Nemene La Aqane Tro Ni a Mele Memine La Haceng?

“HNA qaja palahi koi ni ka hape loi e troa hetre xomihni,” ke, tha ase kö Mikaela thëthëhmine la trenge ithahnata celë hna qaja lapaane koi angeice la ijine meci la keme i angeic. Ngo e thupene hë, ke, angeice pë hë a trotrohnine hnyawa ka hape tha meköti kö la aqane mekune i angeic. Celëhi matre ame la ijine kola meci hnene la ketre qaaqaa ne la sine i Mikaela, ke, atre hi angeice la aqane troa ujë hmekune la ewekë cili. Angeic’a qaja ka hape: “Maine ekö ju la, lue macatre qëmeken, ke, tro hi ni a xexe la lue ihnaiape i angeice me hape ‘ijine tro hi la a amamane ka hape trahmanyi eö.’ Ame pe enehila, hnenge hmaca pena ha hna ketr la ngöne ime i angeice me qaja ka hape ‘The hmahma kö troa fe amamane la aliene la hni eö. Ka loi pe lai matre uqa pi. Nge maine hetre ixatua koi eö tro ni a lapa, ketre ka loi, nge maine ka loi pena la tro ni a tro, ke, ketre ka loi mina fe. Ngo the xou kö, e troa qaja la hnei eö hna mekun.’ ”

Hnei Mariana fe hna xomihnine la itre mekune i angeice thupene la hna meci la fö i angeic. Angeic’a qejepengöne ka hape “Eni pe kö a mekune troa nyi tulu ka loi, matre tha amamane kö ni la hleuhleung, tune la aqane melene la hleuhleu hnene la nöjei atr ngöne la ijine cili. Ngo e thupene pë hë, eni hë a trotrohnine laka tha nyipiewekë kö la troa thahe la itre mekun, tune la atr ka etë hni. Mekune hnyawane ju pe hi ni la ewekë ka traqa, nge öninge jë hi: ‘E ka loi koi eö troa treij, ke, treije jë. The nyi ka catre kö. Ngo fe amamane pi pe la itre mekune i eö matre uqa pi.’ ”

Hawe, ceitune hi la mekune i Mikaela me Mariana, kola qaja ka hape: Mele thenge jë la akötre i epuni utihë la pun! Pine nemen? Pine laka jëne uqa së la troa amamane la hace së. Ixatua lai koi së, matre atrianyi së qa ngöne la itre jole ka traqa koi së. Qa ngöne lai, ke, tro la itre aliene la hni së, hne së hna kapa cememine la inamacane me wangatrehmekun’a xatua së troa amë la nöjei ewekë ngöne la isa göhnen.

Ejehi laka, tha ceitu kö la aqane amamane la hace hnei nöjei atr. Ketre mina, nyimu pengöne mekune ka amejëne la hni ne la atr, celëhi matre, tha ceitu kö la aqane ketr la atr hna asesëkötrëne hnene la meci ne la sine i angeic, memine la atr ka pane inyiën’aqeane la sine i angeic. Casi la ewekë ka mama hnyawa ngöne la ijine easë a akötr, ke, maine tro së a juetrëne la ewekë hne së hna lapa fë e kuhu hni, ke, nyine ngazo kowe la ngönetrei së, memine fe la mekune së. Qa ngöne lai, ka loi la troa fe amamane la hni së. Nemene la nyine kuca? Tro së a öhne ngöne la Tusi Hmitrötre la itre xaa eamo ka ijij.

Tuneka La Aqane Troa Amamane La Hace?

Ixatua ka tru la troa ithahnata. Thupene la hna meci la trene lao nekö i nyidrë, memine la itre xaa jole ka traqa koi nyidrë, hnei Iobu hna qaja ka hape: “Kucakuca fë hë ni la meleng; tro ni a nue ni kö kowe la aeng, tro ni a ewekë ngöne la haite la hning!” (Iobu 1:2, 18, 19; 10:1) Thatreine kö Iobu troa lapa thaupu fë la hace i nyidrë. Nyidrëti a ajane troa uqa la hni nyidrë, loi e tro nyidrëti a “ithahnataan.” Tune la hna qaja hnei Shekesepir, atr cinyihane la hna ithahnata celë: “Ithahnataane jë la hace, ke, e troa lapathaupufë ej, ke, tro eje lai a akötrëne la hni ne la atr.”

