha ka hmaloi kö koi angatr. Atre hi Paulo laka, ame la gojenyi cili, tre, mec la pun. Tro lai a hmaloi koi Paulo, e tha hna sewe angeic kö hnei angatr.
Troa Sine Thel La Itre Mekune Ka Sisitria
(Ite Huliwa 21:23, 24) Qa ngöne lai, kucajë la hne huni hna troa qaja koi nyipë ; the huni la ala eke, hna nyi xepu, 24 haneju nyipëti ce me angate me ce apui loinyi nyipëti me angat me ce nyithupene me angate mate tro angat’ a thupa la ite ihe i angat ; mate atejë hnei nöjei ate asë laka tha nyipici kö la kete ewekë hnei angate hna denge göi nyipë ; ngo loi la thina i nyipëti ka ijijine la wathebo.
“Dengeju La Ini a Troa Amekötine Koi Nyipunie”
10 Ngo, trotrohnine hi Paulo la angetre Iudra ka trongëne la itre hna majemin, tune la troa tha huliwa e Sabath, maine tha xeni la itre xa pengöne xen. (Rom. 14:1-6) Ketre, tha Paulo kö a ami wathebo göi peritomon. Hnei Paulo hna peritomo Timoteo, ke, ketre atre Heleni la keme i angeic. Hnei angeic hna ujë tune matre, tha tro kö la angetre Iudra a cil troa ithanata me Timoteo. (Ite Huliwa 16:3) Isa qanyi angatre kö axecië mekun göi peritomon. Öni Paulo koi angetre Galatia: “Tha nyipi ewekë kö thei Keriso Iesu la peritomone me tha hna peritomone kö ; ngo loi pe lapaune ate huliwa ngöne la ihnim.” (Gal. 5:6) Ngo, maine angatr a mekun ka hape, troa peritomone matre troa trongëne la wathebo, me troa kepe angatr hnei Iehova, ke, kösë pëkö lapaune i angatr.
11 Ngacama ka thoi la itre hna qaja göi angatr, ngo itretre Iudra pala kö a luelu. Celë hi matre, hnene la itre qatr hna upi Paulo, me hape: “The huni la ala eke, hna nyi xepu, haneju nyipëti ce me angate me ce apui loinyi nyipëti me angat me ce nyithupene me angate mate tro angat’ a thupa la ite ihe i angat ; mate atejë hnei nöjei ate asë laka tha nyipici kö la kete ewekë hnei angate hna denge göi nyipë ; ngo loi la thina i nyipëti ka ijijine la wathebo.”—Ite Huliwa 21:23, 24.
12 Ijiji Paulo hi troa qaja ka hape, ame la sipu jol, tre, tha ene kö la itre hna sil göi angeic, ngo hnene la aqane wangatrune la angetre Iudra la Trenge Wathebo i Mose. Ngo, hnei Paulo pe hna kapa la hna amekötin, ke, tha ka icilekeu kö memine la itre trepene meköti Akötresie. Öni angeice lo: “Tune la ate fene la wathebo, koi angete fene la wathebo, nge tha ini kö fene la wathebo.” (1 Kor. 9:20) Hnei Paulo hna trongëne la hna amekötine hnene la itre qatr ne Ierusalema, me tune la “angete fene la wathebo.” Paulo la ketre tulu koi së. Loi e tro sa drengethenge la itre qatre thup, nge tha tro pi kö sa catre fë mekun.—Heb. 13:17.
(Ite Huliwa 22:16) Nge enehila hna uë eö a hmit ? cilejë, mate bapataiso eö me hnea tije la ite ngazo i eö, me hënejë la atesiwa i nyidë.
nwtsty ithuemacanyi göi Ite Huliwa 22:16
hnea tije la ite ngazo i eö, me hënejë la atesiwa i nyidë: Tha tro kö a köletrije la itre ngazo ne la ketre atr, hnene la tim hna bapataiso angeic, ngo hnene pe la hna hëne la ëje i Iesu. Kolo lai a hape, troa lapaune koi Iesu, me amamane hnene la itre huliwa.—Hu 10:43; Ia 2:14, 18.
