Hapeu, Ka Loi Kö La Troa Latresi Pin?

HNENE la ketre atr trene hace hna cinyihane ka hape: “Tune la itre nekönatr’asë e Igilan, hna ini ni laka tha tro kö ni a amamane la hacenge qëmekene la nöjei atr. Mekune jë hi ni la kemenge ka soc, nge ngöne la ijine eni a hleuhleu, ke, nyidrëti a qaja koi ni ka hape ‘Tha tro pi kö a treij,’ nge nyidrëti a getre umë nyö la kola ithahnata. Thatre kö ni, ngo tha hane kö la thine i eahuni hane dremi eahuni me xepi eahun (ala foa eahun). Ame la kola meci la kemeng, ke, 56 lao macatreng. Eni a drenge e cili, kösë ketre ewekë ka tru a paatr.”

Ngöne la itre xaa pengöne qenenöj, ke, itre atr’a amamane la aliene la hni angatr. Ngöne la angatr’a madrine maine hleuhleu, ke, mama hi koi nöjei atr. Ngo, ngöne la itre xaa nöj, tune caloopi ne Erop me Igilan, ke, hna majemine hnene la itre trahmanyi troa juetrëne la hleuhleu i angatr, me hnöthe la itre ewekë ne la hni angatr, me lapa xomihni. Hawe, ngöne la easë a hacene la kola paatre la ketre atr hne së hna hnim, ke, hapeu loi kö troa amamane la hace cili? Nemene la hnei Tusi Hmitrötre hna qaja?

Itretre Treije e Kuhu Hnine La Tusi Hmitrötr

Hna cinyihane la Tusi Hmitrötre hnene la angetre heberu qa ngöne la götrane kohië ne Mediterane, itre atr lai ka iahlë ngöne la aqane mele i angatr. Celëhi matre, hetrenyi e hnine la Tusi Hmitrötre la itre xaa tulu ne atr ka amamane la aliene la hni angatr. Hnei Davita Joxu hna amamane la hace i nyidrë, thupene la hna humuthe lo nekö i nyidrë trahmany, ene Aminona. Ejehi laka, nyidrëti a “kete nyipi teije atraqat.” (2 Samuela 13:28-39) Hnei nyidrëti fe hna treijepine la kola meci la nekö i nyidrë ka iaö, Abasaloma, atr pi thapa la hnanyijoxu qa thei kem. Öni Tusi Hmitrötre koi së ka hape: “Ame hna hmengöhmengöne la joxu, nge nyidëti a elë kowe la hnahage hune la qanahag, me teije ewekë trotro tune la, ka hape, ‘Ekölö hi ni neköng, Abasaloma, neköng, nekönge Abasaloma! ekölö ma meci pe ni hna i ö, ekölö Abasaloma, neköng, neköng!’ ” (2 Samuela 18:33) Kola treije hleuhleu hnei Davita ceitune memine la aqane hleuhleune la ketre kem. Nge nyimu ijine hnene la itre keme me thine hna ajane troa mec, hune la troa meci la itre nekö i angatr! Hna majemine mekune ka hape tha ijije kö tro la nekönatr’a pane meci hune la itre keme me thin.

Nemene la aqane ujë i Iesu la kola meci hnei Lazaro, atr ce hni me Nyidrë? Hnei nyidrëti hna treije pi angeice ngöne la hua. (Ioane 11:30-38) Nge, hnei Maria Magadalena hna treije ngöne la hua i Iesu. (Ioane 20:11-16) Nyipici, ame la keresiano ka hetrenyi la trotrohnin, ene la troa mejiune ngöne la melehmaca tune la hna qaja hnei Tusi Hmitrötr, ke, tha hape kö tro hë angeic’a hace palua, tune la itre ka pëkö trepene ini qa hnine la Tusi Hmitrötr, göne la itre ka meci hë. Ngo ame pe, ke, tune la nöjei atr’asë, tro fe la itre nyipi keresiano a hleuhleu me treije pine la itre hnei angatre hna hnime ka mec, ngacama hetrenyi thei angatre la mejiune kowe la melehmaca.​—1 Thesalonika 4:13, 14.