Hawe, e tro së a ithahnataane la hace së memine la “ate ihnim” ka atreine hnangenyëne hnyawa la itre akötre së, qa ngöne lai tro së a hetrenyi la ixatua. (Ite Edomë 17:17) E troa cinyihane la itre ewekë hna melëne me itre mekune hna lapa fë e kuhu hni, ke, tro itr’eje lai a xatua së troa trotrohnine me troa hetre uqa. Nge maine itre ewekë hna atrepengöne me hna melëne hë hnene lai atr drei së, ke, nyipici atreine hi tro angeic’a hamëne la itre xaa ixatua ka ijij. Hnene la ketre thine ka meci neköne hna qejepengöne ka hape celëhi aqane xatuane eahlo la ketre föe ka hleuhleu pine la meci ne la ketre nekö i eahlo, kola hape: “Drei la ketre ixatua ka tru koi ni, la eni a drenge la aqane elë hune la akötre celë hnene la ketre atr, me aqane melëne i angeice la hace celë.”

Nemene la nyine troa kuca, maine tha pi tro kö epuni a ithahnataane la itre mekune i epun? Thupene la hna meci hnei Saulo me Ionathana, ke, hnei Davita hna cinyihane la ketre nyima thatraqai nyidro nyine amamane la hace i angeic. Celëhi, ketre götrane ka sisitria ngöne Hnaaluene tusi Samuela. (2 Samuela 1:17-27; 2 Aqane lapa ite Joxu 35:25) Hawe, hna tune lai hnei itre xan, hnei angatre hna cinyihane la akötre i angatr. Celëhi matre, hnene la ketre sine föe hna qejepengöne ka hape, hnei eahlo hna majemine troa cinyihane la hace i eahlo, nge thupene la itre drai, eahlo hmaca xome troa e. Nge, hetre ixatua hnei eahlo hna öhne qa ngön.

Ame la hace së, ke, maine hne së hna ithahnataan, maine hne së hna cinyihan, ngo loi palahi troa qaja amaman, matre uqa pi së. Tro fe a xatua së matre apatrene pi la itre mekune ka icilekeu. Hnene la ketre thine ka mele hleuhleu hna qaja ka hape: “Hnenge me föenge hna drenge ka hape alanyimu la itre trefëne ka isa lapa thupene la hna meci hnene la ketre nekönatr, nge tha ajane kö nyiho troa traqa kowe lai. Celëhi matre, ame itre xaa ijin, ke, nyiho a nango iwenemejelë, me iupekeune la zön, ngo ame pe, hnei nyiho hmaca hna ce wange la aqane troa aloin. Eni a mekune laka hnene la aqane mele i nyiho hna ieakeune catrëne la trefëne i nyiho.” Ejehi laka, maine tro së a iqajakeune la hace së, ke, jëne tro së lai a trotrohnine ka hape, ame itre xan, ke, angatre fe a hane lapa fë hace, ngo ame pe, ke, isa pengöne pe la aqane melën.

Ame la ketre ewekë ka hamë ixatua koi së matre uqa la hni së, ke, ene la troa treij. Hetre “ijine teij,” hna qaja hnei Tusi Hmitrötr. (Ate cainöj 3:1, 4) Nyipici, kola traqa la ijine cili, la kola meci hnene la ketre atr hne së hna hnim. Ka nyipiewekë catre la tro së a treij, matre loi hmaca pi la ngönetrei së.