E Tusi Hmitrötr
(Ite Huliwa 21:1-19) Nge inue tiji hë huni me angat, ame hna eapi hun, me köte meköti Koso eë, nge e hmakanyi e Rodo, nge qa lai e Patara ; 2 nge kola öhne la kete he kola troa ea Foinike eë, ame hna hne huni hna të pi fe, me ea. 3 Nge öhnë hë huni e Kupero, eëhuni pë hë a nue pe eje ngöne la götrane mi, me köte Suria eë, me xepe Turo ; ke troa qathëne e cili la aliene la he. 4 Nge öhnë hë huni la itete deng, ame hne huni hna lapa e cili luengemene la o drai ; nge angat’ a qaja koi Paulo ngöne la Ua, ka hape, the tro kö Ierusalema eë. 5 Nge ase hë la nöjei drai cili, ame hne huni hna löpi a tro ; nge hna xönë huni hnei angat’ asë ce me ite fö, me ite kuku, uti hë tröne lapa ; ame hne huni hna sa watingöneca ngöne la zanehngala a thith ; 6 Nge ase huni iahni, eëhuni a elëjë hune he eë, nge angate pe a hmaca kowe la ite hnalapa i angat. 7 Nge traqa huni e Tolemai qa Turo, eëhuni a fetra koi ange tejin, nge ca drai ne ce lapa hun. 8 Nge makanyi eëhuni a tro me traqa e Kaisara ; ame hne huni hna Iöjë kowe la uma i Fillipo ate amamane la maca ka loi, lo kete ne la ala luengemen, me lapa thei angeic. 9 Nge ame la ate cili, te, eke nekö i angeice jajiny, nge itete perofetan’ angat. 10 Nge nyimu drai hne nyipuni hna lapa e cili, ame hna traqapi qa Iuda la kete perofeta, Agabo la ëjen. 11 Nge traqa ha angeice koi hun, ame hnei angeice hna xome la otene i Paulo, me othe la lue hne me lue ca i angeice kö, me hape, Öninejë la Uati Hmitöt, Troa othe tune la hnei angete Iuda e Ierusalema la ate kë otenene la, me troa nue kowe la ite iwanakoime ne la nöjei ethen. 12 Nge dengë hë huni la tenge cili, ame hne huni me angete lapa e cili, hna shewe nyidëti, ka hape, The tro kö Ierusalema eë. 13 Ame hnei Paulo hna sa, ka hape, Ue lae nyipunie a iteijenyi me asheshëthoune la hning ? ke ase hë ni hnëkëne tha kowe la iothi hmekuje hi ; ngo kowe fe la troa meci e Ierusalema pine la atesiwa i Joxu Iesu. 14 Nge tha denge kö nyidë, ame hne huni hna lapa thaupu, me hape, Loi e troa kuca la aja i Joxu. 15 Thupene la nöjei drai cili ame hnei huini hna hnëkëne la ite ewekë, me tro Ierusalema eë. 16 Nge hna ce tro me eëhuni la ite xa ate denge qa Kaisaria, nge angat’ a tro thenge la kete ka hoea la hna deng, Nasona la ëjen, ate Kupero, la Hne huni hna tro ha lapa then. 17 Traqa ha huni e Ierusalema, ame hna kapa madi huni hnei ange tejin. 18 Nge elanyi ame hnei Paulo hna ce tro me eëhuni koi Iakobo ; nge ej’ e cili la nöjei qat’ asë. 19 Nge ase hë nyidëti italofa me angat, ame hnei nyidëti hna amamane wengëne la nöjei ewekë hnei Akötesie hna kuca thei angete etheni hnene la huliwa i nyidë.
14-20 JANUARE
ITRE TRENGAMO QA HNINE LA WESI ULA | ITE HULIWA 23-24
“Hna Qeje Angeic Ka Hape, Ka Thele Iwesitrë Me Ka Upe La Itre Atr Troa Isi”
(Ite Huliwa 23:12) Nge lai hë, ame hnei ite xan’ e angete Iuda hna icasikeu, me nyi xepu, ka hape, Tha tro angat’ a xeni me iji uti hë e ase hë angate humuthi Paulo.
(Ite Huliwa 23:16) Nge dengë hë la ano i Paulo la tro angate a qenith, angeic’ a tropi me löjë kowe la hnapo, me amamane koi Paulo.
‘Easa Catr’
5 Manathithi Paulo ju hi la kola traqa la ithuecatr koi angeic. Ame ju kö lo drai thupen, ala 40 lao itretre Iudra ka “icasikeu, me nyi xepu, ka hape, Tha tro angat’ a xeni me iji uti hë e ase hë angate humuthi Paulo.” Hnei angatr hna “nyi xepu” nyine amamane ka hape, xecie e kuhu hni angatr troa humuthi Paulo. Öni angatr, troa hetre ngazo koi angatr, e tha hna eatrëne kö la hnei angatr hna sa xepu. (Ite Huliwa 23:12-15) Ame la mekuna i angatr, tre, loi e troa bëeke sai Paulo kowe la hnakootr, matre troa hnying hmaca koi angeic la itre xa hnepe götrane la itre ewekë ka traqa. Ngo, angatre pe a thel troa tra thethi Paulo, matre troa humuthi angeic. Nge, hna kapa la mekuna i angatr hnene itretre huuj, me itre hene ne hmi.
6 Hna hane dreng hnene la utha i Paulo la ewekë hnei angatr hna mekun troa kuca. Ame hnei Paulo hna canga upi nyëne jë kowe la keneturio, Kalaudio Lusia. (Ite Huliwa 23:16-22) Atraqatre la ihnimi Iehova kowe la itre thöth, tune la utha i Paulo. Itre ka wangatrune la mele ne la itre hlue i Akötresie, me amë panëne la itre huliwa ne la Baselaia.
(Ite Huliwa 24:2) Nge ase hë thei nyidë ame hnei Teretulo hna qane troa nyi ewekë nyidë, kola hape, Angafilikieti fe ka wēsisi, atraqate la loinöje huni hnei cilie, nge kola kuca hnene la inamacane i cilie la nöjei ewekë nyine amekötine hnyawa la nöje celë ;
(Ite Huliwa 24:5, 6) Ke öhnë hë huni la ate celë ate ikuiajojo, me aciane la ngazo thei angete Iuda asë e cailo fen, kete tane la angete Nazareta ; 6 lo ate thele jëne ; troa angazone la ēnē ; lo hne huni hna xölehuj, me pi troa hnyingëne thenge la wathebo hun ;
‘Easa Catr’
10 Hna “thupë [Paulo] ngöne la uma i joxu, Heroda” e Kaisaria, qëmekene troa traqa la itre ka nyizö angeic qa Ierusalema. (Ite Huliwa 23:35) Thupene la 5 lao drai, hna traqa hnene la atre huuj Anania, memine la atre cainöj, Teretulo, me itre xa qatr. Hnei Teretulo hna pane qaja aloinyi Filiki hnene la itre huliwa ka loi hnei nyidrë hna kuca thatraqane la angetre Iudra, göne hi matre troa wangaloinyi angatr hnei nyidrë. Thupene lai, hnei Teretulo hna qeje Paulo ka hape, “ate [ikucany], me aciane la ngazo thei angete Iuda asë e cailo fen, kete tane la angete Nazareta ; lo ate thele jëne troa angazone la ēnē ; lo hne huni hna xölehuj, me pi troa hnyingëne thenge la wathebo hun.” Nge, hnene la itre xa angetre Iudra hna “hane kapa, ka hape, eje hi lai la nöjei ewekë cili.” (Ite Huliwa 24:5, 6, 9) Ame la atr ka aciane la ngazo thene la nöj, me xomiujine la ketre lapa ka ngazo, me angazone la ēnē, tre, meköt troa humuthi angeic.
