Ketre Pengöne Xen

HAPE nemene jë cahu hna hlem hnene la itre atr? Kösë lo itre wene kiona. Kola troa ceitun me wene lepany, ngo ka wië pe, nge ka hmelele catr. Ngo ame pe thaa wene lepanyi kö; ketre ewekë pe nyine xen.

Thaa caa treu pala kö, qa ngöne lo kola lö pi hnei angetre Isaraela qaa Aigupito. Angatr e ngöne la hnapapa. Pine laka, thaa tru menu kö hnei xen, angatr a eetr, me hape: ‘Nga loi kö ekö tro Iehova a nue së troa meci e Aigupito. Hetrenyi asë hi e cili la nöjei pengöne xen hne së hna ajan.’

Qa ngöne lai, Iehova a qaja ka hape: ‘Tro ni a hamën koi nyipunie la xen kösë mani a trotro qaa hnengodrai.’ Nge celë hi hnei Iehova lai hna kuca. Ame hë elany, kola öhn hnei angetre Isaraela lai ewekë ka wië ka mala qaa hnengödrai, ame hnei angatr hna isa hnying ka hape: ‘Nemene ewekë la?’

Kola qaja hnei Mose, ka hape: ‘Celë hi xen hna hamë nyipunie hnei Iehova.’ Ame hna ati ëjen hnene la nöj la xeni cili, ka hape, MANA. Ceitune la ehnyapane ej me gato hna ce kuca me hani.

Kola qaja hnei Mose ka hape: ‘Isa hleme jë la ka ijije koi nyipunie isa ala caas troa xen.’ Ame ngöne la nöjei hmakany, kola isa hlem hnei angetre Isaraela thenge la etrun hnei angatr hna ajan. Nge ame hë la kola ciciny la jö, kola hmu la itre mana ka lapa pe.

Kola qaja fe hnei Mose ka hape: ‘Thaa tro kö ketre a ami kemej koi elany.’ Ngo thaa hna drei Mose kö hnei itre xan. Matre nemene hë la pune lai? Kola si wanak me pui ngazo lo lai itre mana hna ami kemejin!

Caasi hi la drai ngöne la wiik, hna amekötin kowe la nöj troa hleme atrun la mana, ene laka, troa alue hune lo hna majemine o drai. Hnaasikisine drai hmekuje hi. Hnei Iehova hna upi angatr troa ami kemej kowe lai drai thupen, pine laka, thaa Nyidrëti kö a troa amalan la mana ngöne la hnaasevenene drai. Celë hi matre, loi e troa thatraqan la hnaasevenene drai. Pëkö wanak ka xuje ej, nge ketre thaa pui hmëz pi kö! Celë hi ketre iamamanyikeu lai!

Ame lo nöjei ijin kola trongën la hnapapa hnei angetre Isaraela, Iehova pala hi a ithua i angatr hnei mana.