Tru Catre La Itre Manathith Hnei Nyio Hna Kapa Ngöne La Huliwa i Iehova

THA KA HMI KÖ LA KEME I EAHUN

Hna hnaho ni lo 1934. Lue atre Suisse la kem me thineng, ka fek troa lapa e Timmins, ketre neköi traon ne Ontario e Canada. Ame lo 1939, hnei nenë hna nyiqane e la zonal Ita Ne Thup, me sine la itre icasikeu ne la itre Temoë Iehova. Ala 7 eahun, itre nekö eahlo. Nge hnei eahlo hna xometrongë eahun kowe la itre icasikeu. Tha qea ju kö nge Temoë Iehova fe hë nenë.

Tha madrine pi kö kaka koi nenë. Ngo catre hë la ihnimi eahlo koi Iehova, matre xecie koi eahlo troa lapa ngöne la nyipici. Goi tha cile fe eahlo lo ijine kola wathebone la hmi Temoë Iehova e Canada, lo itre macatre 1940. Ketre, hnei eahlo palahi hna hnim me metrötrë kaka, ngacama ngazo catre la thiina i nyidrë koi eahlo. Hna ketri eahun hnene la tulu ka lolo i nenë. Matre hnei eahuni asë, itre nekö i eahlo hna kapa la nyipici. Eloine pe, kola tro la itre drai, nge kola lolo trootro hnei kaka. Matre menyike hë la itre thiina i kaka koi eahuni asë.

ENI HA HULIWA I IEHOVA DRAI KA PEXEJ

Ame lo Ogas 1950, hnenge hna sine lo asabele hna hape, L’accroissement de la théocratie, e New York. Hnenge hna porotrik memine la itre trejin ka traqa qa cailo fen, me drenge la itre interviews ne lo itre ka ini e Gileada! Celë hi ka hamë aja koi ni troa huliwa catre koi Iehova. Xecie hnyawa koi ni troa huliwa i Iehova drai ka pexej. Ame hë la eni a bëeke koi hnalapa, hnenge hna canga nyialiene lo pepa ne sipo troa pionie. Hna sa koi ni hnene la Bethela ne Canada, ngo hnei angatr hna pane upi ni troa xomi bapataiso. Celë hi hnenge hna kuca lo 1 Okotropa 1950. Thupen la caa treu, ke pionie lapa fe hë ni. Nge hna upi ni a tro Kapuskasing. Nanyi catre la traone cili qa ngöne la hnalapang.

Ame lo 1951, hnene la Bethela hna ithuecatr kowe la itre trejin ka qene Wiwi troa fek kowe la götran ka aja ixatua e Québec. Ame lo eni a co, hnenge hna inine la qene Wiwi me qene Papale. Matre hnenge hna kapa la ihë, nge hna upi ni a tro Rouyn. Pëkö ca atr hnenge hna atre e cili. Tune lo hnenge hna qaja e kula, hna hamë ni hi la adresse. Lolo catre trongenge a tro cili. Itrotrohni hnyawa hi ni me Marcel. Nge madrine catre ni la eni a cainöj e Québec ngöne la foa lao macatre. Ngöne la pun la hnaafoane macatre, hna acili ni troa pionie hut.

INI NE GILEADA NGE ENI FE A ITREQE

Ame lo eni palakö e Québec, hna hane hë ni troa sine lo hna 26ne Ini Ne Gileada e South Lansing, New York. Hna fenesi la ini lo 12 Febuare 1956, nge hna upi ni a tro Ghana,b e Afrique de l’Ouest. Ngo hnenge hna pane bëek a tro Canada, koi “itre wiike hi” matre hnëkëne la itre pepang.

Hnenge hna lapa treqene la itre pepang e Toronto koi 7 lao treu, ngo tha itre wiike ju kö. Ame ngöne la ijine cili, hnenge hna lapa thei fami Cripps, nge hnenge hna iatre memine la nekö i nyidro jajiny, Sheila. Kolo ha kökötre la ihnimi nyio, matre hnenge hna mekun troa sipo angeic troa ikötresai me ni. Ngo traqa ju fe hi visang. Thupene la hnei nyio hna ce thith, hnei nyio hna ce axeciëne ka hape, tro kö ni a tro kowe la götran hna upi ni kow. Nge hnei nyio hna icinyanyikeu matre wange ka hape, tro kö nyio a faipoipo nge eu. Tha ka hmaloi kö, ngo hnei nyio hna öhn e thupene laka, eje hi lai mekun nyine tro nyio a xom.

Ame ngöne la ca treu, hnenge hna ti train me he me avio, uti hë la eni a traqa e Accra, e Ghana. Ame la eni a traqa e cili, hna acili ni troa atre thupëne la district. Celë hi ka aijijë ni troa kanothe la Ghana me tro Côte d’Ivoire me Togoland (hna hën enehila ka hape, Togo). Ame ngöne la ijine cili, pëkö sinatrongeng. Matre eni casi hi ngöne la jeep ne la Bethela. Tru catre la madrineng troa wange trootro la itre trejin!

