INI 4
Troa Eatrëne La Itre Hnëqa
NEMENE LA ALIENE LA TROA EATRËNE LA ITRE HNËQA?
Ame la atr ka eatrëne hnyawa la itre hnëqa hna athipe koi angeic, tre, ketre atr hna mejiune kow. Maine tro sa sipo angeic troa kuca la ketre ewekë, easa mejiune laka, tro angeic a kuca, ngöne la ijine hna sa.
Ijije hi kowe la nekönatr troa eatrëne la itre hnëqa, ngacama co petre kö nyën. Önine la ketre itus (Parenting Without Borders), “Ame ngöne la nekönatr a 15 lao treu, nyën a kuca la hna upi nyën hnei keme me thin. Nge, ame la nyën a 18 lao treu, nyën a kuca asë la hna kuca hnei keme me thin. Ame ngöne la itre xaa nöj, itre keme me thin a nyiqaane amamane kowe la itre nekönatr ka 5 koi 7 lao macatre, la aqane tro nyudreni a ixatua ngöne la hnalapa. Ngacama co petre kö nyudren, ngo nyudreni a kuca hnyawa la itre jol hna hamëne koi nyudren.”
NYIPIEWEKË TROA EATRËNE LA ITRE HNËQA
Ame ngöne la itre xaa nöj, nyimutre la itre thupëtresij me itre föe hmae ka xomi hnalapa, ngo thupene lai, angatr hmaca a bëeke koi keme me thin. Alanyimu thei angatr la itre ka bëeke hmaca, ke, tha hna ini angatre kö la aqane troa huliwane hnyawane la mani, maine nyihnyawa hnalapa, maine eatrëne la itre hnëqa.
Celë hi matre, nyipiewekë troa inine la nekönatr troa eatrëne la itre hnëqa enehila, matre tro nyën a atre la nyine tro nyën a kuca elany, e tru hë. Önine la ketre itus (How to Raise an Adult ), “Tha aja i epuni kö troa 18 lao macatre i nyudren, nge nyudreni pala hi a fedre koi epun. Nge, ame hë e thupen, epuni a upi nyudreni troa ketre mele caas.”
AQANE TROA ININE LA NEKÖNATR TROA EATRËNE LA ITRE HNËQA
Thue jole i nyëne jë ngöne la hnalapa.
TREPENE MEKÖT: “Hete thangane ngöne la nöjei huliwa asë.”—Ite Edomë 14:23.
Ame la nekönatr ka co, aja i nyën troa xatuane la keme me thin ngöne la itre huliwa hnei nyidroti hna kuca. Haawe, loi e tro epon a hamë jole koi nyën, ngöne la hnalapa.
Alanyimu la itre keme me thin ka cil troa thue jolene la nekönatr. Ame koi angatr, tru pala ha la itre qa i nyën qa ngöne la hna ini, matre tha tro kö a ahacenyi nyën.
Ngo, kola mama laka, ame la itre nekönatr ka kuci jol ngöne hnalapa, ke, itre ka lai he ngöne la hna ini. Hnene la itre keme me thin hna canga ini nyudreni troa nyiqaane me afenesine la huliwa hna athip koi nyudren. Hanawang la hna qaja hnene la ketre itus (Parenting Without Borders), “maine easa sawa la nekönatr ka ajan troa ixatua, tro nyëne lai a mekun ka hape, tha nyipiewekë kö troa xatua itre xan . . . Ketre, tro hë nyën a mekun ka hape, itre xan la ka troa kuca la huliwa i nyën.”
Maine tro sa majemine upe la nekönatr troa kuci jol ngöne la hnalapa, tro nyën a inine la aqane troa xatuane la itre xan, ngo tha tro kö a sipu meku nyëne kö. Ame la kola thue jol kowe la nekönatr, öhne hi nyën ka hape, ka tru nyën ngöne la fami, nge nyipiewekë tro nyën a eatrëne hnyawa la itre hnëqa hna athip.
Xatuane jë la nekönatr troa trotrohnine ka hape, tro nyën a xeni pun la itre huliwa i nyën.
TREPENE MEKÖT: “Dengeju la hna eamo, nge kapaju la hna inin, mate inamacan’ eö ngöne la pun.”—Ite Edomë 19:20.
Ame la nekönatr a akaqane la ifekë ewekën, the juetrëne kö la hnei nyën hna kuca. Ijiji nyëne hi troa ketre qëmeke kowe la itre huliwa i nyën. Upi nyëne jë troa qeje menu, nge nyihnane jë la ewekë ka kaqa.
Loi e tro la nekönatr a trotrohnine ka hape, e tro nyën a huliwa menu, tro hë nyën a xeni pun. Celë hi ka xatua nyën matre . . .
troa nyipici me qaja amamane la itre tria i nyën
tha tro kö a iupe zö
tha tro kö a thele kepin
troa qeje menu