Troa Treij, Maine Tha Tro Kö a Treij

Nemene la aqane ujë së enehila? Hapeu, jole kö koi së me hmahma troa amamane la ihnimi së? Nemene la hna eamone hnene la itre ka haji së? Ame la aqane mekune enehila, ke, kola trothenge la inamacane ne la Tusi Hmitrötre ka hekö. Angatr’a qaja ka hape, loi e troa nuane la hace së, hune la troa hnöth. Kola amekunë së lo itre ka lapaune ekö, tui Iobu, me Davita, me Ieremia, itre atre amamane la hace i angatr, hna qejepengöne e kuhu hnine Tusi Hmitrötr. Tha hnei angatre kö hna xomehnöthe la aliene la hni angatr. Ngo ame pe, ke, tha loi kö troa ananyine la itre atr. (Ite Edomë 18:1) Ejehi laka, isa pengöne la aqane amamane la itre hace, ngöne la itre nöj, qa ngöne la itre ini ne la itre hmi.

Nemene la nyine kuca ngöne la epuni a pi treij? Ame la troa treij, ke, ketre ewekë lai ka eje thene la nöjei atr’asë. Mekune hmaca jë lo ijine kola meci hnei Lazaro, lo Iesu a “simano e kuhu hnin, me . . . Iesu a sheitë.” (Ioane 11:33, 35) Hawe, tha tro kö së a sesëkötre la aqane ujë celë, ene la troa treij, la kola meci hnene la atr hne së hna hnim.a

Hnene la ketre thin, Ana la ëjen, hna xomihnine la kola meci hnene la nekö i angeice medreng, Rakela, hna traqa nyimenyime la meci koi nyën. Kola qejepengöne hnene la fö i angeice ka hape: “Ngöne la kola kele wezipo, ke, kola sesëkötre laka tha treije pi kö ni me Ana. Ngo treije pe kö lo nöjei atr.” Nge kola sa hnei Ana ka hape: “Nyipici, ngo tru pë hë la hnenge hna treije thupen. Hnenge hna trotrohnine la ewekë ka hace celë, thupene itre wiik, ngöne la eni pë hë a lapa casi e hnine la uma. Hnenge hna treije la ca drai ka pexej. Ngo eni a mekune laka, ketre ixatua lai koi ni, pine laka eni a drenge la kola nango keukawa la hning. Ka loi la tro ni a treije pine la kola meci la neköng. Ka xeci e kuhu hninge laka, loi e troa nue la itre atr troa treije ngöne la hace i angatr. Ngacama, hnei itre xane hna majemine troa qaja ka hape ‘The treije kö,’ ngo tha nyipi ixatua kö lai koi angatr.”

Nemene La Aqane Ujë Ne La Itre Xan

Nemene la aqane ujë ne la itre xane ngöne la hace i angatr, la kola meci hnene la ketre atr hnei angatre hna hnim? Tro së a ce wange la pengöi Zuanita. Atre hnyawa ha angeice la hace ne la atr la kola meci la nekö i medreng. Hna afaifine ne uthithi hë la upune i angeic. Nge upune hmaca ha angeice enehila. Ame la kola traqa la ketre akesida ne loto, ke, hna nyenyapesai angeice a tro pital. Angeic’a hnehengazo fë la nekö i angeic. Thupene lue wiik, ke, angeic’a malane ijane la nekönatr, Vanesa la ëjen, nge pë ju kö kilo i nyën, 900 garam. “Tru catre la madrineng,” öni Zuanita “Ke, ca nekönge hë!”

Ngo tha qea ju kö la madrine i angeic. Thupene foa lao drai, kola meci hnei Vanesa. Kola qaja hnei Zuanita ka hape: “Kösë lo ka pëkö aliene la meleng. Hna xome qa thenge la elolone la thin. Hetre ewekë ka paatre theng. Atraqatre la akötre koi ni la eni a lö ngöne la uma, nge eni a goeëne la hnahage hnei nyiho hna hnëkëne koi angeic, memine lo hnahetre i angeice hnenge hna itön. Ngöne la lue treu ka ase hë, ke, eni a lapa mekune la drai ne hnaho nyën. Pëkö atr hnenge hna ajane troa goeën.”

