Ijijing Pala Kö Troa Xomi Loto?

EKÖ hë epuni xomi loto. Nge madrine catr epun troa hetre sipu loto i epun me tro kowe la itre götran hnei epun hna ajan. Ngazo pe, fami epun me itre sinee i epun a xou, nge tha aja i angatr hmaca kö tro epuni a xomi loto. Ngo, tha trotrohnine kö epun la kepin matre angatr a xou.

Maine celë hi hnei epun hna melën, nemen la ka troa xatua epun troa wang ka hape, tha ijiji epuni hmaca kö troa xomi loto?

Ame ngöne la itre nöj laka, troa ahnyipixene hmaca la permis, loi e tro la itre qatr ka xomi loto a pase thei droketre. Itre keresiano a metrötrëne la itre wathebo me itre hna amekötin hnene la itre mus. (Roma 13:1) Ngo maine pëkö wathebo ka tun ngöne la nöje i epun, hetre itre xaa aqane troa wang ka hape, ijiji epuni pala kö troa xomi loto maine waea.

WANGE JU KA HAPE, IJIJI EPUN PALA KÖ TROA XOMI LOTO

Tune la hna qaja ngöne la sit américain de l’Institut national du vieillissement, loi e tro epuni a pane hnying ka hape:

Jole kö koi ni troa e la itre panneaux de signalisation maine öhn e jidr?
Ijijing pala kö troa xei matre goeëne la itre rétroviseurs me itre angles morts?
Ijijing pala kö troa canga waja la frein?
Eni kö a nyape hmidra, matre kola ahmitrën la itre xaa loto?
Hapeu, xönë hi tro ni a aksida? Hetre eatrene kö la lotong ke, hnenge hna jenge la ketre ewekë?
Hna hane kö acilë ni hnei polis, pine la aqane xomi lotong?
Hnenge kö a hane meköl la eni a xomi loto?
Hapeu, hnene kö la itre wenekas hna ajolë ni troa xomi loto?
Kolo kö a xou hnene la faming maine itre sinee la eni a xomi loto?

Maine hnei epun hna sa ka hape, öö ngöne la cas maine lue hnying, ke loi e tro epuni a pane mekune hnyawa. Maine jë, the xomi loto hmaca kö e jidr. Nge, loi e tro pala hi a wang ka hape, ijiji epuni pala kö troa xomi loto. Hnyingëne jë fe kowe la fami maine sinee i epun, la mekuna i angatr göne la aqane xomi loto i epun. Maine pena, xome jë la itre cours de conduite sécuritaire. Ngo, maine tru la itre hnying hnei epun hna sa ka hape, öö, ke loi ju hë hna xomi loto.a

XOME JË LA ITRE TREPENE MEKÖT

Ame itre xaa ijin, tha öhne kö së laka, jole hë koi së troa xomi loto. Maine jë, jole koi epun troa mekun maine qaja kape, tha tro hmaca kö epun a xomi loto. Matre, nemene la itre trepene meköt ka troa xatua epun troa atreine axecië mekun ka loi? Tro sa ce wang la lue trepene meköt.

Troa atre la itre ifego së. (It. Ed. 11:2) Ame la easa utipië trootro, ke tha enij hë së tune ekö, tha öhne me dreng hnyawa ha së koilo, nge genyi hë la ngönetrei së. Ame la itre xan a nyiqane utipië trootro, tha kuca ha angatr la itre xaa spor, wanga eatre pi angatr. Ceitune hi lai memine la kola xomi loto. Eje hi, tro la atr ka atre la ifego i angeic, a axeciën ngöne la ketre ijin ka hape, tha tro hmaca kö angeic a xomi loto, ke wanga eatre pi angeic. (It. Ed. 22:3) Ketre, tro fe la atr ka atre la ifego i angeic a dreng me kapa, la itre sinee i angeic a qaja ka hape, angatr a seseu göne la aqane xomi loto i angeic.—Wange ju fe la 2 Samuela 21:15-17.

Tha tro kö a upezö eö “pine la madra hna anenin.” (Dreut. 22:8) Hna mecin la troa xomi loto angazony. Maine tro pala hi la ketre atr a xomi loto nge tha ijiji angeice hë, tro angeice lai a eatr me itre xan. Ketre, maine tro angeic a axulune la ketre aksida, nge hetre ka mec, ke zö i angeic la madra hna anenin.

The mekune kö ka hape, tha tro hmaca kö la itre xan a metrötrë epun, ke tha epuni hmaca kö a xomi loto. Iehova a hnimi epun me madrin la epuni atre la tre ifego i epun, me ipië me meku itre xan. Nge tro kö Nyidrëti a sajuë epun me akeukawanyi epun. (Isa. 46:4) Tha tro jë kö Nyidrëti a nuetriji epun. Celë hi matre, sipo ixatua jë thei Iehova, matre hetre inamacan me atreine waiewekë la epuni a axecië mekun, göi troa xom maine tha xomi loto.

Ixatua Qaathei Itre Xan

Ka loi kö tro la fami a ithanatan me itre kem me thin göi xomi loto. Maine jë, eö la ketre sinee ne la ka xomi loto, nge eö a dreng la itre xan a qaja ka hape, angatr a xou göne la aqane xomi loto i angeic. The drei simine kö la hnei angatr hna qaja. Sipone jë kowe lai atr, tro eö a ce të me angeic. Nge e thupen, ce ithanatane jë me angeic la aqane xomi loto i angeic. Ame la epon a porotrik, pane mekune jë ka hape, eö la hna ithanata kow. Loi e tro eö a loi thiina, ngo qaja mekötine jë la itre ewekë. The amexeje kö la macatre i angeic, ngo qaja jë pe la aqane xomi loto i angeic. The qaja kö ka hape, “Thatreine hë nyipë xomi loto,” ngo qaja jë pe ka hape, “Eni a xou la nyipë a xomi loto, wanga eatre pi nyipë.” Amexeje jë la itre trepene meköt ka mama ngöne la tane mekune celë matre ketr la hni angeic.

Nyipiewekë tro së a trotrohnine la qatr ka tha xomi loto hmaca kö. Pine nemen? Ke angeic a mekun ka hape, tha ijiji angeice hë troa kuca la hnei angeic hna ajan. Nemen la nyine tro eö a kuca? Thele jë troa loi thiina me xatua angeic. (It. Ed. 17:17) Maine jë tro angeic a mekun ka hape, angeic a nyiqai eö, matre the treqene kö tro angeic a sipo eö troa iati. Kuca jë me angeic la ketre porogaram, matre hetre ka troa ati angeic pala hi koi itre icasikeu, me cainöj, me komisio, me tro koi droketre, me itre xane ju kö. Amamane jë koi angeic ka hape, aja i eö troa xatua angeic me ce lapa me angeic.—Roma 1:11, 12.

a Maine epun a aja itre xaa ithuemacany, wange ju la tane mekun “Circulation routière: êtes-vous en sécurité?” ngöne Hmeke Jë! ne 22 Ogas 2002, Qene Wiwi.