Aqane Troa Xomihnine La Akötr Nyine Troa Kuca Enehila

Maine epuni a thele jëne troa nyinyine la itre akötre i epun, nyimutre la itre nyin hnei epuni hna troa öhn. Ame itre xan ka hetre thangan, nge ame pena itre xan tha ie kö. Hnene hi laka, isapengöne kö la aqane akötre së. Maine troa loi koi itre xan, ngo tha ie pë hë koi itre xan.

Hetrenyi la itre eamo hna melëne hë hnene la ka alanyimu. Hna majemine amexej itre ej hnene la itre droketre ka hamë eamo. Ketre, hna nyitrepene la itre eamo cili hnene la itre trepene meköt hna qatreng e hnine la Tusi Hmitrötr.

1: KAPA JU LA IXATUA QAATHENE LA ITRE SINEE

• 

  Alanyim la itre ka inamacan ka qaja, ka hape, celë hi ka troa xatua së troa xomihnine la akötr.[1] Nyipici laka, troa traqa la itre ijin, tro epuni a thel troa lapa cas. Ketre, tro epuni a nango xele ma wai atr.[2] Pengöne hi la atr ka akötr!

• Maine nyipici laka, epuni a ajan troa lapa cas, ngo the iananyi kö memine la itre xan, ke, angatr hmaca hi elanyi la ka troa xatua epun. Qaja hnyawane jë pe koi angatr la hnei epuni hna ajan maine hna xelene pena.

• Thenge la ka loi koi epun, iëne jë la itre ijin troa ce memine la itre sinee maine troa lapa cas pena.

XÖTR: “Loi la ala lue hune la ala cas . . . Maine kei la kete qâne la kete troa ea la sine i angeic, nge ekölö hi ni la ate casi e kei hë, nge pëkö sine i angeice troa e angeic.”​—Ate Cainöj 4:9, 10.

2: Troa Xeni Hnyawa, Me Enij

• Maine tro epuni a tuluthe la aqane troa xen, tro hë epuni lai a atreine xomihnine la akötr. Thele jë troa xeni wene sinöe, me dröne sil, me protéines.

• Iji timi jë, me itre xa nyine ij ka loi kowe la ngönetrei.

• Maine ka canga meji epun, loi e troa anyimua xeni ngöne la drai. Ijiji epuni fe troa sipo droketre la itre xa pengöne xen.a

• Loi e tro epuni a nango tro, me enij matre patre pi la itre xa mekun ka iajolë. Ketre, ame la epuni a kuci elo, ijine hi lai tro epun a mekun la itre xa ewekë.

XÖTR: “Pa pala kö ate xelene la ngönetei angeice kö ; ngo hna ithu ane me thupën’ ej.”—Efeso 5:29.

3: NYIPIEWEKË LA TROA MANO

• 

  Loi e tro sa meköl. Nyipiewekë catre kö kowe la itre ka hace hni, ke, kucakuca catre angatr hnene la akötr.

• Thupëne kö aqane iji kofi me ka haitr, ke, celë hi ka troa sewe epuni troa meköl.

XÖTR: “Loi e ca hnatrapaime ka tiqa ce me tingeting, hune la lue hnatrapaime ka tiqa ce me huliwa me kola xeni la eny.”—Ate Cainöj 4:6.

4: IËNE JË LA KA LOI KOI EPUN

• 

  Maine tro epuni a trotrohnine laka, isapengöne kö la aqane akötre ne la itre atr, haawe, tro hë epuni lai a iën la nyin ka loi.

• Alanyimu la itre ka öhne laka, ame la angatr a qaja amamane la akötre i angatr koi itre xan, kola xatua angatr troa xomihnine la akötr. Nge, ame pena itre xan, aja i angatre kö troa lapa fë la akötre i angatr. Pëkö hna amekötine hnene la itre ka inamacan göne la aqane troa xomihnine la akötr, troa lapa fë maine qaja amamane pena. Maine epuni a xou troa fe la hni epun kowe la ketre atr, nyiqaane qaja jë la itre aliene hni epun kowe la atr hnei epuni hna epe kow.

• Ame kowe la itre xa atr, ka loi e troa treij matre xapo pi la akötr. Nge, ame pena itre xan, tha ka treije kö.

XÖTR: “Ate kö la hni la aköte ne ej.” —Ite Edomë 14:10.

5: THIPETRIJE PI LA ITRE HNA MAJEMINE KA NGAZO

• 

  Hetre itre xa ka meci sineen ka iji menu la ka haitr, me xomi dorog matre troa xapo la akötre i angatr. “Jëne kötre” lai hna mecin. Xoxopatre hi la madrine i angatr, nge ka hetre thangane ka ngazo catr koi angatr. Thele jë la itre nyin ka troa xatua epun, nge ka pë ethan kowe la ngönetrei epun.

XÖTR: “Loi e tro sha nyihnyawa shë kö qa ngöne la nöjei ka sisi asë.” —2 Korinito 7:1.

6: TROA HETRE IJINE MADRIN

• Alanyimu la itre ka mekun ka hape, loi e troa kuca la itre xa ewekë matre tha tro kö angatr a tru la hna mekun la itre akötre i angatr.