Hapeu, tru palaha la aqane ujë cili? Ma jole catre koi itre xane troa trotrohnin, ngo ame pe, ame itre xane ka ceitu me Zuanita, ke, angatr’a hane hacene la kola meci hnene la nekö i angatr, nge kola qejepengöne la angatr’a hleuhleu la kola meci hnene la ketre medrenge tune la aqane hleuhleu i angatre la kola meci hnene la ketre thupëtresij. Kola qejepengöne ka hape, qëmekene troa hnahone la nekönatr, ke, hetre ihnimi hë koi nyëne hnene la keme me thin. Ngo catre kö la ihnimi cili kowe la thin. Nge ame la nyën’a meci e kuhu hni, ke, canga drenge hi hnene la thin, laka atr hë lai ka mec. Loi e troa trotrohnine la ewekë celë hne së asë.

Ijije Troa Hetrenyi The Së La Elëhni Me Iupe Zö

Hnene la ketre thine hna fe amamane la aliene la hni angeice ngöne la angeic’a qejepengöne la kola meci hnene la nekö i angeice ka sikisi lao macatre, pine laka, ka ngazo la wenethëhmi nyëne qaane ekö e kuhu hni thin. “Hna traqa koi ni la nöjei pengöne aqane ujë: genyi, tha lapaune kö, iupe zö, me elëhni kowe la föeng me kowe la droketre pine laka tha canga öhne kö la engazone la meci nyën.”

Ame la ketre hatrene la hleuhleu, ke, elëhni. Troa hetrenyi la elëhni, maine kowe la itre droketre, maine kowe la itre ëfirmie, ke, kola mekune ka hape, tha ijije kö la hnei angatre hna kuca kowe la ka mec. Maine pena, kola elëhni kowe la itre sine ce elo, me itre sine, me mekune ka hape, tha loi kö la aqane ithahnata maine aqane ujë i angatre ekö kowe lai ka mec. Ame itre xan, kola elëhni kowe lai ka meci pine meijëne la meci angeic. Stela a amekunëne ka hape: “Eni a mekune hmaca la eni a elëhni kowe la föeng, pine laka atre hi ni ka hape tha ijije kö tro nyidrëti a mec. Nyipici, tru la meci nyidrë, ngo tha hnei nyidrëti kö hna drengethenge la itre hna ahnithe hnei droketre.” Nge ame itre xan, ke, kola elëhni kowe lai ka mec, pine la itre hace hna amë pe kowe la itre ka mel.

Ame itre xan, ke, kola upe zön, hnene la elëhni, angatr’a sipu wesitre koi angatre kö, pine angatre elëhni. Itre xan’a upe zö angatre kö, la kola meci hnene la ketre atr hnei angatre hna hnim. “Tha tro kö angeic’a mec,” ka xeci e kuhu hni angatr, “maine hnenge ju hna canga trofë koi droketre” maine pena “maine trofë ju kö ni koi ketre droketre,” maine pena “maine thupëne hnyawane ju kö ni la mele i angeic.”

Ame itre xan, ke, kola upezön, e maine kola meci la ketre atr hnei angatre hna hnim, ngo hna asesëkötrëne pe, kösë tha hna treqene kö. Angatr’a nyiqaane mekune hmaca ekö lo itre ijine angatr’a elëhni koi angeic, me ce porotrike me angeic. Maine pena, angatr’a mekune ka hape tha ase kö angatre kuca asë la itre nyine kuca koi angeic.

Ka ihmeku la aqane hleuhleune la itre thine memine la hna öhne hnene la itre droketre, ka hape, ngöne la kola meci hnene la ketre nekönatre, ke, kola hnë meci lapa hnene la keme me thin, ngo mama catre kö thene la thin.

E Kola Meci La Föe

Ketre hace atraqatre la kola meci hnene la ketre, ngöne la lue trefën, troa mama hnyawa e hnei nyidroti hna ce huliwa ngöne la kola ce mel. Ejehi laka, kola nyipune la aqane ce mele i nyidro, me ce tro agö, me ce huliwa, me ce elo, me ce lapa.