(Ite Huliwa 24:10-21) Nge gavana a hnemekë Paulo troa ewekë, nge nyidëti a sa, ka hape, Ate hë ni laka nyimu macate hnei cilieti hna amekötine la nöje celë, qa ngöne lai madine ni troa qaja ameköti ni kö ; 11 ke ate kö nyipëti laka luako pete hi la o drai lo hnenge hna traqa e Ierusalema troa thith. 12 Nge tha öhnyi ni kö hnei angate ngöne la ēnē, me hnine la ite sunago, me ngöne la lapa kola ikelikelë me kete ate, me agomegomëne la nöj ; 13 kete tha ’teine kö angeic troa anyipicine la nöjei ewekë hnei angate hna nyi ewekë ni. 14 Ngo dei pe la hnenge hna troa amamane koi cilie, laka ini a hmi koi Akötesieti ne la ite xötapane huni thenge la jëne hnei angat hna jele heretikon ; kola kapa la nöjei ewekë asë hna cinyihane ngöne la wathebo, me ite perofeta ; 15 nge ini a mejiune koi Akötesie la hnei angat fe hna xome, laka, tro ha mele hmaca la nöjei ka meköt, me ka tha meköti kö ; 16 Qa ngöne lai, ini a cate mate hetenyi pala hi la mekuthethewe ka loi koi Akötesie me ate. 17 Thupene la nöjei macate ka kösau, ini a tro fë ihnimi me ite huje kowe la nöjeng. 18 E kola kuca lai, ame hna öhnyi ni hnei angete Iuda qa Asia ngöne la ënë, hna apui loinyi ni, tha kolo kö a ce memine la nöj, nge kete pëkö pelulu. 19 Loi pe hane pi angate cil’ e celë qëmeke i nyipë, me nyi ewekë ni e hete ewekë i angate göi ni. 20 Ngo e pëkö, qâ i angate la qaja, maine hete thinange ka tha meköti kö hnei angeic hna öhne lo ini a cil’ qëmeke ne la iemân. 21 loi pe la tenge ewekë celë ka cas, lo hnenge hna cainöjëne cilëne nyipi angat ; ka hape, Hna hnyingë ni ngöne la drai celë hnei nyipunie la mele hmaca qa hna mec.
‘Easa Catr’
13 Paulo la ketre tulu koi së ngöne la kola utisai së kowe la itre hene ne mus pine la hmi, me kola jelengazo së ka hape, atr ka aciane la ngazo thene la nöj, me xomiujine la ketre lapa ka ngazo. Tha hnei Paulo kö hna nyi ka loi, me thel troa qaja aloine la gavena, tui Teretulo. Hnei Paulo pe hna nango lapa me metrötrë nyidrë. Hnei Paulo hna ithanata hnyawa, me qaja la nyipici. Öni angeic, patre kö la “angete Iuda qa Asia” lo itre ka nyizö angeic ka hape, angeic la ka angazone la ēnē. Ketre, meköt koi Paulo troa ithanata koi angatr, me dreng la hnei angatr hna sili ewekë angeic.—Ite Huliwa 24:18, 19.
14 Ame la ka sisitria, tre, tha hnei Paulo kö hna cil troa qaja la lapaune i angeic. Hnei angeic hna qaja hmaca la mejiune i angeic kowe la melehmaca. Kolo ini lai ka aciane la ihmönyinyi ngöne la hnakootr. (Ite Huliwa 23:6-10) Ame ngöne la ijine cili, hnei angeic hna qaja atrune la melehmaca. Pine nemen? Pine laka, angeic a cainöjë Iesu, memine la melehmaca i nyidrë, ewekë hna xelene hnene la itre ka icilekeu me angeic. (Ite Huliwa 26:6-8, 22, 23) Eje hi laka, ame la qaane lai jol, tre, mejiune koi Iesu memine la melehmaca i nyidrë.
Troa Sine Thel La Itre Mekune Ka Sisitria
(Ite Huliwa 23:6) Nge wangate hmekunë hë Paulo laka, itete sadukaio ite xan’ e angat, nge ite farasaio ite xan, nyidëti a ewekë cate ngöne la iemân, ka hape, Ange tejine fe, faresaio ni, nekö ne la faresaio ; kola hnyingë ni la ngöne la mejiune troa mele hmaca qa hna mec.
nwtsty Ithuemacanyi göi Ite Huliwa 23:6
faresaio ni: Atre Paulo hi hnene la itre ka lapa xötreithi angeic. (Hu 22:5) Ame la angeic a qeje angeic ka hape, nekö ne la faresaio, hnene la itre faresaio hna trotrohnine laka, casi hi la edrö i angatr me angeic, ngacama ketre keresiano ka catre cainöje hë angeic. Ketre, Paulo a qeje angeic ka hape, faresaio, ngo tha sadukaio kö, ke, itre faresaio la ka mejiune kowe la melehmaca. Matre, hnei angeic hna thel tro la itre faresaio a ce xöl me angeic. Aja i angeic tro la itre xa atrene la hnakootr a kapa la itre hnei angeic hna qaja. Nge celë hi ewekë ka traqa. (Hu 23:7-9) Ka ihmeku la hna qaja hnei Paulo ngöne Ite Huliwa 23:6 memine la itre trengewekë i angeic qëmekei Ageripa joxu. (Hu 26:5) Nge, ame la Paulo a cinyihane la tusi angeic qa Roma kowe la itre keresiano ne Filipi, hnei angeice hmaca hna qaja ka hape, atre faresaio angeic. (Fi 3:5) Ketre, hnene fe la itre xa keresiano ka faresaio ekö hna qejepengöi angatr tune lai ngöne Ite Huliwa 15:5.—Wange ju la ithuemacanyi göi Ite Huliwa 15:5.