• Tro epuni a öhnyi madrin, e hnei epuni hna thel troa ce sinee me itre xan, maine thele pena troa atreine kuca la itre xa ewekë, maine troa kuca la itre xa nyine iamadrinë.

• Troa tro la itre drai, nge kola saze la aqane huliwan epun la traeme i epun. Maine jë, tro epuni a öhne laka, kola qea trootro la itre ijine epuni a kuci madrin. Kolo hi lai a mama laka, epuni ha loi trootro.

XÖTR: “Hete pui ne la nöjei ewekë asë, . . . ijine teij, me ijine hnyima ; ijine latesi, me ijine fiafia.”—Ate Cainöj 3:1, 4.

7: TROA HETRE POROGARAM

• 

  Maine ijij, thele jë troa hetre porogaram.

• Maine hnei epuni hna metrötrëne la traeme ne meköl, me huliwa, me kuca la itre xa jol, troa nyiqaane loi trootro la mele i epun.

• Catre jë kuca la itre huliwa ka hamë madrin, matre troa xapo la akötre i epun.

XÖTR: “Tha tro kö angeic’ a mekune atrune la ite drai ne mele angeic ; ke Akötesieti a huliwa angeice mate madine la hni angeic.”—Ate Cainöj 5:20.

8: THE CANGA AXECIË MEKUNE KÖ

• Alanyimu la itre ka canga axeciëne la itre mekun ka tru, thupene ju fe kö lo kola mec la atr hnei angatr hna hnim. Nge angatre pë hë a öhne la engazon e thupen.

• Maine ijiji epun, loi e tro epuni a nue ijin qëmekene troa saze hnalapa, maine saze huliwa, maine trije pena la itre ewekë ne lai ka mec .

XÖTR: “Ame la ite mekune ne la ate cate huliwa, te, kola atena mon ; nge ite mekune ne la ate sasaqe kola apë ewekën.”—Ite Edomë 21:5.

9: THE THËTHËHMINE KÖ LAI KA MEC

• 

  Alanyimu la itre atr ka meci sineen ka qaja ka hape, hna xatua angatr ngöne la angatr a kuca la ketre huliwa ka amekunë angatr lai ka mec.

• Ce xawane jë la itre foto, me itre nyine amekunën ngöne la ketre itus. Cinyihane jë la itre hnei epuni hna melën memine lai ka mec matre tha tro kö a thëthëhmi angeic. Aqane tro hi lai a xatua epun.

• Amë hnyawane jë la itre ewekë ka amekunë epun la itre ijin ka mingöming ne ce mel epun memine lai ka mec. Nge, e loi hë epuni elany, goeëne hmaca jë itre ej.

XÖTR: “Mekuneju lo ite drai ekö.” —Deuteronomi 32:7.

10: TROA PANE MANO

• Xomi ijine jë troa mano.

• Maine tha ijiji epuni kö troa mano aqeany, xome jë la cas maine lue drai göi troa kuca la ketre ewekë ka troa amadrinë epun. Maine jë, troa eli wetr, maine ihamë ngöne la ketre musée, maine ti loto pena.

• Maine tro epuni a xomi ijine troa mano, tro lai a xatua epun troa xomihnine la akötr.

XÖTR: “Trojë fe nyipunie kowe la ga pa ate troa pane mano.”—Mareko 6:31.

11: TROA XATUANE LA ITRE ATR

• 

  The thëthëhmine kö laka, ame la epuni a xomi ijin troa xatuane la itre atr, tre, jëne tro fe hi epuni lai a hane madrin.

• Pane xatuane jë fe la itre xa ka meci sineen. Angatr a thele atr ka troa trotrohnine la akötre i angatr.

• Maine tro epuni a xatuane me akeukawanyi angatr, tro epuni lai a madrin, nge tro ha hetre aliene la mele i epun.

XÖTR: “Sisitia la manathithi e troa hame hune la troa kapa.”—Ite Huliwa 20:35.

12: TROA WAIPENGÖ SË

• Hnene la akötr matre epuni a trotrohnine la ka nyipiewekë ngöne la mel.

• Ijine tro hi epuni lai a waipengöne la aqane mele i epun.

• Wange hmaca ju la ka nyipiewekë ngöne la mele i epun, nge amekötine jë.

XÖTR: “Loi troa tro kowe la uma e kola teije ngöne hune la troa tro kowe la uma e kola nyikeine ngön ; ngöne laka celë hi pune la nöjei at’ asë, nge tro la ka mel’ a mekune e kuhu hni angeic.”—Ate Cainöj 7:2.

Eje hi laka, pëkö ketre ewekë ka troa apatrene palua la akötr ka ej thei epun. Ngo, alanyimu la itre ka meci sineen ka anyipicine laka, hna xatua angatr hnene caha itre eamo. Nyipici laka, hetre itre xa aqane kuca matre troa xapo la akötre i epun, nge tha hna amë pë hë e caha. Ngo, maine tro epuni a trongëne la itre mekun hne së hna amexej, tro ha akeukawane la hni epun.