Enis a qejepengöne la ijine kola meci la fö i angeic, ka mecifë wenethëhmi. “Ngöne la hnapane wiik, ke, kola traqa la genyi koi ni, kösë lo tha huliwa hmaca kö la itreing. Tha drenge hmaca kö ni la elolone la xen, me punepunen. Nge, kolo fe hë a nyiqaane paatre trootro la wangatrehmekuneng. Pine laka, hnenge hna ce lapa memine la föeng, ngöne la kola tupathe troa ahmaloeë nyidrë hnene la iaparei ne mano me itre drösinö, tha akötre kö ni tune la hna asesëkötrën. Ngo ame pe, ke, eni a lapa tune la atr hna hnöth, tune la ketre loto e kei qa ngöne la hugit, nge tha ijijinge kö troa kuca la ketre ewekë.”

Hnei angeice kö hna treij? “Nyipici laka, hnenge hna treij, nge tru la treije ngöne lo ijine eni a kapa la itre hadredre lao tusi ne ixatua. E ca tus, ke, eni a treij. Nge ka xatua ni troa apexejene la drai. Ngo pëkö ixatua koi ni ngöne la eni a mekune lapaane la pengö i eni. Ejehi laka, ngazo catre koi ni la meleng.”

Nemene la ka xatua Enis troa mele memine lai hace i angeic? Öni angeice ka hape “Thatre hë ni, ketre tha hnenge kö hna thë, ngo eni a ketre axeciëne troa melëne la meleng.” “Ejehi laka, ame la ka akötre palahi koi ni, ke, ene la tro ni a mekune ka hape ajane catre la föenge troa mel, ngo paatre hë nyidrë enehila.”

“The Nue Kö La Itre Xane Troa Musinë Epun . . .”

Hnene la itre ka cinyihane la itus Leavetaking​—When and How to Say Goodbye hna hamëne la eamo celë: “The nue kö la itre xane troa axeciëne koi epun, la aqane troa ujë maine aqane troa hace. Isa pengöne kö la aqane tro la isa alacasi a amamane la hleuhleu i angeic. Ijije tro la itre xan’a mekune me qaja amamane koi epuni la mekune i angatr, laka hleuhleu catre palaha epuni maine tha hace catre kö epun. The mekune catrëne kö la ewekë celë, thëthëhmine pi. Maine epuni a kuca thenge la hna qaja hnei itre xan, maine hnene la nöjei atr, ke, tro lai a acilëëne la jëne troa ahmaloinyi epun.”

Ejehi laka, isa pengöne la aqane amamane la hace ne la isa alacas. Tha eahuni kö a thele troa amamane ka hape ka loi la aqane celë hune la aqane celë, koi ketre me ketre. Ngo ejehi laka, ame la engazon, ke, ene la troa lapa thaenij, ngöne laka thatreine kö la atr ka hleuhleu troa kapa la ewekë ka traqa koi angeic. Nge thupene lai, ke, ijije tro angeic’a kapa la ixatua qa thene la ihnimine la itre sine i angeice ka itrotrohni. Hawe, the xou kö troa thele ixatua me troa porotrik, me treij.​—Ite Edomë 17:17.

Nyipici laka, tro së a amamane la hace së, la kola meci hnene la ketre atr hne së hna hnim, nge tha ngazo kö lai, e troa mama koi itre xan. Ngo hetre itre hnyinge nyine troa sa: ‘Nemene la aqane tro ni mele memine la hleuhleung? Nemene la ka ijije matre xatua ni troa xomihnine la hleuhleu memine la kola meci hnene la ketre atr hnenge hna hnim?’ Tro la hnahage ka troa xulu a sa la itre hnyinge celë me itre xane ju kö?

[Ithueamacany]

Itre Hnyinge Nyine Troa Mekun

Nemene la aqane amamane la hace hnene lo itre xaa atr ka isa hetre qenenöj?

Drei la tulu hna qaja hnei Tusi Hmitrötre ka amamane la hace i angatr?

