Itre Qatr Me Qatre Föe​—Ka Tru Catr Epun Kowe La Ekalesia

Hapeu, hetre ewekë kö hnei epun hna thatreine kuca, ke qatre hë epun? Matre epun a wangaconyi epun, ngacama nyimu macatre hnei epun hna huliwa catr koi Iehova. Maine jë, epuni a dekurag ke, thatreine hë epun huliwa tun ekö. Maine eje hi lai, nemene la nyine tro epuni a kuca?

NEMENE LA HNEI IEHOVA HNA AJAN TRO EPUNI A KUCA?

Isa hnyinge jë ka hape, ‘Nemene la hnei Iehova hna ajan tro ni a kuca?’ Troa akeukawanyi epun hnene la hna qaja ngöne Dreuteronomi 6:5. Kola hape: “Qa i ö troa hnimi Iehova Akötresi ö hnene la hni i ö ka pexej, me mele i ö ka pexej, me trengecatre i ö ka pexej.”

Ame ngöne la xötre celë, Iehova a ajan tro epuni a nyihlue i Nyidrë hnene la hni epun ka pexej, me mele i epun ka pexej, me trengecatre i epun ka pexej. Tro la mekun celë a xatua epun, matre tha tro kö epuni a goeën la hna kuca hnei itre xan, maine mekun hmaca lo hnei epun hna atreine kuca ekö.

Pane mekune jë la: Ame lo epuni a jeune, nemene la hnei epuni hna hamën koi Iehova? Epuni a hamën asë koi Nyidrë, thenge la hnei epuni hna atreine hamën ekö. Ngo tune kaa ha enehila? Nemene la hnei epuni hna atreine hamën koi Iehova? Enehila, epuni pala hi a hamën la hnei epuni hna atrein. Maine tro sa mekun hnyawan, epuni pala hi a hamën koi Iehova la ka sisitria, tun ekö.

IJIJI EPUNI FE TROA XATUA ITRE XAN

The mekune kö la itre hnei epun hna thatreine kuca enehila, ngo thele jë pe la nyine tro epuni a kuca matre xatua itre xan. Hetre hnei epuni hna atreine kuca enehila, ngo hna thatreine kuca ekö lo epuni a jeune. Hane hi la itre xan:

Ce thawa jë me itre xan la hnei epuni hna melën. Lapa mekune jë la hna melën hnene la lue hlue i Iehova e cahu:

Dravita Joxu: “Nekö trahmanyi ni ekö, nge qatr hë ni enehila, ngo tha ase kö ni öhne la kola nuetrije la atr ka meköt, me kola thele xen la itre nekö i angeic.”​—Sal. 37:25.

Iosua: “Ame enehila, drenge ju! Ka tro hë ni la a mec. Atre hë epun hnene la hni i epuni ka pexej, me mele i epuni ka pexej laka, qa ngöne la nöjei ewekë ka mingöming hnei Iehova hna sisinyi koi epun, tha tria kö la ketre. Ngo hna eatrën asë hi. Tha tria kö la ketre.”​—Ios. 23:14.

Ekö hë Dravita me Iosua nyihlue i Iehova. Tru catr la hnei nyidro hna öhn, me melën. Matre ame la nyidro a ithanata, kola ketr la hni i itre xan, ke nyidroti a qaja la itre hnei nyidroti hna atre. Ma hnei epuni fe hna hane ithanata tui nyidro lo epuni a jeune. Ngo ame enehila, qatre hë epun, matre ame la hnei epuni hna qaja, ke canga tro hi a ketr la hni i itre xan.

Pine laka, ekö hë epun nyihlue i Iehova, atre hi epun ka hape, ka hamë madrin la troa nyihlue i Nyidrë. Nge ijiji epun troa ce thawa lai me itre xan. Hapeu, hnei epuni kö hna öhn la Iehova a xatuane la itre hlue i Nyidrëti ekö? The cile kö troa ce thawa me itre xan. Tro lai a xatua angatr. Ma celë hi hnei epuni hna öhn! Haawe, ijiji epun troa ithuecatr kowe la itre trejin, la epuni a qaja koi angatr la hnei epuni hna melën ngöne la huliwa i Iehova.​—Roma 1:​11, 12.

