Joxu Tixenuë Ka Lolo Ekö e Isaraela

EITR petre hi lao macatre i Iosea, nge kola acili angeic troa joxu ne lo lue tribu ne götrane ailojë ne Isaraela. Nekönatr petre kö nyidrë ngöne la kola acili nyidrë troa joxu. Celë hi la kepin matre, hna pane xatua nyidrë hnene la itre thupëtresij ka tru troa musinën la nöj.

Sevene hë lao macatre ne joxu Iosea, nge nyidrë a nyiqaane thele Iehova. Nyidrë a xötrethenge la tulu ne la itre joxu ka lolo, tui Davita, me Iehosafata, me Hezekia. Thöthi petre kö Iosea, nge nyidrëti a kuca jë la ketre ewekë ka tru.

Qea ha la hnei angetre Isaraela hna kuca la itre ewekë ka ngazo catr. Angatr a hmi kowe la itre haze ka thoi. Angatr a thili kowe la itre idrola. Celë hi matre, Iosea a tro memine la itre atre i angeic, me nyiqaan troa lepe apaatren la hmi ka thoi ngöne la nöj. Thaa fene huliwa kö lai, pine laka, ala nyimu catr la itre atr ka hmi kowe la itre haze ka thoi. Nyipunieti a öhnyi Iosea memine la itre atre i nyidrë, hane cahu kola thë la itre idrola.

Thupene lai, kola upe hnei Iosea la köni thupëtresij, matre troa nyihnyawane hmaca la ēnē i Iehova. Hna ithingë manie hnene la nöj me hamën kowe la itre atr cili, matre troa nyi jia thatraqane la itre ejolen la huliwa. Ame ngöne la angatr a huliwa hnine la ēnē, ene pe kola öhne hnei Hilekia, atre huuj ka sisitria, la ketre ewekë ka nyipi ewekë catr. Celë hi itus ne la trenge wathebo hnei Iehova hna upi Mose ekö troa cinyihan. Ekö hë paatr la itusi cili.

Hna tro fë koi Iosea la itusi cili, nge hnei nyidrë hna sipon matre troa e ej koi nyidrë. Drengë hë Iosea me wanga atrehmekune laka, thaa hna trongëne kö hnene la nöj la trenge wathebo i Iehova. Ene pe tru la hace i nyidrë, matre nyidrëti a zezene trije pi la iheetre i nyidrë, hane hi cahu kola amaman ngöne la iatr. Öni nyidrë ka hape: ‘Atraqatr la elëhni i Iehova koi së, pine laka, thaa hna trongëne kö hnene la itre keme së la itre trenge wathebo, hna cinyihan koi së hnine la itusi celë.’

Ame hnei Iosea hna upi Hilekia atre huuj ka sisitria, troa atre la hnei Iehova hna troa kuca koi angatr. Hilekia a tro jë kowe la perofeta föe, Huleda la ëjen, me hnyingë nyiidro la ewekë cili. Nyidroti a hamën la maca nyine troa tro fë koi Iosea, me hape: ‘Tro ha nyithupene koi Ierusalema memin la itre atren la ngazo i angatr, pine laka, hnei angatr hna hmi kowe la itre haze ka thoi, nge tiqa ha la nöj hnene la itre ewekë ka ngazo. Ngo qa ngöne laka, hnei eö Iosea hna kuca la ewekë ka meköt, thaa tro kö a traqa la hlehleu cili ngöne la ijine mele eö.’