Nemene la aqane ujë ne la itre xan, la kola meci hnene la ketre atr hnei angatre hna hnim? Nemene la aqane ujë i epuni ngöne la ijine cili?

Nemene la hna amamane hnene la mecine la ketre ngöne la lue trefën, laka ketre hna melëne ka ketre pengöne kö?

Nemene la aqane trongene la hleuhleu? Hapeu, ngazo kö troa hace?

Nemene la itre xaa götrane ne la hleuhleu? (Wange ju lo itre hna cinyihane hna eköhagene ngöne la götrane 9.)

Nemene la ijine ka isa pengön, ka ketr la itre keme me thin, la kola sasaqe meci hnene la nekönatr? (Wange ju lo itre hna cinyihane hna eköhagene ngöne la götrane 12.)

Tuneka la aqane ketr la itre thine ka alanyimu, la kola uthithe la upune i angatr, maine kolo pena meci la kola malaan? (Wange ju lo itre hna cinyihane hna eköhagene ngöne la götrane 10.)

[Hna eköhagen götrane 9]

Aqane Trongene La Hleuhleu

Ame la ithahnata celë, “aqane trongen,” ke, tha kolo kö a qaja ka hape tro la hleuhleu a traqa ceitune me ketre ewekë hna sa draine maine ka hetre porogaramen. Troa itrongëpi la nöjei pengöne ewekë ka troa ketr la mel, celëhi matre ame la aqane melëne itr’ej, ke, isa pengöne la eqean. Thatreine kö troa e asë, nge nyimu pengöne aqane ujë. Tro së a ce wange la itre xaa pengöne aqane melën.

Itre pengöne hna drenge panën: Kola pane sesëkötr; xele ma jele nyipicin; xele ma dreng; tha drenge koilo; ngazohnin; me elëhni.

Itre ewekë hna troa amejëne hnene la hleuhleu ka tru: Paatre mekune me tha meköl; kucakuca atraqatre la ngönetrei asë; thina ne kösë ka ce tro me treu; menu la mekune me aqane wai ewekë; treije lapa; tha xeni hnyawa kö, tru la hna xeni e ketre ijin, nge co e ketre ijin, celëhi matre, ase jë elë la kilo matre uti hmaca pi; kola mama la nöjei sine mec; meköle lapa; huliwa sinesin; lapa goeëne lo itre ka meci hë, kösë kolo hi a ketr, maine kola dreng, maine kolo pena a igoeë memine lai ka mec.

E ijine kola nango loi: Wesitramenyi e itre xaa ijine maine kolo hmaca pena ha a mekune lo itre drai hnapan; lo itre drai ne ce mele madrine memine lai ka mec; lo itre drai ne ce qenehnyima.

[Hna eköhagen götrane 10]

Upune Ka Uthith Maine Ka Mala a Meci Hë — Hleuhleu Ne La Thin

Ngacama, nyimu nekö i Mona ha, ngo tru palahi la madrine i nyidro la kola lapa fë hmaca la ketre nekönatre hna upunen. Qëmekene tro angeic’a hnaho, öni angeice ka hape: “eni fe hë a elo memin, me ithahnata kow, nge eni fe hë a madri nyëne kösë lo nekönatre hna hnahone hë.”

Otretre lai ka catr, ka isilekeune la thine kowe la nekön. Kola mama ngöne la itre hna qejepengöne hmaca hnei Mona, kola hape: “Tha meköle hnyawa kö ni ngöne la jidr, ke, Rakela palahi a wajawaja la hning. Mekune palakö ni la itre pane hnaca i nyën, ceitune me kola manomano e kuhu hning. Ngöne la nöjei ijine nyën’a enij, ke, ketre eni fe a drenge la kola mejë la trenge ihniming. Celëhi matre canga drenge hi ni ka hape hetre kucakuca thei nyën, nge nyëne hë a wezipo.”

Öni Mona hmaca jë hi ka hape: “Tha hna canga wang’atrune kö hnei droketre la hnenge hna qaja, nge qea ha thupene lai, ke, pë hmaca kö ketre ewekë ka ijije nyine troa kuca. Hnei nyidrëti hna pane qaja koi ni ka hape the seseu kö. Eni a mekune laka ijine cili hi la eni a drenge la nekönge a mec. Hna pane a ca sesë ujë. Nge ame lai drai thupen, ke, nyëne hi a mec.”

