Troa Cile Kowe La Itre Jol

NEMENE LA ALIENE LA TROA CILE KOWE LA ITRE JOL?

Ame la atr ka atreine cile kowe la itre jol, tre, canga tro hi angeic a mejë hmaca thupene la ketre jol. Tro sa atreine cile kowe la itre jol, e hetre jol hne së hna melëne hë ekö. Tro la nekönatr a atreine tro, e hnei nyëne hna pane kei. Ketre tune mina fe, troa tro loi la mele i nyën, e hnei nyën hna qëmeke kowe la itre jol.

NYIPIEWEKË TROA ATREINE CILE KOWE LA ITRE JOL

Alanyimu la itre nekönatr ka hleuhleu, ngöne la nyudreni a triane la ketre itupath, maine cile kowe la itre jol, maine ngöne la kola haji nyudren. Ame pena itre xan, nyudren a nuetrij asë. Ngo, nyipiewekë tro nyudreni a trotrohnine ka hape:

• Ame asë hi la itre hnei nyudreni hna kuca, tha tro asë kö itre ej a eatr.—Iakobo 3:2.

• Tro asë hi nyudreni a cile kowe la itre jole ka tru.—Ate Cainöj 9:11.

• Tro nyudreni a atrein, e hetre ka hane qaja la itre tria i nyudren.—Ite Edomë 9:9.

Maine tro epun a inine la nekönatr troa cile kowe la itre jol, tro nyën a trotrohnine ka hape, ijiji nyëne hi, nge pëkö jol ka tru hnei nyën hna thatreine troa elë hun.

AQANE TROA ININE LA NEKÖNATR TROA CILE KOWE LA ITRE JOL

Tune kaa e hetre hnei nyën hna trian?

TREPENE MEKÖT: “Troa a [7] la o kei la ate ka meköt, me mejë hmaca ; ngo tro pe la ite ka menu a thixöte hnene la ngazo.”—Ite Edomë 24:16.

Xatuane jë la nekönatr troa thele ka hape, ka tru maine ka co la jol. Tune kaa e triane pë hë nyëne la itupath ngöne la hna ini? Maine jë, tro nyën a nuetrij la ini, me hape: “Ka gufa la itre ewekë hneng hna kuca!”

Maine epuni a ajane tro nyën a atreine cile kowe lai jol, xatua nyëne jë troa wang la nyine tro nyën a kuca, e traqa ju ketre itupath elany. Tro nyën e cili a thel troa cile kowe lai jol, hune la troa mekun lapane la akötre i nyën.

Ketre, the thele kö troa nyinyine la jol ka ej thei nyën. Xatua nyëne jë pe troa ketre sipu thele la aqane troa cile kowe lai jol. Maine jë, tro epuni a qaja ka hape, “Nemene la nyine tro eö a kuca matre troa trotrohnine hnyawa la ini cili?”

Tune kaa e hetre ewekë ka ngazo ka traqa?

TREPENE MEKÖT: “Thatre pe nyipunie la ka troa traqa koi nyipunie elany.”—Iakobo 4:14.

Thatre kö së la itre ewekë ka troa traqa elany. Ijije hi tro la atr ka trenamo enehila, a pë ewekë elany. Nge, ame la atr ka egöcatr enehila, tro fe angeic a wezipo elany. Öni Tusi Hmitrötr, “Tha traqa pa la maloe ca, nge tha hune la ate cat . . . [ke] ame la ijine memine la ewekë ka xulu, te, kola traqa koi angat’ asë.”—Ate Cainöj 9:11.

Nyipici laka, itre keme me thin, epuni a kuca asë la hnei epuni hna atreine matre troa thupëne la nekönatr qa ngöne la itre ewekë ka ngazo. Ngo, tha ijiji epuni kö troa thupë nyën qa ngöne la itre ewekë ka ngazo asë, ka troa traqa ngöne la mele i nyën.

Eje hi laka, tha melëne pala kö nyën la itre ejolene troa pë huliwa, maine pë mani. Ngo, ijiji epuni hi troa xatua nyën ngöne la itre jol ka traqa koi nyën, tune la kola trotriji nyën hnene la ketre enehmu, maine meci la ketre atrene la hnepe lapa.a

Tune kaa e kola haji nyën?

TREPENE MEKÖT: “Dengeju la hna eamo . . . mate inamacan’ eö ngöne la pun.”—Ite Edomë 19:20.

Ame la kola hajine la nekö i epun hnene la ketre, tha kolo kö a akötrë nyën, ngo göi tro pe nyën a saze la thiina i nyën ka ngazo.

Ame la epuni a inine la nekönatr troa kapa la ihaji, tro kö epon a kepe thangan. Öni John, ketre kem ka hape, “Maine easë pala hi a nyi xölene la nekö së, pëkö ini hnei nyën hna troa kapa. Tro pala hi nyëne lai a kötrene la itre jol, nge easë pë hë la ka troa nyinyin. Troa hleuhleu la mele ne la keme me thin, memine fe la nekönatr.”

Nemene la aqane tro epuni a xatuane la nekönatr troa kapa la ihaji? Ame la kola haji nyën ngöne la hna ini, maine ngöne la itre xaa götran, the canga mekune kö ka hape, “Tha hnëqa i angatre kö troa hajine la neköng!” Ngo, qaja jë pe koi nyën ka hape:

• “Hnauëne laka, kola ameköti eö?”

• “Nemene la nyine tro eö a kuca matre tha tro hmaca kö a ameköti eö?”

• “Nemene la nyine tro eö a kuca, e traqa hmaca ju koi eö la jol cili?”

The thëthëhmine kö laka, ame la kola amekötine la nekönatr, tre, nyine loi lai koi nyën enehila, me elany, e tru hë nyën.