(Ite Huliwa 24:24) Nge thupene la ite xa drai, ame hna traqa Filiki me Drusila fö’ i nyidë, föe ne Iuda, ame hnei nyidëti hna thei Paulo, troa denge thei nyidëti la pengöne la lapaune koi keriso.
(Ite Huliwa 24:27) Thupene la lue macate, ame hna nyi hna i Filiki, Pokio Feso ; nge Filiki a ajane troa amadi angete Iuda, ame hna hnei Paulo pala kö ngöne la kalabus.
nwtsty Ithuemacanyi göi Ite Huliwa 24:24
Drusila: Hnaakönine nekö jajinyi i Heroda joxu hna qaja ngöne Ite Huliwa 12:1, kolo Heroda Ageripa I. Hna hnaho eahlo lo macatre 38 M.K., nge trejin angeic me Ageripa II me Berenike. (Wange ju la Ithuemacanyi göi Ite Huliwa 25:13 memine la Glossaire, “Hérode.”) Hnaaluene föi eahlo lae Filiki gavena. Hnei eahlo hna pane faipoipo memine la ketre joxu ne Asuria, Azizi qa Emesa la ëjen, ngo thupene lai, hnei eahlo hna seihnacil me nyidrë, me faipoipo pena me Filiki ngöne lo macatre 54 M.K. Nge, 16 lao macatre i eahlo. Maine jë, ce eahlo me Filiki joxu, lo Paulo a “qeje pengöne la thina ka meköti, me xome hnöth, memine la troa hnyingën’ epin.” (Hu 24:25) Ame la kola nyihna i Filiki hnei Feso, hnei Filiki hna nue Paulo ngöne la kalabus matre troa “amadi angete Iuda.” Itre xan a mekune ka hape, hnei Filiki hna ujë tune lai, matre troa amadrinëne la föi nyidrë, ke, atre Iudra eahlo.—Hu 24:27.
E Tusi Hmitrötr
(Ite Huliwa 23:1-15) Ame hnei Paulo hna goeë tilin la ieman, me hape, Ange tejin fe, hnenge hna lapa fë la mekuthethewe ka loi asë xajawa i Akötesie ’uti hë la drai celë. 2 Ame hnene la ate huje ka sisitia hna qaja koi angete icilenyi thei nyidë troa xe la qe i nyidë. 3 Ame hnei Paulo hna qaja koi nyidëti, ka hape, Tro Akötesieti a xe eö, epe hna xupi etine awiën ; ke lapa eö troa ameköti ni thenge la wathebo, nge eö a iupi troa xe ni a ifekethe memine la wathebo ? 4 Nge öni anget’ icilenyi e cili, ka hape, Eö a lica la ate huje ka sisitia i Akötesie ? 5 Öni Paulo, ka hape, Ange tejine fe, tha ’te kö ni laka angeice la ate huje ka sisitia, ke ase hë cinyihan, ka hape, “The tro kö eö a qaja angazone la ate musinëne la nöj’ i ’ö.” 6 Nge wangate hmekunë hë Paulo laka, itete sadukaio ite xan’ e angat, nge ite farasaio ite xan, nyidëti a ewekë cate ngöne la iemân, ka hape, Ange tejine fe, faresaio ni, nekö ne la faresaio ; kola hnyingë ni la ngöne la mejiune troa mele hmaca qa hna mec. 7 Nge ase hë nyidëti qaja tune lai, ame hna ciajë la ikelikelë i angete faresaio me angete sadukaio ; ame hna kaqa luë pi la ka ala nyimu. 8 Ke öni angete sadukaio, ka hape, Pëkö mele hmaca, nge kete pëkö angela ; kete pëkö u ; ngo angete faresaio, a ce xome lue ej. 9 Ame hna ciajë la kakaeo draië, ene pe cilejë la itete cinyihany, la enexöle i angete faresaio, me cate fë, ka hape, Pëkö ngazo ne la ate celë hne huni hna öhn ; ngo maine hna qaja koi angeice hnei u, maine angela, the tro kö sha ishi me Akötesie. 10 Nge atraqate la ikelikelë, ame hna qouju la tane ka sisitia wanga hulethe Paulo pi hnei angat, nyidëti pë hë a upe la ite soce troa thepi, nyidëti pi qa thei angat, me tro sai nyidë kowe la hnapo. 11 Nge edrae e jidi ame hnei Joxu hna cile thei nyidë, me hape, Catejë eö ke tro eö a anyipici ni e Roma tune lo hnei ’ö hna anyipici ni e Ierusalema. 12 Nge lai hë, ame hnei ite xan’ e angete Iuda hna icasikeu, me nyi xepu, ka hape, Tha tro angat’ a xeni me iji uti hë e ase hë angate humuthi Paulo. 13 Nge ame angete nyi xepu, te, tru hune la luate. 14 Nge traqa angate kowe la ite tane i angete huje, me nöjei qat, a qaja, ka hape, Ase hë huni nyi xepu cat, a tha tro kö huni a xeni kete ewekë uti hë e ase hë huni humuthi Paulo. 15 Qa ngöne lai, qajajë nyipunie me angete iemâne kowe la fene ka sisitia mate tro nyidëti a uti sai angeice koi nyipunie ; kösë tro nyipunie a ate hnyawa ite ewekë göi angeic ; nge eëhuni a hnëkëne troa humuthi angeic nge tha eashenyi pete kö angeic.