Ame la itre pune wiik, eni a sine la itre asabele ne sirkoskripsio. Pine laka pëkö Uma Ne Asabele, itre trejin a acili uma baabu me heetrëne itre ej hnei dröne paama, matre tha tro kö a cinajön la itre atrene la asabele. Nge pëkö frigider ngöne la hnë xen, matre angatr a umëne la itre öni ka mel me humuth la ka ijij, göne troa thuane la itre trejin.

Ame la ketre ijine asabele, ase petre hi eahun hnyima. Kola cile fë cainöj hnei Herb Jennings,c ketre mesinare, nge sesëkötre ju hi eahun la kola utraxulu la ketre kau ka kötr qa ngöne la hnë xen. Ej hnyawa a tro nyipine la ita hmitrötr me itre trejin. Tha ithanata ju hi Herb, matre xou ju hi la kau. Eloine pe, hnene la 4 lao trejin ka tru trengecatr hna ea lai kau me abëekëne ej hmaca kowe la hnë xen. Ame hna xexe pi la itre atrene la asabele.

Ame ngöne la wiik, eni a amamane la film La Société du Monde Nouveau en action ngöne la itre xaa hunahmi. Matre, eni a hnöth la ca imaano ka wië nyipine la lue poto maine lue sinöe. Madrine catre la iatr! Ame kowe la itre xan, ke angatre petre hi a hane goeë film. Ame la kola amamane la itre trejin a bapataiso, ke angatr a xexe me madrin. Jëne lai film, angatr a trotrohnine laka, ka cas la itre Temoë Iehova ngöne la fen asë.

Ame lo 1958, thupene la lue macatre e Afrique, hnenge hna sine la asabele koi itre nöj ka nyimutre, e New York. Madrine catre ni la eni a öhnyi Sheila, kola traqa qa Québec. Angeic a pionie hut e cili. Hnei nyio palahi hna icinyanyikeu. Ngo ame la eni a öhnyi angeic, ke hnenge hna sipo faipoipo koi angeic, nge hnei angeic hna kapa. Eni pa cinyanyi jë koi trejin Knorrd matre sipo nyidrë tro Sheila a sine la Ini Gileada, me xötrethenge ni e Afrique. Nge hnei nyidrë hna kapa la sipong. Hnei Sheila hna traqa e Ghana, nge hnei nyio hna faipoipo e Accra lo 3 Okotropa 1959. Ka xecie koi nyio laka, Iehova a amanathithi nyio, ke hnei nyio hna amë panë Nyidrë ngöne la mele i nyio.

CE NYIO E CAMEROUN

Ame lo 1961, hna upi nyio a tro Cameroun. Nge hna upi ni troa acile la ketre filial, matre tru la huliwang. E thupen, hna acili ni troa kordinatör ne la filial, nge tru la hnenge hna inine matre cilëne hnyawane lai hnëqa. Ame lo 1965, upune pi hi Sheila. Tha mekune pi kö nyio laka, tro nyio a hetre nekönatr. Ngo ame hë la nyio a kapa me hnëkë troa bëek a tro Canada, hna traqa la ketre ewekë ka hace koi nyio.

Hna uthith la nekönatr. Nge öni droketre koi nyio ka hape, nekötrahmany. Traqa ha koi 50 lao macatre enehila, nge nyio palahi a meku nyën. Ngacama tru catre la hace i nyio, ngo hnei nyio kö hna lapa e Cameroun, ketre götran hnei nyio hna hnime catrën.

Hna lapa axösisine la itre trejin e Cameroun, ke tha ka kuci politik kö angatr. Nge the qaja palaha la kola élections présidentielles. Ame lo 13 Mei 1970, hna traqa la ketre ewekë hnei eahun hna xouen: Hna wathebone la hmi ne la itre Temoë Iehova. Thupene la 5 hi lao treu ne lapa hun ngöne la Bethela ka hnyipixe, hnei mus hna thinge ej. Ame ngöne la ca wiik, hna up asë la itre mesinare qa ngöne la nöj, nge hna upi ni fe me Sheila. Hace catre koi nyio troa trotrij la itre trejin. Hnimi angatre catre nyio, nge tru catre la hnei nyio hna meku angatr.

Thupene lai, sikis lao treu hnei nyio hna lapa ngöne la Bethela ne Faras. Qa cili, hnenge hna kuca asë la hnenge hna atrein matre xatuane la itre trejin e Cameroun. Ame lo Diseba, hna upi nyio kowe la Bethela ne Nigéria, ka elemekene la huliwa ne cainöj e Cameroun. Hna kepe nyio hnyawa hnene la itre trejin e Nigéria. Nge madrine catre nyio troa huliwa ngöne la Bethela cili koi itre macatre.