Hnene la ketre föe hna qejepengöne la ixatua hna kapa qa thene la ketre sine i angeice hnei angeice hna hnime catrën, la ijine kola meci la thine i angeic. Angeic’a qaja ka hape: “Tha ase pi kö nue ni hnene la sinenge la eni a aja ixatua, angeice palahi a lapa ezing. Nyiho a ce treij, me ce porotrik. Eni a fe la hninge koi angeic, nge celëhi ka nyipiewekë koi ni. Tha hmahma kö ni troa treije qëmekei angeic.” (Goeëne ju Roma 12:15.) Tha tro kö së a hmahma troa treij. Tune la hne së hna inine ngöne la Tusi Hmitrötr, tru catre la itre tulu ne la itre hlue i Iehova, trahmanyi me föe, kola treije ngöne la ijine angatr’a hleuhleu, nge tha hmahma kö angatr.​—Genese 50:3; 2 Samuela 1:11, 12; Ioane 11:33, 35.

Easë a wange ka hape ame la itre hace, ke, itre ka troa xulu koi nöjei atr asë. Pëkö atreine musi kowe la treij, ka traqa xan. Hnene la ketre sine föe hna wangatrehmekune laka ka treije palahi eahlo ngöne la nöjei ijine eahlo a tro koi hna maketr (hnei eahlo hna majemine trongëne me fö i eahlo), qa ngöne laka hnei eahlo hna xome hmaca la itre ewekë hna ajane ekö hnei fö i eahlo. Loi e tro epuni a atreine xomihni. The cipane kö la trenge timidra i epun. Mekune ju laka, aqane tro së hi lai a kapa la hleuhleu së, ewekë lo lai ka traqa kowe la nöjei atr asë.

Aqane Troa Cile Kowe La Iupe Zö

Tune lo hne së hna wange hë, hetre itre atr laka ame la kola meci la sine i angatre hnei angatre hna hnim, ke, angatr’a pane iupekeune la zön. Nyine xatua së troa trotrohnine la hleuhleu ka eje thei Iakobo, ketre atr lapaune ngöne la ijine xeci hë e kuhu hni nyidrë ka hape meci hë la nekö i nyidrë, Iosefa, hna öni hnei “öni ka ngazo.” Hnei Iakobo hna sipu upi Iosefa troa waipengöne la itre trejine me angeic. Celëhi matre, kola jole la hni nyidrë, me sipu upe koi nyidrë la zön, me hape ‘Hnauëne laka eni a upi Iosefa cas? Hnauëne laka upi Iosefa jë ni ngöne la ketre götrane ga tru hnei öni ka ngazo?’​—Genese 37:33-35.

Maine jë epuni fe hi a hane mekune ka hape, ame la meci ne la ketre atr hnei epuni hna hnim, ke, qa ngöne laka tha hnei epuni kö hna atreine neën. Loi e troa trotrohnine hnyawane ka hape ame la tro së a xome koi së la zön​—maine nyipici, maine hna mekuhnin​—loi pe ketre aqane ujë lai ka ijije troa hamëne koi së la loi. Ngo, eje mina fe laka, loi e troa fe itr’ej, tha loi kö troa lapafë e kuhu hni së la itre mekune cili. Hawe, qa ngöne la hne së hna ithahnataan, tro hë lai a nue amacai së.

Loi e troa trotrohnine hnyawaane ka hape, ngacama ka tru la ihnimi epuni kowe lai atr, ngo pëkö atreine musi kowe la mele i angeic, nge thatreine jë pi kö epuni troa acilëëne la “ijine memine la ewekë ka xulu” kowe la itre hnei epuni hna hnim. (Ate Cainöj 9:11) Ketre mina fe, tha ngazo kö la itre mekune i epun. Ketre ceitun, maine tha hnei epuni kö hna canga isapui me droketre thatraqane la ketre sine i epun, aja i epuni kö tro angeic’a wezipo maine tro pena a mec? Ohea! Hapeu, zö i epuni kö la angeic’a mec? Ohea.

