“Tro Ha Tru La Tingetinge” Fene La Baselaia i Akötresie

Easa lapa treqene la Baselaia i Akötresie. Celë hi musi hnei Nyidrëti hna acil, matre troa tingeting me caas la itre atr e celë fen. Öni Salamo 72:7, “Tro ha tru la tingetinge.” Ngo, eue la ijine troa traqa la Baselaia? Nemene la aqane tro la Baselaia i Akötresie a musi kowe la fen? Nge, nemene la nyine tro sa kuca matre tro sa mel?

EUE LA IJINE TROA TRAQA LA BASELAIA?

Hnei Tusi Hmitrötr hna perofetane la itre ewekë ka troa mama qëmekene troa traqa la Baselaia i Akötresie. Ame la itre ewekë cili, tre, “hatene” la traqa ne la Baselaia. Kola qaja la itre isi e cailo fen, me jiin, me sine mec, me itre sa, memine la kola cile kowe la mus.—Mataio 24:3, 7, 12; Luka 21:11; Hna Amaman 6:2-8.

Önine la ketre hna perofetane ka hape: “Tro ha traqa la nöjei ijine ka aköte ngöne la ite drai hnapin. Ke tro nöjei ate a hnimi angate kö, me meciu mani, . . . me tha dei keme me thin, me tha ole kö, me tha metöte kö, angete tha hnimi sinen, me tha ihnimi kö, me itete ixöjetij, me ka tha’teine xomi hnöth, me ka cate mek, me itete tha ajane kö la loi, . . . me ka [pi tru], me itete ajane la nyine amadine ngo tha ajane kö koi Akötesie.” (2 Timoteo 3:1-4) Tha mama kö thene la itre atr la itre thiina celë ekö. Ngo ame enehila, mama catre hë la itre thiina cili.

Hna eatre la itre hna perofetane lo macatre 1914. Hnene la itre historiens, me itretre mus, me itretre cinyihane hna qaja la aqane saze la fen thupene la macatre cili. Öni Peter Munch, ketre historien qa Danemark ka hape: “Thupene la isi lo macatre 1914, ketrepengöne kö la aqane saze la fen. Qëmekene lo macatre cili, kola lolo trootro la mele ne la itre atr . . . Ngo e thupen, hna traqa la itre ijine akötr, me hleuhleu, me imethinë, nge pëhë tingeting.”

Ngo, kola qajaqaja hnene la itre hatrene cili la ewekë ka loi ka troa traqa. Kola amamane laka, easenyi hë tro la Baselaia a musi kowe la fen. Celë hi hnei Iesu hna amaman, ngöne lo nyidrëti a qaja la itre hatrene la pune la fen. Öni nyidrë: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.”—Mataio 24:14.

Ame la maca ka loi, tre, celë hi maca hna tro fë hnene la Itretre Anyipici Iehova. Nge, ame la zonal hnei angatr hna tro fë trongën, tre, Ita Ne Thup—Maca Ne La Baselaia i Iehova. Kola qaja hnene la Ita Ne Thup la hna troa kuca hnene la Baselaia i Akötresie thatraqane la itre atr, memine la ihnadro.

NEMENE LA AQANE TRO LA BASELAIA I AKÖTRESIE A MUSI KOWE LA FEN?

Troa sa la hnyinge celë hnene la foa lao mekun, hna hape:

1. Tha tro kö la ketre hene ne politik a cilëne la Baselaia.

2. Tha tro kö la itre hene ne politik a nue la musi angatr, ngo tro angatr a icilekeu memine la Baselaia i Akötresie.—Salamo 2:2-9.

3. Tro la Baselaia i Akötresie a lepe apatrene la itre musi ne la fen, itre ka catre fë mekun. (Daniela 2:44; Hna Amaman 19:17-21) Hna hëne la isi ka tru cili ka hape, Amagedo.—Hna Amaman 16:14, 16.

4. Ame ngöne la ijine isi hna hape, Amagedo, tro pe hi a mel la itre ka sajuëne la Baselaia i Akötresie, nge tro angatr a mele tingeting ngöne la fen ka hnyipixe. Angatre hi lo hna hëne hnei Tusi Hmitrötr ka hape, “ka ala nyimu atraqat.” Maine jë, tro angatr a sasaith la itre milio.—Hna Amaman 7:9, 10, 13, 14.

NEMENE LA NYINE TRO SA KUCA MATRE TROA MEL FENE LA BASELAIA?

Ame la pane nyine troa kuca matre troa mele fene la musi ne la Baselaia, tre, loi e troa pane ini së. Öni Iesu e thith ka hape: ‘Drei lo la mele ka tha ase palua kö, laka tro angatr a atre cilie la nyipi Akötesieti ka caas, me Iesu Keriso la hnei cilieti hna up.’—Ioane 17:3.

Hetre eloin e tro la itre atr a atrepengöi Iehova Akötresieti hnyawa. Ame la ketre, tre, tro angatr a acatrene la lapaune i angatr koi Nyidrë. Nge, tro la lapaune a upi angatr troa mejiune laka, ka mel la Baselaia i Akötresie, nge easenyi hë tro ej a musinëne la fen. (Heberu 11:1) Ketre, tro angatr a akökötrene la ihnimi angatr koi Akötresie, me kowe la itre ka lapa easenyi angatr. Ihnim la ka upi angatr troa drengethenge Akötresie qa kuhu hni. Nge, ihnim la ka upi angatr troa trongëne la wathebo ka sisitria, lo hna qaja hnei Iesu. Öni nyidrë: “Ame la hnei nyipunie hna ajane ite ate troa kuca koi nyipunie, kuca tune jë lai koi angat.”—Luka 6:31.

Iehova la kem ka ihnim, nge Atre Xupi së. Aja i Nyidrë tro sa mele ka loi, me kapa la hna hëne hnei Tusi Hmitrötr ka hape, “nyipi mel.” (1 Timoteo 6:19) Ame la mel enehila, tre, tha “nyipi mel” kö. Ame kowe la itre atr, itre milio la etrun, jole catr la mele i angatr, nge angatr a isine troa mel ngöne la nöjei drai. Maine epuni a ajane troa atrepengöne la “nyipi mel,” hanawang la itre ewekë hna troa kuca hnene la Baselaia i Akötresie.