21-27 JANUARE
ITRE TRENGAMO QA HNINE LA WESI ULA | ITE HULIWA 25-26
“Hnei Paulo Hna Hë Koi Kaisara, Me Cainöj Koi Heroda Ageripa”
(Ite Huliwa 25:11) Nge maine hete ngazong, me kete ewekë hnenge hna kuca ka ijiji ni troa mec, tha xele kö ni ma mec ; ngo e pëkö kete ewekë hnei angat hna nyi ewekë ni, pëkö ate ateine troa nue ni koi angat Ini a hë koi Kaisara.
“Ini a Hë Koi Kaisara”
6 Maine tro Feso a kei thenge la aja ne la angetre Iudra, tro Paulo lai a mec. Matre hnei Paulo hna hë kowe la mus thenge la meköti angeic, ke, ketre atre Roma. Öni angeic koi Feso: “Ini hi la a cile qëmeke ne la ita ne amekötine i Kaisara, lo ka ijije troa hnyingë ni ngön ; pëkö ngazo hnenge hna kuca koi angete Iuda, ate hnyawa ha cilieti Io. . . . Ini a hë koi Kaisara.” Ame la kola hë koi Kaisara, tha ijije hmaca kö troa uthihe. Celë hi matre Feso a qaja koi angeic ka hape: “Eö a hë koi Kaisara, hunikö ? hawe, tro hë eö koi Kaisara.” (Ite Huliwa 25:10-12) Hnei Paulo hna hë kowe la hene ne musi ka tru, nge ketre tulu lai koi së enehila. Ame la kola “tratraune la iangazo hnei wathebo” hnene la itre ka icilekeu me easë, easa thele la itre xa trepene meköti mus matre troa isigöline la maca ka loi.—Sa. 94:20.
(Ite Huliwa 26:1-3) Ame hnei Ageripa hna qaja koi Paulo, ka hape, Qâ i ’ö troa qeje eö kö. Ame hnei Paulo hna shathepi la ime i angeic, me qeje angeice kö ; 2 Joxu fe, Ageripa, ini a mekune manathithi hë ni, ngöne laka tro ni a qaja ameköti ni qëmeke i cilie ngöne la drai celë, ene la nöjei ewekë asë hna nyi ewekë ni hnei angete Iuda ; 3 ke cilieti laka ate hnyawa la nöjei thina asë me hna ikelikelë i angete Iuda ; qa ngöne lai, ini a sipo nyipëti troa dei ni nge the sixele kö.
“Ini a Hë Koi Kaisara”
10 Hnei Paulo hna olene koi Ageripa joxu la hna aijijë angeic troa cile qëmeke i nyidrë. Ketre, Paulo a olene koi nyidrë, ke, ka atre hnyawa nyidrë la itre qenenöje i angetre Iudra. Thupene lai, hnei Paulo hna qejepengöne la mele i angeic ekö: “Hna cei tune la thinange memine la hmi shë ka nyipi hace, ene la faresaio.” (Ite Huliwa 26:5) Ame lo ijine faresaio pala kö Paulo, angeic a treqene la Mesia. Nge ame hë enehila, ketre keresiano hë angeic, angeic a anyipicine ka hape, Iesu Keriso la Mesia hna treqen. Kola utisai angeic ngöne la ijine cili pine la mejiune ka ej thei angeic, mejiune ka eje fe thene la itre ka icilekeu, ene la troa eatre la hna perofetane hnei Akötresie ekö. Matre, kola thue aja koi Ageripa troa dreng la hna qaja hnei Paulo.
11 Hnei Paulo hna amexeje la aqane ujë i angeic ekö kowe la itre keresiano. Öni angeic: “Nyipici hnenge hna mekune laka iji ni troa kuca la nöjei ewekë ka kösaue a ifekethëne memine la atesiwa i Iesu ate Nazareta . . . nge atraqatepi hë la elëhninge [kowe la itretre drei Iesu], ini’ a angazo angate uti hë la ite xa lapa kö.” (Ite Huliwa 26:9-11) Tha Paulo kö e cili a atrun. Alanyimu la itre atr ka atre la aqane qanangazone Paulo la itre keresiano. (Ga. 1:13, 23) Maine jë, hnei Ageripa hna ketre hnying ka hape, ‘Pine nemene matre saze jë la atr cili?’
12 Öni Paulo e sa, ka hape: “Ini pete kö a tro Damaseko eë fë la musi me mene qa thei itete huje ka sisitia, nge e hnaipajö, ini a öhn’ e kuhu gojeny la lai qa hnengödrai, ka hadehadeu hune la jö, kola wië xöteithö ni me angete ce tro me ini. Nge keiju hi huni asë e kuhu hnadro, ini a denge la aqane ula kola ulati koi ni, me hape, ngöne la qene Heberu, Saulo, Saulo fe, ue lae eö a angazo ni ? akötë hë eö troa waja la ite meken. Mate öningejë, Joxu fe, deti cilie ? Ame hnei Joxu hna hape, Iesu ni lo hnei ’ö hna pune angazon”—Ite Huliwa 26:12-15.
13 Qëmekene troa mama hnei Iesu koi angeic, kösë hnei Paulo hna “waja la ite meken.” Tune la ketre öni ka thele ge, kola nyape menu kowe la jo ka ithinyi nyine engën, hnei Paulo hna eatr pine icilekeu memine la aja i Akötresie. Hnei Iesu, hna amelene hmaca, hna mama koi Paulo ngöne la gojenyi ne Damaseko. Celë hi ka xatua Paulo troa saze la aqane mekune i angeic.—Ioane 16:1, 2.
