Mekene Treen
Ketre Baselaia “Ka Tha Tro Kö a Apaten’ Epine Palua”
1. Nemene la hna amamane hnyawa hnene la itre ewekë ka traqa ngöne la mele ne la atr?
KOLA amamane hnyawa ngöne la nöjei drai hnene la itre ewekë ka traqa e cailo fen laka, pëkö manathithi hna kapa hnene la atr qa ngöne la hnei angeic hna thipetrije la musi ka pë sane i Iehova me thele troa ketre sipu mus. Pëkö musi e celë fen ka hamë nyipi manathith kowe la nöjei pengöne atr asë. Ngacama kola elë la inamacanen la atr ngöne la Sias, ngo ame pe tre, thatreine pala hi angeic troa apaatren epine palua la nöjei pengöne mec, maine troa thapa pena la itre atr qa ngöne la mec nge goi thatreine fe kowe la ala caas. Ketre thaa hna apaatrene kö hnene la musi ne la itre atr la isi, me iakötrë, me ihumuth, me huliwa atrekënö, maine jiine pena. Ame pala kö ngöne la itre nöj ka nyimutre, tre, ngazo catr la aqane musi ne la itre atr. (Ate Cainöj 8:9) Kola adron me angazon la ihnadro memine la tim memine la enyi hne së hna manon, hnene la teknolozi, nyixane jë kö hnene la pi aja manie maine hnene laka kola kuca la itre ewekë ngo thatreine kö neën la itre ethanyin la aqane huliwan. Ame la itre nyine loi thatraqane la melen la atr, tre, ngazo la aqane huliwan. Kola aejën hnene la itre thauzane lao macatre ne musi ne la atr, la mekune celë kola hape: “Tha qâ i ate kö la jë i angeic ; tha qâ i ate troa amekötine la ite hna feke ca hnei angeic.”—Ieremia 10:23.
2. Nemene la nyipi nyin kowe la itre jol ne la itre atr?
2 Nemene la nyine lai? Baselaia i Akötresieti hmekuje hi la nyin, aliene hi lo thithi Iesu lo hnei nyidrëti hna inine kowe la itretre drei nyidrë, kola hape: “Jiniati e hlepëti pi la baselaia i enëtilai. Longëtine jë la hanengë i enëtilai e celë fewatin axajanëti e kohoti hnengödrai.” (Mataio 6:9, 10) Hna qejepengöne ngöne 2 Peteru 3:13 ka hape, ame la Baselaia i Akötresie e hnengödrai, tre, celë hi “hnengödrai ka hnyipixe,” lo ka troa musinëne la “fene hnengödrai ka hnyipixe,” ene lo itre atr ka meköt. Hnene laka nyipi ewekë catr la Baselaia cili, ene pe Iesu a xome jë eje troa nyi trepene la cainöje i nyidrë. (Mataio 4:17) Hnei nyidrëti hna amamane la hnen ej ngöne la mele së, ngöne la nyidrëti a qaja ka hape: “Ngo pane thele jë nyipunie la baselaia i Akötesie, me thina ka meköti anganyidë.”—Mataio 6:33.
3. Pine nemen matre nyipi ewekë troa canga thele troa atrepengöne la Baselaia i Akötresie enehila?
3 Nyipi ewekë catr troa thele troa atre la Baselaia i Akötresie enehila, pine laka easenyi hë tro ej a saze epine palua la musi ne la fene celë. Hna ahnithe ngöne Daniela 2:44 ka hape: “Ngöne la ite drai ne la ite joxu cili [itre mus enehila] tro Akötesieti ne hnengödrai a axulune la kete baselaia [e koho hnengödrai] ka tha tro kö a apaten ‘ or ’ ? epine palua ; nge tha tro kö a nue la baselaia cili kowe la ite xa nöj [thaa tro hmaca kö a musinën la fen hnene la atr], tro ej’ a lep’ anyilanyilane me apatene la nöjei baselaia asëjëihë [ka cile ngöne la ijine] cili, nge tro ej’ a cile hut’ epine palua.” Haawe, tro ha nyipune la itre drai hnapine celë hnene la Baselaia, ene laka eje a troa apaatren la fene hnengödrai asë ka ngazo. Thupene lai, Baselaia ne hnengödrai pë hë la ka troa musinën la fen, pë hmaca kö ka troa isenyin. Drei la madrine me ole së laka easenyi catre hë matre traqa pi la hna thingehnaean!