Hnene la ketre thine hna inine troa cile kowe la iupe zö, thupene la kola meci hnene la nekö i eahlo jajinyi hna eatre ngöne loto. Hnei eahlo hna qejepengöne ka hape: “Eni palahi a lapa mekune ka hape zöng, pine laka, hnenge hna nue angeice troa hane tro la ijine cili. Ngo eni pë hë a trotrohnine hnyawaane laka tha ka meköti kö la aqane mekuneng, ke, nemene la engazone e tro nyiëne a ce tro memine la keme troa itö. Drei la ka atreine neëne la hulö e tro ej’a traqa.”

Maine jë tro epuni a qaja ka hape ‘Hetre itre ewekë tro ni ekö a qaja maine kuca.’ Nyipici, ngo drei la kem, maine thin, maine neköne ka meköti palahi la hnei angeice hna kuca? Kola amekunë së hnene la Tusi Hmitrötre ka hape: “Ke menu hë shë asë ngöne la ite ewekë ka nyimute. Maine tha menu kö la ate ngöne la aqane ewekë, hawe, meköti la ate cili.” (Iakobo 3:2; Roma 5:12) Loi e tro së a trotrohnine ka hape itre atr ka ngazo së. Tha nyipiewekë kö tro së a qaja lapaane ka hape maine hnenge ju hna kuca la ewekë celë, maine tro pena a kuca tune la, nyipi pë hmaca kö ketre ewekë ka loi hne së hna troa kapa qa ngöne la itre mekune ka tune lai, ngo ame pe, itre mekune ka tune lai, la ka troa ajojezine la mele së.

Nge maine epuni a mekune ka hape ame la ewekë hnei epuni hna ngazohnin, ke, sipu qa thei epuni kö la zön, hawe, loi e troa atrehmekune hnyawa ka hape hetre ixatua ka sisitria, ene la Akötresie ka ijije troa senge trije la itre ngazo me xome trije la itre mekune ka jole hne së hna lapa fë. Önine la Tusi Hmitrötre koi së ka hape: “Ia fe Joxu, maine cilieti a ati hatene la ite ngazo, dei la ate troa cil? Ngo cilieti la ate shenge tij.” (Salamo 130:3, 4) Tha ijiji epuni kö troa bëeke kowe lo drai eidri matre tro hmaca a saze la ketre ewekë. Ngo, ijije tro epuni a sipo Akötresie, troa senge trije la itre ngazo hnei epuni hna kuca ekö. Nge, kola hapeue lai? Hawe, maine Iehova a thingehnaeane ka hape tro nyidrëti a köle trije la itre ngazo së ekö, hnauëne laka tro hmaca kö së a mekune itr’ej?​—Ite Edomë 28:13; 1 Ioane 1:9.

Aqane Thupëne Matre Pëkö Troa Elëhni

Hapeu, hna hane kö traqa koi epuni la elëhni, maine kowe la itre droketre, maine itre ëfirmier, maine la itre sine i epun, maine pena kowe la ketre atr ka mec? Maine ejehi, ke, tha tro kö epuni a sesëkötre hnene la aqane ujë cili ngöne la kola traqa koi epuni la hleuhleu. Maine kola xulu la thina cili qa ngöne la hnei epuni hna ngazohnin. Hanawange la hna qaja hnene la ketre ka cinyianyi kola hape: “Tro hi së a atrehmekune laka e drenge hë së la elëhni, tha tro kö së a thele troa ujë ceitu me atr ka pë hna wesitre pin, ngo tro pe së a kapa ej, me atreine xomihnine matre utretre së qa ngöne la itre ethanyin’ej.”

Ame itre xaa ijin, ke, loi e troa qaja amamane la aliene la wesitre së. Tuneka? Tha ene kö la troa jele hmaca la trenge hni së. Tusi Hmitrötre pe a thuemacanyi së ka hape hnamecine la troa elëhni aqeany. (Ite Edomë 14:29, 30) Celëhi matre, loi e tro epuni a ce ithahnataane memine la ketre sine i epuni ka atreine drei epuni me trotrohni epun. Nge, ame itre xan, ke, hnei angatre hna huliwaane la itre huliwa ka catre matre lapakötre ju la elëhni angatr.​—Wange ju fe Efeso 4:25, 26.