Ame la ketre aqane tro epuni a ithuecatr kowe la itre trejin, ke ene la troa sine la itre icasikeu ngöne la Uma Ne Baselaia, e ijij. Nge tro fe lai a ithuecatr koi epun. Öni Connie, lo hna qaja ha e caha ka hape: “Ame la eni a sine la itre icasikeu, ke kola ithuecatr koi ni. Tru catr la ihnim hnenge hna kapa ngöne la Uma Ne Baselaia, matre tro ni lai a dekurag fë nemen? Eni a hamë ahnahna koi itre xan, matre amamane la hni ne oleng koi angatr. Nge eni pala hi a thel la aqane troa ithuecatr kowe la itre trejin ngöne la itre huliwa i Iehova, tune la aqane kuca i angatr koi ni.”

KA TRU KOI IEHOVA LA HULIWA I EPUN

Tusi Hmitrötr a qaja la itre atr ka kucakuca, ngo hna hnim hnei Iehova. Tui Simeona, ketre qatr e Isaraela ka öhnyi Iesu lo medreng pala kö. Ame lo Simeona a tro kowe la uma ne hmi, angeic a öhne la itre xaa thupëtresij a eatrëne la itre hnëqa ka tru. Maine ju, tro angeic a meku nemen? Tha nyipiewekë hë angeice koi Iehova ke, qatre hë angeic. Ngo tha celë kö mekuna i Iehova. Ame koi Nyidrë, Simeona la ketre atr ‘ka meköt nge ka catre nyihlue i Akötresie.’ Matre hnei Nyidrë hna aijijë Simeona troa öhnyi Iesu. Goi upi Simeona fe troa hamën la ketre hna perofetane göne la Mesia! (Luka 2:​25-​35) Eje hi, tha Iehova kö a goeën laka, qatre menu hë Simeona, ngo ketre atr ka lapaune catr koi Nyidrë. Ketre, “ka tiqa fe angeic hnei uati hmitrötr.”

The luelue kö laka, Iehova a wangatrune la hnei epuni hna kuca, thenge la hnei epuni hna atreine hamën. Nyidrëti a wangatrune la huuj hna hamën “thenge la hna hetreny, ngo tha thenge kö la pë.”​—2 Kor. 8:​12.

Thele jë la hnei epuni hna atreine kuca. Hnyinge jë ka hape: “Nemene la nyine tro ni a kuca ngöne la huliwa ne cainöj, ngacama tha qea kö? Tune kaa e tro ni a ithuecatr kowe la ketre trejin jëne telefon, maine jëne sine tus?” Tru catr la thangane la itre ahnahna hne së hna hamën kowe la itre trejin, nge the qaja pala ha e qaathene la itre trejin ka hekö hë nyihlue i Iehova.

Ngacama pëhë trengecatre i epun, ngo ijiji epuni pala hi troa huliwa koi Iehova. Eje hi lai ka mama ngöne la hna melën hnene la ketre trejin föe qa Afrique de l’Est ngöne la hna eköhagen “Mele Ju Kö Angeic.”

The thëthëhmine kö laka, kola ithuecatr koi itre xan hnene la lapaun me aqane mele nyipici epun qan ekö. Epuni la ketre tulu ne catr, nge “ka meköti pala hi Akötresie, matre thatreine kö nyidrëti thëthëhmine la itre huliwa i nyipunie, me ihnim hnei nyipunieti hna amamane kowe la ëje i nyidrë, ene lo itre huliwa i nyipunie ekö me enehila kowe la ange ka hmitrötr.”​—Heb. 6:​10.

CATRE JË HULIWA KOI IEHOVA

Kola mama ngöne la itre hna ithel laka, lolo catr la mele ne la itre qatr ka xatua itre xan, itre ka iahlë, me mel aqeany.

Xatua itre xane ju hë së, ngo tro pala hi sa utipië trootro. Casi hi la nyin, ene la Baselaia i Akötresie. Tro ej a apatrene la qane la mec, ene la ngazo.​—Roma 5:​12.

Ngo ame la epuni a nyihlue i Iehova, me xatua itre xan troa atre Nyidrë, ke kola acatrene la mejiune i epun, me hamë trengecatre i epun. The thëthëhmine kö laka, ka tru catr koi Iehova la itre huliwa i epun, nge epun la itre tulu kowe la ekalesia.