4. Nemene la ewekë ka itretrengekeu memine la Baselaia ka traqa e koho hnengödrai ngöne lo macatre 1914, nge pine nemen matre nyipi ewekë la ewekë cili koi së?
4 Ame ngöne lo macatre 1914, hna acili Iesu Keriso troa Joxu nge hna aijijë nyidrë troa “musinëne la nöjei ithupëjia me [nyidë].” (Salamo 110:1, 2) Hna nyiqaane mina fe ngöne la macatre cili la “ite drai hnapin” ne la fene ka ngazo celë. (2 Timoteo 3:1-5, 13) Kolo mina fe a eatr e koho hnengödrai la itre ewekë hna meköle goeën, nge hna perofetan hnei Daniela. Hnene la “Qate ate ka hekö,” ene Iehova Akötresie hna hamën kowe la Nekö i atr, ene Iesu Keriso, “la mus me lolo, me baselaia, mate tro nöjei ate, me ite nöj, me isa qene hlapa asë a nyi hlue i anganyidë.” Hna amexeje la ewekë cili hnei Daniela matre angeic a cinyihan ka hape: “Musi ka cile huti la musi anganyidë, nge tha tro kö a pate ; nge tha tro kö a ase la baselaia i anganyidë.” (Daniela 7:13, 14) Hna jëne hi la Baselaia cili hna nue koi Iesu Keriso, matre Akötresie a troa aijijën la itre atr ka ajan la meköt troa kapa la itre ewekë ka lolo lo hnei Nyidrëti hna hnëkëne hë ekö kowe la lue pane keme me thine së ngöne la Paradraiso.
5. Nemene la itre ewekë ka itretrengekeu memine la Baselaia nyine tro sa wangatrune catrën, nge nemen kepine lai?
5 Ajane kö nyipunie troa jinine la Baselaia? Maine aja i epuni fe, haawe, loi e tro fe nyipunie a hane thele troa atre la aqane eköth memine la aqane trongene la musi cili e hnengödrai. Ma aja i nyipunieti jë fe troa atre la hnene eje hna kuca enehila, me hna troa kuca elany, me ewekë hna thele thei nyipunie. Haawe, maine tro nyipunie a thele troa atrepengöne hnyawa la Baselaia, eje hi lai laka, tro ha kökötre hnyawa la hni ne ole thei nyipunie. Maine tro nyipunie a kapa la musi ne ej, tro ha hnëkë nyipunieti hnyawa troa qaja kowe la itre xaa atr la itre manathithi ka tru hnene eje hna troa hamën kowe la itre atr ka drengethenge.—Salamo 48:12, 13.
Itre Tane La Baselaia i Akötresie
6. (a) Thenge la hna qaja hnei Tusi Hmitrötr, nemene musi ka pë san la hna mama fë hnene la Baselaia Ne La Mesia? (b) Nemene la hna acian the së hnene la itre hne së hna atre ngöne la Baselaia?
6 Ame la pane ewekë hne së hna atre ngöne la Baselaia Ne La Mesia, tre, eje hi la ka nyihatren la musi ka pë sane i Iehova. Iehova la ka hamën la “mus me lolo, me baselaia” kowe la Hupuna i Nyidrë. Thupene lo hna acile la Hupuna i Akötresie troa Joxu, hetrenyi la itre nine ula qa hnengödrai kola hape: “Ame la baselaia ne la fene, te, kola celohmëne thatraqane la Joxu shë [Iehova Akötresie] memine la Keriso i anganyidë ; nge tro nyidëti [Iehova] a musi epin’ epine palua.” (Hna Amamane 11:15) Qa ngöne lai, ame asë hi la itre hne së öhne göne la Baselaia memine la hnene eje hna kuca, itre ewekë lai ka troa aeasenyi së catre pala hi koi Iehova. Loi e tro la itre hne së hna inin a acian the së la ajan troa lapa epine palua fene la musi cile i Nyidrë.
