Hna Melëne Hnei Ricardo Me Andres

Ijije hi troa saze la mele së hnene la Tusi Hmitrötr. Hanawang la hna melëne hnei Ricardo me Andres.

RICARDO: Ame lo kola 15 lao macatreng, hnenge hna lö hnine la ketre gang. Hna iaö ni hnene la itre sine ce elong. Ame la ajang, tre, troa lapa kalabus koi 10 lao macatre! Ame kowe la itre atr ka lapa xötreithi ni, nyine wangatrune me metrötrën la itre atr ka lapa aqeanyi e hnine la kalabus. Nge, celë fe hi ajang. Ngo ame pe, ka menu la mekunang!

Ase hë ni kuca asë la itre hna majemine kuca ngöne la itre gang, tune la xomi dorog, me kuci ngazo, me isi. Ame ngöne la ketre heji ne ikuqany, eni fe e kuhu nyipin. Xönë hi troa humuthi ni. Eloine pe, pë ju fe kö eatreng. Thupene jë hi lai, hnenge hna pane goeëne la meleng, memine la itre ajang. Loi e tro ni a saze. Ngo, troa tune kaa? Tro ni a thele ixatua ekaa?

Tha madrine kö la itre xaa sineeng. Pëhë ihneimeke i angatr hnene la itre jol ka nyimutre. Ngo, ketrepengöne pe kö la mele ne la hnepe lapa ne la ketre mathineng. Atre hi ni laka, itre atr ka loi angatr, nge angatr a mele thenge la itre trepene meköti ne la Tusi Hmitrötr. Angatr la ka qaja koi ni ka hape, Iehova la ëje i Akötresie. Celë hi matre, tha qea catre kö thupene la ijine ikuqany, hnenge hna thithi koi Iehova, hnenge hna hëne la ëje i Nyidrë, me sipo ixatua koi Nyidrë. Eni a sesëkötre lo drai thupen ngöne la kola fenafena la qëhnelöng hnene la ketre Atre Anyipici Iehova! Angeice pë hë la ka ini Tusi me eni.

Hna traqa koi ni la ketre itupath. Hnene la itre sine ce elong ekö hna majemine hë ni, me iele ni troa ce tro hmaca me angatr. Ngacama tha ka hmaloi kö, ngo hnenge palahi hna thipëne la sipo i angatr. Xecie hnyawa ha e kuhu hning laka, tro ni a ini Tus. Ka lolo la mekun hnenge hna xom! Hna saze la meleng, nge öhne hë ni la nyipi madrin.

Mekune palahi ni ekö lo hnenge hna qaja koi Akötresie. Öning koi Nyidrë, ajang troa lapa kalabus koi 10 lao macatre, matre tro la itre atrene la gang a metrötrë ni. Ngo, eni pena ha a sipone troa huliwa i Nyidrë ngöne la drai ka pexej koi 10 lao macatre. Eni a ajane troa xatuane la itre xan, tune la aqane xatua ni. Hnei Nyidrëti hna dreng la thithing, me aijijë ni troa huliwa i Nyidrë koi 17 lao macatre! Ketre, tha hane ju kö ni xome la gojenyi ne tro kalabus.

Alanyimu la itre sine ce elong ekö ka lapa aqeanyi e hnine la kalabus. Hna meci hnei itre xan. Ame la eni a mekune hmaca lo meleng ekö, madrine catre ni kowe la faming ka anyipici Iehova. Pëkö xou thei angatre troa isapengöne memine la fen, me mele thenge la Tusi Hmitrötr. Tru catre kö la hnenge hna metrötrë angatr, hune lo itre xaa atrene la gang. Ketre, eni a olene koi Iehova, ke, hnei Nyidrëti hna ini ni la pengöne mel ka loi.

ANDRES: Hna hnaho ni ngöne la ketre götrane gaa pë ewekë, nge hna jilapa e cili la itre ka xomi dorog, me atrekënö, me ihumuth, me itre föe ne gojeny. Ka iji gorok catre la kemeng, me xomi dorog. Hnei nyidrëti hna lapa lepi nenë, me qaqa eahlo.

Ame lo co petre kö ni, hnenge fe hna nyiqaane ij, me xomi dorog. Eni palahi a ngenu agö e cahu gojeny, me atrekënö, me salemëne hmaca la itre ewekë. Ame la eni a nango tru, hnei kaka hna thele troa easenyi ni, ngo ka ngazo la aqane hamë ini nyidrë. Hnei nyidrëti hna ini ni la aqane troa salemë dorog ngöne la nöj. Tru catre la manie hnenge hna kapa. Ngo, ame la ketre drai, hna traqa hnei polis, me upe zö ni la ketre ihumuth, matre 5 lao macatre ne lapa kalabusi ni.

Ame la ketre hmakany, hna hëne la atrene la kalabus matre troa porotrikë Tusi Hmitrötr memine la Itretre Anyipici Iehova. Hnenge hna tro troa hane sine la porotrike cili. Ka lolo la itre hna qaja, matre hnenge hna nyiqaane ini Tusi Hmitrötr me angatr. Tha hnei angatre kö hna nyixane la hna qaja hnene la Tusi Hmitrötr, ngo hnei angatre pe hna amamane hnyawa la itre trepene meköti Akötresie.

Eni a trotrohnine laka, thatreine kö ni troa saze, e pëkö ka xatua ni. Ketre, tha madrine kö la itre xaa hna akalabusin la hnenge hna kuca, matre angatr a icilekeu me eni. Hnenge hna thith, me sipo Iehova la trengecatre memine la inamacan ka ijij. Nge, hnei Nyidrëti hna xatua ni. Tha hnenge kö hna të la ngazo hnei angatr hna kuca koi ni, ngo hnenge pe hna qeje Tusi Hmitrötr koi angatr.

Ame la kola nue ni qa kalabus, eni a xou. Eni a ajane troa lapa aqeanyi e hnine kalabus! Ame la eni a tro, alanyimu la itre hna akalabusin ka qaja ka hape, “Öi hnamiatr, catre pi!”

Eni a madrin, ke, hna ini ni hnei Akötresie. Eni a olene koi Iehova la hnei Nyidrëti hna hnimi ni, me nyipiewekë ni. Tha ka luzi kö ni xajawa i Nyidrë.a