14 Hna canga ujë hnei Paulo. Öni angeic koi Ageripa: “Tha hnenge kö hna sixane la amamane qa hnengödrai ; ngo hnenge hna pane amamane koi angat’ e Damaseko me Ierusalema memine la nöj’ asë e Iuda, me angete etheni fe, mate tro angat’ a ietra me ujë koi Akötesie, me kuca la ite thina ka cei tune memine la ietra.” (Ite Huliwa 26:19, 20) Itre macatre hë ne kuca Paulo la hnëqa hna athip hnei Iesu lo ijine cili. Nemene la thangane lai? Ame la itre ka kapa la maca ka loi, tre, angatr a ujë qa ngöne la aqane ujë i angatr ka ngazo. Maine itre ka kuci ngazo, maine huliwa thoi ekö, angatr a bëeke hmaca koi Akötresie. itre atr ka loi hë angatr, me ka trongëne la itre wathebo me itre hna amekötine hnei mus.
15 Ngo, ka pë pengöne la itre ewekë cili kowe la angetre Iudra ka icilekeu me Paulo. Öni Paulo: “Celë hi ite qane mate xölehuji ni hnei angete Iuda ngöne la ēnē, me thele jëne troa humuthi ni. Hetenyi hë ni la ixatua qa thei Akötesie, celë hi mate cile huti ni uti hë la drai celë, kola anyipicine kowe la ite ka co me ka tru.”—Ite Huliwa 26:21, 22.
16 Ame easë itre keresiano, loi e tro sa “hnëkëne pala hi troa sa koi angat asëjëihë,” itre ka hnyingëne pengöne la lapaune së. (1 Pe. 3:15) Maine easa qejepengöne la hmi së kowe la itretre mus, maine itretre amekötin, loi e tro sa nyitipune la aqane kuca i Paulo qëmekei Ageripa me Feso. Loi e tro sa qaja, cememine la metrötr, la itre thangane ka loi hne së hna kapa, memine fe la itre ka kapa la maca ka loi. Maine jë, troa ketre la hni angatr.
(Ite Huliwa 26:28) Ame hnei Ageripa hna qaja koi Paulo, ka hape, Tro eö a ahmalanyi ni troa Kerisiano hnene la hnepe ka co.
“Ini a Hë Koi Kaisara”
18 Öni Paulo kowe la gavena ka hape: “Feso fe, joxu, tha hmo kö ni la ; ngo ini a qaja la ite tenge ewekë ka nyipici me inamacan. Ke wangate hmekunë hë hnei joxu la ite ewekë celë, nge ini a ewekë tha hlele qëmeke i nyidë; . . . Ageripa fe, joxu, hape u kapa kö hnei cilieti la ite perofeta ? ate hë ni laka cilieti a kapa.” Öni Ageripa e sa ka hape: “Tro eö a ahmalanyi ni troa Kerisiano hnene la hnepe ka co.” (Ite Huliwa 26:25-28) Nyipici ju hë, maine thoi la itre trengewekë i nyidrë, ngo kola amamane laka, hna ketr la hni nyidrë.
Troa Sine Thel La Itre Mekune Ka Sisitria
(Ite Huliwa 26:20) Ngo hnenge hna pane amamane koi angat’ e Damaseko me Ierusalema memine la nöj’ asë e Iuda, me angete etheni fe, mate tro angat’ a ietra me ujë koi Akötesie, me kuca la ite thina ka cei tune memine la ietra.
nwtsty Ithuemacanyi göi Ite Huliwa 26:20
ietra: Ame la hnëewekë qene Heleni e celë, tre, kola hape, “troa saze mekun.” Ame la aliene lai, tre, troa saze la aqane mekun, me ujë, me itre hna ajan. Ame e celë, ame la atr ka “ietra,” tre, atre ka thele Akötresie, me ka ajan troa imelekeu me Nyidrë. Itre huliwa a amamane laka, ka nyipi ietra angeic. Haawe, mama hi ngöne la aqane ujë i angeic, me aqane mekune laka, saze hë angeic.
(Ite Huliwa 26:27) Ageripa fe, joxu, hape u kapa kö hnei cilieti la ite perofeta ? ate hë ni laka cilieti a kapa.
w03 15/11 16-17 ¶14
Xatuane Jë La Itre Xan Troa Kapa La Maca Ka Loi
14 Atre hi Paulo ka hape, atre Iudra Ageripa. Thenge la hna atre hnei Ageripa göne la hmi Iudra, öni Paulo koi nyidrë, ame la hnei angeic hna cainöjëne, tre, “tha kolo kö a qaja la kete ewekë, ngo loi pe la hnei ange perofeta me Mose hna qaja ka tro ha traqa” göne la mec me melehmaca ne la Mesia. (Ite Huliwa 26:22, 23) Öni angeic koi Ageripa: “Ageripa fe, joxu, hape u kapa kö hnei cilieti la ite perofeta ?” Jole ju hi Ageripa e cili. Maine tro nyidrëti a qaja ka hape, waea, tha tro hmaca kö a qeje angeic ka hape, atre Iudra. Ngo, e tro nyidrëti a nang, kösë nyidrëti hë lai a ce xöle me Paulo, nge tro ha jele keresiano nyidrë. Ka inamacane Paulo, ame hnei angeice kö hna ketre sipu sa la hnyinge i angeic, me hape: “Ate hë ni laka cilieti a kapa.” Nemene la aqane sa i Ageripa? Öni nyidrë: “Tro eö a ahmalanyi ni troa Kerisiano hnene la hnepe ka co.” (Ite Huliwa 26:27, 28) Ngacama tha kapa kö Ageripa la hmi keresiano, ngo ase hë Paulo ketr la hni nyidrë hnene la maca.—Heberu 4:12.