7. Pine nemen matre ka lolo catr koi së tro Iesu Keriso a hane musi fe i Iehova?
7 Mekune ju fe së laka hna acili Iesu Keriso hnei Iehova matre troa musi hune la therone fe i Nyidrë. Nyidrëti hi lo atre xup ka ce huliwa me Akötresie matre troa xupe la fen memine la itre atren, haawe, pë hmaca ju kö atr ka sisitria hui Iesu ka atre hnyawa la itre ewekë hne së hna ajan. Ketre, hnei nyidrë hna amamane pala hi ngöne la mele ne la atr laka ‘hanyi nyidë la itre nekö i atr.’ (Ite Edomë 8:30, 31; Kolose 1:15-17) Hnene laka tru catre la ihnimi nyidrë kowe la itre atr, matre hnei nyidrëti hna ketre sipu uti kowe la fen matre troa huujën la mele i nyidrë thatraqa së. (Ioane 3:16) Haawe, hnei nyidrë hna aijijë së troa utretr qa ngöne la ngazo memine la mec, ene pe ijiji së jë fe troa hane kapa la mele ka thaa ase palua kö.—Mataio 20:28.
8. (a) Pine nemen matre ka troa cile huti la Baselaia i Akötresie, thaa tune kö lo musi ne la itre atr? (b) Nemene la pengöne la “hlue ka nyipici me ka inamacan” kowe la musi e koho hnengödrai?
8 Ame la Baselaia i Akötresie tre, ketre musi ka cile catr me cile hut. Qa ngöne laka thaa ka meci kö Iehova, haawe, thatreine kö tro sa luelu me thele ka hape, ka tro jë kö a cile huti la Musi Nyidrë. (Habakuka 1:12) Ketre tui Iesu Keriso lo hna acile hnei Iehova troa mus, laka thaa ceitui nyidrëti kö memine la itre joxu ne fen, thaa tro hmaca fe kö nyidrëti a mec. (Roma 6:9; 1 Timoteo 6:15, 16) Troa ce me Keriso fe e koho ngöne la itre therone e hnengödrai la itre xaa atr, ala 144 000, ene lo itre ka mele nyipici koi Akötresie ka xulu qa ngöne la “nöjei tribu asëjëihë, me ite qene hlapa, me nöjei nöj.” Nge ame mina fe angatr, thaa tro kö angatr a hane mec. (Hna Amamane 5:9, 10; 14:1-4; 1 Korinito 15:42-44, 53) Ala nyimu hë thei angatr la itre ka elë hnengödrai eë, nge ame pë hë la thelen e celë fen tre angatre hi lo lai “hlue ka nyipici me ka inamacan,” ka catre kuca la itre aja ne la Baselaia enehila e celë fen.—Mataio 24:45-47.
9, 10. (a) Nemene la jëne gomegom memine la itre ewekë ka ngazo hna troa apaatren hnene la Baselaia? (b) Maine thaa ajane kö së troa ithupëjia memine la Baselaia i Akötresie, nemene la itre ewekë nyine tro sa neën?
9 Easenyi hë matre upe jë Iehova la itre xötre isi Nyidrë qaa hnengödrai matre troa apaatrene trije pi la itre atr ka angazon la fen. Tro angatr a apaatren epine palua la itre atr ka xele ma hane thili kowe la musi ka pë sane i Nyidrë, me methinën la itre hnei Nyidrë hna amekötine ngöne la ihnim jëne Iesu Keriso. (2 Thesalonika 1:6-9) Celë hi lo drai i Iehova lai, ene lo ijine hnei Nyidrëti hna sa matre troa anyipicin laka Nyidrëti hi la Atre Musi Ka Pucatin Asë e Celë Fen Me e Koho Hnengödrai. “Hana wang, calemi hë la drai Iehova, welë hë hnei hmenigöje me elëhni ka idreuth, . . . me apatrene la itre ka ngazo ngön’ ej [la nöj].” (Isaia 13:9) “Drai ne elëhni la drai cili, drai ne hleuhleu me aköt, drai ne hnëjine me apë wenën, drai ne jidi me melöhlem, drai ka hete iawe me miti drai.”—Zefania 1:15.