Loi e tha tro kö së a lapa fë mekun, ngo tro pe a qaja amekötine la itre hne së hna drenge e kuhu hni së, ngo hetre ketre ewekë nyine troa thupën. Pine laka lue pengöne ka isazikeu catr, ene la tro la atr a fe la hni angeic, maine tro pena a ihnakeune koi ketre atr la itre trenge ithahnata ka akötr. Tha tro kö a nyi zöne la itre xane qa ngöne la elëhni epuni, maine hnene la iwenemejelë. Hawe, nyipiewekë troa tro tune lai matre tha tro kö a iangazo. (Ite Edomë 18:21) Tro së a ithahnataane enehila la ketre ewekë ka troa xatua epuni troa cile kowe la hleuhleu i epun.

Ixatua Qathei Akötresie

Tusi Hmitrötr’a thuecatre koi së me hape: “Eashenyi Iehova koi angete thë fë hni; nge kola amele ange aköte u.” (Salamo 34:18) Nyipici, e hne së hna eashenyi Iehova hune la nöjei ewekë asë, troa hetre ixatua troa cile kowe la hace, ngöne la kola meci hnene la ketre atr hne së hna hnim. Tuneka? Ame la nöjei aqane troa cile kowe la hleuhleu, hne së hna goeën, ke, hna cinyihane itr’eje hnine la Tusi Hmitrötr. Troa hetrenyi la ixatua e hna trongëne itr’ej.

Ketre mina fe, tha tro kö a wangacone la mene ne la thith. Tusi Hmitrötr’a thuecatre koi së, kola hape: “Nuepi koi Iehova la hnei nyidëti hna hamë eö, nge tro nyidëti a sajuë eö.” (Salamo 55:22) Maine nyipici laka, ketre ixatua la troa fe la hni së kowe la ketre sine së, ke, ejehi laka, tru palakö la ixatua e tro së a fe asë la hni së kowe la “Akötesieti ate akeukawan’asë!”​—2 Korinito 1:3.

Ame la thith, ke, tha tro kö ej’a aloine la itre mekune hmekuj. Hnene la “Ate shamatine la thith” hna thingehnaeane ka hape tro nyidrëti a hamëne la Uati Hmitrötre kowe la itre hlue i nyidrë ka sipone qa kuhu hni angatr. (Salamo 65:2; Luka 11:13) Tro la Uati hmitrötr, ene la trenge catre i nyidrë, a aijijë epun, ke, “qa thei nyidrë la etrune la men,” matre xatua epuni troa thu la itre ehnefe i epuni o’drai. (2 Korinito 4:7) Mekune ju: ijije tro Akötresie a xatuane la itre hlue i nyidrë ka lapaune troa xomihnine la nöjei itupathe ka traqa koi angatr.

Hnene la ketre föe ka meci nekön, hna qejepengöne la aqane kapa eahlo me fö i eahlo la ixatua, kola mama la mene ne la thithi ngöne la ijine nyidro a hleuhleu. Eahlo a qaja ka hape: “Ame e itre jidr, nyiho mina pe hi a nango lapa casi ngöne la hnalapa, itre ijine cili hi la nyiho a drenge catrëne la hleuhleu, nge nyiho palahi a catre thith.” “Ame la itre pane ewekë hnei nyiho hna kuca caasine pë hë, nge paatre hë nyën, tune la pane icasikeu ne la ekalesia, maine pane kovasio pena, hawe, ame ngöne la nöjei ijine cili, hnei nyiho palahi hna catre thithi matre tro nyiho a atreine xomihnine la hace. Hnei nyiho hna ce hlë e hmakanyi cememine la hleuhleu, ame ngöne la ijine cili, nyiho mina a thithi koi Iehova troa sipo ixatua. Ame itre xaa ijin, maine hetre hnenge hna troa kuca ngöne la hnalapa, jole koi ni e tro ni a lö cas. Hawe, eni mina ju hi lai a pane thithi ju koi Iehova matre tingetinge ju la hning.” Qa ngöne la aqane catrene la lapaune ne la föe, xecie hnyawa ha e kuhu hni angeice laka hetre eloine la itre thith. Hawe, ijije tro fe epuni a kepe thangane ka loi qa ngöne la itre thithi epun, ‘tro ha thupëne la ite hni nyipunie me ite mekune i nyipunie göi Keriso Iesu, hnene la thingetinge ka sisitia qa thei Akötesie hune la nöjei mekun’asë.’​—Filipi 4:6, 7; Roma 12:12.

