KOLA TRO NGAZO LA FEN

2 | Thupëne Kö La Itre Ewekë i Epun

ENYIPIEWEKËN

Nyimutre la itre atr ka isine matre tro kö a hetre nyine xen e nöjei drai. Ngo kolo jë pe jole catre jë, hnene la itre ewekë ka traqa kowe la fen. Pine nemen?

Ame ngöne la itre nöj gaa jol, kola elë la thupene xen, me uma.
Tro fe a tru hnei atr ka pë huliwa, nge co hi la mani hna kapa e pune treu.
Tro la itre hulö a angazone la itre magazë, me itre uma, me itre xaa ewekë ju kö. Nge ame la pun, ke tru hnei atr ka mel ngöne la pë.

Nyine Troa Atre

Maine tro sa huliwane hnyawane la mani, atreine hi së cile kowe la itre jol.
Tha ka lapa huti kö la mani. Canga tro hi a patr la itre hne së hna kapa e pune treu, maine mani hne së hna amë acon, maine itre ewekë së.
Thatreine kö la mani itöne la nyipi mel, me madrin e hnine la fami.

Nyine Troa Kuca Enehila

Öni Tusi Hmitrötr: “E hetrenyi hë së la xen me iheetr, haawe, mejihnine ju.”—1 Timoteo 6:8.

Ame la atr ka mejihnin, tha ka itö menu kö angeic, ngo angeic pe a madrin la hnei angeic hna hetreny. Ka nyipiewekë lai, e co hi la manie së.

Ame la ka loi, ke tro epuni a saze la aqane mele i epun. E tro epuni a itö menu, troa traqa la itre jol koi epun.

NEMENE LA NYINE TRO SA KUCA?—Itre Ixatua

Ame ngöne la itre jol, trongëne jë la itre eamo celë matre troa thupëne la itre ewekë i epun

THA TRO KÖ A ITÖ MENU

Troa hetre budget

The canga sesë kö troa itö ewekë maine iheetr. Pane isa hnyinge jë ka hape: ‘Ka loi kö tro ni a itö loto? Ijije kö tro ni a nango tra feja e celë hnalapa?’
Qëmekene troa itöne la ketre ewekë, isa hnyinge jë ka hape: ‘Ka nyipiewekë kö tro ni a itön la ewekë cili? Hetre manienge kö troa itöne lai?’
Sipo ixatua jë thei mus maine thene la ketre organizasio.

“Hnene la faming hna pane ce wang la aqane mele hun. Matre tha eahuni hmaca kö a aluzi mani ngöne la itre nyine iamadrinë ka tru thupen. Ketre, eahuni a itöne la itre xen ka co thupen.”—Gift.

TROA HETRE BUDGET

Tha tro kö a itö menu

Öni Tusi Hmitrötr: “Ame la ite mekune ne la ate cate huliwa, te, kola atena mon ; nge ite mekune ne la ate sasaqe kola apë ewekën.” (Ite Edomë 21:5) Tro la budget a xatua epun matre tha tro kö la mani hnei epuni hna huliwan a sasaith la mani hnei epuni hna kapa.

Pane makëne jë la manie hnei epuni hna kapa e nöjei treu.
Thupene lai, makëne jë la etrune la manie hnei epuni hna huliwan göi xen, maine tirisite, maine itre xaa ewekë ju kö.
Goeëne jë la manie hnei epuni hna hetrenyi memine la mani hnei epuni hna huliwan, nge e sasaithe hë la hnei epuni hna hetreny, tuluthe ju hi la aqane itö.

“Ame e nöjei treu, eni me föeng a makëne la mani hnei nyio hna kapa memine la mani hnei nyio hna huliwan. Hnei nyio hna ami mani acony, matre troa cil kowe la itre jol elany, maine göi troa itöne la ketre ewekë. Celë hi matre, tha hnehengazo kö nyio, ke atre hi nyio la aqane tro nyio a huliwane la manie i nyio.”—Carlos.

THA TRO KÖ A XOMI GUFA / TRO PE A AMI MANI ACONY

Tha tro kö a xomi gufa / tro pe a ami mani acon

Thele jë troa acone la itre gufa i epun. Maine ijij, the xomi gufa kö. Thele jë pe troa nango ami mani acony, matre troa itön la hnei epuni hna ajan.
Loi e tro epuni a ami mani acony e nöjei treu matre tro palahi epuni a hetre mani, e traqa ju la itre jol.

TROA CATRE HULIWA / THE NUETRIJE KÖ LA HULIWA

Öni Tusi Hmitrötr: “Hete thangane ngöne la nöjei huliwa asë.”—Ite Edomë 14:23.

Troa catre huliwa / the nuetrije kö la huliwa

Loi e tro palahi epuni a wangatrune la huliwa i epun. Ngacama tha celë kö huliwa hnei epuni hna ajan, ngo ame pe, hna nyithupen.
Loi e tro epuni a metrötrëne la hawa, me huliwa nyipici. Celë hi ka troa ukune la maseta matre tro palahi epuni a huliwa koi nyidrë, maine pena troa canga öhnyi huliwa hmaca.

“Eni a xome la itre huliwa hna hamëne koi ni, ngacama tha huliwa kö hnenge hna ajan, nge tha hna nyithupene hnyawane kö. Eni a isine troa kuca hnyawane la huliwa, kösë eni a huliwa koi ni.”—Dmitriy.

Maine epuni a thele huliwa . . .

The lapa kö. Hëne jë la itre entreprise hnei epun hna pi huliwa ngön, ngacama tha angatre kö a thele atr troa huliwa. Qaja jë kowe la itre sinee me itre fami epun laka, epuni a thele huliwa.
Loi e tro epuni a kapa la huliwa hnei epuni hna öhn. Ke, tha tro jë kö epuni lai a öhne la ketre huliwa ka ihmeku hnyawa memine la hnei epuni hna ajan.