10 Troa apaatren epine palua la hmi ka thoi memine la itre musi ne fen me itre trongene isi angatr, lo itre hna amenun ngöne la fene celë hna musinën hnene la tane ka iakötrë lo hnei atr hna thatrein öhne hnei lue mek. Ame la atr ka ce sinee memine la fene celë nge ka mele caas, me huliwa atrekënö, maine kuci ngazo pena, tro ha apaatrenyi angeic. Tro ha akalabusi Satana memine la itre dremoni i angeic, caa thauzane lao macatre, matre thatreine hmaca kö tro angatr a tupath la itre atr. Tro hë la Baselaia i Akötresie a musinëne hnyawa la itre ewekë e celë fen. Drei la ketre inuamacanyi ka tru kowe la itre atr ka ajane catrën la meköt!—Hna Amamane 18:21, 24; 19:11-16, 19-21; 20:1, 2.
Aqane Troa Eatrën La Itre Aja Ne La Baselaia
11. (a) Tune kaa la aqane tro la Baselaia ne la Mesia a eatrën lo aja i Iehova kowe la ihnadro? (b) Nemene hë la aliene la Baselaia kowe la itre atr ka troa mele e celë fen?
11 Tro la Baselaia ne la Mesia a eatrëne asë lo hnei Akötresieti ekö hna mekune troa kuca ngöne lo qaan kowe la fen. (Genese 1:28; 2:8, 9, 15) Qaane ekö uti hë enehila, thaa hnene kö la itre atr hna sajuën lo lai aja i Akötresieti cili. Ngo ame la “nöj [“fen,” MN ] ka troa traqa” ke troa musinëne ej hnene la Nekö i atr, ene Iesu Keriso. Ame asë pë hë la itre atr ka troa mele pe ngöne lo Iehova a amekötin la fene ka ngazo celë, tre, tro angatr a ce huliwa me caas fene la musi Keriso lo joxu, nge angatr a madrin troa kuca asë la hna ahnithe koi angatr hnei nyidrë matre paradraiso asë hmaca pi la fene hnengödrai. (Heberu 2:5-9) Tro la itre atr asë a kepe thangane ka loi qa ngöne la itre hnei angatr hna isa kuca, nge tro angatr a kapa la emanane la itre wene ne la ihnadro.—Salamo 72:1, 7, 8, 16-19; Isaia 65:21, 22.
12. Tune kaa la aqane troa pexej ngöne la mekun me ngöne la ngönetrei hnene la itre jinin la Baselaia?
12 Ame ngöne la kola xupi Adamu me Eva, ka pexeje nyidro nge ame la aja i Akötresie, tre, ene la tro nyidroti a hnaho, me nyialiene la ihnadro hnene la itre matra i nyidro, nge tro angatr a mele madrin ke pexej la mekun memine la ngönetrei. Troa eatr la aja i Akötresieti celë, ngöne la kola musi elanyi la Baselaia. Eje hi laka, troa pane apaatren la itre ethan la ngazo, nge celë hi kepine lai matre ame Keriso tre, thaa nyidrëti hmekuje kö a Joxu ngo nyidrëti fe la Atre Huuje Ka Tru. Tro nyidrëti a xomihni ahoeany me xatuan la itre atre i nyidrë ka drengethenge, troa hane kapa la itre manathith ka xulu qa ngöne la mel hna huujën hnei nyidrë.
13. Nemene la itre manathith ngöne la götrane la ngönetrei hna troa eatrën fene la musi ne la Baselaia?
13 Fene la musi ne la Baselaia, tro la itre atr a kapa la itre manathith ka sisitria ngöne la götrane la ngönetrei. “Ame hna troa ahlëne la ite lue meke ne la timek, me fepi la ite lue hnangenyë ne la ite ka sim ; ame hna troa sheshë draië la ite ka geny ca tune la aila, nge troa nyima la sesepeneqe ne la humu.” (Isaia 35:5, 6) Tune la nekönatr, troa pepeija hmaca lo ijön ne la itre atr ka ethitre ekö hnene laka kola qatre trootro, maine pena hnene la itre sine mec, nge pë hmaca kö troa hetre ka wezipo, ngo tro asë hi a egöcatre la itre atr ngöne la ijine cili. “Tro ha pepeija la ngönetei angeice hune la nekönat ; tro hmaca angeic’ a thupëtesij.” (Iobu 33:25) Troa traqa la ijin pë hmaca kö atr ka troa qaja ka hape, “Ini a mec.” Pine nemen? Pine laka troa ahmaloeën la itre atr ka xoue Akötresie, ke kola troa thepe angatr qa ngöne la itre ethane la ngazo. (Isaia 33:24; Luka 13:11-13) Eje hi laka tro Akötresieti a “köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec, me hace hni, me teij, me aköt ; ke patë hë la ite ewekë hnapan.”—Hna Amamane 21:4.