Tha Mona hmekuje kö la hna ketr hnene la hace ka tune la. Hna cinyihane hnei MM. Friedman me Gradstein, ngöne la itus Surviving Pregnancy Loss ka hape, ngöne nöjei macatre e Etazini hmekuje hi, ke, milio lao föe ka uthithi nekön. Ejehi, sisitria catre palakö la etrune ngöne la fene hnengödrai.

Tha hne së kö hna mekune ka hape, ame la kola uthithi la nekönatr, maine kolo pena hnahone la nekönatre ka meci hë e kuhu hni, ke, ketre akötre atraqatre kowe la thin, nge nyine tro pë hë angeic’a lapa fë ngöne la mele i angeice ka pexej. Hanawange la ketre ceitune hna amamane hnene la melene la ketre föe ne Newe Yok, Veronika la ëjen, 50 hë lao macatre i eahlo, ngo jole koi eahlo troa thëthëhmine la nöjei upune i eahlo ka uthith, nge tru catre hmaca kö la hace i eahlo, pine la nekö i eahlo hna hnahon, ka meci hë e kuhu hni. Hna mele hnene la nekönatre utihë la hna naenene treu, nge lue wiike qëmekene tro nyën’a mala, ke, nyëne hi a meci e kuhu hni thin. Sikisi lao kilo i nyëne la kola traqa. Öni eahlo jë hi ka hape: “Ame kowe la thin, ke, ketre akötre ka tru la troa malaane la nekönatre ka meci hë e kuhu hni.”

Ame la itre akötre hna melëne hnene la itre thine celë, ke, tha hna trotrohnine hnyawa kö hnene la itre xaa föe. Ame la ketre droketre föe ka huliwa ngöne lo itre ume hmo, ke, hnei eahlo hna cinyihane thupene la hna uthithi la nekö i eahlo, ka hape: “Eni petre hi a öhne la ketre akötre ka tru, ngo qëmekene la troa traqa koi ni la hace celë, tha trotrohnine hnyawa kö ni la akötre ne la itre sineng, itre ka traqa ha koi angatre la ewekë celë. Hnenge hna meijëne me wang’acone la akötre i angatr, tune la aqane ujë i itre xane koi ni enehila.”

Ngöne la ijine kola lapa fë hleuhleu hnene la itre xaa thin, ke, angatr’a mekune ka hape tha hna dreng’atrune kö hnene la fö i angatre ngöne la kola meci la nekönatr. Celëhi matre, önine la ketre föe ka hape: “Ame la ijine cili, ke, hnenge hna thixötre qa ngöne la aqane ujëne la föeng. Pine laka e tro ni a wai nyidrë, ke, ceitu me pëkö koi nyidrë, kösë lo ka hape tha hnenge kö hna lapa fë upune. Tha atrehmekune kö nyidrëti la haceng. Nyipici laka, e hetre itre ewekë hnenge hna xouen, ke, nyidrëti a xatua ni, ngo ame pe la hleuhleu hnenge hna lapa fë celë, thatreine kö nyidrëti troa hane trotrohni ni.”

Maine aqane ujë i trahmanyi jë kö lai, pine laka thatre pengöne kö angeice la aqane iothekeune la thine memine la kuku hna qatreng, me hna isilekeu nyidro hnene la otretre ka catr, ene la ihnimi memine la madra ka cas. Ngo ame pe, ketre drenge fe hi nyidrëti laka hetre ewekë ka paatr. Celëhi matre loi e tro nyidro a trotrohnine hnyawa ka hape ngacama tha ceitune kö la aqane mama thei nyidroti la hace, ngo ame pe, ke, nyidroti asë hi a ce akötr. Loi pe e tro nyidroti lue trefën’a ixomexatuan, me ifekeune la aqane drenge la akötr. Ka loi e troa tro tune lai, pine laka maine tro la trahmanyi a lapafë caasine la hleuhleu i nyidrë, ke, tro la föe a mekune ka hape ma pëkö koi nyidrëti la hace. Qa ngöne lai, qale jë la trahmanyi kowe la fö i angeic, matre ce treije me nyidro, me ifekeune la itre mekun. Nge ce thue jë la hace. Hawe, itre trahmanyi fe, loi e tro palahi a hetrenyi la itrotrohni.