KETRE MEKUN KA HACE TROA XOM

Ame lo 1973, hnei nyio hna xome la ketre mekun ka hace catre koi nyio. Tru catre la meci Sheila. Ame la nyio a sine la ketre asabele e New York, hnei angeic hna treij me hape: “Thatreinë ni! Eni palahi a kucakuca me wezipo.” Traqa koi 14 lao macatre hnei nyio hna ce nyihlue i Iehova, e Afrique de l’Ouest. Madrine catre ni koi angeic, ngo ijine hë tro nyio a tro. Thupene la hnei nyio hna ce ithanatan me thith, hnei nyio hna bëek a tro Canada, matre troa xatua Sheila hnei itre droketre. Pëkö ketre mekun hnei nyio hna xom ka hace catr, hune la troa nue la huliwa ne mesinare memine la huliwa i Iehova drai ka pexej.

Thupene la nyio a traqa e Canada, hnenge hna öhnyi huliwa ngöne la ketre traon e Toronto, ngöne la hnë salemë loto, hna cilëne hnene la ketre sineeng. Hnei nyio hna loué la neköi appartement, me itöne la itre meuble thei itre xan. Matre tha hnei nyio kö hna xomi gufa. Xele nyio troa ahacene la mele i nyio, ke nyio hmaca a pi huliwa i Iehova drai ka pexej. Sesëkötre ju hi nyio la kola canga eatrëne la mekuna i nyio.

Hnenge hna nyiqane huliwa ngöne la hnë xupi Uma Ne Asabele e Norval, Ontario. Nge eni a huliwa e nöjei Mecixen. Thupene lai, hna sipo ni troa thupëne la Uma Ne Asabele. Pine laka kola lolo trootro la meci Sheila, hnei nyio hna kapa lai hnëqa cili. Matre ame e Juun 1974, hnei nyio hna nyiqane lapane la Uma Ne Asabele. Madrine catre nyio troa huliwa hmaca koi Iehova drai ka pexej!

Lue macatre thupen, kolo palahi a lolo trootro la meci Sheila, matre hnenge hna kapa troa atre thupëne la sirkoskripsio. Hna upi nyio a tro Manitoba e Canada, gaa hnötre catr. Hna akeukawanyi nyio hnene la ihnimi ne la itre trejin. Hnei nyio hna öhn e cili laka, tha ka nyipiewekë kö la götrane hne së hna nyihlue i Iehova ngön, ngo ene pe la troa nyihlue i Iehova ngöne la götrane hna upi së kow.

KETRE INI KA TRU

Ame lo 1978, thupene la itre macatre ne huliwa ngöne la sirkoskripsio, hna hë nyio troa huliwa ngöne la Bethela. E thupen, hnenge hna kapa la ketre ini ka tru, nge ka jole pi hë koi ni. Hna upi ni troa cile fë cainöj qene Wiwi ka 1h30, ngöne la ketre icasikeu ka ketrepengön e Montréal. Ngazo pe, pëkö ka trotrohnine la cainöjeng, matre hna hamë eamo koi ni hnene la ketre trejin ka huliwa ngöne la Biero Thatraqane La Huliwa Ne Cainöj. Maine ju tro ni a trotrohnin e cili ka hape, thatreine hnyawa kö ni cile fë cainöj. Nge nyipici hi! Ngo tha hnenge kö hna kapa la ixatua ne lai trejin. Matre hnei nyio hna iwesitrë. Ame koi ni, angeic a qejegele ni, ke tha hna pane felisite ni kö hnei angeic. Tha kapa kö ni la eamo, pine la aqane hamën, me aqane goeë xapo hneng.

Itre drai thupen, hnene la ketre atrene la filial hna wai ni. Atre hi ni laka, tha ase kö ni kapa la eamo hna hamë ni. Hnenge hna qeje menu pine la aqane ujëng. E thupen, hnenge hna wange la trejin ka hamë eamo koi ni, me qeje menu koi angeic. Hna ini ni troa ipië, nge tha tro jë kö ni lai a thëthëhmin. (It. Ed. 16:18) Hnenge hna thithifë koi Iehova. Nge tha tro hmaca kö ni a wesitr, e kola hamë eamo koi ni.

Traqa koi 40 lao macatre enehila eni a huliwa ngöne la Bethela ne Canada. Nge ame lo 1985, hna hane ië ni troa nyiatrene la Komite Ne Filial. Ngazo pe ame lo Febuare 2021, hna mec hnei Sheila. Hace catre ni! Nge pine laka, eni ha kucakuca, tha ijijinge hë troa kuca la itre xaa huliwa. Ngo eni a madrin, ke tru catre palakö la itre huliwange koi Iehova enehila. Matre tha öhne kö ni la kola ‘tro la itre drai ne la meleng.’ (A. Cai. 5:​20) Nyipici laka, hnenge hna cile kowe la itre jol, ngo tru catre kö la madrin hnenge hna kapa. Hetre thangane catre koi ni la hnenge hna amë panë Iehova ngöne la meleng me huliwa koi Nyidrë drai ka pexej ngöne la 70 lao macatre. Eni a thithi fë la itre jeune matre tro palahi angatr a amë panë Iehova ngöne la mele i angatr. Xecie koi ni laka, tro fe angatr a hetre mel ka loi me madrin. Mele hi lai hne së hna troa kapa, e hne së hna nyihlue i Iehova.