14. Nemene la nyine troa kuca matre troa pexeje la itre atr?
14 Ngo thaa tro hmekuje kö a hetrenyi la ketre ngönetrei me mekune ka pë ethan matre troa pexeje la atr. Nyipi ewekë mina fe troa eën la itre thiina i Iehova, pine laka hna xupi së ‘hnaiji Akötresie, me tui Nyidrë.’ (Genese 1:26) Nge eje hi lai laka tro ha nyimutre catr la itre ewekë nyine tro sa inin, matre troa traqa kowe lai. Haawe tro ha “eje la thina ka meköt” ngöne la fene ka hnyipixe. Qa ngöne lai, tune la hna perofetane hë hnei Isaia kola hape, “ej’ e celë fene la ite hna amekötine hnei cilie, tro itete lapane la fen’ a inine la thina ka meköt.” (2 Peteru 3:13; Isaia 26:9) Troa aijijën hnene la thiina celë la tingeting—thene la itre atr asë ngacama isa pengön la itre hane ngönetrei, me thene la itre sinee, me itre atrene la hnepe lapa, ngo ame la ka sisitria tre ene laka tingetinge hnyawa la itre atr me Akötresie. (Salamo 85:10-13; Isaia 32:17) Ame kowe la itre atr ka troa inine la thiina ka meköt, ke tro angatr a inin me majemi trootro kowe la aqane troa eatrën la aja i Akötresie. Ame la kola cia hnyawa la ihnimi Iehova ngöne la itre hni angatr, ke angatre fe hi a hane xötrethenge ju la itre jë i Nyidrë ngöne la nöjei götrane ne la mele i angatr. Tro hë angatr a hane qaja tui Iesu ka hape, ‘Ini a kuca pala hi la nöjei ewekë nyine amadrinën la Tretretrong.’ (Ioane 8:29) Drei la madrine atraqatr elany ngöne la kola troa eatr asë la itre ewekë cili kowe la mele ne la itre atr!
Itre Ewekë Hna Eatrëne Hë Hnene La Baselaia
15. Jëne la itre hnying ne la paragarafe celë, loi e qaja atrune jë la itre ewekë hna eatrëne hë hnene la Baselaia, nge amamane jë la nyine tro sa kuca enehila.
15 Mama cile hnyawa la itre ewekë hna eatrën hnene la Baselaia i Akötresie memine la itre jinin ej. Troa amekunë së hmaca la itre ewekë cili hnene cahu itre hnying memine la itre xötre ne la Tusi Hmitrötr, ketre tune mina fe la itre xaa ewekë ka ijij nge nyine troa kuca enehila hnene la itre jinin la Baselaia.
Hna pane ujë koi drei hnene la Baselaia, nge nemene hë la thangane lai? (Hna Amamane 12:7-10, 12)
Qaane lo kola acili nyidrë troa joxu, drei la lapa hna wangatrune hnei Keriso matre troa acaasine lo itre thelene ej? (Hna Amamane 14:1-3)
Thenge la hna qaja ngöne Mataio 25:31-33, nemene huliwa hna ahnithe hnei Iesu nge hnei nyidrëti hna troa kuca thupene la hna nyiqaane la akötr atraqatr?
Nemene la huliwa hna pane eatrën ngöne la hneijine së? Drei la ka sine la huliwa cili? (Salamo 110:3; Mataio 24:14; Hna Amamane 14:6, 7)
Pine nemen matre thatreine ju kö la itre ithupëjia ka kuci politik me hmi, troa sawa la huliwa ne cainöje trootro? (Zakaria 4:6; Ite Huliwa 5:38, 39)
Nemene hë la itre ewekë ka saze ngöne la mele ne la itre atr ka lapa fene la musi ne la Baselaia? (Isaia 2:4; 1 Korinito 6:9-11)
Baselaia Ka Caa Thauzane Lao Macatre
16. (a) Ije macatre ne tro Keriso a mus? (b) Nemene la itre ewekë ka sisitria hna troa kuca ngöne la itre ijine cili me e thupene fe?
