KOLA TRO NGAZO LA FEN

3 | Troa Cas Memine La Itre Atr Hne Së Hna Hnim

ENYIPIEWEKËN

Hnene la itre jol ka traqa kowe la fen, matre tru la xou thene la itre atr, nge angatr a thel troa lapa cas.

Itre atr a ananyine la itre sinee i angatr.
Itre trefën a iwesitrë lapa.
Tha nyipiewekëne hë keme me thin la akötre ne la itre neköi angatr.

Nyine Troa Atre

Ka nyipiewekë kowe la mele së troa hetre sinee ngöne la itre ijine jol.
Ijije hi tro la aqane trongene la fen a thë la cas ne la fami.
Ijije hi tro la itre ithuemacany hna qaja hnene la itre journaliste a axouenyi la itre neköi epun.

Nyine Troa Kuca Enehila

Öni Tusi Hmitrötr: “Ketre sinee a ihnim ngöne la nöjei ijin asë, nge ketre trejin angeic ngöne la itre ijine akötr.”—Ite Edomë 17:17, MN.

Mekune jë la ketre atr ka xatua epun, me hamë ithuecatr. Maine tro epuni a mekune la atre cili ka hnimi epun, tro lai a xatua epun troa elë hun la itre jol ka troa traqa ngöne la drai.

NEMENE LA NYINE TRO SA KUCA?—Itre Ixatua

Ame ngöne la itre jol, trongëne jë la itre eamo celë matre tro palahi epuni a cas memine la itre atr hnei epuni hna hnim

TROA ACATRENE LA FAIPOIPO

Troa acatrene la faipoipo

Öni Tusi Hmitrötr: “Loi la ala lue hune la ala cas . . . Maine kei la kete qâne la kete troa ea la sine i angeic.” (Ate Cainöj 4:9, 10) Loi e tro la lue trefën a ce huliwa tune la pilote me copilote ne avio. Ngo tha tro pi kö nyidro a ihmönyinyi.

The elëhni kö kowe la föi epun, e epuni a hnehengazone la ketre jol. Ngo loi e tro epuni a atreine xomihni me itrotrohni.
Ame ngöne la wiik, ithanatane jë memine la föi epun la itre jol ka traqa. Thele jë troa nyinyine la jol, ngo tha tro kö a upezö ketre.
Xomi ijine jë troa ce madrin.
Mekune hmaca jë la itre ewekë ka amadrinë epon ekö. Troa goeëne la itre foto ne faipoipo i epon, maine itre xaa ewekë hnei epon hna ce kuca ekö.

“Hetre ijin, tha tro kö la lue trefën a ca mekun, ngo tha kolo kö lai a hape, tha ijiji nyidro kö troa ce huliwa. Tro nyidro a ce axecië mekun, me ce huliwa matre eatr la mekuna i nyidro.”—David.

TROA HNIM LA ITRE SINEE

Troa hnim la itre sinee

The tro hmekuje kö epuni a kapa la ixatua qaathene la itre sinee, ngo loi e tro fe epuni a hamë ixatua. Ame la epuni a xatua itre xan, hetre thangane fe lai koi epun.
Hëne jë la itre xaa sinee i epun e nöjei drai, matre troa hnyingë pengöi angatr.
Hnyingëne jë kowe la itre sinee i epun la aqane kuca i angatr matre cil kowe la jol ka hane fe traqa koi epun.

“Ame la easa cil kowe la itre jol, itre sinee la ka xatua së troa cile catr. Tro angatr a nango ameköti së, me amekunë së la itre hne së hna inin. Itre sinee a meku së, nge atre hi angatr laka, easë fe a meku angatr.”—Nicole.

TROA CAS ME ITRE NEKÖNATR

Troa cas me itre nekönatr

Öni Tusi Hmitrötr: “Troa saqe dreng, me hmitre ithanata.” (Iakobo 1:19) Ame lo xötrei, tro la itre nekönatr a xou troa qaja la mekuna i nyudren, ngo e tro epuni a drei nyudreni hnyawa, tro ha hmaloi koi nyudren troa fe la itre hni nyudren.

Loi e tro epuni a thel matre tro la itre neköi epun a pi ithanata. Ame la itre xaa nekönatr, ka hmaloi kö koi nyudren troa fe la itre hni nyudren ngöne la kola ti loto maine tro pena, hune la troa ithanata iqëmekekeu koi keme me thin.
The nue pi kö la itre neköi epun troa goeë tele lapa.
Qaja jë kowe la itre neköi epun la hnei epuni hna hnëkëne matre troa thupëne la fami epun.
Qaja lapane jë kowe la itre neköi epun la nyine troa kuca e traqa ju la ketre jol.

“Ithanata jë kowe la itre neköi epun, nge nue angatre jë fe troa hane ithanata. Maine jë, angatr a xou, maine hnehengazo, maine wesitr pena. Qaja jë koi nyudren laka, hna hane fe traqa koi epun la itre mekune cili, nge hane hi la aqane kuca i epun matre elë hune la itre mekune cili.”—Bethany.