Ame la ixatua qa thei Iehova, ke, ka hetre thangane ka loi. Hnei Paulo aposetolo hna qaja ka hape Akötresieti a “akeukawa huni ngöne la aköte huni asë, mate ateine huni troa akeukawa angat’ angete aköt.” Nyipici, tha eje kö a köle trije la itre akötr, ngo ame pe, ke, ej’a xatua së troa atreine xomihnin. Tha tro kö a mekune ka hape tha tro hmaca kö a treij’aqeany, maine pena tro hë epuni a thëthëhmine paluane lai atr ka meci hnei epuni hna hnim. Ngo ame pe, tro epuni lai a kapa la ixatua ka ijij. Nge, qa ngöne la tulu hnei epuni hna melën, ijije tro epuni a atreine trotrohnine me ce thawa me itre xane la hleuhleu i angatr, matre xatua angatre fe troa xomihnine ngöne la ijine angatr’a hace.​—2 Korinito 1:4.

Itre Hnyinge Nyine Troa Mekun

Pine nemene matre nyipiewekë la troa amamane la hace utihë la pun?

Nemene la aqane tro së a amamane la hace së?

Nemene la aqane tro la Tusi Hmitrötr’a xatua epuni troa xomihnine la nyi zö me elëhni?

Tuneka la tro la aqane lapa qale koi Iehova a xatua epuni troa xomihnine la kola meci hnene la ketre atr hnei epuni hna hnim?

Nemene la itre ixatua ka ijije nyine xomihnine la hleuhleu?

[Hna eköhagen götrane 18]

Itre Xaa Ixatua Ka Ijij

Mejiune ju la ixatua ne la itre sine i epun: The thipëne kö troa kapa la ixatua qa thei itre xan, nge tupathe jë troa trongën. E tro angatr’a kuca la ketre ewekë nyine xatua epun, ke, ketre aqane tro angatre lai a amamane laka angatr’a ce treije me epun; ke ma ka hmaloi kö koi angatre troa kuca la ketre ewekë, hune la troa qaja la aliene la hni angatr.​—Ite Edomë 18:24.

Thupëne hnyawa kö la mele i epun: Hnene la hleuhleu hna pane hamë së la kucakuca. Celëhi matre ngönetrei së a ajane troa pane mano, hawe, loi mina fe troa nango enijën; kola ajane la xeni ka ijije hune lo itre xaa ijin. Nge loi mina fe, troa hane wai droketre ngöne la itre drai.

Amë jë koi ketre ijin, la troa axeciëne la itre mekune ka nyipiewekë: Maine ijij, ke, treqene ju matre e uqa ha la mekune i epuni troa kuca la itre nyipiewekë ceitune memine la troa salemëne la hnalapa i epun, maine pena la troa saze huliwa. (Ite Edomë 21:5) Hnene la ketre sine föe hna qaja ka hape xalaithe petre hi la itre drai thupene la hna meci hnene la fö i eahlo, nge eahlo fe hë a hamëne trongëne la itre ewekë i fö i eahlo. Ngo, nyimu drai thupen, ke, eahlo ha trotrohnine laka asehë eahlo hamëne la itre suvenir, lo hnei eahlo hna ajane catrën.