16 Thupene la hna kuië Satana memine la itre dremoni i angeic hnine la hnaop, tro Iesu memine la ala 144 000 ka troa ceme nyidrë, ene lo itre joxu me itretre huuj, ka troa musi ngöne la caa thauzane lao macatre. (Hna Amamane 20:6) Ame ngöne la ijine cili tre, kola troa eatrongën la itre atr matre pexeje pi angatr, tro ha paatre palua lo ngazo memine lo meci qaathei Adamu. Ame hë ngöne la pune la Musi Iesu Ka Caa Thauzane Lao Macatre, hna umuthe hi e cili la hnëqa ne la Mesia, ene la Joxu nge Atre Huuj; haawe, Iesu pë hë a troa “nue la baselaia” kowe la Tretretro i Nyidrë, “mate Akötesieti la ka sisitia cate hun’ asë.” (1 Korinito 15:24-28) Ame e cili, kolo hi a nue Satana hmaca pi kowe la itre hnepe ijin, matre troa tupathe la itre atr hna itön, maine jë catre pala hi la aqane cilëgöline angatr la musi cile i Iehova. Thupene jë hi la itupathi tixenuë cili, tro Iehova a apaatrenyi Satana memine la itretre ce me angeic. (Hna Amamane 20:7-10) Tro ha mama hnyawa e cili la aqane cile huti me mele nyipici ne la itre atr koi Iehova, nge itre ka amamane hnyawa ka hape ce angatr memine la musi ka pë sane i Nyidrë, angatre fe la ange ka catre fë la musi Nyidrë ka meköt troa musinën la hnengödrai memine la fene hnengödrai. Tro ha eje hnyawa hmaca lo itre aqane imelekeu i angatr me Iehova, ngöne laka tro Nyidrëti a kepe angatr ceitune me itre nekö i Nyidrë trahmanyi me jajiny, nge ketre tro Nyidrëti a kepe angatr me aijijë angatr troa hane mele epine palua.—Roma 8:21.
17. (a) Nemene la ewekë ka troa traqa kowe la Baselaia ngöne la pune la itre macatre ka caa thauzan? (b) Nemene la enyipicine la hna qaja ka hape ame la Baselaia tre “tha tro kö a apaten’ epine palua”?
17 Haawe, tro ha saze la hnëqa i Iesu memine lo 144 000 kowe la fen. Nemene pë hë la nyine tro angatr a kuca thupen? Pëkö hnei Tusi Hmitrötr hna qaja göne lai. Ngo maine tro sa catre sajuën la musi cile i Iehova, tro fe së elanyi a hane öhne ngöne lo lai pune la Musi Iesu Ka Caa Thauzane Lao Macatre, la hnei Iehova hna hnëkëne thatraqai angatr, me kowe mina fe la hna troa kuca kowe la hnengödrai memine la fen. Ngo, eje hi lai laka, ame la musi Keriso ka caa thauzane lao macatre, tre ka tro eje a “cile hut” nge ame la Baselaia i nyidrë tre “tha tro kö a ase.” (Daniela 7:14) Nemene la aliene lai? Ame la hnapan, tre thaa tro hmaca kö a nue la musi kowe la itre atr matre tro angatr a isa trongë mekunan, ke Iehova pë hë la Atre Mus. Ame la hnaaluen, tre ame la Baselaia cili tre, “tha tro kö a apaten’ epine palua” pine laka ka troa cile huti epine palua la itre hnene eje hna troa kuca. (Daniela 2:44) Ame hë la pun, tre, tro ha wangatrun epine palua la Mesia, ene la Joxu nge Atre Huuj memine la itre ka ce me nyidrë, qa ngöne laka hnei angatr hna nyihluei Iehova cememine la nyipici.
Revizio
• Pine nemen matre Baselaia i Akötresieti hmekuje hi la sipu nyin la itre jole ne la itre atr? Eu la kola nyiqaane cile la Joxu ne la Baselaia cili?
• Nemene la ka ketr hnyawa la itre hni nyipunie göi Baselaia, nge nemene la hna troa kuca hnene ej?
• Nemene hë la itre huliwa hna kuca hnene la Baselaia ka mama koi së, nge nemene fe la aqane hane sine së itre ej?
[Iatr ne la götran 93]
Ame fene la Baselaia i Akötresie, tro asë hi la itre atr a inine la thiina ka meköt