Nyine Kuca Matre Troa Mel Ngöne La Fene Ka Hnyipixe

Hne së hna ce wang laka, easenyi hë tro Akötresie a apatrene la fene celë ka ngazo, me nyinyine la itre jol e cailo fen. Xecie koi së laka, tro lai a eatr. Pine nemen? Pine laka, öni Tusi Hmitrötr:

“Kola tro la fen.”—1 IOANE 2:17.

Xecie koi së laka, hetre itre ka troa mel ke, önine la xötr ka hape:

“Ame la atre kuca la aja i Akötresie, tro angeic a lapa palua.”

Maine easa ajane troa mel, loi e tro sa kuca la aja i Akötresie. Ngo loi e tro sa pane atrepengöi Nyidrëti hnyawa.

JËNE MELE KOI SË LA ‘TROA ATREPENGÖI AKÖTRESIE’

Iatr: 1. Ketre föe ka huliwa ngöne pital a pane lapa ke angeic a kucakuca me akötr. 2. Angeic ngöne hnë iji kofi, angeic a goeëne la sine huliwa i angeic ka e la ketre zonal me madrin. 3. Sine huliwa i angeic a amamane la ketre xötr me hamëne la carte göne la sit jw.org.

Öni Iesu: “Ame la aqane troa hetrenyi la mele ka pë pun, tre, tro angatr a atrepengöi nyipë, Akötresie ka cas.” (Ioane 17:3) Maine easa ajane troa mel ngöne la kola troa apatrene la fene celë ka ngazo, loi e tro sa “atrepengöi” Akötresie. Tha tro hmekuje kö sa atre laka, ka mele Nyidrë. Loi e tro fe sa nyisinee i Nyidrë. Maine easa ajane troa imelekeu hnyawa me Akötresie, nyipiewekë tro sa xomi ijine matre troa easenyi koi Nyidrë. Tro sa ce wang la itre ini hna hamën hnei Tusi Hmitrötr matre tro sa nyisinee i Akötresie.

Itre Ini Qa Hnine La Tusi Hmitrötr

Aja i Akötresie tro sa mel ngöne la Paradraiso.

Hnei Akötresie hna xupi Adramu me Eva me ami nyidro ngöne la “gatran e Edrena.” Lue atr ka pexeje nyidro, nge hnei Akötresie hna hamëne la nöjei ewekë matre tro nyidroti a mele madrin. Maine drengethenge Akötresieti ju nyidro me nyisinee i Nyidrë, tha tro kö nyidroti a mec. Ngazo pe, hnei nyidroti hna tha idrei, me ena la wathebo i Akötresie.

Itre kepin matre easa akötr.

Pine la hnei Adramu hna tha idrei, matre tha ijiji angeice hë me itre matra i angeic troa mele palua e celë fen. Öni Tusi Hmitrötr: “Hna haöthe la fen hnene la ngazo ne la ala cas, nge meci a traqa pine la ngazo, ene pe, traqa pi la meci kowe la nöjei atr asë.” (Roma 5:12) Tune la kola ixötrekeu la meci ne la kem me thine kowe la nekönatr, ngazo me meci la pun kowe la itre matra i Adramu. Celë hi matre, easa qatre trootro me mec.

Hetre hnei Akötresie hna kuca thatraqai së.

Öni Tusi Hmitrötr: “Atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioane 3:16) Hnei Akötresieti hna upi Iesu e celë fen matre troa meci pi së. Öni Prabhakar, ketre trejin qa Inde ka 86 lao macatre: “Celë hi ketre hatrene la ihnimi Iehovaa koi ni. Ijijinge hë troa hetrenyi la mel ka pë pun.”

Aqane tro sa amamane la hni ne ole së koi Akötresie.

Öni Tusi Hmitrötr ka hape, easa amamane la hni ne ole së koi Akötresie, ngöne la easa “trongëne la itre wathebo i nyidrë.” (1 Ioane 2:3) Iehova a amamane la nyine tro sa kuca matre troa mel madrin enehila. (Isaia 48:17, 18) Tha aja i Nyidrëti kö tro sa akötr. Iehova a thingehnaean laka, maine tro sa trongëne la itre Wathebo i Nyidrë, tro hë sa mele madrin enehila me elany.

TROA E TUSI HMITRÖTR O DRAI

Ame ngöne ijine xen, angeic a e Tusi Hmitrötr me gala draië. — Loi e tro sa sipo ixatua ngöne la thith me kuca la aja i Akötresie, matre hane mel ngöne la pune la fene celë

Maine aja së troa mel, nyipiewekë tro sa xen e nöjei drai. Ngo öni Iesu: “Tha tro kö la atr a mel hnei falawa hmekuj, ngo hnene la nöjei trengewekë hna qaja hnei Iehova.”—Mataio 4:4.

Ame enehila, easa e la itre trengewekë i Iehova e hnine la Tusi Hmitrötr. Maine tro sa inine la itusi cili, tro hë sa atre la itre hna kuca hnei Akötresieti ekö, enehila, me elany.

TROA SIPO IXATUA NGÖNE LA THITH

Maine jë, easa ajane troa drengethenge Akötresie, ngo jole koi së troa nuetrije la itre ewekë hna sisine hnei Nyidrë. Nemene la nyine tro sa kuca e cili? Loi e tro sa thele troa atrepengöi Akötresieti hnyawa.

Hanawang la hna melën hnei Sakura, ketre föe ka kuca la itre huliwa ka sisi ekö. Hnei angeic hna inine la Tusi Hmitrötr me e la wathebo i Akötresie ka hape, “kötrene pi la kuci ngazo.” (1 Korinito 6:18) E cili, hnei Sakura hna thith me sipo trengecatr koi Iehova, matre troa nuetrije la itre huliwa ka sis. Angeic palahi a isi memine la itre aja cili enehila. Ngo öni angeic: “Ame la kola traqa la itre mekun ka ngazo, eni a fe la aliene hning koi Iehova. Atre hi ni laka, thatreine kö ni troa isi memine la itre aja cili. Eni a easenyi koi Iehova ngöne la thith.” Tui Sakura, itre milio lao atr a thele troa atrepengöi Akötresieti hnyawa. Nge Nyidrëti a thue trengecatr koi angatr matre troa mel thenge la itre aja i Nyidrë.—Filipi 4:13.

Maine tro sa thele troa atrepengöi Akötresieti hnyawa, tro hë ‘Akötresieti a atre së’ me nyisinee së. (Galatia 4:9; Salamo 25:14) E cili, tro hë sa mel uti hë la fene ka hnyipixe. Ngo troa tune kaa la mel ngöne la fene ka hnyipixe? Celë hi lai hne së hna troa ce wang ngöne la ketre tane mekun.

a Iehova la ëje i Akötresie e hnine la Tusi Hmitrötr.