[Hna eköhagen götrane 12]

Ngöne La Kola Meci Ka Iasesëkötrë Ne La Medreng — Nemene La Aqane Troa Mele Fë La Akötr

Ame la meci ka iasesëkötrë ne la medreng, ke, ketre akötre ka tru. Ka egöcatre la nekönatr, nge ka pëkö sine kucakuca i nyën, ngo ame pe, tha hlë ju kö nyën. Ketre ewekë lai ka jole koi së troa trotrohnin, pine laka, tha hne së kö hna mekune laka tro la nekönatre a meci pa, hune la keme me thin? Ame la nekönatre celë hna hni kow, hnene la thin, ke, nyëne hmaca fe hi la qaane la hleuhleu ka tru ne la thin.

Ketre mekune ka jol’a nyiqaane jilapa thene la keme me thine kola hape zö i nyidroti la meci ne la nekönatr. Nyidroti a mekune ka hape ame la aliene la meci ne la nekönatr, ke, maine qa ngöne la hnei nyidroti hna thatreine thupëne hnyawa nyën. Nyidroti a isa thele ka hape: ‘Nemene jë la ewekë hnei nyiso hna kuca, maine tha kuca pena matre kösë kola upe menune la zöne kowe la föe i angeic?’b Ame itre xaa ijin, ke, hnene la trahmanyi hna thatreine iëne la itre ithahnata nyine qaja. Kola hetrenyi la itre mekune ka tune lai, pine laka ka mele la nekönatre la kola tro troa huliwa, ngo ame la kola traqa hmaca, ke, meci hë nyën. Matre kola mekune ka hape nemene jë la hna kuca hnene la föi angeic? E ka angeice ngöne la ijine cili? Loi e pëkö troa mekuhnine menun, e pi tro nyidrëti a thupëne la lue trefëne i nyidro.

Itre ewekë ka traqa kowe la nöjei atr’asë, nge ka ahleuhleunyi së. Celëhi matre, Tusi Hmitrötr’a qaja ka hape: “Hnenge hmaca hna öhne fene la jö laka tha traqa pa la maloe ca, nge tha hune la at cat, nge kete tha tene xeni la ate inamacan, nge kete tha tena mo la ate trotrohnin, nge kete pëkö ihnimi gufa thene la ate wangate hmekun; ngo ame la ijine memine la ewekë ka xulu, te kola traqa koi angat’asë.”​—Ate Cainöj 9:11.

Nemene la ixatua nyine troa hamëne kowe la itre fami ka meci nekön? Kola qaja hnene la ketre thine ka öhnë hë la hace celë ka hape: “Hna traqa troa wai ni hnene la sinenge troa nyii-hnyawaane la hnalapa. Itre xan’a traqa troa kuci xen. Itre xan’a traqa me haluthi ni, pëkö ketre ithahnata hna qaja, ngo ame koi ni, ke, ixatua ka tru. Tha traqa kö koi ni la ajane troa ithahnata. Nge jole koi ni troa qejepengöne lapaane la aqane meci ne la neköng. Tha ajane kö ni troa drenge la itre hnyinge hmo, ka inyizö me hape tha ase kö ni kuca hnyawa la götraneng. Eni la thine i nyën; maine atreine ni, ke, tro ni a kuca la ka ijije matre tha tro kö a meci hnene la nekönge hnenge hna hnime catrën.”

[Ithueamacany]

[Iatr ne la götran 8]

Tha nyine hmahmane kö la troa hace me treije ngöne la kola meci hnene la ketre atr hne së hna hnim

[Iatr ne la götran 11]

Ketre ewekë ka akötre la kola meci hnene la ketre nekönatr​—Ame la aqane troa xatuane la itre keme me thin, ke, ene la troa trotrohni angatre me troa kapa la itre mekune i angatr