Xomihni ju epun: Tha mekune kö hnene la itre atr laka ijije troa qea la hace koi së. E nöjei macatre, ke, tro hmaca hi a mekune lo atr ka meci hë hne së hna hnim, nge troa traqa hmaca lo hleuhleu koi së. Ijije mina fe troa atreijë së hnene la itre iatr hna goeën, maine itre nyima, maine itre epunepunene itre xaa ewekë. Hnene la ketre siatifike ka inine la aqane ujë ne la atr, hna qejepengöne la aqane trongene la hleuhleu. Öni nyidrë: “Nyimenyime troa traqa kowe la atr ka hleuhleu la troa ujë la hni angeic. Celëhi matre, ame e ketre drai, ke, angeic’a ajane troa apatrene qa ngöne la mekune i angeice lai atr ka mec, nge ame e ketre ijin, ke, angeic’a thele troa mekune lapaan.” Thupëne hnyawane ju la itre hna thingehnaeane hnei Iehova e kuhu hni epun.​—Filipi 4:8, 9.

Trotrohnine ju la itre xan: Tupathe ju troa xomihnine la itre xan. Loi e troa trotrohnine ka hape ka jole catre koi angatre ngöne la itre ijine cili. Nge, pine laka, thatre kö angatre la nyine troa qaja, hawe, menumenu la itre hnei angatre hna qaja.​—Kolose 3:12, 13.

Thupëne kö la aqane troa iji la itre drösinöe maine ka haitr, göi troa xomihnine la hleuhleu: Nyipici laka, hetre thangane la hna xome la itre drösinöe, maine ka haitr, ngo ame pe, ke, tha itre ka qea ju kö. Tro hi a xome la itre drösinöe jëne droketre. Ngo thupëne hnyawa kö; ke, nyimu drösinöe ka hetre thangane ka ngazo, pine laka thatreine hë së nue. Qa ngöne lai, troa hmiitre la aqane troa aloine la hleuhleu. Hnene la ketre atr ka inine la itre hatrene me itre kepine la itre meci hna qaja ka hape: “Loi e troa xomihnin, me kapa la hace, me atreine troa lapa fë, ke, e maine troa iji drösinöe lapa, tro hë a ahmitrëne la ijine tro lai atr a loi trootro.” Ame la ketre ixatua ka hut, ke, ene la troa mekune lapaane la itre aja atraqatre i Iehova.​—Salamo 1:2; 119:97.

Troa thele ixatua ngöne la itre ewekë hna majemine kuca: Nyipici laka epuni a acatreihni troa huliwa, maine troa itö, maine pena troa kuca la itre xaa hnëqa së. Ngo, tro kö epuni lai a öhne laka, troa hetre thangane ka loi qa ngön. Loi mina fe troa tru hnei huliwa palahi ngöne la itre huliwa ne la keresiano.​—Goeëne ju 1 Korinito 15:58.

The xou kö troa nuetrije la hleuhleu: Easë a sesëkötre laka, kola xou hnene la itre atr ka hleuhleu e troa fenesi la hleuhleu thei angatr, ke, wanga hape jë co hi la ihnimi angatre kowe lai ka mec. Ngo tha eje kö lai. E troa apatrene la hace, ke, kola nuejëne pë hë la itre xaa nyipi mekune hna ajane catrën, nge ka cile hut.​—Ate Cainöj 3:1, 4.

The atrune menune kö la luelue i epun: Ma tro epuni a kukehnine ka hape ‘Nemene pë hë la melenge enehila?’ Tusi Hmitrötr’a eamo së ka hape tha tro kö a seseune la drai elany. Önine la ketre sine föe ka hape “Ixatua koi ni la eni a inine la aqane mele ngöne hi la drai enehila hi, tha kukehnine kö ni la drai elany.” Hnei Iesu hna qaja kowe la angetre drenge ka hape: “Qa ngöne lai the kuke hnine kö göi elany; ke qa i elanyi troa kuke hnine göi nyëne kö.”​—Mataio 6:25-34.

[Iatr ne la götran 15]

Kola amamane hnene la itre tulu ne la itre hlue i Iehova ngöne la Tusi Hmitrötre ka hape e maine easë a cinyihane la akötre së, ke, ketre ixatua koi së troa fe amamane la hni së

[Iatr ne la götran 16]

Ngöne la nöjei nöj, kola kapa madrine la itre ixatua hnene la itre atr ka hleuhleu