E Tusi Hmitrötr
(Ite Huliwa 25:1-12) Nge traqa ha Feso kowe la hnei nyidëti hna musi ngön, nge thupene la köni drai nyidëti a tro Ierusalema eë qa Kaisaria. 2 Anne hnene la ate huje ka sisitia me ite tane i angete Iuda hna qeje Paulo koi nyidë, me weneweji koi nyidë ; 3 me sipo nyidë ma ea ihnimi göi Paulo, mate upi nyidëti Ierusalema eë ; nge tro angat’ a qenithi nyidëti e kuhu gojenyi troa humuth. 4 Ngo Feso a sa, ka hape, troa thupë Paulo e Kaisaria, nge tha hmite kö nyidëti troa tro kowe lai. 5 Nge öni nyidëti, ka hape, Qa ngöne lai, qâ i nyipunie itete ateine troa ce tro me ini, maine hete geIe la ate celë, te, troa qaja. 6 Nge ase hë lapa thei angate kösë köningemene ma luepi la o drai, nyidëti a uti Kaisaria nge elanyi nyidëti a të hune la ita ne amekötin, me iupi troa thei Paulo. 7 Nge traqa ha nyidë, ame hna cile xöteithe hnei angete Iuda hna uti qa Ierusalema, me nyi ewekë Paulo ene la nöjei ewekë ka hace me ka kösau, lo hnei angate hna tha’ teine troa anyipicin. 8 Nge Paulo a qaja ameköti nyidëti kö, ka hape, Tha hnenge kö hna kuca la qali kowe la wathebo i angete Iuda, kete pëkö kowe la ēnē, kete pëkö koi Kaisara. 9 Nge Feso a ajane troa amadi angete Iuda, ame hnei nyidëti hna sa koi Paulo, ka hape, Aja i ’ö tro Ierusalema eë, mate troa hnyingën’ e cili la nöjei ewekë e celë qëmekeng ? 10 Ame hnei Paulo hna hape, Ini hi la a cile qëmeke ne la ita ne amekötine i Kaisara, lo ka ijije troa hnyingë ni ngön ; pëkö ngazo hnenge hna kuca koi angete Iuda, ate hnyawa ha cilieti Io. 11 Nge maine hete ngazong, me kete ewekë hnenge hna kuca ka ijiji ni troa mec, tha xele kö ni ma mec ; ngo e pëkö kete ewekë hnei angat hna nyi ewekë ni, pëkö ate ateine troa nue ni koi angat Ini a hë koi Kaisara. 12 Nge ase hë Feso ithanata me angete iemân, nyidëti a sa, ka hape, Eö a hë koi Kaisara, hunikö ? hawe, tro hë eö koi Kaisara.
28 JANUARE–3 FEBUARE
ITRE TRENGAMO QA HNINE LA WESI ULA | ITE HULIWA 27-28
“Paulo a ea utihë Roma”
(Ite Huliwa 27:23, 24) Ke qa i angela i Akötesie hna cile thenge eid, ewekë i nyidëti ni, nge ini a nyi hlue i nyidë, 24 kola hape, Paulo fe, the qou kö ; tro pala hi eö a cile qëmeke i Kaisara ; nge hana wang, ase hë Akötesie hame eö angat’ asë angete ce ea me eö.
“Tha Tro Kö a Pate La Mele i Kete e Nyipunie”
15 Hnei Paulo hna cainöjëne “la mejiune hna thinge hnaean hnei Akötesie” kowe la itre atr ka alanyim hune la he. (Ite Huliwa 26:6; Kol. 1:5) Kolo ha troa lö la he i angatr, ngo hnei Paulo hna hamë mejiune koi angatr. Öni angeic: “Qa i angela i Akötesie hna cile thenge eid, ewekë i nyidëti ni, nge ini a nyi hlue i nyidë, kola hape, Paulo fe, the qou kö ; tro pala hi eö a cile qëmeke i Kaisara ; nge hana wang, ase hë Akötesie hame eö angat’ asë angete ce ea me eö.” Hnei Paulo hna hamë ithuecatr koi angatr, me hape: “Qa ngöne lai, ite joxu fe, catejë nyipunie, ini a lapaune koi Akötesie, ka hape, tro pala kö a eje la hna qaja, koi ni. Ngo loi pe troa ha tithi shë ngöne la kete hnapet.”—Ite Huliwa 27:23-26.
(Ite Huliwa 28:1, 2) Nge melë hë hun, ame hna wangate hmekune hne huni laka Melita la ëjene la hnapet. 2 Nge atraqate la hna hnimi huni hnei ite wanaithihlë ; ke angat’ a athi hlenge hun, me kepe huni asë ngöne laka hate manie me hnöt.
“Tha Tro Kö a Pate La Mele i Kete e Nyipunie”
18 Hnei angatr hna të hune la hnapet e Melita, ngöne la götrane ailojë ne Sicile. (Wange ju la hna eköhagen, “Ekaa la hnapet e Melita?”) “Atraqate la hna hnimi” angatr hnene la itre wanaithihlë, itre ka qaja la ketre qene hlapa. (Ite Huliwa 28:2) Angatr a mengömengön, nge itre ka hmuhmu hnyawa. Ngacama kola hnötr me manie, hnene la itre wanaithihlë hna athi eë koi angatr, matre troa akeukawanyi angatr. Hna hane traqa fe la ketre iamamanyikeu.
“Tha Tro Kö a Pate La Mele i Kete e Nyipunie”
21 Popilio, la ketre trena dro me ka trenamo ngöne la hnapet cili. Maine jë, angeice hi la ketre tane i angetre Roma ka hlemu e Melita. Luka a qeje angeic ka hape, “joxu ne la hnapet,” nge celë hi aqane hëne ngöne la qene Melita, hna cinyihane ngöne la lue iplak ka hekö. Köni drai ne kepe Paulo memine la itre sinetronge i angeic, hnei Popilio. Hna wezipo la keme i Popilio. Hnei Luka fe hna qejepengöne hnyawa la meci nyidrë. Öni Luka, “Kola meci fë ideuthi me trongë madra.” Hnei Paulo hna thith, me ati ime hune la qatr, ame hna loi pi la meci nyidrë. Hna haine la ewekë celë hnene la angetre Melita. Hnei nyudreni hna tro fë la itre xa wezipo koi Paulo, matre troa nyinyine la itre meci angatr. Ketre, hnei nyudreni hna hane traqa fë ahnahna koi Paulo memine la itre sinetronge i angeic, me hamëne la itre hnei angatr hna ajan qëmekene troa xome hmaca la gojeny.—Ite Huliwa 28:7-10.
(Ite Huliwa 28:16, 17) Nge traqa ha huni e Roma, ame hnei keneturio hna nue la ite hna othe kowe la tane i angate thup ; nge hna nue koi Paulo troa lapa cas, nge hete soce ate thupë nyidë. 17 Nga thupene la köni drai, ame hnei nyidëti hna icasinekeune la ite nyipi ate i angete Iuda ; nge icasikeu hë angat, öni nyidëti, ka hape, Ange tejine fe, pëkö ngazo hnenge hna kuca kowe la nöj, me kowe la ite thina ne la ite xötapane shë, ngo hna nue hna othe qa Ierusalema, kowe la ite ime i angete Roma.
“Nyidëti a Amamane Me Anyipicine”
10 Ame la kola xepe la he e Roma, “hna nue koi Paulo troa lapa cas, nge hete soce ate thupë nyidë.” (Ite Huliwa 28:16) Hna majemine ce othe la atr hna akalabusin memine la ka thupë angeic, matre tha tro kö a kötr. Paulo la ketre atre cainöjëne la Baselaia, haawe, tha sine ceine kö la ka troa sewe angeic troa ithanata. Thupene la hnei Paulo hna pane mano koi 3 drai, hnei angeic hna hëne la itretre Iudra ka mama ngöne la nöj, matre troa iamamanyi koi angatr, me cainöj.
Troa Sine Thel La Itre Mekune Ka Sisitria
(Ite Huliwa 28:3) Nge Paulo a nyi hleng me atë hune la eë, ame hna xaleapi la une ka iheji qa ngöne la ideuth, me fede ngöne la ime i nyidë
nwtsty Ithuemacanyi göi Ite Huliwa 28:3
une ka iheji: Ame enehila, pëhë une ka ihej (vipère) ngöne la hnapet e Melita. Ngo, kola mama ngöne la hna melëne celë ka hape, atre hnyawa hi la itre atr ekö, la pengöne la une cili. Thupene la itre hadredre lao macatre, patre hë lai vipère, hnene laka, hna saze la hnedrai, nge kolo fe a tru hnei atr e Melita.
(Ite Huliwa 28:11) Thupene la köni teu eëhuni a ea hune la kete he ne Alesanedria, lo ka za e hnapeti ene la ijine wene, ame la haten’ eje, te, Luefini.
nwtsty Ithuemacanyi göi Ite Huliwa 28:11
Luefini: Thenge la itre ifejicatre qene Heleni me Roma, “Luefini” la lue nekö i Zeus (qene Heleni, Di·oʹskou·roi), nge ame la ëjene la ketre, tre, Castor, nge ame la ketre, tre, Pollux. Kolo lue nekö i Zeus (Jupiter) me Leda, isola ne Sparte. Nyidroti la ka thupëne la itre ka ti he, me ka amelene la itre matelo ngöne la ijine ngazo drai. Pine nemene matre nyipiewekë tro sa atre la hnasaatr ka mama ngöne la imekene la he? Kola anyipicine laka, ame la ka cinyihane la hna melëne celë tre, ketre atre hi ka hane sine la tronge i Paulo.
E Tusi Hmitrötr
(Ite Huliwa 27:1-12) Nge xecië hë laka tro huni a ea Italia eë, ame hnei angate hna nue Paulo me ite xa hna othe kowe la keneturio ne la xöte i Auguso, Iulio la ëjen. 2 Ame hnei huni hna të hune la kete he ne Adamutiu, me ea kola mekune troa köte kowe la ite götrane nöj’ e Asia ; ce eëhuni me Aritako, ate Makedonia qa Thesalonika. 3 Nge elanyi, eëhuni a kuië uhni e Sidona. Nge loi la thina i Iulio koi Paulo, me nue nyidëti troa tro kowe la ite sine i nyidë troa kapa la ihnim. 4 Nge ase hë huni feke hna uhni, eëhuni a köte fene Kupero, ke ngazo la eny. 5 Nge ase hë huni kötëne la hnagejë e Kilikia me Pamafulia, eëhuni a xep’ e Mura e Lukia. 6 Nge öhnë hë hnei keneturio la he ne Alesanedria e cili kola troa ea Italie eë, ame hnei angeice hna ami huni hun’ ej. 7 Nge nyimu pui ne köte hmite hun, nge huliwapi hë huni troa eashenyin’ e Nido, ke ngazo la enyi, eëhuni a köte fene Kerete, hmekun’ e Salamone ; 8 nge atraqate la huliwa troa tian’ ej, ame hne huni hna köte kowe la götrane nöje hna ati ëjene QathëkaloIopihë ; nge eashenyi e cili la lapa lasea. 9 Nge thupene la ite drai ka nyimute, traqa ha la ijine ngazo troa ea, ke ase hë la ijine tha xen, ame hnei Paulo hna haji angat, 10 kola hape koi angat, Ite joxu fe, ini a mekune troa atraqate la ngazo ngöne la ea celë, tha kowe kö la hna qathë me he hmekuje hi, ngo kowe fe la ite mele shë. 11 Nge hnei keneturio hna drei tixene he memine la ate kë hen, ngo tha denge kö la hnei Paulo hna qaja. 12 Nge ngöne laka ngazo la qathë troa za ene la ijine wene, ame hnene la ka ala nyimu hna iqeje aja troa ea qa lai, maine ateine troa xep’ e Foinike mate za ene la ijine wene ; celë hi kete qathë a Kerete, hmekun’ e kolojë e kuë, me kolopi e kuë.